Read Awing 1 Kɔlintyanə 7 Bible Online

1 Kɔlintyanə 7 - Awing bible

1 Kɔlintyanə 7

¹Nə́ əghâ nə́, ńgɛn nə́ mənu páʼ pɨ nə ŋ́ŋwaʼlə̂ nə́ ńté lə́, a pěʼ ḿbɔŋ ńgə́ kɔ ŋwu mbyâŋnə a zɔ́ʼə.

²Ndzaŋə ándó anuə zɔ́ʼə ndzɔʼə́ mbǒʼḿbóʼə́ á chî nə́ á mə́m pɨ lə́, ŋwu mbyâŋnə ntsəmə a zɔ́ʼ əyǐ məngyě, məngyě ntsəmə a kə́ ńdzɔ́ʼ əyǐ ndúmə.

³Kɔ ŋwu mbyâŋnə a zɔŋ mbɨ əjǐə á mbô ngwě əyǐə, kɔ məngyě a kə́ ńdzɔŋ əjǐə á mbô ndu əyǐə.

⁴Ńté ńgə́ mbɨ məngyě ə́ kě lə́ tsɔʼə əjǐ yí təjiʼ pô, lə́ əzɔb ndú əyǐə. Mbɨ ŋwu mbyâŋnə ə́ kě kə́ ḿbə́ lə́ tsɔʼə əjǐ yí təjiʼ pô, ńkə́ ḿbə́ lə́ yi ngwě əyǐə.

⁵Kɔ ŋwu mbyâŋnə a zɔŋ mbɨ əjǐə á mbô ngwě əyǐ, kɔ məngyě a kə́ ńdzɔŋ mbɨ əjǐə á mbô ndú əyǐə, tə ńdéʼtə nə́ pěʼ ḿbímnə á mə́ chî nə́ ə́lɨ́d nə́ mɔ́ akəmə ndɛlə́ á mə́ fɛ̂ nə́ mbɨ əzəənə́ á mə́mə achaʼtə́sê. Ndɛd yi wɨ́ yǐ ńdaŋ nə́ pɨ ńchúʼə á mə́ ghɛd nə́ mənu mɨ́ ńjî ńgə́ kɔ Satanə á yǒ ńkwaʼlə̂ ŋwu əwɨ yitsə̌ a ghɛlə̂ təpɔŋ ńté ńgə́ a kě chî təmbɔʼ a wam mbɨ əjǐ pô.

⁶Maŋ kë sóŋə lə́ ńgə́ mbɔʼ nə́ shib ńgɛd ə́lɛ̌ pô, ḿbə́ ə́sóŋə lə́ ńgə́ mbɔʼ nə́ kɔŋ nə́ ghɛd ə́lə́ələ́.

⁷Maŋ pěʼ ńkɔŋ ńgə́ mbɔʼ ŋwu ntsəmə a chîə ándó maŋ chî nə́, Əsê a pɛn ńgɛlə̂ ŋwu ntsəm lə́, ə́fɛ̂ məmí məfɛ̂nə. Ŋwunə a túg məmí ŋwunə túg məmíə.

⁸Əghâ nə́ mäŋ sóŋə á mbô pɨ mbyâŋnə páʼ ə́ kě nə́ kə̂ zɔ́ʼə pô pópə pəkog ńgə́, a pɔŋə̂ á mbô pó á mə́ chî nə́ tə zɔ́ʼə ándó maŋ chî nə́ lɛ̌.

⁹Lə́ təmbɔʼ pó chî chî təmbɔʼ pó wam mbɨ əzɔb pô, pó zɔ́ʼə, ńté ńgə́ a pɔŋə̂ á mə́ zɔ́ʼ nə́ ńtsɛɛlə̂ á mə́ tə́ nə́ kéelə lumə̂.

¹⁰Ńgɛnə̂ á mbô pɨ páʼ pó zɔ́ʼ nə́, maŋ sóŋ ńgə́, lə́ pə́ ńkě mäŋ sóŋə pô, lə́ sóŋ Mmaʼmbîə: ńgə́ kɔ məngyě a fɛ́lə á ndɛ̂ ndú əyǐə;

¹¹Lə́ mbɔʼ a fɛ́d, kɔ a pɨ ńdzɔ́ʼə, kəənə a pɨ ḿbímnə pó ndú əyǐ ḿbɨ ḿbəənə̂ á ndɛ̂. Kɔ ŋwu mbyâŋnə a kə́ fógə a ngwě əyǐə.

¹²Á mbô apuʼə pɨ maŋ sóŋ ńgə́, (zəənə́ á fɛ́d lə́ á mbô maŋə, á kě lə́ á mbô Mmaʼmbî fɛ́d pô) ńgə́ mbɔʼ ŋwu páʼə a pí nə́ nə́ Yeso a túgə məngyě páʼ a kě nə́ nə́ Yeso pí pô, məngyě yi wə́ a kɔŋ ńgə́ pó yí ə́ chî, kɔ a fógə yə́.

¹³Təmbɔʼ məngyě a kə́ ńtúgə a ndú əyǐ páʼ a kě nə́ nə́ Yeso pí pô, ndú wə̂ a kə́ ńkɔŋ ńgə́ pó yí chî, kɔ a fɛ́d ndzɔʼə́.

¹⁴Ńté ńgə́ ndú wə̂ páʼ a kě nə́ nə́ Yeso pí pô lə́, a ŋwaʼ ńdaŋə̂ á ndzəm ngwě əyǐə, məngyě páʼ a kě nə́ nə́ Yeso kə́ ḿbí pô lə́ a kə́ ŋ́ŋwaʼ ńdaŋə̂ á ndzəm ndú əyǐ páʼ a pí nə́ nə́ Yeso lə̂. Təmbɔʼ á pěʼ ńchî ə́lɨ́d pô tə ḿbə́ pɔ́ pɔ́b pə́ pěʼ ńkě ŋwaʼ pô, á pɛn ḿbə́ ə́lɨ́d lə́ pó ŋwaʼə̂.

¹⁵Lə́ təmbɔʼ yí páʼ a kě nə́ nə́ Yeso pí pó lə́, a kɔŋə̂ á mə́ ghɛn nə́ yí, pə́ mɛdtə̂ yə́ a ghɛnə̂. Nə́ ndú wɨ́d wə̂, məngyě wə̂ páʼ a pí nə́ nə́ Yeso lə́, kɨ ŋwu mbyâŋnə wə̂ páʼ a pí nə́ nə́ Yeso lə́, a chîə á mə́ ghɛd nə́ anuə atsəm páʼ a kɔŋ nə́. Ńté ńgə́ Əsê a sóŋ ńgə́ pɛn pətsəm chî nə́ mbwɔ́dnə.

¹⁶Gho, məngyě páʼ gho pí nə́ ńdzoŋə̂ Yeso, gho jî nə́ akə̂ ńgə́ mbɔʼ Əsê a kě ndzəm gho laŋ ńchwádkə ndú əgho? Gho ndú, gho jî nə́ akə̂ ńgə́ mbɔʼ Əsê a kě ndzəm gho laŋ ńchwádkə ngwě əgho?

¹⁷Ŋwu ntsəmə a chî nə́ nchîmbî əjǐ ńdzoŋə̂ anu páʼ Mmaʼmbîə a nə fɛ̂ nə́ nə́ yə́, ndzaŋ páʼ a nə ńchî nə́ əghâ páʼ Əsê a nə fóŋ nə́ yə́. Lɛ̌ ntəgə́ páʼ mäŋ fɛ̂ nə́ á mə́m mənkyeetə mə́ pɔ́ pə́ Əsê mətsəmə.

¹⁸Təmbɔʼ ŋwunə a nə ńtə́ ḿbí Əsê, pə́ nə ḿbɛ́dtə ḿbóʼə yə́, kɔ a moomə̂ á mə́ lyáŋ nə́ alagə́ yəwə́; lə́ mbɔʼ ŋwu páʼ pə́ kě nə́ yí kə̂ póʼə pô, mbɔʼ a pí ndzoŋ ndzəm Yeso, kɔ pə́ pɨ ḿbóʼə yə́.

¹⁹Ńté ńgə́ təmbɔʼ pə́ póʼə gho kɨ ńchî póʼ pô á kě nə́ anu yətsə́ chî pô. Anu páʼ á chî nə́ ə́wɨ́ lə́ ńgə́ nə́ tə́ ńdzoŋə̂ məntəgə́ mə́ Əsê.

²⁰Ŋwu ntsəmə a chî tsɔʼə ndzaŋə a nə ńchî nə́ əghâ Əsê a nə fóŋ nə́ yə́.

²¹Gho nə ḿbə́ lə́ apoʼ əghâ páʼ Əsê a nə fóŋ nə́ gho? Kɔ gho shǎa; Lə́ təmbɔʼ gho zɨ́ əsêndúmə á mə́ fɛ́d nə́ á mə́m ə́wɨ́, gho fɛ́lə.

²²Ńté ńgə́ apoʼ páʼ Mmaʼmbîə a fóŋ nə́, a tíʼ ḿbə́ lə́ ŋwunə á ngǎ yə́ á mbô Mmaʼmbîə. Tsɔʼə nə́ ndú wɨ́d wə́, ŋwu páʼ a nə ńkě nə́ apoʼ pô əghâ páʼ Mmaʼmbîə a nə fóŋ nə́ yí, a tíʼ ḿbə́ lə́ apoʼə á Yeso.

²³Əsê a nə ńjúnə áwɨ́ lə́ jú nə́, lə́ələ́ pə́ ńgə́ kɔ nə́ pɨ ḿbímə apoʼə á mbô ŋwu məsɔŋə́.

²⁴Pəlimə́ mə á mə́m Yeso, ŋwu ntsəmə a chî pó Əsê ndzaŋ páʼ a nə́ ńchî nə́ ndɛlə́ ándó páʼ Əsê a nə́ fóŋ nə́ yí lə́.

²⁵Əghâ nə́, anu ńté pɨ pə́ kě nə́ zɔ́ʼ pô, maŋ kě anu yətsə́ túgə á mə́ sóŋ nə́ á mbô pɨ páʼ á lǒo nə́ á mbô Əsê pô, lə́ mäŋ sóŋə lə́ azéemə anu páʼ maŋ kwaŋ nə́, ándó ŋwu páʼ apɔŋə́ntə́əmə Mmaʼmbîə á chî nə́ nə́ yə́, a kə́ ḿbə́ ŋwu ə́sóŋə anu pə́ zóʼə.

²⁶Ńdzoŋ ngə́ʼ páʼ ə́ chî nə́ əghâ nə́, maŋ kwaŋ ńgə́ á pěʼ ḿbɔŋə̂ á mbô ŋwu ńgə́ a chî tə zɔ́ʼə.

²⁷Gho túgə məngyě? Kɔ pɨ ńdoonə̂ á mə́ kəm nə́ yə́. Gho kě kə̂ zɔ́ʼə? kɔ gho pɨ ńnáŋə gho məngyě.

²⁸Lə́ mbɔʼ gho zɔ́ʼ, gho kě lə́ təpɔŋ ghɛd pô, kɨ mbɔʼ məngyě a kě nə́ kə̂ zɔ́ʼə pô a zɔ́ʼ, a kě lə́ təpɔŋ ghɛd pô. Lə́ pɨ páʼ pó zɔ́ʼ nə́ pó chî nə́ ngə́ʼ ńté mənu mə́ mbî məənə́, lə́ ḿbə́ ńgɛn nə́ pɨ maŋ loonə̂ ńgə́ kɔ nə́ kwúnə á mə́m ngə́ʼ zɨ́d zə̂.

²⁹Anu páʼ maŋ sóŋ nə́ á mbô pɨ pəlimə́ mə lə́ ńgə́, ndɛd yi wɨ́ ə́ tə́ ḿbáatə, ńchwáakə nə́ pə́ əghâ nə́ mbyâŋnə páʼ ə́ zɔ́ʼ nə́ pó chîə mbîə ándó pi pó kě nə́ zɔ́ʼ pô.

³⁰Pɨ pó kyéŋ nə́ pó chîə ándó anu yətsə́ á kě nə́ tə́ ńdaŋə̂ pô, pɨ pó tə́ nə́ ńkɔŋtə̂ pó chîə ándó pɨ pó kě nə́ tə́ ńkɔŋtə̂ pô, pɨ pó jú nə́ əpúmə, pó chîə ándó pɨ pó kě nə́ ajú túg pô,

³¹pɨ pó faʼ nə́ á mə́m əpú mbî kɔ pó néŋ ntɨ́ əghɔ́b ə́wə́. Ńté ńgə́ ndzaŋə ándó mbî zɨ chî nə́ əghâ nə́ lə́, zɨ́d kě yǐ pɨ chî ndi ə́ sag pô.

³²Maŋ yǐ kɔŋ ńgə́ kɔ nə́ tə́ ńjwaʼ mbɨ əzɨ ńté mənu mə́ mbîə; ŋwunə a kě nə́ zɔ́ʼ pô a tə́ ńkwaŋə̂ pə́ mənu ńté afaʼə Mmaʼmbîə, ńté ńgə́ a loonə̂ á mə́ faʼ nə́ afaʼ páʼ Mmaʼmbî əyǐə a yǐ nə́ kɔŋə̂.

³³Lə́ ŋwu páʼ a zɔ́ʼ nə́ a kwaŋə̂ lə́ əpú mbî, ńté ńgə́ a loonə̂ á mə́ ghɛd nə́ mənu páʼ ngwě əyǐə yǐ nə́ kɔŋə̂,

³⁴ńdaŋ ə́lɨ́d a tíʼ ńtə́əmə a yə́ á tətɨ nkǐə. Lə́ məngyě páʼ a kě nə́ zɔ́ʼ kɨ mɔ̂ məngyě a kě nə́ ŋwu mbyâŋnə kə́ jîə a kwaŋə̂ lə́ ndzaŋ mbɔʼ á tə́gə atûə ají lə́ á mə́ faʼ nə́ á mbô Mmaʼmbîə, ńdoonə̂ á mə́ ŋwaʼ nə́ nə́ mbɨ pó ajwiə. Lə́ məngyě páʼ a zɔ́ʼ nə́ a kwaŋə̂ lə́ mənu mə́ mbîə, ńdoonə̂ lə́ á mə́ ghɛd nə́ mənu mə́ pɔŋə̂ a ndú əyǐə.

³⁵Maŋ sóŋə zɨ lə́ ńté ńgə́ maŋ loonə̂ á mə́ kwá nə́ áwə́ənə́, maŋ kě loonə̂ lə́ á mə́ zɔŋ nə́ ńgə́ kɔ nə́ tə́ ńgɛlə̂ mənu pô. Lə́ ḿbə́ ńdoonə̂ ńgə́ mbɔʼ nə́ tə́ ńgɛlə̂ mənu nə́ ndú yi əshîʼnə, ńkə́ fɛ̂ mbɨ əjɨ ntsəmə á mbô Mmaʼmbîə.

³⁶Ńgɛn nə́ ŋwu páʼ a tə́g nə́ məloʼə á atû ngwě əyǐ: mbɔʼ ŋwu mbyâŋnə a kwaŋ ńgə́ anu pó məngyě wə́ ghɛd nə́ a kě koʼnə̂ pô, a kə́ ńtə́ ńdumə̂ tə́shú ńté anuə ndzɔʼə́, ńkə́ ńkwaŋ ńgə́ mbɔʼ pó yí ghɛd ndzɔʼə́ əghɔ́b yi, a pɔŋ ńgə́ a zɔ́ʼə məngyě yi wɨ́ ńnéŋə ndɛ̂ ndzoŋ ndzaŋ páʼ ntɨ́ yí lɔ nə́. Ńté ńgə́ mbɔʼ a zɔ́ʼə məngyě wə̂, təpɔŋ yitsə̌ á kě ə́wɨ́ chî pô.

³⁷Lə́ mbɔʼ ŋwunə a sóŋə á ntɨ́ yí ndə̌ŋdəŋ ńgə́, yí yǐ wam mbɨ əjǐ ə́ kě zɔ́ʼə mɔ̂ məngyě páʼ a nə ńchî nə́ mə́ zɔ́ʼ nə́ lə́, ńkə́ ḿbə́ ńgə́ mbɔʼ a wam mbɨ əjǐ, á faʼə̂ anu páʼ a tsɔʼ nə́ a ntɨ́ yí lə́, a jî ńgə́ a faʼə̂ lə́ anu yə əshîʼnə páʼ a kě nə́ məngyě wə̂ zɔ́ʼ pô.

³⁸Lə́ələ́ a pə́ ńgə́ ŋwu mbyâŋnə páʼ a zɔ́ʼ nə́ məngyě yi wə̂ a faʼ əshîʼnə, ŋwu mbyâŋnə páʼ a kě nə́ yə́ mɔ̂ məngyě wə̂ zɔ́ʼ pô, a chígə́ faʼə̂ anu yə əshîʼnə.

³⁹Məngyě páʼ a zɔ́ʼ nə́ a chî mə́ mɛdnə̂ nə́ á mbô ndú əyǐ páʼ ndú əyǐ a pɛ́d nə́ á mbî, lə́ mbɔʼ ndú əyǐ yi wə́ a kwû, a koʼnə̂ á mə́ zɔ́ʼ nə́ ndú yi ndaʼ páʼ a kɔŋ nə́. Lə́ ŋwu mbyâŋnə wə́ a shib ḿbə́ mɔ́ Klisto.

⁴⁰Lə́ nə azéemə akwaŋ, maŋ jî ńgə́ a yǐ pyádnə chîə yí əshîʼnə páʼ təmbɔʼ a chîə yə́ ŋwu ndaʼ pɨ zɔ́ʼ pô. Lɛ̌ azéemə akwaŋə, maŋ nə́ nkɔ̌ʼmbəəmə, maŋ kwaŋ ńgə́ maŋ túgə Ajwi páʼ á lǒo nə́ á mbô Əsê.