Read Awing 1 Kɔlintyanə 3 Bible Online

1 Kɔlintyanə 3 - Awing bible

1 Kɔlintyanə 3

¹Lə́ pəlimə́ mə, maŋ nə ńkě á mbô pɨ tsáb lə́ ándó maŋ nə ńtsáb nə́ á mbô pɨ pó túg nə́ Ajwi pô. Maŋ nə ńtséebə á mbô pɨ lə́ ándó pɨ pə́ mbî pəənə́, ándó pɔ̂nkə̂ á mə́m pɨ pó néŋ nə́ ntɨ́ nə́ Yeso.

²Maŋ nə nɔ́ŋkə áwɨ́ lə́ nə́ nəpə́ənə, maŋ nə kě məjî mimə tyantə̂ nə́ nə́ pɨ fɛ̂ pô, ńté ńgə́ pɨ nə ńkě kə̂ koʼə̂ pô, tə ńkoʼ əghâ nə́ nə kě kə̂ koʼə̂ á mə́ jî nə́ pô,

³ńté ńgə́ nə́ pɛ́d ńchîə ándó pɨ pə́ mbî pəənə́. Ndzaŋə ándó ŋwéetə́ pópə afyaʼə́ chî nə́ á tətɨ pɨ lə́, pɨ pɛ́d ńkə́ ńchî lə́ tsɔʼə ándó pɨ pə́ mbîə, ngɛdmə́nu ə́wɨ́ ə́ kə́ ḿbə́ tsɔʼə yi pɨ pə́ mbîə.

⁴Təmbɔʼ táʼ ŋwu əwəənə́ a tə́ ə́sóŋə ńgə́, “Maŋ lə́ ndzoŋ ndzəm Pɔlə,” yitsə̌ a tə́ ə́sóŋə ńgə́, “Maŋ lə́ ndzoŋ ndzəm Apolos,” nə kě ghɛlə̂ lə́ tsɔʼə ándó pɨ pə́ mbî?

⁵Apolos lə́ əwə? Pɔlə a kə́ ḿbə́ əwə? Pəg lə́ tsɔʼə ngaŋə́faʼ Əsê páʼ pɨ nə ńdaŋ nə́ á ndzəm pəg ńnéŋ ntɨ́ əwɨ́ nə́ Əsê. Ŋwu əwəg ntsəmə a faʼə̂ lə́ tsɔʼə afaʼ páʼ Mmaʼmbîə a fɛ̂ nə́ nə́ yí ńgə́ a faʼə̂.

⁶Maŋ nə ḿbǐ əpúmə, Apolosə a fyaʼə̂, Əsê a pə́ ńgɛd pɨ́d kɔ́ʼə.

⁷Ŋwunə ándó páʼ a pǐ nə́ pó ŋwunə ándó a fyaʼ nə́ pó kě nə́ anu yitsə̌ chî pô, tə ńdéʼtə Əsê páʼ ä ghɛd nə́ pɨ́d kɔ́ʼə.

⁸Ŋwunə ándó páʼ a pǐ nə́, pó ŋwunə ándó a fyaʼ nə́ ə́ faʼə̂ lə́ táʼə afaʼə. Əsê a yǒ tsɔ́ʼə afaʼə ŋwu ntsəm ə́zoŋ ndzaŋ páʼ a faʼ nə́.

⁹Ńté ńgə́ pəg nɔd ḿbə́ lə́ ngaŋə́faʼ Əsê, nə́ tíʼ ḿbə́ afoonə, ḿbə́ ndɛ̂sê páʼ a pɔ́ nə́.

¹⁰Ndzoŋ nə́ apɔŋə́ntɨ́ páʼ Əsê a fɛ̂ nə́ á mbô maŋ, maŋ nə ńnoŋkə̂ achîəndɛ̂ ándó chigə mbɔ̂ndɛ̂, ŋwu ndaʼə ä tíʼə ḿbɔ́ ndɛ̂ á ndu ə́wə́. Lə́ ŋwu ntsəmə a pə́ ńdɔg ndɛd ndzaŋ páʼ a pɔ́ nə́.

¹¹Ńté ńgə́ mbɔʼ ŋwu tsə̌ a kě achîəndɛ̂ yə ndaʼ pɔ́ tə ńdaŋə̂ yi pə pɛ́d nə́ tə ḿbɔ́ pô, á pə́ nə́ Yeso Klisto lə́.

¹²Təmbɔʼ ŋwu ntsəmə a tə́ ḿbóomə á ndumə achîəndɛ̂ zɨ́d zɨ, kəənə a tə́ ḿbóomə a pə́ nə́ atəənə́ gôl, kəənə yə sɛləba, kɨ məngɔʼ mimə əshîʼnə kɨ mətǐ kəənə akəkaʼ kɨ ngɔ́n,

¹³pə́ yǒ zə́ənə afaʼə ŋwu ntsəmə á Alě ándó Yeso a yǒ nə́ yǐəə, ńté ńgə́ Alě yi wɨ́ lə́ yǒ pə́ alě páʼ a yǒ nə́ jwə́ʼə afaʼə ŋwu ntsəm nə́ móg, ńté ńgə́ móg yǒ jwə́ʼ tíʼ nɨd ntê afaʼ ŋwu ntsəmə a nə faʼ nə́.

¹⁴Təmbɔʼ afaʼə ŋwu ntsəm páʼ a nə faʼ nə́ á ndúmə achîəndɛ̂ zə̂ a yǒ ńchwád móg, tə ḿbə́ a yǒ kwá ńtsɔ́ʼə afaʼ əjǐə.

¹⁵Lə́ təmbɔʼ móg yǒ ńtoonə̂ afaʼə ŋwu tsə̌, afaʼə ngaŋə á laŋ kətaŋə, lə́ yí nə́ nkɔ̌ʼmbɨ əyí a yǒ chwáalə, lə́ ə́ pə́ chwád lə́ tsɔʼə ándó ŋwunə ándó pə́ chúb nə́ yə́ á mə́m mógə́.

¹⁶Pɨ kě jî ńgə́ pɨ nə́ nkɔ̌ʼmbɨ əwɨ́ lə́ Ndɛ̂sê, Ajwiə pə́ nə́ yə Əsê a kə́ ńchîə á mə́m pɨ?

¹⁷Təmbɔʼ ŋwu ntsəmə ándó páʼ a tsəŋkə̂ nə́ Ndɛ̂sê, Əsê a yǐ ńkə́ ńtsəŋkə̂ yə́, ńté ńgə́ Ndɛ̂sê ə́ ŋwaʼə̂, pɨ nə́ nkɔ̌ʼmbɨ wɨ́ pɨ pə́ zə́ələ́.

¹⁸Kɔ gho fɨg mbɨ əzo, təmbɔʼ ŋwu tsə̌ á mə́m pəənə́ a kwaŋ ńgə́ yə́ a túgə ayáŋ, ndzoŋ ndzaŋ páʼ mbî kwaŋ nə́ ńgə́ pó yáŋ lə́, a sɛlə̂ “akəkóg” ńjî ńgə́ a yǐ ńtúgə chigə ayáŋə.

¹⁹Ńté ńgə́ ayáŋə á mə́m mbî zɨ lə́ akəkógə́ a əmə́g Əsê. Ndzaŋə ándó páʼ aŋwaʼlə Əsê a sóŋ nə́ ńgə́, “Əsê á téemə atəənə́ ńgwaamə̂ pɨ pó yáŋ nə́ á mə́mə ayáŋə azóobə́,”

²⁰aliʼə́ aŋwaʼlə yitsə̌ a kə́ sóŋ ńgə́, “Mmaʼmbîə a jî ńgə́ akwaŋə anuə pɨ páʼ pó yáŋ nə́ lə́ ənukə́taŋə.”

²¹Lə́ələ́ pə́ ńgə́ kɔ ŋwu tsə̌ a kɔn ndzɔʼ əjǐ nə́ anu páʼ təmbɔʼ pɨ pə́ mbî pə́ faʼə̂. Ńté ńgə́ ajúmə atsəm lə́ azə́ənə́.

²²Kəənə a pə́ pə́ Pɔl kəənə Apolosə kɨ Sifasə kɨ mbî kɨ nchîmbî kɨ nəwû kɨ mənu mə́ lɔg nə́ aliʼ əghâ nə́, kɨ mimə́ pɛ́d nə́ tə yǐ - atsəmə atsəm lə́ azə́ənə́,

²³pɨ lə́ pɨ pə́ Klisto, Klisto a pə́ yi Əsê.