Read Awing 1 Kɔlintyanə 5 Bible Online

1 Kɔlintyanə 5 - Awing bible

1 Kɔlintyanə 5

¹Pə́ tə́ ḿbyádnə ə́sóŋə ńgə́ ndzɔʼə́ tə apímnə ə́ chîə tətɨ pɨ tə ḿbə́gə. Alǒ pɨ pə́ tə jîə anǔəsê á péʼ ńkě á mə́m pó ə́lɨ́d chî pô. Ŋwunə a kwáalə ngwě tǎ əyǐə.

²Nə́ tíʼə ńkɔn ndzɔʼ zəənə́: Pɨ pěʼ ńchî mbɔʼ nə́ fɨnə̂ tə ə́fóg ndzaŋ ŋwu zɨ́d zəənə́ á mə́m nkyeetə zəənə́.

³Pɛn pǎtə ńkě á əshîsaŋ chî pô lə́, maŋ pə́ ńchîə á mə́m pəənə́ á mə́mə ajwiə, ńkə́ ḿbɛ́dtə ə́sáʼ əsáʼ ŋwu páʼ a nə ńgɛd nə́ anu zɨ́d zɨ tsɔʼə ándó maŋ nə ńchîə aliʼ wɨ́d wə̂.

⁴Təmbɔʼ nə́ kyeetə̂ nə́ əlɛ́n Mmaʼmbî əwɛ̂n Yeso, maŋ chîə á mə́m pɨ nə́ ajwi, mətɨ mə́ Mmaʼmbî əwɛ̂n Yeso mə́ kə́ ńchîə á mə́m pɛn,

⁵nə́ fɛ̂ a ŋwu wɨ́d ghɛnə́ á mbô Satan ńjî ńgə́ a tsəŋkə̂ na mbɨ əjǐ, ajwiə ajíə á yǒ ńtíʼ ńchwáalə á alě páʼ Tǎ a yǒ nə́ ńgyǐəə.

⁶Nə́ kɔn ndzɔʼ lə́ a kě pɔŋ pô. Nə́ jîə aliʼə́ atsáb zɨ ńgə́, “Tsɔʼə mɔ́ mbê apéenə məkálə́ á kwúnə á mə́mə atsɛ̂káŋə apéenə məkálə́ ńgɛlə̂ zə́ələ́ á kɔ́ʼə.”

⁷Fóg nə́ ndɛn mbê apéenə məkálə́ ghɛnə́ á mə́m pɨ páʼ wə́ələ́ á pə́ nə́ təpɔŋ lə́ ńjî ńgə́ nə́ pyádnə ŋ́ŋwaʼə̂. Ńjî ńgə́ nə́ tíʼ ńchîə ándó atsɛ̂káŋə apéenə məkálə́ yə fî tə mbê yi ndaʼə á mə́m wə́, ndzaŋ maŋ jî nə́ ńgə́ nə́ pyádnə ŋ́ŋwaʼ lə̂. Ńté ńgə́ pə́ fyaʼə́nu nə́ Yeso páʼ a pə́ nə́ mɔ́ mbéŋ ndzɛd akɔŋtə Ndzáʼkə.

⁸Lə́ələ́ á pə́ ńgə́ pɛn jîə alě mbîə akɔŋtə zəənə́, kɔ pɛn jîə zə́ələ́ á pə́ nə́ apéenə məkálə́ páʼ á túg nə́ ndɛn mbê páʼ wə́ələ́ á pə́ nə́ təpɔŋ pópə ntɨ́ təpɔŋə, pɛn jîə á pə́ apéenə məkálə́ páʼ á kě nə́ mbê túg pô, yi páʼ á túg nə́ ntɨ́ yi ŋwaʼ nə́ pó ndə̌ŋdəŋə́.

⁹Á mə́mə aŋwaʼlə páʼ maŋ nə ŋ́ŋwaʼlə̂ nə ə́fɛ̂ á mbô pɨ, maŋ nə sóŋə á mə́m ə́wɨ́ ńgə́ kɔ nə tə́ ńtsɛntə̂ pɨ pə́ ngaŋə́jîə mə̂ghabə.

¹⁰Maŋ nə kě sóŋə lə́ ngaŋə́jîə mə̂ghabə páʼ pó kě nə́ Əsê jî pô kɨ pəkad kɨ pəzə̌ kɨ pɨ pə́ ghóʼkə nə́ pɔ́ pə́ pəkɔ́ pô. Maŋ nə ńkě lə́ ághɔ́b sóŋə pô ńté ńgə́ mbɔʼ gho ghə́ lə́ʼə ághɔ́b gho shib ə́fɛ́lə á gho á mə́m mbî zəənə́.

¹¹Anu páʼ maŋ nə sóŋ nə́ lə́ nə́ ḿbə́ ńgə́ kɔ pɨ kyeetə̂ pɨ pə́ ŋwu páʼ a fóŋ nə́ mbɨ əjǐ ńgə́ yí lə́ ndim əwɨ ḿbə̈ ńjîə mə̂ghabə, kɨ ngǎŋfóʼndé, kɨ ńgóʼkə pɔ́ pə́ pəkóomə́, kɨ ngaŋmənaŋə́, kəənə apɛ̌ləmə́loʼə, kɨ ndzə̌lə. Kɔ nə́ pěʼ ńkwéʼnə ńjî məjî pɨ pə́ ndzaŋ ŋwu zɨ́d zə̂.

¹²Maŋ kě chîə á mə́ tə́ nə́ sáʼ əsáʼ pɨ páʼ pó kě nə́ á mə́m nkyeetə pɔ́ pə́ Yeso chî pô. Nə́ chîə á mə́ sáʼ nə́ lə́ əsáʼ pɨ páʼ pó chî nə́ á mə́m nkyeetə.

¹³Əsê a sáʼ nə́ məsáʼ mə́ pɨ páʼ pó chî nə́ apeŋə́. “Fɨ́dkə nə́ ŋwu təpɔŋə á mə́m nkyeetə əzəənə́.”