Read Awing Lomanə 8 Bible Online

Lomanə 8 - Awing bible

Lomanə 8

¹A pə́ ńgə́ əghâ nə́, pɨ páʼ pó chî nə́ pópə Klisto Yeso, təmbɔʼ pó kě əsáʼ wǔ pô.

²Ńté ńgə́ noŋkə Ajwi páʼ ä fɛ̂ nə́ nchîmbîə á mbô pɨ páʼ pó chî nə́ á mə́m Klisto, á ghɛd maŋ chwáalə á mə́m noŋkə páʼ á yǐ nə́ nə́ təpɔŋ pó nəwûə.

³Anu páʼ təmbɔʼ noŋkə á kě faʼ pô, ńté ńgə́ na mbɨ ə́ pwɔ́d, Əsê ä faʼə̂. A kə túmə mɔ́ əyǐ a yǐ nə́ na mbɨ ə́ chî nə́ ándó yi ŋwu mbî páʼ ə́ túg nə́ təpɔŋ, a kə yǐ lə́ ándó afyaʼə́nu ńté təpɔŋ pɨ pə́ mbîə, ńjî ńgə́ a laŋ ə́lɨ́d ńgɛd təpɔŋ á chî nə́ mə́m na mbɨ á wǔ əsáʼə.

⁴Əsê a nə ńgɛd ə́lɨ́d lə́ ńjî ńgə́ mənu mə́ tɨ́ nə́ ndə̌ŋdəŋ páʼ Noŋkə ä lɔ nə́ mə́ yǐ ńchî tsɔʼə ndzaŋ páʼ mə́ pěʼ nə́ ńchîə á mə́ chî nə́ á mə́m pɛn páʼ pɛn zoŋ nə́ á pə́ anu páʼ Ajwiə a lɔ nə́, ńkě zoŋə̂ pə́ anu páʼ na mbɨ lɔ nə́ pô.

⁵Pɨ páʼ pó túg nə́ nchîmbî əzɔb ńdzoŋə̂ á pə́ anu na mbɨ ə́sóŋ nə́, pó tə́gə atûə azɔ́b lə́ nə́ mənu páʼ na mbɨ əzɔb ə́ sóŋ nə́. Lə́ pɨ páʼ pó túg nə́ nchîmbî əzɔb ńdzoŋə̂ á pə́ anuə ándó Ajwiə a sóŋ nə́, pó tə́gə atûə azɔ́b lə́ nə́ mənu páʼ Ajwiə á sóŋ nə́.

⁶Ndwegtə mə tə́g nə́ atû nə́ mənu páʼ na mbɨ ə́sóŋ nə́ lə́ nəwûə, lə́ ndwegtə mə tə́g nə́ atû nə́ mənu páʼ Ajwiə á sóŋ nə́ á pə́ nchîmbî pó mbwɔ́dnə.

⁷Ńdaŋ ə́lɨ́d ŋwu páʼ a tə́g nə́ atûə ají pə́ nə́ mənu páʼ na mbɨ ə́ sóŋ nə́, lə́ ngaŋkə́pa Əsê, ńté ńgə́ a kě noŋkə Əsê zoŋə̂ pô, lə́ ndə̌ŋdəŋə́, təmbɔʼ a kě zoŋ pô.

⁸Pɨ páʼ pó zoŋ nə́ pə́ mənu páʼ na mbɨ əzɔb sóŋ nə́, təmbɔʼ pó kě ghɛd ntɨ́ Əsê kɔŋtə̂ pô.

⁹Lə́ pɨ kě faʼə̂ lə́ anu páʼ na mbɨ ə́ sóŋ nə́ ńgə́ pɨ faʼ pô, nə́ faʼə̂ lə́ anu páʼ Ajwiə á sóŋ nə́ ńgə́ nə́ faʼə̂, lə́ təmbɔʼ a pə́ ndə̌ŋdəŋ ńgə́ Ajwǐəsê á chîə á mə́m pɨ, tə ḿbə́ ŋwu ntsəm páʼ a kě nə́ Ajwiə Klisto túg pô a kě lə́ ŋwu Klisto pô.

¹⁰Lə́ təmbɔʼ Klisto a chîə á mə́m pɨ, mbɨ əzɨ ə́ pǎtə ńkwû ńté təpɔŋ lə́, Ajwiə azə́ənə́ á chîə á mbî ńté ńgə́ Əsê a ghɛd pɨ tɨ́ ndə̌ŋdəŋə́.

¹¹Təmbɔʼ Ajwǐəsê páʼ a nə ńjúmkə nə́ Yeso a nəwû lə́ á chîə á mə́m pɨ, tə ḿbə́ yí páʼ a nə ńjúmkə nə́ Yeso á nəwû lə́ a yǐ fɛ̂ nchîmbî á mbô na mbɨ əzɨ ə̈ kwû nə́, ə́laŋ nə́ Ajwiə ají páʼ á chî nə́ á mə́m pəənə́.

¹²Pəlimə́ mə, lə́ pə́ ńgə́ pɛn lə́ əpoʼə, ḿbə́ ńkě lə́ á mbô na mbɨ pô, á mə́ ghɛd nə́ mənu páʼ na mbɨ əzɛ̂n ə́ lɔ nə́ ńgə́ pɛn ghɛd pô.

¹³Ńté ńgə́ təmbɔʼ pɨ chîə á mbî á mə́ faʼ nə́ pə́ anu páʼ na mbɨ əzɨ ə́ sóŋ nə́ ńgə́ nə́ faʼ, tə ḿbə́ pɨ yǐ kwúkə, lə́ ńdaŋ nə́ Ajwi, pɨ jwítə mənu mimə təpɔŋ mə́ chî nə́ a mbɨ pɨ, ńchîə á mbîə.

¹⁴Pɨ páʼə Ajwǐəsê ä nɨd nə́ ághɔ́b nə́ ndú lə́ pɔ́ pə́ Əsê.

¹⁵Ńté ńgə́ Ajwi páʼ Əsê a nə fɛ̂ nə́ nə́ pɨ lə́ a nə ńkě áwɨ́ lɔg ə́sɛd lə́ əpoʼ ə́wɨ́ pô, ńkě kə́ ńgɛd ńgə́ nə́ tíʼə̈ ḿbɔ́g əliʼ pô; Lə́ kə pə́ Ajwi páʼ a ghɛd nə́ pɨ tíʼ ḿbə́ pɔ́ pə́ Əsê, ńdaŋ nə́ mətɨ mə́ Ajwǐəsê pɛn kyéŋə á mbô Əsê ńgə́, “Aba! Tǎ Mə!”

¹⁶Ajwǐəsê nə́ nkɔ̌ʼmbɨ əyí pó azɛ̂nə Ajwi kyeetə̂ nə́ ə́sóŋ ńgə́ pɛn lə́ pɔ́ pə́ Əsê,

¹⁷Ndzaŋə ándó pɛn pə́ nə́ pɔ́ pí lə́, pɛn yǒ jîə afoʼ páʼ a lɔʼkə̂ nə́ nə́ pɨ píə, pɛ̌npə Klisto yǒ kə́ jîə ajú páʼ Əsê a lɔʼkə̂ nə́ á mbô yə́, ńté ńgə́ təmbɔʼ pɛn tə́ ńjɨ́ ngə́ʼ pɛ̌npə Klisto, pɛn yǐ ńkə́ ńchîə á mə́m nəgháʼ əyǐə.

¹⁸Maŋ kwaŋ ńgə́ ngə́ʼ páʼ pɛ̈n zɨ́ nə́ nə́ ndɛd zɨ təmbɔʼ pə́ láʼ ńkě fiʼkə̂ ázɨ́d nə́ nəgháʼ páʼ Əsê chî nə́ á mə́ nɨd nə́ á mbô pɛn pô.

¹⁹Ajúmə atsəm páʼ Əsê a tsoŋkə̂ nə́ a tə́ ńchígə́ ḿbyáabə ńgə́ Əsê a yǐ ńnɨd pɔ́ píə.

²⁰Əpú páʼ Əsê a nə ńtsoŋkə̂ nə́ ə́ nə́ ńchîə á mə́ sɛdnə̂ nə́ ə́ tíʼ pə́ ənukə́taŋə. Ńkě ə́ té ńgə́ pɨ́d nə ńdoonə̂ á mə́ chî nə́ ə́lɨ́d pô, ńté pə́ ńgə́ lə́ nə́ ńdɔ Əsê ńgə́ pɨ́d chî ə́lə́ələ́, ńgɛd ńgə́ pó chî nə́ akwaŋ ńtə́ ḿbyáabə.[9]

²¹Ńté ńgə́ əpú páʼ Əsê a tsoŋkə̂ nə́ ə́ láʼ pə́ alě yitsə̌ ə́ chwáalə á mə́m məngə́ʼ páʼ mə́ ghɛd nə́ pɨ́d kwûə ńkə́ ńdə̂, ńjî ńgə́ pɨ́d kə́ fɛ́lə atsáŋ nə́ nəgháʼ pɔ́ pə́ Əsê.

²²Pɛn jî ńgə́ əpú ətsəm páʼ Əsê a tsoŋkə̂ nə́, ə́ nə ńtə́ ńkyéŋə á mə́m ngə́ʼə ándó məngyě a zóʼə móonə, tə ńkɔ́ʼ ńkoʼ nə́ ndɛd zəənə́.

²³Lə́ kə kě tsɔʼə əpú páʼ Əsê a tsoŋkə̂ nə́ pô, pɛn nə́ nkɔ̌ʼmbɨ əwɛ̂n, pɛn páʼ pɛn túg nə́ ntsɛɛmbi məfɛ̂nə mə́ Ajwi, pɛn kə̈ ńkyéŋə á mə́m məntɨ́ mɛ́n ńtíʼə ńjwə́ʼtə ńgə́ Əsê a yǐ ńdɔgə̂ áwɛ̂nə ándó pɔ́ píə, ńtíʼ ńtsóʼə atûə azɛ̂nə.

²⁴Ńté ńgə́ lə́ nə́ ḿbə́ á mə́mə akwaŋ zɨ ńtə́ ḿbyáabə pɛn kə chwád nə́. Nə́ əghâ nə́, akwaŋ ńtə́ ḿbyáabə páʼ pə̈ zɨ́ nə́, lə́ kě akwaŋ ńtə́ ḿbyáabə pô. Lə́ əwə á túg nə́ akwaŋ ńtə́ ḿbyáabə nə́ anu páʼ a tə́ nə́ ńdzə́ənə?

²⁵Lə́ təmbɔʼ pɛn túgə akwaŋ ńtə́ ḿbyáabə nə́ anu pɛn kě nə́ jɨ́ pô, pɛn yǐ ńgwam ntɨ́ ńtə́ ḿbyáabə.

²⁶Lə́ tsɔʼə ndzaŋ Ajwiə Əsê a yǐ nə́ kwáalə áwɛ̂n ńté ńgə́ pɛn póolə. Ńté ńgə́ pɛn kě jîə á mə́ tə́ nə́ chaʼtə́sê ndzaŋ pɛn chî nə́ mə́ chaʼtə̂ nə́ pô, lə́ Ajwǐəsê nə́ nkɔ̌ʼmbɨ əyə́ a nɛ́dkə ḿbóʼmbô á mbô Əsê á ngǎ pɛnə̂, nə́ ndú təmbɔʼ atséebə á ntsoolə á kě fiʼtə̂ pô.

²⁷Lə́ Əsê páʼ ä zɨ́ nə́ məntɨ́ mə́ ŋwu ntsəm, a jîə ajú páʼ Ajwiə á kwaŋ nə́, ńté ńgə́ Ajwiə a póʼmbô á mbô Əsê a ngǎ pɨ pə́ Əsê, ńdzoŋə̂ pə́ mənu páʼ Əsê ä lɔ nə́.

²⁸Pɛn jî ńgə́ á mə́m mənu mətsəm, Əsê a faʼə̂ lə́ əshîʼnə á mbô pɨ páʼ pó kɔŋ nə́ yə́. Pɨ páʼ a fóŋ nə́, ńté ńgə́ pó yǐ faʼə̂ anu páʼ a lɔ nə́.

²⁹Pɨ páʼ Əsê a pɛ́d nə́ tə ńtsɔ́ʼ ńgə́ pó yǐ ḿbə́ pɨ píə, a kə pɛ́dtə ə́fógə ághɔ́b ńtə́g ńgə́ pó chîə ándó Mɔ́ əyǐə, ńjî ńgə́ Mɔ́ əyǐ a yǐ ńtíʼ ḿbə́ ntsɛɛmbi a tətɨ pɔ́pə́mɛ́ pipə nɨ́ nə́.

³⁰Ńdaŋ ə́lɨ́d Əsê a fóŋ pi páʼ a pɛ́d nə́ tə ntsɔ́ʼə; pɨ páʼ Əsê a pɛ́d nə́ tə ə́fóŋ lə́, a ghɛd pó pə́ pɨ páʼ pó tɨ́ nə́ ndə̌ŋdəŋə́, pɨ páʼ Əsê a ghɛd nə́ pó tɨ́ ndə̌ŋdəŋ lə́ a kə fɛ̂ nəgháʼ əyǐə á mbô pó.

³¹Nə́ mənu mɨ mətsəm pɛn yǐ tíʼ ə́sóŋ lə́ ńgə́ akə̂ lə̂? Təmbɔʼ Əsê a chî pɛn po, tə ḿbə́ mbɔʼ əwə á tsáb təpɔŋ ńté áwɛ̂nə?

³²Əsê a kě ndaʼ Mɔ́ əyǐ lɔʼkə̂ pô, ḿbə́ fɛ̂ yí ńgə́ a kwû ńté atûə azɛ̂n pətsəmə, a kě yǐ kə́ pɨ ə́fɛ̂ əpú ətsəmə á mbô pɛn kətaŋ, ə́ péenə mɔ́ wɨ́d wə̂?

³³Lə́ yǒ tə́m əwə ə́ tə́m əsóomə atû pɨ páʼ Əsê a tsɔ́ʼ nə́? Əsê nə́ nkɔ̌ʼmbɨ əyí a ghɛd nə́ pó tɨ́ ńkoʼnə̂!

³⁴Təmbɔʼ əwə ŋwunə a ghɛd pó wǔ əsáʼə? Ŋwu tsə̌ a kě ə́wɨ́ chî pô, tə ńdéʼtə Yeso Klisto, páʼ a nə ńkwû nə́, pə́ yǐ ńkə́ ḿbɨ ńjúmkə yə́ á nəwû a tíʼ ńnáanə á əlá apô Tǎ əyǐ yə təənə. Ä póʼmbô á mbô Əsê ńté áwɛ̂nə.

³⁵Lə́ əwə ŋwu təmbɔʼ á fógə áwɛ̂nə á mə́m akɔŋnə Yeso Klisto? Təmbɔʼ ngə́ʼ faʼ ə́lɨ́d? kɨ mənu mə́ záŋ nə́ áwɛ́n? Lə́ ndzaŋ páʼ pə́ tsaŋkə̂ nə́ áwɛ̂n? kɨ nji páʼ ə́ kwú nə́ á mə́mə aláʼə? kəənə apóŋə atsəʼ yə wê nə́? kɨ ndzaŋ pɛn chî nə́ á ntso nəwû lɛ? kɨ ndzaŋ pə́ tə́ nə́ ńdoonə̂ á mə́ jwítə áwɛ̂n nə́ ŋwíŋ ntso lɛ̌?

³⁶Ndzaŋə ándó pə́ ŋwaʼlə̂ nə́ á mə́mə aŋwaʼlə Əsê ńgə́, “Ńté atûə azô pə́ loonə̂ á mə́ jwítə áwə́g əlě ətsəm ətsəmə. Pə́ náŋə áwə́gə́ ándó məmbéŋ mə́ ndzɛd pə̈ ghɛn nə́ á mə́ wadtə̂ nə́.”

³⁷Ngá, á mə́m mənu mətsəm pəg maʼ ntso ńtsɛɛlə̂ ajúmə atsəm ńdaŋə̂ á ndzəm yí páʼ a kɔŋ nə́ áwɛ̂nə!

³⁸Ńté ńgə́ maŋ pyádnə ńjî ńgə́ ajûtsə́ a kě ə́wɨ́ chî təmbɔʼ á fógə áwɛ̂nə á mə́m akɔŋnə ají pô. Kɨ nəwû kɨ nchîmbî, kɨ pətseŋpə́ndɛ́pə́sê kɨ mətɨ mə́ ndzəmə́, kɨ əpú ə́ chî nə́ əghâ nə́ kɨ pí páʼ ə́ chî nə́ á mə́ yǒ nə́ yǐ kɨ mətɨ mətsəm;

³⁹kɨ əpú páʼ ə́ chî nə́ atǐə á nəpó, kɨ pi páʼ ə́ chî nə́ á ndəsê, ajûtsə́ á kě ə́wɨ́ chîə á mə́m əpú ətsəm páʼ Əsê a tsoŋkə̂ nə́ páʼ təmbɔʼ a yǒ fógə áwɛ̂nə á mə́mə akɔŋnə Əsê pô, akɔŋnə Əsê páʼə á pə́ nə́ azɛ̂n ńdaŋə̂ á ndzəm Yeso Klisto páʼ a pə́ nə́ Mmaʼmbî əwɛ̂n.