Read Awing 1 Kɔlintyanə 11 Bible Online

1 Kɔlintyanə 11 - Awing bible

1 Kɔlintyanə 11

¹Nə́ tə́ fiʼnə̂ mənu mäŋ ghɛd nə́ ndzaŋ páʼ maŋ kə́ nə́ ńtə̈ fiʼnə̂ mənu páʼ Klisto a ghɛd nə́.

²Mäŋ ŋáŋkə áwɨ́ ńté ńgə́ nə́ zá ńkwúmtə mə, ńkə́ ńdzoŋə̂ mənu mətsəm tsɔʼə ndzaŋ mäŋ zéʼkə nə́ áwɨ́ ə́wɨ́ lə́.

³Maŋ loonə̂ ńgə́ nə́ lánə ńjî əshîʼnə ńgə́ Klisto lə́ nətû nə́ mbyâŋnə ətsəmə, ŋwu mbyâŋnə a kə́ ḿbə́ nətûə á mbô ngwě əyǐə. Əsê a kə́ ḿbə́ nətûə á mbô Klisto.

⁴Lə́ələ́ á pə́ ńgə́ ŋwu mbyâŋnə ntsəm páʼ ä chaʼtə̂ nə́ Əsê kɨ ńtə́ ə́sóŋə anǔəsê nə́ atûə ají yə kə́bkə nə́ a néŋə lə́ əsə́ənə atû klisto páʼ a pə́ nə́ nətû jí lə́.

⁵Kɨ məngyě ntsəm páʼ a tə́ nə́ ńchaʼtə́sê kɨ ə́sóŋə anǔəsê á əshîsaŋ tə́ kə́bkə atûə ají a néŋə lə́ əsə́ənə atû ndú əyǐ páʼ a pə́ nə́ nətû jí lə́, a tíʼ ńchî lə́ ándó məngyě páʼ pə́ kɔ́ nə́ atûə ajíə á mə́ néŋ nə́ əsə́ənə á atû yə́.

⁶Təmbɔʼ məngyě a chî kɔŋə̂ á mə́ tə́ nə́ kə́bkə atûə ají pô, a tíʼ ńkɔ́ mənoŋ mə́ chî nə́ ə́wə́. Ndzaŋ páʼ á pə́ nə́ əsə́ənə á mbô məngyě á mə́ kɔ́ nə́ mənoŋ mə́ atû mi lə́, á pɔŋ ńgə́ məngyě a tə́ ńkə́bkə atûə ajíə.

⁷Ŋwu mbyâŋnə a kě chîə á mə́ kə́bkə nə́ atûə ají pô ńté ńgə́ a fî lə́ Əsê ńkə́ ḿbə́ nəgháʼ Əsê. Lə́ məngyě a pə́ ḿbə́ lə́ nəgháʼ ŋwu mbyâŋnə.

⁸Ńté ńgə́ Əsê a nə ńkě lɔg lə́ əlam mbɨ məngyě ńtsoŋkə̂ a ŋwu mbyâŋnə ə́wɨ́ pô, a nə ńdɔg lə́ əlam mbɨ ŋwu mbyâŋnə ńtsoŋkə̂ məngyě ə́wə́.

⁹Əsê a nə ńkě kə́ ńtsoŋkə̂ a ŋwu mbyâŋnə lə́ á mbô məngyě pô, a nə ńtsoŋkə̂ lə́ a məngyě ńté ŋwu mbyâŋnə.

¹⁰Lə́ ghɛd ə́lɨ́d məngyě a chîə á mə́ kə́bkə nə́ atûə ajíə á mə́ nɨd nə́ ńgə́ ndu əyǐə a túg mətəənə a ndu yə́, ńkə́ ńté Pətseŋpə́ndɛ́pə́sê.

¹¹Á mə́m nchîmbî əzɛ̂n nə́ Mmaʼmbî, mbɔʼ məngyě a kě chîə a ngǎ yí tə ŋwu mbyâŋnə pô, ŋwu mbyâŋnə a kě kə́ ńchîə a ngǎ yí tə məngyě pô.

¹²Ndzaŋə ándó pə́ nə ńdɔg nə́ əlam mbɨ ŋwu mbyâŋnə ńtsoŋkə̂ məngyě ə́wɨ́ lə́, lə́ tsɔʼə ndzaŋ páʼ məngyě a tíʼ nə́ ḿbîə ŋwu mbyâŋnə. Nte ńgə́ mənu mətsəm mə́ lǒo lə́ á mbô Əsê.

¹³Ŋwu ntsəmə a kwaŋ nə́ atûə ají ńgə́; á koʼnə̂ á mbô məngyě á mə́ chaʼtə̂ nə́ Əsê tə kə́bkə atûə ajíə?

¹⁴Təmbɔʼ nə́ zɨ́ ndzaŋ Əsê a nə ńtsoŋkə̂ nə́ mbî, nə́ zɨ́ ńgə́ lə́ əsə́ənə á mbô ŋwu mbyâŋnə á mə́ mɛdtə̂ nə́ mənoŋ mə́ atû mí mə́ sakə̂.

¹⁵Lə́ ḿbə́ ḿbə́ lə́ anu yə əshîʼnə á mbô məngyě á mə́ mɛdtə̂ nə́ mənoŋ mə́ atû mí mə sakə̂. Əsê a fɛ̂ mənoŋə á mbô məngyě lə́ ńgə́ a tə́ ńkə́bkə atûə ají ə́wə́.

¹⁶Lə́ təmbɔʼ ŋwu tsə̌ a tə́ ńdoonə̂ á mə́ kǐ nə́ ndɛn mənu ghɛn, maŋ chî təmbɔʼ maŋ sóŋ lə́ tsɔʼə ńgə́, pɛn, ńdzoŋ ḿbá mənkyeetə mə́ pɔ́ pə́ Əsê tsɔʼə mətsəm kě noŋkə yi ndaʼ túgə á tə́gtə nə́ áwɛ̂n ńté mə chaʼtə̂ nə́ Əsê tə ńdéʼtə ghɛn pô.

¹⁷Ntəgə́ maŋ lɔ nə́ á mə́ fɛ̂ á mbô pɨ lə́, maŋ kě lə́ nəkwíŋ zə́ənə́ atǐ tə́ ŋ́ŋáŋkə pô, ńté ńgə́ nə́ ghɛnə̂ aliʼə́ nkyeetə pɔ́ pə́ Əsê lə́, nə́ ghɛlə̂ mənu mə́ təpɔŋ ńtsɛɛlə̂ mimə əshîʼnə.

¹⁸Ntsɛɛmbiə anu lə́ ńgə́, maŋ zóʼ ńgə́ əghâ pɨ yǐ nə́ ńkyeetə̂ ándó pɔ́ pə́ Yeso lə́, nə́ ghabtə̂ məmbɨ mə́ənə́, pɨ pə́ chî nə́ əghɔ́b əlá, pɨ pə́ chî nə́ əghóobə́. Maŋ kwaŋ ńgə́ mbɔʼ anu zəənə́ á nyaʼ ḿbə́ ndə̌ŋdəŋə́.

¹⁹Lə́ ndə̌ŋdəŋ ńgə́ aghabtə á pěʼ ńchîə á mə́ chî nə́ a tətɨ pɨ ńjî ńgə́ pə́ jɨ́ pɨ páʼ pó ghɛd nə́ mənu páʼ mə́ tɨ́ nə́ ndə̌ŋdəŋə́.

²⁰Əghâ ándó nə́ yǐ nə́ ńkyeetə̂ táʼə aliʼ lə́, nə́ kě yǐ lə́ á ajîə Ntád pô.

²¹Ńté ńgə́, nə́ yǐəə ńjî mbǒʼḿbóʼə́; ŋwunə a tə́ ńjîə ńkě ngaŋəko əyǐ pyáb pô, nji ə́ tə́ ńdzáŋə ŋwu tsə̌, páʼ yitsə̌ a nô nə́ tə ḿbɛ́ɛlə yə́.

²²Zɨ́d zəənə́ anu á chî lə́ ə́lɛ́, nə́ kě nə́ məngyaʼə́ chîə á mə́ tə́ nə́ jîə ə́wɨ́ ə́ kə́ nô? Kɨ nə́ kwaŋ ńgə́ nkyeetə pɔ́ pə́ əsê lə́ kě ajûtsə́ pô nə́ tíʼə néŋ əsə́ənə á atû pɨ páʼ pó kě nə́ ajú túgə? Nə́ loonə̂ lə́ ńgə́ maŋ sóŋ ńgə́ akə̂ á mbô pɨ ńté anu zəənə́? Nə́ loonə̂ lə́ ńgə́ maŋ pímtə? Ngá! təmbɔʼ maŋ kě mə áwɨ́ ŋáŋkə po!

²³Anuə atsəm páʼ Mmaʼmbîə a nə ńdzéʼkə nə́ mə ə́wɨ́ lə́ zɨ́d mäŋ sóŋ nə́ á mbô pəənə́, ńgə́ á nətúʼə ándó pə nə fi nə́ Yeso á mbô pɨ pə́ təpɔŋ lə́, a lɔgə̂ apéenə məkálə́,

²⁴ə́fɛ̂ ndǎ á mbô Əsê, ńtíʼ ḿbagtə̂ zɨ́d, ə́sóŋ ńgə́, “Lɛ̌ mbəəmə mə páʼ maŋ fɛ̂ nə́ ńté atûə azə́ənə́. Nə́ tə́ ńgɛlə̂ ə́lɛ̌ á mə kwúmtə nə́ mə.”

²⁵A nə ńkə́ ńtwám ndɔ́ŋ tsɔʼə ə́lɨ́d əghâ ándó pó nə məgtə̂ nə́ á mə́ jî nə məjî lə́ ńtíʼ ə́sóŋ ńgə́, “Ndɔ́ŋ zɨ lə́ əka yi fî páʼ Əsê a wad nə́ pɨ po nə́ achǐə mbəəmə mə. Əghâ ətsəm pɨ nô nə́ ázɨ́d pɨ kwúmtə mə.”

²⁶Zɨ́d zəənə́ á nəələ̂ ńgə́ əghâ ətsəm pɨ jî nə́ apá jɨ́d jɨ, ńkə́ ńnô ndɔ́ŋ jɨ́d jɨ nə́ sóŋə anu ńté nəwû Mmaʼmbî tə ńkoʼ nə́ ndɛd páʼ a yǒ nə́ yǐəə.

²⁷Lə́, ŋwu páʼ a jî nə́ apá ńkə́ ńnô ndɔ́ŋ nə́ əsêndú ə́ kě nə́ koʼnə̂ pô, a ghɛd lə́ təpɔŋ nə́ na mbɨ Mmaʼmbî pó achǐə ajíə.

²⁸Lə́ələ́ á pə́ ńgə́ ŋwu ntsəmə a peg ńchaʼ mbɨ əjǐ záʼ ḿbɔŋə́ jîə apá ə́ kə́ nô ndɔ́ŋ zə̂.

²⁹Ńté ńgə́ ŋwu ntsəm páʼ a jî nə́ ńkə́ ńnô ḿbə́ ńkě jîə anu mbɨ Klisto tɨ́ nə́ nə́ zɨ́d pô, ä twáamə lə́ ndɔ əjǐə.

³⁰Lə́ ghɛd ə́lɨ́d pɨ pipə nɨ́ nə́ á mə́m pɨ pó tə́ ńgoonə̂, pipə nɨ́ nə́ pó pwɔ́d, pətsə́ pó kwúkə.

³¹Lə́ mbɔʼ pɛn peg ńchaʼ mbɨ əzɛ̂n, Mmaʼmbîə a yǐ ńkě áwɛ̂n tsəŋkə̂ pô.

³²Lə́, Mmaʼmbîə ä sáʼ əsáʼ əwɛ̂n ńkə̈ ə́fɛ̂ atsáŋə azɛ̂n ńjî ńgə́ kɔ a yǒ ńkyeetə̂ áwɛ̂n pə pɨ pə́ mbî pɨ ńtsəŋkə̂.

³³Pəlimə́ mə, lə́ pə́ ńgə́ əghâ nə́ kyeetə̂ nə́ á mə́ jî nə́ ntád, nə́ pyáabə a ŋwu ntsəmə.

³⁴Lə́ təmbɔʼ nji pěʼ ńtə́ ńdzáŋə ŋwu tsə̌ á pɔŋ ńgə́ a peg ńjî məjîə á ndɛ̂ yə́, ńjî ńgə́ əghâ pɨ kyeetə̂ nə́ táʼə aliʼ kɔ ŋwunə a ghɛlə̂ anu páʼ təmbɔʼ a twá ndɔ ə́wə́ á mbi Əsê. Ńgɛn nə́ mətsɨ́ mənu mə́, maŋ yǐ tə́gtə áwɨ́ əghâ maŋ yǐ nə́.