Read Awing 1 Kɔlintyanə 1 Bible Online

1 Kɔlintyanə 1 - Awing bible

1 Kɔlintyanə 1

¹Aŋwaʼlə zəənə́ á lǒo lə́ á mbô maŋ Pɔlə, páʼ Əsê a nə fóŋ nə́ mə ndzaŋ páʼ a nə ńdɔ nə́ ńgə́ maŋ pə́ táʼ ntú Yeso Klisto yitsə̌, ńkə́ ńdǒo á mbô ndim əwɛn Sɔstenesə.

²Aŋwaʼlə yi wə́ ä ghɛnə̂ lə́ á mbô nkyeetə pɔ́ pə́ Əsê ándó ə́ chî nə́ á Kɔlinə. Á kə́ ńgɛnə̂ lə́ á mbô pɔ́ pə́ Əsê ándó Əsê a fóŋ nə́ ághɔ́b ńkə́ ńgɛd ńgə́ pó pə́ táʼə á mə́m Yeso Klisto. Ḿbɨ́ ńkə́ ńgɛnə̂ lə́ á mbô apuʼə pɔ́ pə́ Əsê pətsəm pó chî nə́ aliʼə́ atsəmə páʼ pó ghóʼkə nə́ əlɛ́n Mmaʼmbî əwɛ̂n Yeso Klisto, páʼ a pə́ nə́ Mmaʼmbî əghɔb ńkə́ ḿbə́ əwɛ̂nə.

³Pəg chaʼtə́sê ńgə́, Əsê páʼ a pə́ nə́ Tǎ əwɛ̂n pó Mmaʼmbî Yeso Klisto ə́ fɛ̂ á wɨ́ nə́ apɔŋə́ntɨ́ pópə mbwɔ́dnə.

⁴Maŋ zá fɛ̂ ndǎ á mbô Əsê ńté áwɨ́, ńté lə́ pə́ apɔŋə́ntə́əmə Əsê páʼ pə́ nə ə́fɛ̂ nə́ á mbô pɨ ńdaŋə̂ á mə́m Yeso Klisto.

⁵Ndzaŋə ándó pɨ chî nə́ pɨ pə́ Yeso Klisto lə́, pə́ fɛ̂ afoʼə atsəmə á mbô pəənə́, ḿbá mbô atsáb ntsəm pópə ajíənuə atsəmə

⁶Ńté ńgə́ nkəənə ándó pəg nə náŋkə nə́ á mbô pɨ ńté Yeso Klisto lə́ ə́ nə ńkwúnə á mə́m pɨ əshîʼnə.

⁷Lə́ələ́ á pə́ ńgə́ nə́ kě póŋə ajûtsə́ páʼ Ajwiə ä fɛ̂ nə́ pô, ndzaŋə ándó pɨ tə́ nə́ ḿbyáb ndɛd páʼ Əsê a yǐ nə́ nəələ̂ áwɛ̂n nə́ Mmaʼmbî əwɛ̂n Yeso Klisto.

⁸A yǒ ghɛd pɨ tɨ́ ńtyantə̂ tə ńkoʼə̂ á ndwigtə mbîə, ńjî ńgə́ nə́ yǒ ńkě fid yitsə̌ á mə́m pɨ túg pô, tə koʼə̂ alě páʼ Mmaʼmbî əwɛ̂n Yeso Klisto a yǒ nə́ ńgyǐəə.

⁹Əsê páʼə a kě nə́ ntɨ́ əyí kwúblə pô lə́, lə́ fóŋ yí ə́fóŋə áwɛ̂n ńgə́ pɛ̌npə mɔ́ əyǐ Yeso Klisto ándó a pə́ nə́ Mmaʼmbî əwɛ̂nə ə́ chîə nəkaʼə́.

¹⁰Maŋ póʼ mbô á mbô pɨ pɔ́pə́mɛ́ mə nə́ əlɛ́n Mmaʼmbî əwɛ̂n Yeso Klisto ńgə́ pɨ pətsəm chî nə́ apímnə ńjî ńgə́ kɔ aghabtə á chîə tətɨ pəənə́. Nə́ kyeetə̂ ḿbə́ táʼ ŋwunə á mə́mə akwaŋə anuə azə́ənə́, ńkə́ ḿbə́ nə́ ndú nə́ náŋ nə́ mənu əwə.

¹¹Pɔ́pə́mɛ́ mə, mäŋ ə́sóŋə ə́lɨ́d lə́ ńté ńgə́ pɨ pətsə́ á mə́m ngwud kloe pó sóŋ nə́ maŋ ńgə́ azɔŋə á chîə tətɨ pəənə́.

¹²Anuə ándó mäŋ sóŋ nə́ lə́ ńgə́ ŋwu ntsəmə á mə́m pəənə́ a sóŋ ńgə́, “Maŋ lə́ ndzoŋdzəm Pɔlə, yitsə̌ ghə́ maŋ lə́ ndzoŋdzəm Apolosə, yitsə̌ pɨ ńgə́ maŋ lə́ ndzoŋdzəm Sifasə, yitsə̌ ghə́ maŋ zoŋə̂ mə lə́ Klisto.”

¹³Pə́ lə́ ńgabtə̂ Klisto? Pə́ nə́ ńkwumtə̂ Pɔlə ńté áwɨ́? Kɨ pɨ nə ńkwá nkǐ nə́ əlɛ́n Pɔlə?

¹⁴Maŋ fɛ̂ ndǎ á mbô Əsê ńté ńgə́ maŋ nə ńkě nkǐə á mbô ŋwu wɨ́ yitsə̌ fɛ̂ pô, tə ńdéʼtə Klipus pó Gayɔsə,

¹⁵ńjî ńgə́ kɔ ŋwu tsə̌ á mə́m pəənə́ á sóŋ ńgə́ yə́ nə ńkwá nkǐ nə́ əlɛ́nə mə.

¹⁶(Maŋ nə ńkə́ ə́fɛ̂ nkǐ nə́ ngwud Stefanasə, tə ńdéʼtə ə́lɨ́d maŋ kě pɨ ńkwúmtə ńgə́ maŋ nə ńdáʼ ə́fɛ̂ nkǐ nə́ ŋwu əwɨ yitsə̌ pô).

¹⁷Ńté ńgə́ Klisto a nə ńkě mə tú lə́ ńgə́ maŋ yǐ ńtə́ ə́fɛ̂ nkǐ pô, a nə ńtúmə mə lə́ ńgə́ maŋ yǐ ńnáŋkə nkɨ yi əshîʼnə á mbô pəənə́. Ńkě náŋkə lə́ nə atsáb páʼə á túg nə́ ayáŋə ŋwu mbî pô, ńté ńgə́ mbɔʼ á náŋkə nə́ atsáb páʼə a túg nə́ ayáŋə ŋwu mbî, mətɨ mə́ chî nə́ nə́ nəwû Yeso atǐə apagləpaglə mə́ laŋ kətaŋə.

¹⁸Atsáb ńté nəwû Yeso atǐə apagləpaglə lə́ akəkógə́ anuə á mbô pɨ pö péŋ nə́, lə́ ḿbə́ ńgɛn nə́ pɛnə̂ ándó pə́ chwádkə nə́ lə́, lə́ mətɨ mə́ Əsê.

¹⁹Ńté ńgə́ aŋwaʼlə Əsê á sóŋ ńgə́, “Maŋ yǐ tsəŋkə̂ ayáŋə ŋwunə ándó a yáŋ nə́, ə́sɛdkə̂ ajíənuə ngaŋə́ŋwaʼlə a pə́ ənukə́taŋə.”

²⁰Ndzaŋə á pə́ nə́ lɛ lə́, ŋwu páʼ a yáŋ nə́, a ə́fó? Njîə aŋwaʼlə yi wə́ a pə́ ə́fó? ŋwunə ándó a chigə nə́ ńjîə á mə́ kəʼlə̂ nə́ mənuə á ndu mbîə nə́ a pə́ ə́fó? Əsê a tíʼ ńgɛd ayáŋə á ndu mbî zəənə́ á sɛdnə̂ ńtíʼ ḿbə́ akəkógə́.

²¹Ńté ńgə́ Əsê nə ńgɛd nə́ nə́ ayáŋə ají nə́ ndú ńgə́ pɨ pə́ kě chîə mə́ lɔg nə́ lə́ ayáŋə ndu mbî zɨ ə́ jîə yí wɨ́ pô. Əsê a tíʼ ńtsɔ́ʼə á mə́ chwádkə nə́ pɨ pó pí nə́ ndzoŋ nkɨ əyí ghɛn páʼ mbî lɔg nə́ ándó akəkógə́ lə́.

²²Pəjus pó náŋə lə́ əkyeʼmə́nuə, Pəglik pó pə́ ńnáŋə lə́ ayáŋə.

²³Lə́ nə́ pəg, pəg náŋkə lə́ nkɨ ndzaŋ Yeso a nə ńkwû nə́ atǐə apagləpaglə, nkɨ páʼ ə̈ ghɛd nə́ Pəjus pö záŋə məndě, Pətəjǐsê pó kə́ ńdɔg nkɨ yi wɨ́ ńgə́ lə́ akəkógə́ atséebə.

²⁴Lə́ ḿbə́ ńgɛn nə́ pɨ páʼ Əsê fóŋ nə́ ághɔ́b kɨ pó pə́ pə́ Pəjus kɨ Pəglik, pó jî ńgə́ Yeso lə́ mətɨ mə́ Əsê ńkə́ ḿbə́ ayáŋə Əsê.

²⁵Ńté ńgə́ akəkógə́ anuə á mbô Əsê, á tsɛɛlə̂ ayáŋə ŋwu mbîə, ajúmə ándó pɛn zɨ́ nə́ ńgə́ á pwɔ́dkə á mbô Əsê, á tyantə̂ ńtsɛ mətɨ mə́ ŋwu mbîə.

²⁶Pəlimə́ mə, nə́ pə əghâ nə́, kwúmtə nə́ ndzaŋ pɨ nə ńchî nə́, záʼ Əsê a pɔŋə̂ ə́fóŋə áwə́ənə́. Ndzoŋ ndzaŋ ŋwu mbîə a kwaŋ nə́, pɨ pipə nɨ́ nə́ á mə́m pɨ, pɨ kə kě əjî túg pô, ńkě mətɨ kə́ ńtúg pô, ńkě kə́ ḿbə́ pətə́kɔʼ pə́ pəənə́ á mə́mə aláʼ pô.

²⁷Lə́ Əsê a pə́ ńtsɔ́ʼə ajúmə ándó mbî zɨ sóŋ nə́ ńgə́ lə́ akəkógə́ ajú á mə́ néŋ nə́ əsə́ənə atû pɨ pə́ yáŋ nə́, ńkə́ ḿbɨ ńkə́ ńtsɔ́ʼə ajú páʼ mbî zɨ ə́ sóŋ nə́ ńgə́ á pwɔ́dkə á mə́ néŋ nə́ əsə́ənə á atû ngaŋmə́təənə.

²⁸A tsɔ́ʼ əpú páʼ mbî wág nə́ ńkəŋkə̂ ə́sóŋ ńgə́ lə́ ənukə́taŋ, ńjî ńgə́ a laŋ ə́lɨ́d ńtsəŋkə̂ əpú páʼ mbî kwaŋ nə́ ńgə́ ə́ chîə atûə anu yətsə̌.

²⁹Zəənə́ á nəələ̂ lə́ ńgə́ mbɔʼ ŋwunə a kě mbɨ əjǐə á mbi Əsê kɔ́ʼkə pô.

³⁰Lə́ ghɛd Əsê ńgə́ pɛn pə́ táʼə á mə́m Yeso Klisto, lə́ kə́ ńgɛd tsɔʼə yí ńgə́ Yeso a pə́ ayáŋə azɛ̂nə, ńdaŋə̂ a ndzəm yí pɛn tɨ́ ndə̌ŋdəŋə́ á mbi Əsê, ńtíʼ ḿbə́ pɨ pə́ Əsê pipə ŋwaʼ nə́, Əsê a chwádkə nə́ áwɛ̂nə á mə́m təpɔŋə.

³¹Lə́ tsɔʼə ndzaŋə ándó aŋwaʼlə Əsê á sóŋ nə́ ńgə́, “Ŋwu ntsəm páʼ a tə́ nə́ ńdoonə̂ á mə́ kɔ́ʼkə nə́ mbɨ əjǐ, a kɔ́ʼkə mbɨ əjǐ ńté pə́ Mmaʼmbîə.”