Read Awing 1 Kɔlintyanə 10 Bible Online

1 Kɔlintyanə 10 - Awing bible

1 Kɔlintyanə 10

¹Pəlimə́ mə, maŋ loonə̂ ńgə́ nə́ kwúmtə anu páʼ á nə ńdaŋ nə́ nə́ pətǎ pə́ pətǎ pɛn əghâ pó nə ńdzoŋ nə́ Mosisə lə́. Pó nə́ nyinə̂ lə́ á nətɛ́n nə́ alə́mə, lə́ ŋwu ntsəmə a nə ńkə́ ńtúmə Paŋ Nɨ́ əshîʼnə.

²Á mə́mə alə́m pópə nɨ́ pó pətsəm nə ńkwá nkǐə ándó ngaŋə́zoŋə́ndzəm Mosisə.

³Pó pətsəm nə ńjîə táʼ ntê məjî mə́ ajwiə.

⁴Pó pətsəm kə́ ńnô táʼ ntê nkǐə ajwiə. Pó nə nô məloʼ mə́ ajwi páʼ mə́ fɛ́d nə́ á mə́m ngwúbə ajwi wə́ ə́ kə zoŋ nə́ ághɔ́b lə́, ngwúb yi ə́wɨ́ ə́ nə́ ḿbə́ lə́ Klisto.

⁵Á nə́ ḿbǎtə ḿbə́ ə́lɨ́d lə́, ndě Əsê ə́ nə ńkě nə́ pó pipə nɨ́ nə́ ŋwáʼ pô, lə́ nə ńgɛd ə́lɨ́d pó tíʼ ə́shamnə̂ ńkwúkə á kɔŋ məŋkwâʼlə̌.

⁶Əghâ nə́, mənu mɨ mətsəm lə́ akwantə á mbô pɛn, ńgə́ kɔ pɛn tə́ ńdoonə̂ mə́ ghɛd nə́ mənu mə́ təpɔŋ pó nə̈ ńgɛd nə́ lə́.

⁷Kɔ nə tə́ ńgóʼkə məsê mə́ məfɨgə ndzaŋ pó pətsə́ nə ńgóʼkə nə́ lə́. Ndzaŋə ándó aŋwaʼlə Əsê a sóŋ nə́ ńgə́, “Pɨ pipə wɨ́ pó nə náanə á ndəsê á mə́ jî nə́ ə́ kə́ nô, ńtíʼ ńdǒ á ndəsê ḿbɛ́nə.”

⁸Kɔ pɛn fɛ̂ mbɨ əzɛn nə́ ndzɔʼə́ mbǒʼḿbóʼə́ ándó pó pətsə́ nə̈ faʼ nə lə́, ńdaŋ ə́lɨ́d pó tɔsə məghə́m mɛ́n mə́ mbɛ̌ nə́ tɔsə teelə́ ə́ tíʼ ńkwúkə táʼə alě.

⁹Kɔ pɛn jwə́ʼ Əsê ándó pó pətsə́ nə ńjwə́ʼ nə́ yí mənó mə́ tíʼ ńjwítə ághɔ́b lə́.

¹⁰Kɔ nə́ ŋwuntə̂ ándó pó pətsə́ nə́ ŋwuntə̂ nə́ Əsê a túmə á Ntseŋ Ndɛ̂ Nəwûə a yǐ ńjwítə ághóobə́.

¹¹Ndɛn mənu ghɛn nə ńdɔgə̂ aliʼə́ á mə́m pó lə́ á mə́ pə́ nə́ akwantə á mbô pətsə́ pəənə. Pə́ tíʼ ŋ́ŋwaʼlə̂ mə́ələ́ á mə́ lɔg nə́ tə́gtə áwɛ̂n ə́wɨ́ ńté ńgə́ pɛn chîə á mbî lə́ nə́ ndɛd páʼ ndwegtə tə́ nə́ ḿbáatə.

¹²Lə́ələ́ á pə́ ńgə́ mbɔʼ ŋwu tsə̌ a kwaŋ ńgə́ a tɨ́, a lɔg ndɛlə́, tə ḿbə́ a yǐ wǔəə.

¹³Akwaʼlə yətsə́ a kě á mbô pɨ kə́ yǐəə tə ghə́ á nə ḿbɛ́d tə ńgyǐəə á mbô ŋwu pô. Əsê a pə̈ ńdɔʼkə̂ ndaʼnə əjǐə, a yǐ kě mɛdtə̂ akwaʼlə a yǐəə á mbô pɨ páʼ á tsɛ nə́ mətɨ mɨ́ pô, lə́ mbɔʼ akwaʼlə á yǐəə á mbô pɨ Əsê a kə́ ə́fɛ̂ ndúmə á mə́ fɛ́d nə́ á mə́m ə́wə́, ńkə́ ə́fɛ̂ mətəənə á mbô pəənə́ á mə́ wam nə́ ntə́əmə á mə́m ə́wə́.

¹⁴Lə́ələ́ á pə́ ńgə́, pəlimə́ mə páʼ maŋ kɔŋ nə́, lə́ʼ nə́ áwə́ənə́ á mə́ ghóʼkə nə́ məsê mə́ məfɨgə.

¹⁵Maŋ tséebə á mbô pɨ lə́ ándó pɨ pó jî nə́ ənuə; lɔg nə́ ndɛd ńkwaŋə anu páʼ maŋ sóŋ nə́ lə́ əshîʼnə.

¹⁶Ndɔ́ŋ páʼ ə́ fɛ̂ nə́ mbwɔ́dnə páʼ pɛn nô nə́ ńdáʼkə Əsê: mbɔʼ pɛn nô ájɨ́d ə́ kě lə́ áwɛ̂n á mə́m achǐə Klisto tsɛntə̂? Apéenə məkálə́ páʼ pɛn kə́ nə́ ḿbagə̂ ázɨ́d, tə mbɔʼ pɛn kɔ́lə ázɨ́d, á kě áwɛ̂n á mə́m mbɨ Yeso Klisto tsɛntə̂?

¹⁷ndzaŋə apá zə̂ á pə́ nə́ tsɔʼə táʼ mbə́ʼ lə́, pɛn pǎtə nɨ́ lə́ ḿbə́ ḿbə́ táʼə á mə́m na mbəəmə, ńté ńgə́ pɛn tsɛntə̂ lə́ táʼ mbə́ʼə apéenə məkálə́.

¹⁸Kwaŋ nə́ pɨ pə́ Islɛl, pɨ páʼ pó jî nə́ əpúmə afyaʼə́nu, pó tsɛntə̂ ḿbə́ lə́ táʼ ŋwunə á mə́mə afyaʼə́nu pó ghɛd nə́ zə́ələ́ á nəpéenə á mbô Əsê.

¹⁹Maŋ sóŋ ə́lɛ́ ńjî ńgə́ maŋ tíʼ sóŋ lə́ ńgə́ akə̂? ńgə́ Əsê məfɨgə kɨ məjî páʼ pə́ fɛ̂ nə́ mə́ələ́ á mbô məsê mə́ məfɨgə, lə́ ajûtsə́?

²⁰Ngá! anu maŋ lɔ nə́ á mə́ sóŋ nə́ lə́ ńgə́, Ajú pətəjǐsê pó lɔg nə́ ə́fyaʼə́nu ə́wɨ́, pó fɛ̂ lə́ á mbô pɛ̌sê, pó kě lə́ á mbô Əsê fɛ̂ pô. Maŋ tíʼ ńkě kɔŋ ńgə́ nə́ túgə anu yitsə̌ pɨ̌pə pɛ̌sê pô.

²¹Təmbɔʼ nə kě ndɔ́ŋ Mmaʼmbî nô ńkə́ ḿbɨ ńnô yi pɛ̌sê pô. Təmbɔʼ nə́ kě məjîə á ndumə atə́gtə məjîə Mmaʼmbî jî ńkə́ ḿbɨ ńjîə mimə́ chî nə́ á ndumə atə́gtə məjîə pɛ̌sê pô.

²²Pɛn loonə̂ á mə́ twáb nə́ ndě Mmaʼmbîə a túgə ŋwéetə́? Pɛn kwaŋ ńgə́ pɛn tyantə̂ ńtsɛɛlə̂ yí?

²³Noŋkə á sóŋ ńgə́ mbɔʼ pɛn faʼə̂ anuə atsəmə, lə́ anuə atsəmə á pə́ ńkě á mbô pɛn pɔŋ pô. Noŋkə á sóŋ ńgə́ mbɔʼ pɛn faʼə̂ anuə atsəmə lə́ pə́ ńkě anuə atsəm páʼ á kwá nə́ áwɛ̂n ńgə́ pɛn kwéŋə á mə́mə ajwi pô.

²⁴Kɔ ŋwunə a tə́ ńnáŋə ńgə́ a pɔŋ yə́, a náŋə pə́ ńgə́ a pɔŋ pɨ pipə́ ndaʼə.

²⁵Jî nə́ ajúmə atsəm páʼ pə́ fi nə́ á məta tsɔʼə tə pítə anu yətsə́ ńjî ńgə́ kɔ məntɨ́ mɨ́ mə́ tə́ ńjwaʼə̂ áwə́ənə́.

²⁶Ńté ńgə́, “Ndu ndəsê lə́ yi Mmaʼmbî pópə ajúmə atsəm páʼ á chî nə́ á mə́m ə́wə́.”[5]

²⁷Mbɔʼ ŋwu páʼ a kě nə́ nə́ Yeso pí pô a wúnə áwɨ́ ńgə́ nə́ yǐ ńjî məjî á ndɛ̂ yí, nə́ ghɛn əwɨ́, nə́ jîə ajúmə atsəm pə́ tə́g nə́ mbi pɨ tsɔʼə tə pítə anu yətsə́ ńjî ńgə́ kɔ məntɨ́ mɨ́ mə́ tə́ ńjwaʼə̂ áwə́ənə́.

²⁸Lə́ mbɔʼ ŋwu tsə̌ a pə́ ə́sóŋə á mbô pɨ ńgə́, “Lɛ̌ əpú pə́ pěʼ nə́ ə́fyaʼ məsê ə́wə́,” kɔ nə́ jîə áwə́ənə́, ńté atûə ŋwu páʼ a pěʼ nə́ fiʼtə̂ áwɨ́ lə́, ńkə́ ńté akwaŋə ntə́əmə.

²⁹Maŋ kě ə́sóŋə lə́ azə́ənə́ akwaŋə ntə́əmə á yǐ nə́ jwaʼə̂ áwɨ́ pô, maŋ ə́sóŋə lə́ yə ŋwu páʼ a fiʼtə̂ nə́ lə́. Kɔ nə́ jîə áwə́ənə́. Ŋwu tsə̌ a yǐ tə́ ə́sóŋə ńgə́, “Akə̂ á yǐ ghɛd ńgə́ kɔ maŋ ghɛlə̂ anuə atsəm ndzaŋ maŋ kɔŋ nə́ ńté pə́ ńgə́ təmbɔʼ á jwaʼ ntɨ́ ŋwu tsə̌?

³⁰Təmbɔʼ maŋ láʼkə Əsê nə́ məjîə mə, lə́ ghɛlə̂ akə̂ ŋwu tsə̌ a tíʼə ə́sóŋə ńgə́ maŋ kě əshîʼnə ghɛlə̂ á mə́ jî nə́ məjî páʼ maŋ láʼkə nə́ Əsê wə̂?”

³¹Lə́ələ́ pə́ ńgə́ kɨ gho jî məjî kɨ nô məloʼ kəənə anu atsəmə páʼ gho ghɛd nə́, ghɛlə̂ zə́ələ́ pə́ á mə́ fɛ̂ nə́ nəgháʼə á mbô Əsê.

³²Chî nə́ nə́ ndú páʼ təmbɔʼ wɨ́d kě ngə́ʼə á mbô Pəjus kɨ pətəjǐsê kəənə á mbô nkyeetə pɔ́ pə́ Yeso Klisto fɛ̂ pô.

³³Lə́, faʼ tsɔʼə ndzaŋ páʼ mäŋ faʼ nə́, maŋ lɔ ndú ətsəmə á mə́ ghɛd nə́ mbɨ ŋwu ntsəm ə́ pɔŋə̂ á mə́mə anuə atsəm páʼ mäŋ ghɛd nə́, ńkě tə́ ńkwaŋə̂ a pə́ ńgə́ ape anuə a pə́ azá pô, ńkwaŋə̂ pə́ ńgə́ ape anuə a pə́ yə ŋwu ntsəmə. Ńjî ńgə́ mbɔʼ pó ghɛd ńchwáalə.