Read Awing Lomanə 9 Bible Online

Lomanə 9 - Awing bible

Lomanə 9

¹Mäŋ tséebə lə́ ndə̌ŋdəŋ á mə́m Klisto, maŋ kě lə́ ntsɨd tsəələ̂ pô. Akwaŋə ntə́əmə mə á sáʼə mə á mə́mə Ajwǐəsê, ə́ fiʼtə̂ mə ńgə́ maŋ kě lə́ ntsɨd tsəələ̂ pô,

²ńgə́ maŋ túgə afɨnə yə nɨ́ nə́ á ntɨ́ maŋə, ntə́əmə mə ə́ tə́ ńjwaʼə̂ mə.

³Ńté ńgə́ maŋ pěʼ ńkɔŋ ńgə́ təmbɔʼ pə́ néŋ ndoonə atû maŋ ńtíʼ ə́fógə mə á mə́m Yeso ńté atûə pəlimə́ mə pó túg nə́ mbimə́ nə́ Yeso pópə yə ngwulə mə.

⁴Pó lə́ pɨ pə́ Islɛlə ḿbə́ pɨ páʼ Əsê a nə ńtsɔ́ʼnə, ńdɔgə̂ ághɔ́b nə́ pɔ́ pí ńkə̈ ńgeebə̂ á nəgháʼ əyǐə á mbô pó, a nə ńgwad əka pó po ńkə́ fɛ̂ noŋkə á mbô pó; pó jîə ndə̌ŋdəŋ ndú mbɔʼ pó ghóʼkə Əsê ə́wə́; pó kə́ ńkwá ndaʼnə páʼ Əsê a nə fɛ̂ nə́ á mbô pó.

⁵Pó nə́ fɛ́d lə́ nə́ tə́kɔʼ ngwud Pətǎ pə́ pətǎ pɛnə̂, Klisto ándó ŋwu mbî a kə́ fɛ́d lə́ á mə́m ngwud əzoobə́. Əsê páʼ a sáʼ nə́ ŋwu ntsəm, pə́ ŋáŋkə yí əghâ ətsəm tə ńgɛn ńkoʼə̂ ndwegtə. Amɛn.

⁶Maŋ kě sóŋ lə́ ńgə́ atséebə Əsê á laŋ kətaŋ pô. Ńté ńgə́ lə́ kě ŋwu ntsəm páʼ a nə fɛ́d nə́ Islɛlə páʼ a pə́ nə́ mɔ́ Əsê pô.

⁷Lə́ nə́ ńkě kə́ ḿbə́ pɔ́ pə́ pətsəm páʼ pó pə́ nə́ pɔ́ pə Ablaam ńté ńgə́ pó fɛ́d nə́ ngwud əjǐ pô, lə́ Əsê a tíʼ ə́sóŋə á mbô Ablaam ńgə́, “ńdaŋə̂ á ndzəm Azeg ngwud əzo yǒ túg əlɛ́nə.”[10]

⁸Lə́ pə́ ńgə́ lə́ kě pɔ́ páʼ pə́ pî nə́ á mə́m na mbɨ páʼ pə́ pə́ nə́ pɔ́ pə́ Əsê pô, pɔ́ pə́ Əsê lə́ pɔ́ páʼ pə́ pǐ nə́ ńdaŋ nə́ ndaʼnə Əsê.

⁹Lɛ̌ ndzaŋ páʼ ndaʼnə Əsê nə sóŋ nə́ ńgə́, “ndɛd zɨ yǒ koʼ lə́ maŋ pəənə̂, Sala a tíʼ ḿbîə á mɔ́ mbyâŋnə.”[11]

¹⁰Lə́ kě tsɔʼə zɨ pô; pɔ́ pə́ Ləbeka pə́ pɛ́n pɛ̌, pó nə ńtúg lə́ táʼ Tǎ a pə́ nə́ Tǎ pə tǎ əwɛn Azigə.

¹¹Pə́ nə ḿbɛ́d tsɔʼə tə pǐə ághɔ́b lə́, pó kě anu yətsə́ kə́ ńgɛd kɨ yə əshîʼnə kɨ yə təpɔŋ pô, á mə́ ghɛd nə́ á pə́ ndzaŋ Əsê a nə ńkwaŋ nə́ a mə́ tə́ nə́ tsɔ́ʼə pɨ pí lə́ pô. Əsê a tsɔ́ʼə pɨ pí ńkě té pə́ məfaʼ pô ḿbə́ ńté pə́ ndzaŋ páʼ ä fóŋ nə́ ághóobə́.

¹²Əsê a sóŋə á mbô Ləbeka ńgə́, “Ntsɛɛmbi a yǒ tə́ faʼə̂ á mbô ŋwu páʼ a zoŋ nə́ á ndzəmə.”

¹³Ndzaŋ páʼ aŋwaʼlə Əsê a sóŋ nə́ ńgə́, “Maŋ nə ńkɔŋə̂ a Jekɔb ḿbéenə Esau.”[12]

¹⁴Pɛn yǐ tíʼ ə́sóŋ lə́ ńgə́ akə̂ əghâ nə́? Ńgə́ Əsê ä kě lə́g əsáʼ ndə̌ŋdəŋə́? Təmbɔʼ pɛn kě ə́lɨ́d sóŋ pô!

¹⁵Ńté ńgə́ a nə sóŋə á mbô Mosisə ńgə́, “Maŋ yǐ kó mələ́ŋ mə́ pɨ páʼ maŋ kɔŋ nə́ á mə́ kó nə́ mələ́ŋ móobə́, ə́ kə́ fɨnə̂ ə́ té pɨ páʼ maŋ kɔŋ nə́ á mə́ fɨnə̂ nə́ ə́ té ághóobə́.”[13]

¹⁶Akóolə́mə́lə́ŋə Əsê á kě chî ńdzoŋə̂ lə́ ndzaŋ páʼ ŋwunə a kɔŋ nə́ kɨ faʼ pô, á chî ńdzoŋə̂ lə́ ndzaŋ Əsê a kó nə́ mələ́ŋə.

¹⁷Ńté ńgə́ aŋwaʼlə Əsê a nə ə́sóŋə á mbô Fɛlo ńgə́, “Maŋ nə ńgɛlə̂ a gho ándó əfo lə́ tsɔʼə nə́ táʼə anuə á mə́ nɨd nə́ mətəənə mə á mə́m gho, ńjî ńgə́ əlɛ́nə mə ə́ nyinə̂ á mə́m mbî ntsəmə.”[14]

¹⁸Ńdaŋ ə́lɨ́d Əsê a túgə akóolə́mə́lə́ŋə á mbô ŋwu ntsəm páʼ a lɔ nə́ mə́ túg nə́, ńkə́ fɛ̂ atyǎntətûə á mbô pɨ páʼ a lɔ nə́ mə́ fɛ̂ nə́ á mbô pó.

¹⁹Ŋwu wɨ́ yitsə̌ a yǐ tíʼ ə́sóŋə á mbô maŋ ńgə́, “Təmbɔʼ á pə́ ə́lɨ́d, Əsê a tíʼ filə̂ a ŋwu tsə̌ lə́ ə́lɛ́? Təmbɔʼ əwə a kǐə anu páʼ Əsê lɔ nə́?”

²⁰Ŋwu mbî, gho lə́ əwə á mə́ kwěe nə́ anuə á mbô Əsê? “Nəkəŋ nə́ atsaʼ nə́ kě chîə á mə́ pítə nə́ ŋwu páʼə a tsoŋkə̂ nə́ yí ńgə́, gho tsoŋkə̂ mə ndú ghɛn ńté akə̂?”[15]

²¹Ńdaŋ ə́lɨ́d, ŋwu páʼ a tsoŋkə̂ nə́ məkəŋ, a chîə á mə́ faʼ nə́ nə́ atsaʼə́ nəkəŋ ndzaŋ ntsəm páʼ a kɔŋ nə́, kəənə a loonə̂ pə́ mə́ tsoŋkə̂ nə́ məkəŋ mə́ mbɛ̌ nə́ táʼ mbə́ʼə atsaʼə́, əlɔʼkə̂ táʼ nə́ chigə alě anu ə́ tíʼ tə́ faʼə̂ nə́ táʼ əlě ətsəmə, lə́ jî yə́.

²²Á kə́ ńchî lə́ tsɔʼə ə́lɨ́d ndə̌ŋdəŋ nə́ mənuə ándó Əsë ghɛd nə́. A kə tə́ ńdoonə̂ mə́ nɨd nə́ azáŋə́ndé ají ə́ kə́ pɨ ghɛd pə́ jî mətɨ míə. Lə́ a kə pə́ ńtúgə awaamə́ntɨ́ ńté pəənə ándó pó ghɛd nə́ ndě əyí záŋə, pó lə́ pɨ páʼ Əsê a kə́ tɨ́ nə́ á mə́ jwítə nə́ ághóobə́.

²³A kə kə́ mbɨ ńdoonə̂ lə́ á mə́ nɨd nə́ tə́kɔʼ nəgháʼ əyǐ páʼ pə́ kə kwɛd nə́ mbɨ pɛn ándó ə́laŋ ə́lɨ́d ńnəələ̂ akóolə́mə́lə́ŋə ají nə́ pɛnə̂. Lə́ pɛnə̂ ándó páʼ a kə chwíʼtə nə́ áwɛ̂n ńgə́ pɛn yǒ kwáalə nəgháʼ əyǐ,

²⁴ńdzoŋ ḿbegə̂ áwɛ̂n páʼ a kə fóŋ nə́ áwɛ́n. A kə kě fóŋ lə́ tsɔʼə á mə́m Pəjusə pô a kə kə́ fóŋə á mə́m Pətəjǐsê.

²⁵Tsɔʼə ndzaŋə ándó á sóŋ nə́ á mə́mə aŋwaʼlə Osiya ńgə́, “Pɨ páʼ pó nə ńkě nə́ pəənə mə pô, maŋ yǐ fóŋə ághɔ́b nə́ pəənə mə; Atúmə ándó páʼ maŋ kə kě nə́ kɔŋ pô, maŋ yǐ fóŋə zɨ́d nə́ Nkɔŋə́ Mə”

²⁶Tsɔʼə á mə́mə aliʼ zɨ́d zə́ ándó pə́ kə sóŋ nə́ nə́ pó ńgə́, Pɨ lə́ kě pəənə mə pô, pó yǒ fóŋə ághóobə́ aliʼ yə wɨ́ ńgə́ pó lə́ pɔ́ pə́ Əsê ə́ chî nə́ mbîə.[16]

²⁷Izaya á kyéŋ ngye əjǐ kɔ́ʼə atǐ ńté pɨ pə́ Islɛlə, ə́sóŋə ńgə́, “Ndɛn pɔ́ pə́ Islɛlə kə pǎtə nɨ́ ńchîə ándó wáakə́ á nkaŋ nɨ́ lə́, lə́ pə́ ḿbə́ tsɔʼə ntaʼlə əghɔ́b ə́ yǒ nə́ chwáalə.

²⁸Ńté ńgə́ Mmaʼmbî á yǒ ghə́glə á mə́ lə́g nə́ əsáʼ əyə́ á mə́m mbî tə kě kwaʼ pô”

²⁹Lə́ tsɔʼə ndzaŋə ándó Izaya a kə sóŋ nə́ á ntsɛɛmbi ńgə́, “Mbɔʼ Mmaʼmbî páʼ a ŋáŋnə nə́ ńtsɛɛlə̂ ajúmə atsəmə á kə chîə apuʼə ngwulə azɛ̂n mɛdtə̂ pô, ḿbə́ pɛn pěʼ ńchîə ándó Sodom, mbɨ ńchîə ándó Gomolya.”[17]

³⁰Pɛn yǐ tíʼ sóŋ lə́ ńgə́ akə̂? ńgə́ Pətəjǐsê páʼ pó kə kě nə́ fǔəlóʼə á mə́ tɨ́ nə́ ndə̌ŋdəŋ á mə́m pó, pó tíʼ ntɨ́ ndə̌ŋdəŋ əghâ nə́ ńdaŋə̂ á mə́m mbimə́;

³¹Lə́ pɔ́ pə́ Islɛlə páʼ pó kə fǔ nə́ alóʼə á mə́ tɨ́ nə́ ndə̌ŋdəŋ ńdaŋə̂ á mə́m noŋkə pó kə kě chî tə mbɔʼ pó zoŋə̂ noŋkə wɨ́d wə́ pô.

³²Lə́ kə ghɛlə̂ akə̂ lə́ələ́? Ńté ńgə́ pó kə kě fǔəlóʼ ńdaŋə̂ á mə́m mbimə́ pô, ḿbə́ fǔəlóʼ ńdaŋə̂ á pə́ mə́m məfaʼə. Pó kə kɔntə̂ á ndu ngɔʼ ə̈ ghɛd nə́ pɨ pó kɔntə̂.

³³Tsɔʼə ndzaŋ pə́ ŋwaʼlə̂ nə́ á mə́mə aŋwaʼlə Əsê ńgə́, “Zə́ənə, maŋ yǐ noŋkə̂ ngɔʼə á Zayɔn páʼ zɨ́d yǐ nə́ ghɛd pɨ pó kɔntə̂, ngwúb páʼ wɨ́d yǐ nə́ ghɛd pó wǔəə. Ŋwu ntsəm páʼ a pí nə́ nə́ yə́, əsɨ́ láʼ kě yí kó pô.”