Read Awing 1 Kɔlintyanə 12 Bible Online

1 Kɔlintyanə 12 - Awing bible

1 Kɔlintyanə 12

¹Əghâ nə́ nə́ pəlimə́ mə, ńdzoŋ mənu pɨ nə ŋ́ŋwaʼlə̂ nə́ ńté məfɛ̂nə mə́ Ajwǐəsê lə́, maŋ loonə̂ ńgə́ pɨ jîə á ndə̌ŋdəŋ ńtə́ mə́ələ́.

²Nə́ jî ńgə́ əghâ páʼ pɨ nə ḿbɛ́d nə́ tə́ jîə Yeso lə́, pə fɨgə̂ áwɨ́ pɨ ghɛnə̂ ńgóʼkə məsê mə́ məfɨg páʼ lə́ əkwû məsê.

³Maŋ pə́ ńdoonə̂ ńgə́ nə́ jî ńgə́ ŋwu ntsəm páʼ a túg nə́ Ajwǐəsê, təmbɔʼ a kě sóŋ ńgə́, “Ndɔ ə́ chîə atû Yeso pô!” təmbɔʼ ŋwu tsə̌ a kě kə́ ə́sóŋ ńgə́, “Yeso lə́ Mmaʼmbî,” tə ńdéʼtə Ajwǐəsê a chîə á mə́m yə́.

⁴Əghâ nə́ məfɛ̂nə mə́ Ajwǐəsê mə́ chî lə́ ntê ńtê, lə́ ḿbə́ ńdǒo lə́ á mbô táʼə Ajwiə.

⁵Məfaʼ mə́ chî lə́ ntê ńtê, lə́ pə́ pə̂ faʼə̂ lə́ á mbô táʼ Mmaʼmbîə.

⁶Məndú pə̈ faʼ nə́ məfaʼ ə́wɨ́ mə́ chî lə́ á ntê ńtê, lə́ pə́ ḿbə́ tsɔʼə táʼ Əsê páʼ ä fɛ̂ nə́ ndú ńgə́ ŋwu ntsəmə a faʼə̂ anu təmbɔʼ a faʼə̂.

⁷Ajwiə ä nəələ̂ mətɨ mə́ Əsê ńdaŋə̂ á mə́m táʼ táʼ ŋwunə á mə́ kwá nə́ ŋwu ntsəmə.

⁸Ajwǐəsê a ghɛlə̂ ńgə́ ŋwu tsə̌ a tséebə atsáb páʼ zə́ələ́ á túg nə́ ayáŋ ńgɛnə̂ á mbô yitsə̌ ŋwu ńgɛd ńgə́ a tséebə atsáb páʼ zə́ələ́ á túg nə́ ajíənuə.

⁹Tsɔʼə Ajwǐəsê zɨ́d zə̂ á ghɛnə̂ á mbô yitsə̌ ŋwu ə́fɛ̂ mbimə́ ḿbɨ ńgɛnə̂ á mbô ŋwu tsə̌ ə́fɛ̂ mətəənə á mə́ tsóʼ nə́ məghoonə́.

¹⁰Ńgɛnə̂ á mbô yitsə̌ ŋwu ə́fɛ̂ mətəənə á mə́ ghɛd nə́ əkɨʼnəmə́nu, ńgɛnə̂ á mbô yitsə̌ ńgɛd ńgə́ a chî mbɔʼ a zóʼ nkɨ Əsê ńnáŋkə wə́ələ́, ńkə́ ḿbɨ ńgɛnə̂ á mbô yitsə̌ ŋwu ə́fɛ̂ mətəənə á mbô yə́ á mə́ fiʼtə̂ nə́ mənu páʼ mə́ fɛ́d nə́ á mbô Ajwǐəsê pópə mi páʼ mə́ kě nə́ lə́ á mbô Ajwǐəsê fɛ́d pô. Ńkə́ ḿbɛ́d ńgɛn nə́ yitsə̌ ŋwu ə́fɛ̂ mətəənə á mə́ tsáb nə́ ətsáb pəfîə, ńkə́ ńgɛnə̂ á mbô yitsə̌ ŋwu ə́fɛ̂ mətəənə á mbô yə́ á mə́ fiʼtə̂ nə́ anu páʼ ətsáb pəfî pipə wɨ́ ə́ sóŋ nə́.

¹¹Lə́ tsɔʼə Ajwǐəsê zɨ́d zə́ páʼ ä faʼ nə́ ndɛn mənu wɨ́d ghɛnə̂, ńkə́ ə́fɛ̂ á mbô ŋwu ntsəm ndzaŋ páʼ a kɔŋ nə́.

¹²Mbɨ ŋwu lə́ táʼə, ḿbə́ ńtúg əlam pipə nɨ́ nə́, əlam pɨ ətsəm, ə́ pǎtə ńnɨ́ lə́ ḿbə́ ńnɔd ḿbə́ lə́ táʼə ajúmə, lə́ ndzaŋ páʼ Yeso Klisto a chî nə́.

¹³Ńté ńgə́ lə́ nə ḿbə́ táʼə Ajwi páʼ a kə fɛ̂ nə́ nkǐ nə́ pɛn ńjî ńgə́ pɛn tíʼ táʼ mbəəmə, kɨ pɛn pə́ pə́ Pəjus kɨ Pətəjǐsê kɨ əpoʼ kɨ pɨ pə́ kě nə́ əpoʼ, pɛn nə ńnô lə́ tsɔʼə táʼə Ajwi wɨ́d wə̂.

¹⁴Ńté ńgə́ mbɨ ŋwu kě lə́ tsɔʼə táʼə alam túg pô, ə́ túg əlam tə ə́ nə́ənə.

¹⁵Təmbɔʼ akoolə á sóŋ ńgə́, “Ndzaŋ páʼ maŋ kě nə́ apô pô lə́, maŋ kě lə́ alamə́ mbɨ pô,” zə̂ á yǐ kě zɔŋ ńgə́ kɔ á pɨ ḿbə́ alamə́ mbɨ pô.

¹⁶Təmbɔʼ nətôglə nə́ kə́ ə́sóŋ ńgə́, “Ndzaŋ páʼ maŋ kě nə́ pə́ nələ́g pô lə́, maŋ kě lə́ alamə́ mbɨ pô,” zə̂ á kě yǐ zɔŋ ńgə́ kɔ á pɨ ḿbə́ alamə́ á mbɨ pô.

¹⁷Təmbɔʼ mbɨ ntsəm ə́ pěʼ ḿbə́ lə́ tsɔʼə nələ́g, tə ḿbə́ mbɔʼ ə́ pěʼ ńtíʼə ńdzóʼ əliʼ ə́lɛ́? Təmbɔʼ zɨ́d ntsəm ə́ pěʼ ḿbə́ lə́ tsɔʼə nətôglə, tə ḿbə́ ə́ tíʼə ńdəmkə̂ ajú ə́lɛ́?

¹⁸Ndzaŋə á pɛn ḿbə́ ə́lɨ́d lə́, Əsê a nə ńtyáŋtə əlam mbɨ ətsəm táʼ táʼ ndzaŋ páʼ a kɔŋ nə́.

¹⁹Mbɔʼ pɨ́d ətsəm ətsəm ə́ nə ḿběʼ ḿbə́ lə́ táʼə alam, tə ḿbə́ mbɨ ə́ chî ə́fó?

²⁰Ndzaŋ á pɛn ńchî ə́lɨ́d lə́, əlam mbɨ ə́ nə́ənə, ḿbə́ ḿbə́ lə́ tsɔʼə táʼ mbəəmə.

²¹Lə́ələ́ á pə́ ńgə́ təmbɔʼ nələ́g nə́ kě sóŋ nə́ apô ńgə́, “Maŋ kě gho tə́ ńdoonə̂ pô!,” kəənə atûə á kě kə́ sóŋ nə́ ako ńgə́, “Maŋ kě gho tə́ ńdoonə̂ pô!”

²²Lə́ a pɛn ḿbɨ́ ńchî lə́ ńgə́, əlam mbɨ páʼ ə́ chî nə́ ándó ə́ pwɔ́d lə́, mbɔʼ pɛn kě chî tə pɨ́d pô;

²³pi páʼ pɛ̈n kwaŋ nə́ ńgə́ ə́ kě nə́ anu chígə́ ńchî pô, lə́ pi pɛn chígə́ nə́ ńdɔg ndɛd ə́wə́; əlam mbɨ páʼ pɛn náŋ nə́ ńgə́ pɨ́d kě pɔŋ pô, lə́ pi pɛn pyádnə nə́ ńdɔg ndɛd ə́wɨ́,

²⁴ńtsɛ pi páʼ pɛn kwaŋ nə́ ńgə́ pɨ́d pɔŋə̂. Lə́ Əsê a pɛn ḿbə́ ńtsoŋkə̂ mbɨ nə́ əsêndú ńgə́ tə́kɔʼ ngóʼkə ə́ ghɛnə̂ á mbô əlam mbɨ páʼ ə́ kě nə́ nə́ anu chígə́ ńchî pô.

²⁵Ńjî ńgə́ kɔ mbɨ ə́ ghabnə̂, lə́ alamə́ mbəəmə atsəm á pyádnə mɔ́mɛ́ əyǐə.

²⁶Təmbɔʼ táʼə alamə́ mbəəmə á tə́ ńjɨ́ ngə́ʼ, əlam mbɨ ətsəm ə́ chîə á mə́m ngə́ʼə. Təmbɔʼ pə́ ŋáŋkə táʼə alamə́ mbɨ, apuʼə atsəmə á kɔŋtə̂ pó pô.

²⁷Əghâ nə́ pɨ pətsəm lə́ nkɔ̌ʼmbɨ Yeso, táʼ táʼ ŋwunə a pə́ alamə́ mbəəmə ajíə.

²⁸Əsê a pɛn ńgɛnə̂ á mə́m nkyeetə pɔ́ pə́ Yeso lə́ ḿbeg ńtsɔ́ʼ məntú mə́ Yeso, ńdzoŋkə̂ ńtsɔ́ʼ məntú mə Əsê, ḿbɨ ńkə́ ńtsɔ́ʼ pəzéʼkə, ńtíʼ ńtsɔ́ʼ ngaŋə́ghɛlə əkɨʼnəmə́nuə ńkə́ ńtsɔ́ʼ ngaŋə́tsóʼə məghoonə́, ńkə́ ńtsɔ́ʼ pɨ ńgə́ mbɔʼ pó kwáatə pətsə́, ńkə́ ńtsɔ́ʼ mətûə, ḿbɨ́ ńkə́ ńtsɔ́ʼ pətsə́ pɨ mbɔʼ pó tsáb ətsáb pəfîə.

²⁹Ŋwu ntsəm lə́ kě ntú Yeso pô. Ŋwu ntsəmə a kě ntú Əsê pô; ŋwu ntsəmə a kě ndzéʼkə pô. Ŋwu ntsəmə a kě mətɨ túgə á mə́ ghɛd nə́ əkɨʼnəmə́nu pô.

³⁰Ŋwu ntsəmə a kě mətɨ kə́ ńtúgə á mə́ tsóʼ nə́ məghɔ pô, kəənə á mə́ tsáb nə́ ətsáb pəfî kəənə á mə́ fiʼtə̂ nə́ anu páʼ ətsáb pəfî ə̈ sóŋ nə́ pô.

³¹Tə́g nə́ atûə azə́ənə́ á mə́ túg nə́ pətə́kɔʼ pə́ məfɛ̂nə Ajwǐəsê ä fɛ̂ nə́. Maŋ yi nəələ̂ áwɨ́ nə́ yitsə̌ ndú páʼ ə́ pɔŋ nə́ ńtsɛ məndú mətsəmə.