Read Awing 1 Kɔlintyanə 2 Bible Online

1 Kɔlintyanə 2 - Awing bible

1 Kɔlintyanə 2

¹Pəlimə́ mə, á nə ḿbə́ nə ndɛd maŋ nə ńgyǐ nə́ á mə́ fiʼtə̂ nə́ nkɨ Əsê yi lyáŋ nə́ wə́ á mbô pɨ lə́, maŋ nə ńkě lɔg lə́ pəmɛ́ pə́ atsáb pópə ayáŋə ndu mbî zɨ ńdɔg fiʼtə̂ áwɨ́ ə́wɨ́ pô.

²Ńté ńgə́ maŋ nə ńgɛd ntə́əmə mə á mə́ ləgnə̂ nə́ anuə atsəmə əghâ maŋ kə chî nə́ á mə́m pɨ, ńtíʼə ə́sóŋə lə́ tsɔʼə anu ńté Yeso Klisto, ə́fiʼtə̂ ándó pə́ nə ńkwumtə̂ nə́ yə́ atǐə apagləpaglə.

³Əghâ ándó maŋ nə ńgyǐ nə́ á mbi pɨ lə́, mbəəmə mə ə́ nə ḿbóolə, maŋ tíʼ ḿbɛ́nkə nə́ apɔ́gə.

⁴Maŋ nə ńkě ndzeʼkə́ mə pópə nkəənə mə lə́ nə́ atséebə ŋwu mbî páʼ á túg nə́ ayáŋə ndu mbî ə̈fɛ̂ pô. Maŋ nə ńtséebə lə́ nə́ ajîə á kə̈ nɨd nə́ mətɨ mə́ Ajwǐəsê.

⁵Lə́ pə́ ńgə́ kɔ nə́ túg mbimə́ á pə́ nə́ ayáŋə ŋwu mbîə, nə́ túg mbimə́ á pə́ nə́ mətɨ mə́ Əsê.

⁶Maŋ náŋkə nkɨ ə́ túg nə́ ayáŋə á mbô pɨ pó kwéŋ nə́ á mə́mə Ajwiə. Lə́ ayáŋ maŋ tsáb nə́ ə́wɨ́ lə́, lə́ kě ayáŋə á mbî zɨ pô, ńkě kə́ ḿbə́ ayáŋə pɨ páʼ pó túg nə́ mətəənə á mə́ sáʼ nə́ mbî zɨ pô ńté ńgə́ lə́ pəənə ándó mətɨ mɔ́b mə́ yǐ nə́ měe.

⁷Ayáŋ páʼ maŋ tsáb nə́ ńté lə́ ayáŋə Əsê yə nəlyaŋnə́ ándó pə́ lyáŋ nə́ zə́ələ́ á mbô pɨ pə́ mbîə, Əsê á kə pɛ́dtə ńdɔʼkə̂ ayáŋ zəənə́ mə́ fɛ̂ nə́ nəgháʼ wə́ á mbô pɛn záʼ pə́ pɔŋə̂ yǒ tsoŋkə̂ mbîə.

⁸Ŋwu tsə̌ páʼ ä sáʼ nə́ mbî zɨ a nə ńkě ayáŋə Əsê zɨ jî pô. Təmbɔʼ pó nə ńjî, tə ḿbə́ pó nə ńkě Mmaʼmbî əwɛ̂n páʼ a túg nə́ nəgháʼ lə́ atǐə apagləpaglə kwumtə̂ pô[1].

⁹Lə́ ndzaŋə ándó aŋwaʼlə Əsê a nə sóŋ nə́ ńgə́, “Anu páʼ ŋwunə a nə ńkě nə́ zɨ́ kɨ ńdzóʼ, ḿbɨ́ ḿbə́ nə́ anu páʼ ŋwunə a nə ńkě nə́ kwaŋ ńgə́ təmbɔʼ á láʼ ńdɔgə̂ aliʼ pô, lə́ tsɔʼə zɨ́d páʼ Əsê a tsoŋkə̂ nə́ á mbô pɨ pə́ kɔŋ nə́ yə́.”[2]

¹⁰Lə́ nə ḿbə́ pɛnə̂ ándó Əsê a nə ńgɛd nə́ ńgə́ pɛn jîə anuə nəlyaŋnə́ ajíə, ńdzoŋə̂ á ndzəmə Ajwiə ajíə. Lə́ Ajwi zə́ páʼ á náŋ nə́ anuə atsəm əshîʼnə, tə ḿbá mənu páʼ Əsê a lyáŋ nə́ á mə́mə akwaŋə ajíə.[3]

¹¹Lə́, nə́ ŋwu mbî, lə́ ajíə ajwi páʼ á chî nə́ á mə́m yí ándó páʼ á jî nə́ anuə atsəm ńté yə́, tsɔʼə nə́ ndú yi wɨ́, lə́ kə́ ḿbə́ tsɔʼə Ajwi páʼə pə́ nə́ yə Əsê a jî nə́ anuə atsəm ńté Əsê.

¹²Pɛn kě ajwiə mbî zɨ kə́ kwáalə pô, pɛn kwá lə́ Ajwi páʼ Əsê a tú nə́, ńjî ńgə́ pɛn jîə ajúmə atsəmə ándó Əsê a fɛ̂ nə́ á mbô pɛnə̂.

¹³Ńdaŋ ə́lɨ́d, pə̈g kě tséebə lə́ mənu páʼ lə́ zéʼkə nə́ ayáŋə ŋwu mbî ńdzéʼkə áwɛ̂n ə́wɨ́ pô, lə́ pəg tséebə lə́ mənu páʼ lə́ zéʼkə nə́ Ajwi ńdzéʼkə áwɛ̂n ə́wə́, ńtíʼə ńtyáatə mənu mə́ ajwi páʼ mə́ pə́ nə́ ndə̌ŋdəŋə́ á mbô pɨ pó túg nə́ Ajwiə.

¹⁴Lə́ ŋwunə ándó a kě nə́ Ajwi túg pô təmbɔʼ a kě kə́ ńtúg əpú páʼ Ajwǐəsê fɛ̂ nə́ pô. Atûə yə́ kě wɨ́ tsɔ́ʼnə pô, á chîə á mbô yí lə́ ándó əkəkóg mənu ńté ńgə́ lə́ tsɔʼə ŋwu páʼə a túg nə Ajwi páʼ a jî nə́ ndzaŋ mənu mə́ Ajwi mə́ pə́ nə́.

¹⁵Ŋwu páʼ a túg nə́ Ajwiə, a chî təmbɔʼ a jî ndzaŋə anuə atsəmə chî nə́, lə́ ŋwu tsə̌ a pə́ ńkě ə́wɨ́ chî təmbɔʼ a sáʼ əsáʼ əyí pô.

¹⁶Ndzaŋ páʼ aŋwaʼlə Əsê a sóŋ nə́ ńgə́, “Lə́ jî əwə ńjîə anuə ándó á chî nə́ á ntɨ́ Mmaʼmbîə? Əwə a chî təmbɔʼ á tə́gtə yə́?” Lə́ nə́ pəg, pəg jîə akwaŋə Klisto.