Read Awing 1 Kɔlintyanə 15 Bible Online

1 Kɔlintyanə 15 - Awing bible

1 Kɔlintyanə 15

¹Əghâ nə́ nə́ pəlimə́ mə, maŋ loonə̂ á mə́ kwúmtə nə́ áwɨ́ nə́ nkɨ yi əshîʼnə páʼ maŋ nə ńnáŋkə nə́ á mbô pɨ lə̂, nkɨ páʼ pɨ nə́ ńdzóʼ nə́ áwɨ́d ńkə́ ńtɨ́ ə́wɨ́ ńtyantə̂.

²Lə́ nkɨ yi əshîʼnə ḿbə́ nkɨ páʼ mäŋ nə ńnáŋkə nə́ á mbô pəənə́ lə́. Nə́ chwád lə́ ńté nkɨ yi əshîʼnə wɨ́d ghɛn páʼ təmbɔʼ nə́ tɨ́ ə́wɨ́ ńtyantə̂, tə ńchî ə́lɨ́d pô, lə́ pə́ ńgə́ pɨ nə́ ńnéŋ ntɨ́ ə́wɨ́ lə́ kətaŋə.

³Ajú maŋ nə fɛ̂ nə́ á mbô pɨ lə́ tsɔʼə yi maŋ nə ńkwá nə́, páʼ á pə́ nə́ chigə anu ə́səglə̂ ńgə́: klisto a nə ńkwû ńté pətəpɔŋ pɛn ndzaŋ pə́ nə ŋwaʼlə̂ nə́ á mə́mə aŋwaʼlə Əsê;

⁴ńgə́, pə́ nə ńtwə́ŋə yə́, əlě pɛ́n teelə́ ə́ laŋ a júmnə á nəwû, ndzaŋ pə́ nə ŋwaʼlə̂ nə́ á mə́mə aŋwaʼlə Əsê;

⁵ńgə́, a nə ńnɨd mbɨ əjǐə á mbô Pita, ńkə́ ḿbɨ ńnɨd mbɨ əjǐə á mbô məntú mí mə̂ ntsɔb pɛ̌.

⁶Ńtíʼ ḿbɨ ńkə́ ńnɨd mbɨ əjǐ táʼ ngǎ á mbô ngaŋə́zoŋə́ndzəm əjí páʼ pó nə ńchî nə́ ńdaŋ nkɛd tênə, pó pətsə́ nə́ mbǎtə ńkwúkə lə́, pó pipə nɨ́ nə́ pə́ ḿbɛ́lə á mbîə.

⁷A tíʼ ńnɨd mbɨ əjǐə á mbô Jɛmsə pópə məntú mí tsɔʼə mətsəmə.

⁸A nə́ ńtə́ ńdwegtə̂ ńkə́ ńnɨd mbɨ əjǐə á mbô maŋə; Maŋ pǎtə ńchîə pə́ ándó ŋwu pə́ nə ḿbî nə́ yí ndɛd yi ndaʼ lə́, a pə́ ḿbɛ́d ńnɨd mbɨ əjǐə á mbô maŋə.

⁹Ńté ńgə́ maŋ chígə́ ńkə́gə á mə́m məntú mə́ Yeso tə ḿběʼ ńkě koʼnə̂ təmbɔʼ pə́ fóŋə mə nə́ ntú əjǐ pô. Ńté ńgə́ maŋ nə́ ńtsaŋkə̂ nkyeetə pɔ́ pə́ Əsê.

¹⁰Ńdaŋ nə́ apɔŋə́ntə́əmə Əsê maŋ pə́ ajú páʼ maŋ pə́ nə́ zɨ́d ə́sɛ̂nə̌. Apɔŋə́ntə́əmə Əsê ńté mə á nə ńkě lə́ kətaŋ laŋ pô. Maŋ kə́ ḿbɨ ḿbyádnə faʼ ńtsɛ məntú mə́ Yeso tsɔʼə mətsəmə, lə́ nə ḿbə́ ńkě mäŋ faʼə̂ pô, lə́ nə̈ faʼə̂ apɔŋə́ntə́əmə Əsê páʼ á chî nə́ nə́ maŋə.

¹¹Lə́ələ́ pə́ ńgə́ kəənə á nə fɛ́lə á pə́ á mbô maŋ kəənə á mbô pó tə ḿbə́ lɛ̌ nkɨ pəg pətsəm kə náŋkə nə́, nə́ kə́ ńnéŋ ntɨ́ ə́wə́.

¹²Əghâ nə́, mbɔʼ pɛn tə́ sóŋə ńgə́ Yeso klisto a nə ńjúmnə nəwû, pɨ pətsə́ á mə́m pɨ pó pɨ ńdǎ lə́ ə́lɛ́ ḿbɔŋə̂ sóŋə ńgə́ pəkwû pə́ yǒ kě á nəwû júmnə pô?

¹³Təmbɔʼ lə́ pə́ ndə̌ŋdəŋ ńgə́ pəkwû pə́ yǒ kě a nəwû júmnə pô, lə́ələ́ pə́ ńgə́ alǒ Yeso klisto a nə ńkě a nəwû kə́ ńjúmnə pô.

¹⁴Təmbɔʼ Yeso a nə ńchîə a nəwû júmnə pô, tə ḿbə́ pəg kě nkɨ yitsə̌ túgə á mə́ náŋkə nə́ pô, nə kě kə́ ńtúgə anu yətsə̌ təmbɔʼ nə́ néŋ ntɨ́ ə́wɨ́ pô.

¹⁵Anu tə ńtsɛɛlə̂ ájɨ́d zə̂ á yǐ ḿbə́ ńgə́ pə̈g néŋə lə́ ntsəələ atû Əsê ńté ńgə́ pəg sóŋ ńgə́ a nə ńjúmkə Yeso á nəwûə lə́ pə́ ńgə́ a nə ńkě yə́ á nəwû júmkə pô páʼ təmbɔʼ a pə́ ndə̌ŋdəŋ ńgə́ pəkwû pə́ yǒ kě á nəwû júmnə pô.

¹⁶Ńté ńgə́ mbɔʼ pəkwû pó chî chîə á mə́ júmnə nə́ á nəwû pô, tə ḿbə́ Əsê a nə ńkě Yeso kə́ ńjúmkə pô.

¹⁷Təmbɔʼ Yeso a nə ńkə́ ńchîə á nəwû júmnə pô, tə ḿbə́ nə kě anu yətsə̌ túgə á mə́ néŋ nə́ ntɨ́ ə́wɨ́ pô, ńkə́ ḿbɛ́d ḿbéŋə á mə́m təpɔŋ əwəənə́.

¹⁸A kə́ ńnɨd ńgə́ pɨ páʼ pó kwû nə́ á mə́m Yeso pó péŋə.

¹⁹Təmbɔʼ akwaŋə́nuə azɛ̂n ńtə́ ḿbyáabə á mə́m Yeso á chî ńté lə́ tsɔʼə nchîmbî əzɛ̂nə á ndu mbî ghɛn, tə ḿbə́ pə́ chîə á mə́ sɔbnə̂ nə́ ə́ té áwɛ̂n tsɛɛlə̂ ŋwu ntsəmə a ndu mbîə.

²⁰Ndə̌ŋdəŋə́ á chî nə́ á mə́m ə́wɨ́ lə́ ńgə́, Klisto a nə ńjúmnə á nəwû ḿbə́ akyeʼə́nuə á mə́ nɨd nə́ ńgə́ pəkwû pə́ yǒ júmnə á nəwûə.

²¹Lə́ələ́ pə́ ńgə́ ndzaŋ páʼ nəwûə a nə ńgyǐ nə́ ńdaŋə̂ á ndzəm táʼ ŋwu lə́, mə júmnə nə́ á nəwû mə́ yǐ kə́ yǐ laŋə̂ á ndzəm táʼ ŋwunə.

²²Ndzaŋ ŋwu ntsəmə ä kwû nə́ ńté atûə Adam lə́, lə́ kə́ ḿbə́ ndzaŋ ŋwu ntsəmə a yǒ nə́ júmnə á nəwû ə́ té atûə klisto.

²³Lə́ ŋwu ntsəmə á pə́ ńjúmnə nə́ əjǐ ndɛlə́: Yeso a pə́ ntsɛɛmbi ŋwunə; ńtíʼ ńdǒ ə́lɨ́d, pɨ páʼ pó pí nə́ nə́ yí pó júmnə əghâ páʼ a yǒ nə́ yǐəə.

²⁴Ndwegtə mbî ə́ tíʼ ńgyǐəə, Klisto a tsəŋkə̂ ajwiə təpɔŋ páʼə ä sáʼ nə́ mbîə, pópə mətû mətsəm nə́ mətɨ mətsəm páʼ pə́ sáʼ nə́ mbî ə́wə́, ńtíʼ ə́fɛ̂ nəfoonə á mbô Əsê páʼ a pə́ nə́ Tǎ.

²⁵Ńté ńgə́ Klisto a chîə á mə́ sáʼ nə́ nəfɔ tə koʼ nə́ ndɛd páʼ Əsê a yǒ nə́ tsɛ ngaŋkə́pa əjí ə́ tíʼ néŋə ághóobə́ a nətɛ́n nə́ məko Yeso Klisto[8].

²⁶Ngaŋkəpa pə́ yǒ nə́ lwigtə̂ mə́ tsəŋkə̂ nə́ lə́ nəwûə.

²⁷Ńté ńgə́ aŋwaʼlə Əsê a sóŋ ńgə́, “Əsê a néŋə ajúmə atsəmə a nətɛ́n nə́ məko yə́.” [9] Á lánə ńchígə́ ŋ́ŋwaʼ ńgə́ pə́ sóŋ ńgə́, “Ajúmə atsəm” lə́ ńkě Əsê páʼ a nə ńnéŋ nə́ ajúmə atsəmə á məko Yeso Klisto lə́ ə́wɨ́ peg pô.

²⁸Lə́, əghâ ándó pə́ yǒ nə́ ḿmɛdtə̂ ajúmə atsəm ńgə́ Yeso Klisto a sáʼ, yí Yeso Klisto nə́ nkɔ̌ʼmbɨ əyə́ ándó mɔ́, a kə́ ḿmɛdtə̂ əjǐ mbəəmə á mbô Əsê páʼ a kə mɛdtə̂ nə́ ajúmə atsəmə á mbô yi lə̂. Əsê a tíʼ ńkwéʼnə əsáʼə ajúmə atsəmə.

²⁹Nə́ kwaŋ ńgə́ təmbɔʼ mə júmnə nə́ á nəwû mə́ chî ə́wɨ́ chî, pɨ pə́ kwá nə́ nkǐə aliʼ pəkwû lə́ pó pə́ ńkwáalə lə́ ńgə́ á kwáalə ághɔ́b nə́ akə̂ lə́? Təmbɔʼ pəkwû pə́ chî chîə á mə́ júmnə nə́ á nəwû pô, pɨ pə́ tíʼə ńkwá nkǐ aliʼ pó ńgə́ akə̂?

³⁰Ńgɛn nə́ pəg, pə̈g fɛ̂ mbɨ əzəgə́ á ntso nəwû əghâ ətsəm lə́ ńgə́ akə̂?

³¹Pəlimə́ mə, mäŋ kwɛnə̂ nə́ nəwû əlě ətsəmə! kətɨd páʼ maŋ túg nə́ nə́ pɨ ńté nchîmbî əzɛnə̂ á mə́m Yeso Klisto páʼ a pə́ nə́ Mmaʼmbî əwɛn lə́, ä ghɛlə̂ ńgə́ maŋ sóŋ leenə́.

³²Təmbɔʼ maŋ nə̈ ḿbóʼnə məlaʼ pəg pə́ məna mə́ məyeŋ mə́ təpɔŋ a Ɛfesus lə́ tsɔʼə mə́ kwá nə́ ape ŋwu mbî, tə ḿbə́ ape anuə mə ə́wə́ á pə́ ńgə́ akə̂? Təmbɔʼ pəkwû pə́ chî chîə á mə́ júmnə nə́ á nəwû pô, á pə́ ńgə́, “Pɛn jî ńkə́ ńnô ńté ńgə́ a yǒ pə́ a ngwɛʼə́ pɛn kwúkə.” [10]

³³Kɔ ŋwu tsə̌ a fɨgə̂ áwə́ənə́, “əghɨ təpɔŋ ə́ tsəŋə̂ a mbɔ́ yi əshîʼnə.”

³⁴Fóŋ nə́ ajîə azə́ənə́, ḿmɛdtə̂ á mə́ tə́ nə́ ghɛlə̂ təpɔŋ; ńté ńgə́ pɨ pətsə́ pə́ chîə á mə́m pɨ páʼ pó kě nə́ Əsê jî po, mäŋ sóŋə jɨ lə́ á mə́ néŋ nə́ əsə́ənə á atû pəənə́.

³⁵Lə́ ŋwu tsə̌ a chî təmbɔʼ a pítə ńgə́, “Təmbɔʼ pəkwû pə́ júmnə nəwû lə́ ə́lɛ́? Pó yǒ tíʼ túg lə́ zə́ənə́ ntê mbəəmə?”

³⁶Akəkóg! Ajú páʼ gho pǐ nə́ a kě sáʼə pô tə ńdéʼtə á kwûə.

³⁷Ajú páʼ gho pǐ nə́ á ndəsê lə́ tsɔʼə mbi əjǐə. Əghâ tsə́ a pə́ pə́ mbi ngəsáŋ kəənə ajúmə ndaʼə.

³⁸Lə́ Əsê a pə́ ə́fɛ̂ ntê mbɨ ntsəm nə́ yí páʼ a kɔŋ nə́, ńkə́ ńgɛn nə́ ntê mbǐpú ətsəm ə́fɛ̂ ndzaŋ mbɨ ntsəm páʼ ə́ koʼnə̂ nə́.

³⁹Na mbɨ ntsəm ə́ kě lə́ ndə̌ŋdəŋ pô: ŋwu məsɔŋə́ a túg əzɔb mbəəmə, məna mə́ túg əzoobə́, pəsə́ŋ pə́ túg əzoobə́, məshú mə́ kə́ ńtúg əzoobə́.

⁴⁰Məmbɨ mə́ chîə á nəpóolə, məmbɨ mə́ kə́ ńchîə á ndu ndəsê ghɛnə́; lə́ nəpɔŋ məmbɨ mə́ nəpóolə á pə́ ḿbə́ lə́ táʼə. Nəpɔŋ məmbɨ mə́ ndu ndəsê á kə́ ḿbə́ lə́ táʼə.

⁴¹Mə́numə a túg lə́ táʼ nəpɔŋə, sáŋə á kə́ ńtúg əyǐə, pɔ́ pə́ sáŋ pə́ kə́ ńtúg əghoobə́, alǒ á mə́m pɔ́ pə́ sáŋ, nəpɔŋə a kə́ ńchî ə́wɨ́ lə́ tsɔʼə ndzaŋə ndzaŋə.

⁴²Lə́ lɛ̌ ndzaŋ páʼ a yǒ nə́ chî əghâ páʼ pəkwû pə́ yǒ nə́ júmnə á nəwûə. Əghâ pə́ tə́ nə́ ńtwə́ŋə lə́ a pə́ mbɨ páʼ ə̈ kwû nə́, əghâ á mə́ júmnə nə́ lə́, ə́ tíʼ lə́ yi kě nə̈ kwûə pô.

⁴³Əghâ páʼ pə́ tə́ nə́ ńtwə́ŋə lə́ ə́ shwad ńkə́ ḿbóolə; əghâ páʼ ə́ tə́ nə́ ńjúmnə nəwû lə́, ə́ túgə nəpɔŋ ńkə́ ńtúgə apɛ̂.

⁴⁴Pə́ tə́ ńtwə́ŋə lə́, ə́ pə́ lə́ na mbəəmə; əghâ páʼ ə́ tə́ nə́ ńjúmnə lə́ ə́ túgə ajwǐə. Mbɔʼ na mbɨ ndu mbî ə́ chî ə́wɨ́, tə ḿbə́ yə ajwi ə́ kə́ ńchî ə́wə́.

⁴⁵Ńté ńgə́ aŋwaʼlə Əsê a sóŋ ńgə́, “ntsɛɛmbi ŋwu pə́ nə ńtsoŋkə̂ nə́ a pə́ Adam lə́, a nə ńtúg nchîmbîə” [11] ndwegtə ndzəm Adamə a pə́ Ajwi páʼ a nə̈ fɛ̂ nə́ nchîmbîə

⁴⁶Mbi lə́ nə ńkě ajwi kwá pô. Na mbɨ ə́ nə ńkwá nə́ mbi záʼ ajwiə a pɔŋə̂ zoŋə̂.

⁴⁷Pə́ nə ńtsoŋkə̂ ntsɛɛmbi Adam lə́ nə atsaʼə́; ndzoŋdzəm Adamə a lǒo lə́ á nəpóolə.

⁴⁸Pɨ pə́ chî nə́ á ndu ndəsê pə́ chî lə́ tsɔʼə ándó ŋwu pə́ nə ńdɔg nə́ ndəsê ńtsoŋkə̂ yí ə́wɨ́ lə̂. Pɨ pə́ chî nə́ á nəpó pə́ kə́ ńchî lə́ ándó ŋwu páʼ a nə ńdǒ nə́ a nəpó lə̂.

⁴⁹Ndzaŋ pɛn fî nə́ ŋwu páʼ pə́ nə ńtsoŋkə̂ nə́ nə́ ndəsê lə, lə́ tsɔʼə ndzaŋ pɛn yǒ nə́ kə́ fîə ŋwu páʼ a nə ńdǒo nə́ á nəpóolə.

⁵⁰Maŋ kyaʼə̂ áwɨ́ nə́ pəlimə́ mə ńgə́, na mbɨ pópə achǐ ə́ kě chîə á mə́ yǒ nə́ kwúnə á mə́mə anuə nəfoonə Əsê pô, mbɔʼ ajú páʼ ä kwû nə́ a kě kə́ ńdɔgə̂ aliʼə́ ajú páʼ á kě nə́ kwûə pô.

⁵¹Jwə́ʼtə nə́ maŋ kyaʼə̂ áwɨ́ nə́ ndə̌ŋdəŋə́ anuə nəlyaŋnə́ yətsə̌: pɛn pətsəm yǒ kě kwû pô, Əsê a yǒ ghabkə̂ ə́kwúblə áwɛ̂n pətsəmə.

⁵²A yǒ pə́ lə́ tsɔʼə ándó gho pə́btə əmə́g mô lə́, pə́ tɔ́ŋə ndwegtə nəpaŋə. Ńté ńgə́ əghâ pə́ yǒ nə́ tɔ́ŋə ájɨ́d lə́, pəkwû pə́ júmnə ńdáʼ ńkě pɨ ńkwû pô, pɛn pətsəm tíʼ ńkwúblə.

⁵³Ńté ńgə́ pə́ yǒ kwúblə ajúmə atsəm páʼ ä lə̂ nə́ a pə́ yə tə lə̂. Ajúmə atsəm páʼ ä kwû nə, pə́ kə́ ńkwúblə zə́ələ́ á pə́ yə tə kwûə.

⁵⁴Lə́ələ́ pə́ ńgə́ əghâ ándó ajú yə lə̂ nə́ a sɛd nə́ ńtíʼ yə tə lə̂, yə́ ä kwû nə á kə́ sɛlə̂ yə tə kwûə, lə́ələ́ pə́ ńgə́ anu páʼ aŋwaʼlə Əsê ä sóŋ nə́ á lɔgə̂ aliʼə́ ají ńgə́, “Pə́ tsɛɛlə̂ nəwû ḿmǐəə yə́.”

⁵⁵“Nəwû, mətɨ mô mə́ ə́fó? Nəwû, ə́sɛ̂n gho ə́fó?” [12]

⁵⁶Ə́sɛ̂n nəwû lə́ təpɔŋə, mətɨ mə́ təpɔŋ mə́ fɛ́lə lə́ á mə́m pənoŋkə pə́ Mosisə.

⁵⁷Lə́, ndǎ á mbô Əsê páʼ a ghɛd nə́ pɛn tsɛɛlə̂ nəwû ńdaŋə̂ á ndzəm Mmaʼmbî əwɛn Yeso Klisto.

⁵⁸Pəlimə́ mə maŋ kɔŋ nə́, lə́ələ́ pə́ ńgə́, nə́ tɨ́ ńtyantə̂, kɔ nə́ chiʼnə̂. Fɛ̂ nə́ mbɨ əjɨ tsɔʼə ntsəmə á mə́mə afaʼə Mmaʼmbî əghâ ətsəm ńté ńgə́ nə́ jî ńgə́ afaʼə azə́ənə́ á mbô Mmaʼmbîə a kě lə́ kətaŋ laŋə̂ pô.