Read Awing Lomanə 6 Bible Online

Lomanə 6 - Awing bible

Lomanə 6

¹Təmbɔʼ pɛn pə́ ńtíʼ ə́sóŋ lə́ ńgə́ akə̂? Təmbɔʼ pɛn ghɛn nə́ mbiə á mə́ tə́ nə́ ghɛlə̂ təpɔŋ ńjî ńgə́ apɔŋə́ntə́əmə Əsê á peg?

²Ngá! təmbɔʼ pɛnə̂ ándó pɛn kwû nə́ áwɛ̂n ńté anuə mə ghɛd nə́ təpɔŋ, pɛn pɨ ńtíʼ ńchîə á mə́m təpɔŋ yi wɨ́ lə́ ə́lɛ́?

³Nə́ kě jî ńgə́ pɛn pətsəm pɛn nə́ ńkwá nə́ nkǐ nə́ əlɛ́n Yeso, Pə́ nə́ ńkə́ ńkyeetə̂ áwɛ̂n po á nəkaʼ pɛn kə́ ńkwá nkǐə á mə́m nəwû əyǐ?

⁴Pə́ kə kə́ ńtwə́ŋə áwɛ̂n po ńdaŋ nə́ akwáalə́nkǐə á mə́m nəwû ńjî ńgə́ tsɔʼə ndzaŋə ándó Klisto á nə́ ńjúmnə nə́ nəwû ńdaŋə̂ á mə́m nəgháʼ Tǎ, əghâ tsə̌ pɛn yǒ ńkə́ ńjî nchîmbî yi fîə.

⁵Təmbɔʼ pɛ̌npo pə́ táʼ á mə́m nəwû əyǐ, tə ḿbə́ pɛ̌npo yǒ kə́ pə́ táʼə mə́ júmnə nə́ nəwû ándó yə́.

⁶Pɛn jî ńgə́ na mbɨ əzɛn yi ndɛn zə̂ pə́ kə́ kwumtə̂ zɨ́d pópə Yeso, ńjî ńgə́ pə́ tsəŋkə̂ mətɨ mə́ təpɔŋ á mə́m na mbɨ, ńjî ńgə́ mbɔʼ pɛn kɔ pɛ́d ḿbə́ əpoʼə á mbô təpɔŋə.

⁷Ńté ńgə́ ŋwu ntsəm páʼ a kwû nə́ əyí, a chwáalə mə́m təpɔŋə.

⁸Lə́ mbɔʼ pɛn nə́ ńkwû pɛn pə́ Yeso, a pə́ ńgə́ pɛn pí ńgə́ pɛn yǒ kə́ chî pɛn pô.

⁹Lə́ pɛn jî ńgə́ pə́ kə́ júmkə Klisto á nəwû páʼ a kě nə́ láʼ pɨ kwû ngǎ yitsə̌ pô: nəwûə á láʼ kě pɨ túg mətəənə á ndu yí pô.

¹⁰Nəwû páʼ a kə kwû nə́ áwɨ́d lə́ a kə kwû táʼ ngǎ mɔʼə́ nə́ təpɔŋə[8], nchîmbî á túg nə́ ázɨ́d əghâ nə́ ə́ tíʼ ńchî lə́ á mbô Əsê.

¹¹Lə́ pə́ ńgə́ pɨ yǐ kə́ shib lɔg mbɨ əzɨ ńgə́ zɨ́d kwûə yí nə́ təpɔŋə, ḿbɨ ńchîə á mbî ńté Əsê ńdaŋ nə́ Yeso Klisto.

¹²Kɔ təpɔŋə á pɨ ńtúg mətəənə á ndu na mbɨ páʼ ə́ yǐ nə́ kwûə, ńtíʼə ńgɛlə̂ pɨ zóʼnə pə́ anu mbɨ əzɨ ə́ sóŋ nə́.

¹³Kɨ kɔ pɨ shib ə́fɛ̂ alamə́ mbəəmə azɨ́ yətsə́ á mbô təpɔŋə, pə́ lɔg ńgɛd əfanə mənu ə́wə́. Á tíʼ ńgə́ á pə́ pə́ ə́lɨ́d pɨ fɛ̂ məmbɨ mə́ənə́ á mbô Əsê ándó pɨ páʼ pó fɛ́d nə́ á mə́m nəwû ńtíʼ ńchî á mbîə, ńtíʼ ə́fɛ̂ mbɨ əzɨ ntsəmə á mbô Əsê, pə́ lɔg ə́faʼ mənu mə́ tɨ́ nə́ ndə̌ŋdəŋ ə́wə́.

¹⁴Kɔ təpɔŋə á túg mətəənə á ndu gho, ńté ńgə́ lə́ kě noŋkə túg ńtúg mətəənə á ndu gho pô, lə́ túgə apɔŋə́ntə́əmə Əsê.

¹⁵Pɛn yǐ tíʼ sóŋ ńgə́ akə̂? Pɛn tə́ ńgɛlə̂ təpɔŋ ńté ńgə́ lə́ kě noŋkə túg ńtúgə áwɛ̂n, lə́ túg apɔŋə́ntɨ́? Təmbɔʼ á kě ə́lɨ́d chî pô!

¹⁶Nə́ kě jî ńgə́ təmbɔʼ pɨ fɛ̂ məmbɨ mə́ənə́ á mbô ŋwu tsə̌ ándó əpoʼ páʼ ə́ zóʼnə nə́, pɨ pə́ lə́ əpoʼə á mbô ŋwu pɨ̈ zóʼnə nə́ lə́, kɨ pɨ pə́ əpoʼ á mbô təpɔŋ páʼ ä yǐ nə́ nə́ nəwû kɨ əpoʼə á mbô mə zóʼnə nə́ páʼ mə̈ yǐ nə́ nə́ mətɨ nə́ ndə̌ŋdəŋə́?

¹⁷Lə́ ndǎ á mbô Əsê ńgə́ ndɛd yitsə̌ ə́ nə́ ńchî əwɨ́ páʼ gho nə ḿbə́ nə́ apoʼə á mbô təpɔŋə, gho pɛn ńdzóʼnə á ndə̌ŋdəŋ páʼ á chî nə́ á mə́m ndzéʼkə gho kə kwá nə́ lə́ nə́ ntɨ́ əgho ətsəmə.

¹⁸Pə́ kə fógə áwə́ənə́ á mə́m təpɔŋ, pɨ tíʼ əpoʼə á mbô mə tɨ́ nə́ ndə̌ŋdəŋə́.

¹⁹Mäŋ tséebə lə́ atsáb təmbɔʼ atûə azə́ənə́ tsɔ́ʼnə əwɨ́ ńté ńgə́ ajíənuə azə́ənə́ á kəmkə̂. Á nə́ ḿbə́ ndɛd yitsə̌ nə́ fɛ̂ mbɨ əzɨ ntsəmə ándó əpoʼə á mbô ndɔtí mənu, mbɨ ḿbə́ nə́ təpɔŋ tə jwitə̂, pə́ lɔgə̂ ńgɛlə̂ mənu mə́ təkoʼ ə́wə́. Nə́ yǐ kə́ shib fɛ̂ mbɨ əzɨ ntsəm əghâ nə́ ándó əpoʼə á mbô mə tɨ́ nə́ ndə̌ŋdəŋ pə́ ghɛd mbɨ əzɨ ŋwaʼə̂.

²⁰Á nə ḿbə́ ndɛlə́ ándó pɨ nə ḿbə́ nə́ əpoʼə á mbô təpɔŋ lə́, pɨ nə ńkě lə́ əpoʼə á mbô mə tɨ́ nə́ ndə̌ŋdəŋ pô.

²¹Ape páʼ pɨ nə́ ńjî nə́ á mə́ ghɛd nə́ mənu pɨ túg nə́ əsɨ́ wə́ əghâ nə́ lə́ akə̂? Ndwegtə ndɛn mənu wə́ lə́ nəwû.

²²Lə́, əghâ nə́ ándó páʼ pɨ fɛ́d nə́ á mə́m təpɔŋ ńtíʼ əpoʼ Əsê lə́, ape azɨ́ lə́ nchîmbî əzɨ páʼ nə́ fɛ̂ nə́ á mbô Əsê tsɔʼə ntsəmə, ndwegtə ə́ pə́ nchîntɨ páʼ ə́ mɛdnə̂ nə́ ngǎ mɔʼə́.

²³Ńté ńgə́ ńtsɔ́ʼə afaʼ təpɔŋ lə́ nəwûə, lə́ mə fɛ̂ nə́ mə́ Əsê mimə tə ndɛn lə́ nchîntɨ páʼ ə́ mɛdnə̂ nə́ ngǎ mɔʼə́ ńdaŋ nə́ Mmaʼmbî əwɛ̂n Yeso Klisto.