Read Awing Lomanə 7 Bible Online

Lomanə 7 - Awing bible

Lomanə 7

¹Pəlimə́ mə, maŋ kwaŋ ńgə́ nə́ chígə́ ńjîə anu páʼ maŋ chî nə́ á mə́ sóŋ nə́, ńté ńgə́ pɨ pətsəm jîə anu ńté noŋkə. Noŋkə á yǐ waamə̂ ŋwu lə́ tsɔʼə əghâ páʼ a pɛ́d nə́ mbîə.

²Lə́ pə́ ńgə́ noŋkə á sóŋ ńgə́ məngyě a zɔ́ʼ nə́ a chî pó ndú əyǐ əghâ páʼ ndú əyǐə á pɛ́d nə́ mbîə, lə́ təmbɔʼ ndú əyǐə a kwûə yí, noŋkə á kě məngyě yi wɨ́ pɨ ńgwam ńté ndú əyǐ pô.

³Lə́ pə́ ńgə́ pə́ yǐ fóŋə yí nə́ ńjî mə̂ghabə páʼ təmbɔʼ a ghɛn ńdzɔ́ʼə ŋwu ndaʼ ándó ndú əyǐə a pɛ́d nə́ mbîə. Lə́ təmbɔʼ ndú əyǐ a kwûə yí, noŋkə á kě yí pɨ ńgwam pô, a kə́ ḿbɨ ńdzɔ́ʼə yə́ á pə́ ŋwu ndaʼ noŋkə á kě yí wam pô.

⁴Pəlimə́ mə, lə́ ndzaŋ páʼ á chî nə́ á mə́ chî nə́ á mə́m pəənə́. Pɨ kwúkə nə́ noŋkə ńté ńgə́ pɨ lə́ táʼə á mə́m mbɨ Klisto; əghâ nə́ nə́ chî lə́ á mbô yí páʼ a nə ńjúmnə nə́ nəwû ńjî ńgə́ pɛn yǐ ńdzə́m mənteemə́ á mbô Əsê.

⁵Ńté ńgə́ əghâ pɛn nə́ ńchî nə́ á mbîə á mə́m na mbɨ lə́, mənu mə́ təpɔŋ pɛn kə faʼ nə́ páʼ na mbɨ əzɛ̂n ə́ lɔ nə́ ńgə́ pɛn faʼ, mənu noŋkə̈ kə lɔ nə́, mə́ chîə afaʼə á mbɨ pɛnə̂. Mənu mətsəm pɛ̈n kə faʼ nə́ mə́ kə lwigtə̂ lə́ tsɔʼə nə́ nəwûə.

⁶Lə́, əghâ nə́ noŋkə á kě áwɛ̂n pɨ ńtə́ ńgwaamə̂ pô, ńté ńgə́ pɛn kə kwû nə́ yi páʼ a kə lɔʼkə̂ nə́ áwɛ̂nə ándó ngaŋə́tsáŋ lə́. Pɛn kě pɛ́lə ə́faʼə̂ ńdzoŋə̂ á ndɛn noŋkə wə́ páʼ pə́ nə́ ŋ́ŋwaʼlə̂ nə́ lə́ pô, lə́ pɛn tíʼə faʼə̂ ńdzoŋə̂ lə́ noŋkə yi fîə á mə́mə Ajwiə.

⁷Pɛn yǐ tíʼ sóŋ lə́ ńgə́ akə̂ əghâ nə́? Ńgə́ noŋkə lə́ təpɔŋə? Lə́ kě ə́lɨ́d pô! Lə́ nə́ ḿbə́ noŋkə páʼ á nə́ ńgɛd nə́ maŋ jîə ajú páʼ təpɔŋə á nə ḿbə́ nə́ zə́ələ́. Təmbɔʼ maŋ nə ńkě jîə anu páʼ á sóŋ nə́ ńgə́ kɔ ŋwéetə apeʼə ŋwu páʼ təmbɔʼ noŋkə á nə chî ə́sóŋ ńgə́, “Kɔ ŋwéetə apeʼə ŋwu tsə̌” pô.

⁸Lə́ təpɔŋə á lɔg əsa páʼ noŋkə á nə́ fɛ̂ nə́, ńgɛd maŋ túgə lwaʼə á mə́ náŋ nə́ ntê əpú ətsəmə. Təmbɔʼ noŋkə á chî ə́wɨ́ chî pô, təpɔŋə á kwûə.

⁹Maŋ nə́ nkɔ̌ʼmbəəmə mə maŋ nə́ ḿbɛ́dtə ńchîə á mbî páʼ noŋkə a nə ńkě nə́ ə́wɨ́ chî pô, Lə́ əghâ ándó noŋkə á nə ńgyǐ nə́, təpɔŋə á pəənə̂ á mbîə, maŋ tíʼ ńkwûə.

¹⁰Ntəgə́ zə́ páʼ ə́ nə ńdaʼnə̂ nə́ nchîmbî lə́ ə́ tíʼ ḿbə́ pə́ nəwûə á mbô maŋə.

¹¹Təpɔŋə á jɨ́ əsa əjǐ ńtíʼ ə́fɨgə̂ mə ńdaŋə̂ á mə́m noŋkə, ńkə́ ńté noŋkə təpɔŋə á jwítə mə.

¹²Lə́ á pə́ ńgə́ noŋkə á ŋwaʼə̂, məntəgə́ mə́ kə́ ŋwaʼə̂, ńtɨ́ ndə̌ŋdəŋ ńkə́ ḿbɔŋə̂.

¹³Lə́ á pə́ ńgə́ ajú páʼ á pɔŋ nə́ á yǐəə nə́ nəwûə á mbô maŋə? Təmbɔʼ á kě ə́lɨ́d pô! Lə́ nə ḿbə́ təpɔŋ páʼ á nə faʼ nə́ zə́ələ́; ńdaŋ nə́ ajú páʼ á pɔŋ nə́, təpɔŋə á yǐ nə́ nəwû á mbô maŋ ńjî ńgə́ chigə ajú páʼ a pə́ nə́ zə́ələ́, á pə́ nə́ təpɔŋ á fɛ́d nɨd mbɨ əjǐə. Ńjî ńgə́ ńdaŋə̂ á mə́m məntəgə́, təpɔŋə á tíʼ ńnɨd mbɨ əjǐ ndzaŋ páʼ təpɔŋə a pěʼ nə́ ḿbeg ńchîə.

¹⁴Pɛn jî ńgə́ noŋkə á túgə anu ńté lə́ ajwiə azɛ̂nə, lə́ maŋ pə́ ḿbə́ lə́ na mbɨ päʼ ə́ kwû nə́, pə́ fi nə́ ándó apoʼə á mbô təpɔŋə.

¹⁵Mənu mäŋ ghɛd nə́ atûə mə kě wɨ́ tsɔ́ʼnə pô, ńté ńgə́ mənu maŋ kɔŋ nə́ á mə́ ghɛd nə́, maŋ kě mɨ̈d ghɛlə̂ pô, mənu maŋ kě nə́ kɔŋ pô lə́ mɨ́d mäŋ ghɛd nə́.

¹⁶Lə́ təmbɔʼ maŋ faʼə̂ anu páʼ maŋ kě nə́ kɔŋə̂ á mə́ faʼ nə́ pô, maŋ pí ńgə́ noŋkə á pɔŋə̂.

¹⁷Lə́ pə́ ńgə́ lə́ kě maŋ páʼ maŋ ghɛd nə́ ndɛn mənu wɨ́d ghɛn pô, lə́ təpɔŋ páʼ wə́ələ́ á chî nə́ á mə́m maŋə.

¹⁸Maŋ jî ńgə́ anu yə əshîʼnə yətsə́ á kě á mə́m maŋ chî pô, lə́ pə́ ńgə́, á mə́m na mbəəmə mə. Ńté ńgə́ təmbɔʼ maŋ túgə akwaŋə anuə á mə́ faʼ nə́ anuə á koʼnə̂ nə́, lə́ ḿbə́ ńkě chîə mə́ faʼ nə́ pô.

¹⁹Ńté ńgə́ anu yi əshîʼnə páʼ maŋ kɔŋ nə́ á mə́ faʼ nə́ zɨ́d maŋ kě lə́ zɨ́d faʼə̂ pô. Maŋ pəənə̂ faʼə̂ á pə́ anuə təpɔŋ páʼ maŋ kě nə́ kɔŋə̂ á mə́ faʼ nə́ pô.

²⁰Təmbɔʼ maŋ faʼə̂ anu páʼ maŋ kě nə́ kɔŋə̂ á mə́ faʼ nə́ pô, lə́ pə́ ńgə́ lə́ kě maŋ pɛ́lə faʼə̂ anu yə wɨ́ pô, lə́ tíʼə faʼə̂ təpɔŋ páʼ wə́ələ́ á chî nə́ á mə́m maŋə.

²¹Ńdaŋ ə́lɨ́d maŋ jɨ́ ńgə́ noŋkə tə́ faʼə̂ á mə́m maŋ ńté ńgə́ əghâ páʼ maŋ tə́ nə́ ńdoonə̂ á mə́ ghɛd nə́ anuə á koʼnə̂ nə́ lə́, lə́ yǐəə tsɔʼə təpɔŋə á ntɨ́ maŋə.

²²Ńté ńgə́ maŋ kɔŋtə̂ á mə́m ntɨ́ maŋ á mə́ faʼ nə́ anu páʼ noŋkə Əsê a sóŋ nə́.

²³Lə́ maŋ pə̈ ńdzə́ənə pə́ noŋkə yi ndaʼə a mbɨ maŋə, noŋkə páʼ á póʼnə məlaʼ pó noŋkə páʼ ntə́əmə mə pí nə́ áwə́ələ́. Ńtíʼ ńdɔgə̂ mə ə́sɛlə̂ ngaŋətsáŋ ə́wə́ á mə́m noŋkə təpɔŋ páʼ wə́ələ́ ä faʼ nə́ á mə́m mbɨ maŋə.

²⁴Wə̌ə ngə́ʼə mee, maŋ tíʼ lɛ̌ zə́ənə́ ndzaŋ ŋwunə! Əwə a yǐ kwáalə mə á mə́m na mbɨ nəwû zəənə́?

²⁵Ndǎ á mbô Əsê ńdaŋ nə́ Mmaʼmbî əwɛ̂n Yeso Klisto. Lə́ pə́ ńgə́ á mə́m ntɨ́ maŋ, maŋ lə́ apoʼə á mə́m noŋkə Əsê, lə́ á mə́m na mbəəmə mə, maŋ pə́ ḿbə́ apoʼə á mbô noŋkə təpɔŋə.