Read Awing 1 Kɔlintyanə 13 Bible Online

1 Kɔlintyanə 13 - Awing bible

1 Kɔlintyanə 13

¹Mbɔʼ maŋ chî təmbɔʼ maŋ tsáb ətsáb pɨ pə́ mbî pɨ ńtû ńtsáb pí pətseŋpə́ndɛ́pə́sê, ḿbə́ ńchîə akɔŋnə túg pô, tə ḿbə́ maŋ chî lə́ ándó kwə́ŋ kɨ ŋwáglə́ pə́ póʼ nə́ tsɔʼə əpǒʼpóʼə́.

²Mbɔʼ maŋ chî təmbɔʼ maŋ tséebə ándó məntúmə́sê, atûə mə kə́ ńtsɔ́ʼnə nə́ mənu mə́ nəlyaŋnə́ mətsəm; ńkə́ ńtúg mbimə́ ətsəm təmbɔʼ maŋ sóŋ nə́ məŋnkwəənə ńgə́, “Lǒo aliʼə́ nə́ ńgɛnə̂ aliʼə́ ndaʼə,” ḿbə́ ńchîə akɔŋnə túg pô, maŋ lə́ ənukə́taŋə.

³Təmbɔʼ maŋ fɛ̂ ajúmə atsəm páʼ maŋ túg nə́ á mbô pəənə; tə ńtû ə́fɛ̂ mbəəmə mə ńgə́ pə́ toonə̂ á mógə́,[6] ḿbə́ ńchîə akɔŋnə túg, a kě mə nə́ anu yitsə̌ kwá pô.

⁴Akɔŋnə lə́ awaamə́ntə́əmə ńkə́ ḿbə́ mə túg nə́ ntɨ́ yi əshîʼnə; akɔŋnə á kě ŋwéetə́ túg pô, ńkě akɔnə́ndzɔʼ túg pô, á kě aŋáŋkə mbɨ túg pô;

⁵ńkě ntso yi féŋ nə́ túg pô, ńkě aŋwɛ túg pô, ńkě ndě zaŋkə̂ ńdzáŋə pô, ńkě təpɔŋ lɔʼkə̂ pô.

⁶Akɔŋnə á kě kɔŋtə̂ əghâ páʼ təpɔŋə a chî nə́ pô, ḿbə́ ńkɔŋtə̂ əghâ páʼ ndə̌ŋdəŋə́ a chî nə́.

⁷Akɔŋnə á kě anu waamə̂ ḿbəənə̂ ḿmyaʼə̂ pô, a tə́gə atû nə́ mbimə́, nə́ akwaŋ ńtə́ ḿbyáabə, pó awaamə́ntə́əmə.

⁸Akɔŋnə á kě měe pô; mə zóʼ nə́ nkɨ Əsê ńnáŋkə á yǒ měe, mə tsáb nə́ ətsáb pəfî mə́ ghɛd měe, ajíənu á kə́ měe.

⁹Ńté ńgə́ ajíənuə azɛ̂n pópə mə zóʼ nə́ nkɨ əsê ńnáŋkə kě koʼ ńgɛn ə́fyag pô,

¹⁰lə́ mbɔʼ á yǒ ḿbə́ əghâ mənu mə́ koʼnə̂ nə́ ńgɛn fyag mi mə́ kě nə́ koʼ ńgɛn ə́fyag pô mə́ měe.

¹¹Á nə ḿbə́ əghâ páʼ maŋ nə́ ḿbə́ nə́ mɔ́ lə́ atséebə mə á pə́ lə́ yə móonə, akwaŋə mə pə́ yə móonə, ndu mäŋ tyáatə nə́ mənu wɨ́ pə́ yi móonə, əghâ nə́ maŋ tíʼ nə́ ntəŋkaŋ lə́, ḿmɛdtə̂ mənu mə́ pɔ̂nkə̂.

¹²Nə́ pə́ əghâ nə́ pɛn zə́ənə mənuə ándó aleŋkə ajúmə á mə́mə akyaʼə́shîə, əghâ yi ə́wɨ́ pɛ̌npo yǒ zɨ́nə məshîə. Əghâ nə́ maŋ jî mənu lə́ tsɔʼə akəmə akəmə, lə́ á yǒ pə́ əghâ yi əwɨ́ lə́ maŋ jî mənu ndzaŋ páʼ a kə́ nə́ ḿbyádnə ńjîə mə lə́.

¹³Lə́ələ́ á pə́ ńgə́ lə́ mənu mɨ mɛ́n teelə́, mbimə́, mə túg nə́ akwaŋ ńtə́ pyáabə pópə akɔŋnə. Akɔŋnə á pə́ ńtsɛɛlə̂ ághɔ́b pətsəmə.