Read Awing 1 Kɔlintyanə 8 Bible Online

1 Kɔlintyanə 8 - Awing bible

1 Kɔlintyanə 8

¹Nə́ əghâ nə́, maŋ yǐ sóŋə anu ə́ té məjî páʼ pə̈ fɛ̂ nə́ á mbô məsê mə́ məfɨgə. Pəg jî tsɔʼə əshîʼnə nə́ ńgə́, “Pɛn pətsəm túgə ajíənu,” ándó pə́ sóŋ nə́ lə́. Lə́ mbô ajíənu zə́ ə́ pə́ ńgɛlə̂ ŋwunə a kɔ́ʼkə lə́ pə́ mbɨ əjǐə, páʼ akɔŋnə a ghɛd nə́ a kwíŋə lə́ kwíŋ nə́.

²Ŋwu páʼ a kwaŋ nə́ ńgə́ yə́ jîə anu yətsə́, a kě chígə́ ńjî ndzaŋ páʼ a pěʼ nə́ ńchîə á mə́ jî nə́ pô.

³Lə́ ŋwu páʼ a kɔŋ nə́ Əsê, Əsê jîə yə́.

⁴Ńgɛn nə́ anuə ajíəmə́jî páʼ pə́ fɛ̂ nə́ nə́ məsê mə́ məfɨg: pɛn jî ńgə́, “Əsê məfɨg lə́ ajú páʼ á kě nə́ á mbî chî pô,” ńkə́ ńjî ńgə́, Lə́ chî tsɔʼə táʼ Əsê á mə́m mbîə.

⁵Mbɔʼ pə́ pěʼ ə́sóŋ ńgə́ pɨ pə́ fóŋ nə́ nə́ məsê lə́ pó chî wɨ́ kəənə nəpó pó ndəsê, “məsê mə́ məfɨgə” mimə wɨ́ pó “pəmaʼ pə́ mbî” pó pǎtə ńchî wɨ́ lɛ ti lə́,

⁶lə́ á mbô pɛn lə́ pə́ ńchî tsɔʼə táʼ Əsê, Tǎ, páʼ a tsoŋkə̂ nə́ ajúmə atsəmə, pɛn kə́ ńchîə á mbî ńté lə́ yə́, lə́ kə́ ńchî tsɔʼə táʼ Mmaʼmbîə, Yeso klisto, páʼ pə́ nə́ ńdaŋ nə́ lə́ á ndzəm yí ńtsoŋkə̂ ajúmə atsəmə, pɛn kə́ ńchîə á mbî ńté lə́ yə́.

⁷Lə́ kě ŋwu ntsəm jî ńjîə anu zɨ pô. Pɨ pətsə́ pó chî ə́wɨ́ páʼ pó nə kwéʼnə nə́ ńchîə á mə́mə anuə məsê mə́ məfɨgə tə́shú tə ńkoʼ əghâ nə́ mbɔʼ pó jî mbô məjî yi wɨ́, pó pɛ́lə ńkwaŋə̂ ńgə́ məjî mimə wɨ́ lə́ məjî pə́ fɛ̂ nə́ nə́ məsê mə́ məfɨgə. Ńté ńgə́ məntɨ́ mɔ́b mə́ kě tyantə̂ pô, pó tíʼ ńkwaŋ ńgə́ lə́ təpɔŋ pó ghɛd nə́, ntɨ́ əghɔ́b ə́ tíʼə ńjwaʼə̂ ághóobə́.

⁸Məjî mə́ kě yǐ ghɛd ńgə́ pɛn pə́ pɨ pipə əshîʼnə á mbô Əsê pô, pɛn yǒ kě ajûtsə́ péŋ páʼ təmbɔʼ pɛn chî məjî jî pô, ə́ kě kə́ kwáalə áwɛ̂n nə́ ajûtsə́ páʼ təmbɔʼ pɛn jî məjî pô.

⁹Ndzaŋ nə́ kwaŋ nə́ ńgə́ mbɔʼ nə́ jîə ajúmə atsəm páʼ nə́ kɔŋ nə́ lə́, nə lɔg ndɛd ńgə́ kɔ zə́ələ́ ghɛd ŋwu páʼ ntɨ́ əyí kě nə́ tyantə̂ a ghɛlə̂ təpɔŋə.

¹⁰Lɔg ńgə́ ŋwu páʼ ntɨ́ əyí kě nə́ á mə́m mbô mənu zɨ tyantə̂ pô, a zəənə́ gho páʼ pə́ sóŋ nə́ ńgə́ gho túgə “ajíənu” gho tə́ ńjîə məjî aliʼə́ fyaʼə̂ məsê mə́ məfɨgə, zəənə́ á kě yǐ kə́ ghɛd ńgə́ a jî məjî páʼ pə́ fɛ̂ nə́ á mbô məsê mə́ məfɨgə?

¹¹Lə́ələ́ á pə́ ńgə́ ŋwu wə̂ páʼ a túg nə́ ntɨ́ yi pwɔ́d nə́ lə́, lə́ ndim əgho páʼ klisto a nə́ ńkwû nə́ ńté yə́, a yǐ kwû ə́ té “ajíənu” azô!

¹²Təmbɔʼ gho ghɛd ntê təpɔŋ zəənə́ á mbɨ ndim əgho, gho ghɛd lə́ təpɔŋə á mbô Klisto ńté ńgə́ gho tsəŋ ntɨ́ ndim əgho páʼ a pwɔ́d nə́.

¹³Lə́ələ́ á pə́ ńgə́ mbɔʼ məjî mə́ pə́ ajú páʼ a ghɛd nə́ ndimə́ mə a ghɛlə̂ təpɔŋ, maŋ yǒ ńkě na pɨ ńkɔ́d pô, á mə́ ghɛd nə́ ńgə́ kɔ ndimə́ mə a wǔəə á mə́m təpɔŋə.