Read Awing 1 Kɔlintyanə 16 Bible Online

1 Kɔlintyanə 16 - Awing bible

1 Kɔlintyanə 16

¹Əghâ nə́, ńgɛn nə́ anuə amaʼə́nkáb ə́ kwáatə pɨ pə́ Əsê ə́wɨ́ lə́, ghɛd nə́ tsɔʼə ndzaŋ páʼ maŋ nə fiʼtə̂ nə́ mənkyeetə mə́ pɔ́ pə́ Əsê páʼ mə́ chî nə́ á Galɛsya ńgə́ pó tə́ ńgɛlə̂ lə̂.

²Á mə́m ntsɛɛmbiə alě á mə́m ngab mbî ntsəm, ŋwu ntsəmə a shib ńdɔʼkə̂ ndɛn nkáb yitsə̌ páʼ wɨ́d ə́ koʼnə̂ nə́ nə́ ajú páʼ a faʼ nə́ nə́ ngab jɨ́d zə̂. Ńdɔʼkə̂ ájɨ́d ńjî ńgə́ əghâ páʼ maŋ yǒ nə́ ńgyǐ kɔ pə́ pɨ ńtə́ ḿmaʼə̂ ajúmə.

³Ńjî ńgə́ əghâ maŋ yǒ nə́ ńgyǐ, maŋ tíʼ ŋ́ŋwaʼlə̂ aŋwaʼlə ə́fɛ̂ á mbô pɨ páʼ nə́ tsɔ́ʼ nə́ ńtíʼ ńtúmə ághɔ́b nə́ əpú pəənə́ á Jɛlusalɛmə.

⁴Á kə́ ńkoʼnə̂ pə́ ńgə́ maŋ ghɛn ə́wɨ́, pə̌gpo ghɛnə̂.

⁵Maŋ yǒ laŋə̂ a Masedonya ə́ pɔŋə̂ yǐ ghéenə áwə́ənə́: ńté ńgə́ maŋ nə ḿbɛ́d tə ńkwaŋə̂ á mə́ laŋ nə́ á Masedonya.

⁶Maŋ yǒ yǐ pɛn chî tə ndi ə́ sagə̂ kɨ əghâ tsə̌ pɛn yǒ ńchî tə ḿməg ndɛd əfə́g ntsəm ńjî ńgə́ mbɔʼ pɨ yǒ ńkwáatə mə maŋ ghɛnə̂ aliʼə́ atsəm páʼ maŋ chî nə́ á mə́ ghɛn nə́ ə́wə́.

⁷Maŋ kě kɔŋə̂ á mə́ yǐ nə́ laŋ tsɔʼə laŋ nə́ pô. Maŋ kɔŋə̂ á mə́ yǐ nə́ pɛn chî nə́ ndɛd yitsə̌ páʼ təmbɔʼ Əsê a pímə.

⁸Lə́ maŋ yǐ pɛ́d chîə á Ɛfesus tə koʼə̂ alě Pɛntekɔsə,

⁹ńté ńgə́ əsa yi ngweŋ ŋáʼnə á mbô maŋ ə́fênə̌ á mə́ faʼ nə́ afaʼ yə əshîʼnə. Pɨ pipə nɨ́ nə́ pó pǎtə ə́sɔb məsɔŋə́ a ndzəm maŋ lə, əsa ə́ pə́ ŋ́ŋáʼnə.

¹⁰Mbɔʼ Timotiə a yǐ ńgyǐ, nə́ túgə yí əshîʼnə á mə́m pɨ ńté ńgə́ a kə́ faʼə̂ lə́ afaʼə Mmaʼmbî tsɔʼ ándó maŋə.

¹¹Kɔ ŋwu əwɨ yitsə̌ a wágə yə́, kwáatə nə́ yí ńjî ńgə́ a ghɛnə̂ á nənyi əyǐ nə́ mbwɔ́dnə mbɨ ńgyǐ ńtégə mə; ńté ńgə́ pə̂gpə pəlimə́ mə tə́ ḿbyáabə yə́.

¹²Əghâ nə́, ńgɛn nə́ ndim əwɛn Apolos, maŋ nə ḿbyádnə ńtɛ́nkə yí ńgə́ a yǐ pópə pəlim pətsə́ ńgéenə áwə́ənə́, atûə ajíə á pə́ ńkě lánə ńdá ńgə́ mbɔʼ a yǐ əghâ nə́ pô. Lə́ mbɔʼ əsa ə́ yǒ ə́fɛ́d, tə ḿbə́ a yǐ yǐəə.

¹³Kɔ nə lê, tɨ́ nə ńtyantə̂ á mə́m mbimə́ əzəənə́, túg nə́ atyǎŋtəntə́əmə ándó mbyâŋnə ńkə́ ńtɨ́ ńtyantə̂.

¹⁴Faʼ nə́ afaʼə atsəm nə́ akɔŋnə.

¹⁵Əghâ nə́ nə́ pəlimə́ mə, nə jî ńgə́ əla Stefana lə́ nə ḿbə́ pɨ pó nə ḿbeg nə́ néŋ ntɨ́ əghɔ́b nə́ Yeso Klisto aláʼə Akaya ńkə́ ə́fɛ̂ məmbɨ móobə́ á mə́ faʼ nə́ kə́ kwá pɨ pə́ Əsê. Pəlim, maŋ póʼ mbô

¹⁶ńgə́, nə tə ńdzóʼnə ndzaŋ pɨ zɨ́d zəənə́, ńkə́ ḿbə́ nə́ ŋwu ntsəm páʼ pó po faʼ nə́.

¹⁷Mbəəmə mə ə́ nə ḿbɔŋə̂ ándó Stefana pó Fɔtunatu ḿbéenə Achakus pó nə ńgyǐ nə́, ńté ńgə́ pó nə ḿmegnə̂ akwá páʼ pɨ nə ńkě nə́ aliʼə́ nə́ chîə á mə́ fɛ̂ nə́ nə́ maŋ pô.

¹⁸Pó nə́ ńgɛd ntə́əmə mə ə́ féŋtə ándó pó nə ńkə́ nə́ ńgɛd ə́wɨ́ ə́ kə́ ə́féŋtə lə̂. Pí nə́ afaʼə pəənə ándó pɨ́d pəənə́.

¹⁹Mənkyeetə mə́ chî nə́ á mboʼ Esya pó ghə́ maŋ chaʼtə̂ áwə́ənə́. Akwilasə pó Plisila ḿbɨ ḿbá nkyeetə páʼ ə́ kwú nə́ á ndɛ̂ pó lə́, pó tə́ ńchaʼtə̂ áwɨ́ nə́ chigə achaʼtə yi əshîʼnə á mə́m Mmaʼmbîə.

²⁰Pəlim páʼ pó chî nə́ aliʼə́ nə́ tsɔʼə pətsəm pə́ tə́ ńchaʼtə̂ áwə́ənə́. Chaʼtə̂ nə́ pəlim táʼ táʼ ńchweg məmbɨ mɨ́ nə́ ndú páʼ ə́ koʼnə̂ nə́.

²¹Lə́ maŋ Pɔlə páʼ maŋ ŋwaʼlə̂ nə achaʼtə jɨ nə́ apô mə, á mbô pəənə́.

²²Ŋwu ntsəm páʼ a kě nə́ Mmaʼmbî kɔŋ pô ndɔ ə́ chîə á atû yə́. Malanata - Mmaʼmbî əwəg, yǐəə.

²³Apɔŋə́ntə́əmə Mmaʼmbî Yeso a chîə á mbô pəənə́.

²⁴Akɔŋnə mə á chîə á mbô pɨ ńdaŋə̂ á ndzəm Mmaʼmbî Klisto Yeso, Amɛn.