Read Awing 1 Kɔlintyanə 6 Bible Online

1 Kɔlintyanə 6 - Awing bible

1 Kɔlintyanə 6

¹Təmbɔʼ ŋwu ə́wɨ́ yitsə̌ a túgə azɔŋ pó mɔ́mɛ́ əyǐ, kɔ lɔgə̂ yí ńgɛnə̂ á mbô pɨ pə́ tə jî Əsê ńgə́ pó sáʼ əsáʼ əghɔ́b yə́. A chîə á mə́ lɔg nə́ yí ə́ ghɛn lə́ á mbô pɨ pə́ Əsê.

²Nə́ kě jî ńgə́ pɨ pə́ Əsê pó yǒ sáʼ mbî, təmbɔʼ nə́ chîə á mə́ yǒ nə́ sáʼ mbî, tə ḿbə́ nə́ kě koʼnə̂ á mə́ sáʼ nə́ kə́yé məsáʼ?

³Nə́ kě jî ńgə́ pɛn ghɛd sáʼ məsáʼ mə́ pətseŋpə́ndɛ́pə́sê? Mbɔʼ pɛn chîə á mə́ yǒ nə́ sáʼə ághɔ́b, pɛn pɨ ńkě chî mbɔʼ pɛn sáʼ mənu mə́ mbî mɨ?

⁴Lə́ələ́ pə́ ńgə́ təmbɔʼ nə́ túgə azɔŋə ándó zɨ́d zɨ nə́ pɨ ńdɔg ńgɛn lə́ á mbô pɨ páʼ pó kě nə́ nətɨnə́ á mə́m nkyeetə pɔ́ pə́ Əsê túg?

⁵Mäŋ sóŋə á zɨ lə́ á mə́ néŋ nə́ əsə́ənə atû pəənə́. Nə́ loonə̂ lə́ á mə́ sóŋ nə́ nə́ maŋ ńgə́ ŋwu tsə̌ a kě tətɨ pɨ chî páʼ a pyádnə nə́ ńtúgə ajíənuə á mə́ sáʼ nə́ məsáʼə tətɨ pəlimə́ á mə́m Yeso?

⁶Táʼ ndimə́ a pəənə̂ ńdɔgə̂ a mɔ́mɛ́ əyǐ ńgɛnə̂ nə́ yə́ aliʼə́sáʼə́məsáʼ ńgə́ pɨ pə́ tə́ jî Əsê pó sáʼ əsáʼ əghóobə́?

⁷Ndzaŋ pɨ lɔg nə́ pɔ́pə́mɛ́ pɨ ńgɛnə̂ nə́ pó ńgə́ pɨ pə́ tə́ jî Əsê pó sáʼ məsáʼ mɨ lə́, á nɨd ńgə́ pɨ pɛ́dtə ńkwéʼnə ə́soŋ nətɛ́n zə́ənə́ á ndəsê, ńgwǔəə. Təmbɔʼ ŋwunə a kě anuə á mbô pɨ wǔ? Təmbɔʼ ŋwunə a kě ajúmə azɨ́ kətaŋ jî?

⁸Á pɛn ḿbɨ ḿbə́ pɨ pɨ jî nə́ əpú pɔ́pə́mɛ́ pɨ́ kətaŋə, ńkə́ ńgwǔəə anuə á mbô pó.

⁹Nə́ kě jî ńgə́ pɨ pə́ təpɔŋ pó yǒ kě á mə́mə anuə Nəfoonə Əsê ə́ kwú? Kɔ nə́ fɨg mbɨ əzəənə́, ńté ńgə́, ngaŋə́ zɔ́ʼə ndzɔʼə́ mbǒʼḿbóʼə́ kɨ ngaŋə́ghóʼkə məsê mə́ məfɨgə, kɨ ngaŋə́jîə mə̂ghabə, kɨ mbyâŋnə páʼ ə́ zɔ́ʼ nə́ yitsə̌ mbyâŋnə,

¹⁰kɨ pəzə̌, kɨ ngǎŋfóʼndé, kɨ əpɛ̌mə́loʼ, kɨ ngaŋmə́naŋ, kɨ pəzə̌ láʼ kě á mə́mə Anuə Nəfoonə Əsê kwú pô.

¹¹Pɨ pətsə́ nə ńchî lə́ lə́ələ́, pə́ nə ḿbɛn ńtíʼ ə́sogə̂ áwə́ənə́ á mə́m təpɔŋ; Əsê a tíʼ ńgɛd nə́ ŋwaʼə̂ á mə́ pə́ nə́ pɔ́ píə. Ńtíʼ ńgɛd nə́ tɨ́ ndə̌ŋdəŋ nə́ əlɛ́n Mmaʼmbî Yeso Klisto ńkə́ ńdaŋ nə́ Ajwi páʼ á pə́ nə́ yə Əsê əzɛnə̂.

¹²“Pə́ pí ńgə́ təmbɔʼ maŋ faʼə̂ anuə atsəmə,” lə́ anuə atsəmə a pə́ ńkě á mbô maŋ pɔŋ pô. “Pə́ pí ńgə́ təmbɔʼ maŋ faʼə̂ anuə atsəmə,” lə́ maŋ kě yǐ pí ajûtsə́ á lɔgə̂ mə ə́sɛlə̂ apoʼ ə́wɨ́ pô.

¹³“Məjî mə́ chî lə́ ńgə́ pə́ néŋə á nəpəmə, nəpəm nə́ kə́ ńchî lə́ ńgə́ pə́ néŋ məjî ə́wə́.” Lə́ Əsê a ghɛd tsəŋkə̂ pɨ́d ətsəmə, mbɨ əzo kě chî lə́ ńgə́ gho tə́ ńdɔgə̂ ńdzɔ́ʼ ndzɔʼə́ wɨ́ mbǒʼḿbóʼ pô, ə́ chî lə́ á mə́ faʼ nə́ á mbô Mmaʼmbîə, Mmaʼmbîə á kə́ ńdɔg ndɛd nə́ zə́ələ́.

¹⁴Əsê a nə ńjúmkə Mmaʼmbîə á nəwûə, a yǒ kə́ júmkə áwɛ̂n nə́ mətɨ míə.

¹⁵Nə́ kě jî ńgə́ məmbɨ mɨ lə́ əlam mbɨ Yeso Klisto? Maŋ pɛn yǐ tíʼ ə́ lɔgə̂ alamə́ mbəəmə Yeso Klisto ə́ ghɛlə̂ zə́ələ́ á tíʼ ḿbə́ alamə́ mbəəmə akwɛlə? Ngá!

¹⁶Nə́ kě jî ńgə́ ŋwu mbyâŋnə ntsəm páʼ a tsɛntə̂ nə́ mbɨ əjǐ pó njîəkwɛlə pó yí tíʼ ḿbə́ lə́ táʼ mbɨ? Ńté ńgə́ aŋwaʼlə Əsê á sóŋ ńgə́, “Pó pɛ́n pɛ̌ yǒ tíʼ pə́ lə́ táʼ mbəəmə.” [4]

¹⁷Lə́ ŋwu páʼ a tsɛntə̂ nə́ mbɨ əjǐ pó Mmaʼmbî, pó yí tíʼ ḿbə́ lə́ táʼ á mə́mə ajwiə.

¹⁸Lə́ʼə á mə́ zɔ́ʼ nə́ ndzɔʼə́ mbǒʼḿbóʼ ńté ńgə́ pətsɨ́ pətəpɔŋ pətsəm páʼ ŋwunə a ghɛd nə́ pɨ́d pə́ kě lə́ á mə́m mbɨ yí chî pô lə́ ŋwu páʼ a zɔ́ʼ nə́ ndzɔʼə́ mbǒʼḿbóʼ ä ghɛlə̂ təpɔŋ lə́ á mə́m mbɨ əjǐə.

¹⁹Gho kě jî ńgə́ mbɨ əzo lə́ Ndɛ̂ Ajwǐəsê páʼ zɨ́d ə́ chî nə́ á mə́m gho, páʼ Əsê a nə fɛ̂ nə́ nə́ gho? Gho kě lə́ á ngǎ gho chî pô;

²⁰Əsê a nə ńjúnə áwɨ́ lə́ jú nə́, lə́ pə́ ńgə́ nə́ lɔg mbɨ əzɨ ə́fɛ̂ nəgháʼ wə́ á mbô Əsê.