Read Awing 1 Kɔlintyanə 9 Bible Online

1 Kɔlintyanə 9 - Awing bible

1 Kɔlintyanə 9

¹Maŋ kě lə́ ŋwunə ngǎ maŋ pô? Maŋ kě lə́ ntú Yeso Klisto pô? Maŋ nə ńkě Yeso páʼ a pə́ nə́ Mmaʼmbî əwɛn lə́ jɨ́? Pɨ kě lə́ apô afaʼə mə ńdaŋə̂ á mbô Mmaʼmbî pô?

²Təmbɔʼ maŋ pěʼ ńchî pə́ ntú Yeso á mbô pɨ pətsə́ pô, tə ḿbə́ maŋ lə́ wə́ələ́ á mbô pəənə́! Ńté ńgə́ pɨ lə́ akyeʼə́nuə á mə́ nɨd nə́ ńgə́ maŋ lə́ ntú Yeso Klisto.

³Əghâ ándó pɨ pə́ tə́ nə́ ə́sóŋə ńgə́ maŋ faʼə̂ anuə təkoʼ lə́, maŋ kwá mbəəmə mə ńgə́:

⁴Lə́ kě aliʼə́nuə mə ńgə́ pə́ fɛ̂ məjî pópə məloʼ nə́ maŋ ńté afaʼə mə pô?

⁵Lə́ kě aliʼə́ azə́gə́ á mə́ túg nə́ pəngyě páʼ pó pí nə́ nə́ Yeso pəg pö nyinə̂ ándó mətsə́ məntú mə́ Yeso mə̈ ghɛd nə́, ńdzoŋ ḿbá pɔ́pə́mɛ́ pə́ Mmaʼmbî ḿbéenə Pita?

⁶Kɨ nə́ kwaŋ ńgə́ lə́ tsɔʼə pəg Banabasə páʼ pəg yí chî nə́ á mə́ faʼ nə́ pɔŋə̂ jîə ajú?

⁷Wə́ənə́ ḿmaʼ ntsoolə ä tû mbɨ əjǐə a ngǎ yə́? Lə́ əwə ŋwu páʼ təmbɔʼ a pǐə akoobə́ mətǐ mə́ məloʼ ḿbə́ ńkě chî təmbɔʼ a kyɛ̂ nəta nə́ atǐ ə́wɨ́ ńjîə? Lə́ əwə ŋwu páʼ a tseŋnə̂ nə́ məna ḿbə́ ńkě chî təmbɔʼ a nô mə́lég pô?

⁸Nə́ kwaŋ ńgə́ mäŋ sóŋə jɨ lə́ nə akwaŋə́nuə ŋwu mbî? Noŋkə a kě lə́ tsɔʼə ə́lɨ́d sóŋə?

⁹Ńté ńgə́ pə́ ŋwaʼlə̂ á mə́m pənoŋkə pə́ Mosisə ńgə́, “kɔ kwúd ntso na əghâ páʼ gho tə́ nə́ ńdɔgə̂ ájɨ́d ə́ kəblə̂ ngəsáŋ ə́wə́.” Əsê a pěʼ ńchígə́ ńtséebə atsáb jɨ lɛ̌ ńté lə́ məna?

¹⁰A nə ńkě chígə́ ńtséebə ə́lɨ́d ńté lə́ áwɛ̂n? A nə̈ ńtséebə ńté lə́ áwɛ̂n ńté ńgə́ ŋwu ntsəm páʼ ä líʼ nə́ alíʼə a líʼə lə́ ńtə́ ḿbyáabə ńgə́ a yǐ foʼ məmí məjîə. Ŋwu ntsəm páʼ a kə́ nə́ ńkəblə̂ ngəsáŋə́ a kəblə̂ lə́ ńtə́ ḿbyáb əyǐ ngəsáŋə́

¹¹Pəg pǐə atséebə Əsê á mə́m pəənə́, nə́ kwaŋ ńgə́ a yǐ pə́ anu yə əshîʼnə mbɔʼ nə́ zə́mə áwə́g nə́ məjî?

¹²Mbɔʼ á pə́ aliʼə́nuə pɨ pətsə́ a mə́ kwá nə́ əpúmə á mbô pɨ, tə ḿbə́ lə́ kě kə́ ḿbə́ aliʼə́nuə azə́gə́ á mə́ kwá nə́ əpúmə á mbô pɨ tə ńtsɛɛlə̂ pə́ ághɔ́b? Lə́ pəg nə ḿbɛn ńkě aliʼə́nuə azə́g zɨ nə́ anu néŋ pô. Pəg nə mbɛn ḿbɨ ńgwaamə̂ pə́ ntə́əmə á mə́mə anuə atsəm ńté ńgə́ pəg nə ńtə́ ḿbɔ́gə á mə́ pə nə́ kɨ́ʼ nə́ nkɨ yi əshîʼnə ghɛn ńté Yeso Klisto.

¹³Nə kě jî ńgə́ pɨ páʼ pö faʼ nə́ á Tə́kɔʼndɛ̂sê, məjî mɔ́b mə́ fɛ́lə lə́ ə́wɨ́, pɨ pó kə́ nə́ ə́faʼə̂ á nəpá pó kə́ ńjîə lə́ əpúmə afyaʼə́sê?

¹⁴Ńdaŋ ə́lɨ́d, Əsê a sóŋ ńgə́ pɨ pö sóŋ nə́ anǔəsê, məjî mɔ́b mə́ fɛ́lə lə́ á mə́mə anǔəsê.

¹⁵Lə́ maŋ nə ḿbɛn ńkě aliʼə́nu jɨ lɛ̌ yətsə́ nə́ anu néŋ pô, kɨ ńkě kə́ ŋ́ŋwaʼlə̂ lə́ nə́ akwaŋ ńgə́ mbɔʼ pɨ pěʼ ə́fɛ̂ əpú pɨ nə́ maŋ pô. Mbɔŋə ə́lɨ́d maŋ kwûə, ńdaŋ ndzaŋ mbɔʼ ŋwunə a kwáalə pə́ aliʼə́nuə mə maŋ tɨd nə́ nə́ zə́ələ́.

¹⁶Ńté ńgə́ mbɔʼ maŋ sóŋə anu ńté nkɨ Əsê, lə́ kě pə́ aliʼə́nuə mə ńgə́ maŋ tə́ ńkɔ́ʼkə mbɨ pô, Lə́ anu páʼ maŋ chî nə́ á mə́ shib nə́ faʼə̂. Ndɔ ə́ tə́əmə atû maŋ páʼ mbɔʼ maŋ chî nkɨ Əsê ghɛn ə́ tə́ náŋkə pô.

¹⁷Təmbɔʼ maŋ pěʼ ńkɔŋ lə́ ngǎ maŋ á mə́ faʼ nə́ afaʼ zɨ, tə ḿbə́ maŋ pěʼ ńtúg ntsɔ́ʼəfaʼə. Lə́ maŋ pɛn ə́faʼə̂ ńkě faʼə̂ lə́ ándó maŋ kɔŋ nə́ pô, ńté ńgə́ lə́ afaʼə Əsê páʼ a fɛ̂ nə́ á mbô maŋə.

¹⁸Ntsɔ́ʼə afaʼə mə tíʼ ḿbə́ lə́ akə̂? lə́ tsɔʼə əsa páʼ maŋ túg nə́ á mə́ tə́ nə́ náŋkə nkɨ yi əshîʼnə ghɛnə́ á mbô pɨ, tə pítə ntsɔ́ʼəfaʼə, ńkě kə́ ə́sóŋə ńgə́ lə́ aliʼə́nuə mə mbɔʼ pó pěʼ ńtûə mə pô.

¹⁹Maŋ pǎtə ḿbə́ ŋwunə a ngǎ maŋ lə́, ḿbə́ ńdɔg mbəəmə mə ńgɛlə̂ apoʼ ə́wə́ á mbô ŋwu ntsəmə, á mə́ soŋtə̂ nə́ ŋwu ntsəmə a yǐəə á mbô Yeso.

²⁰Əghâ ándó maŋ tə́ nə́ ə́faʼə̂ pə́g Pəjus lə́, maŋ chîə ándó ŋwu Jusə, ńjî ńgə́ maŋ soŋə̂ ághɔ́b ńgyǐəə á mbô Yeso Klisto, lə́ maŋ nə́ nkɔ̌ʼmbəəmə mə maŋ kě á mə́m noŋkə Mosisə chî pô, lə́ ḿbə́ ńchî pə̂gpə pɨ pó zoŋ nə́ noŋkə Mosisə, maŋ chîə ándó táʼə, á mə́ soŋ nə́ pɨ pipə nɨ́ nə́ pó yǐəə á mbô Yeso Klisto.

²¹Tsɔʼə nə́ ndú wɨ́d wə́, təmbɔʼ maŋ chî pə̂gpə pɨ páʼ pó kě nə́ noŋkə Mosisə zoŋə̂ pô, maŋ kə́ ńchîə á mə́m pó ándó ŋwunə a kě nə́ noŋkə zoŋə̂ pô. Ńjî ńgə́ təmbɔʼ maŋ soŋtə̂ ághɔ́b pó yǐəə á mbô Yeso klisto. Á kě pə́ lə́ ńgə́ maŋ kě noŋkə Əsê tə́ ńdzoŋə̂ pô, maŋ tə́ ḿbyádnə ńdzoŋə̂ noŋkə Yeso klisto.

²²Təmbɔʼ maŋ tég pɨ páʼ mbimə́ əzɔb pwɔ́d nə́ maŋ kə́ ḿbóolə azéemə ándó táʼ ŋwu əghɔb yitsə̌, ńjî ńgə́ təmbɔʼ maŋ soŋtə̂ ághóobə́. Maŋ tíʼ ḿbímə ajúmə atsəmə á mbô ŋwu ntsəmə, ńjî ńgə́ mbɔʼ á tíʼ ḿbə́ pə́ ə́lɛ́ maŋ chwádkə ághɔ́b pətsə́.

²³Mäŋ ghɛd ndɛn mənu ghɛn ətsəm lə́ ńté lə́ nkɨ yi əshîʼnə ńjî ńgə́ mbɔʼ maŋ yǐ ńkə́ ńtúgə afoʼə ajíə.

²⁴Nə́ kě jî ńgə́ təmbɔʼ pə́ tə́ ńkə ndə̌, ŋwu ntsəmə a mɨtə̂, lə́ pə́ ńkwá tsɔʼə táʼ ŋwu ńkwá ntsɔ́ʼəfaʼə. Lə́ələ́ pə́ ńgə́ kə ndə̌ pə́ nə́ ndú páʼ gho yǐ nə́ kwá ntsɔ́ʼəfaʼə.

²⁵Ŋwu ntsəm páʼ a tə́ nə́ ńdzéʼə á mə́ kə nə́ ndə̌ a mɛdkə̂ mbɨ əjǐ ńgə́ mbɔʼ a zɨ́ ndzaŋ ngə́ʼ ntsəmə. Ŋwunə a ghɛlə̂ ə́lɨ́d lə́ ńté ńgə́ a loonə̂ lə́ á mə́ kə nə́ ə́ kwá ntsɔ́ʼəfaʼ, páʼ jɨ́d yǐ nə́ kě mɛdnə̂ pô; lə́ pɛn pə́ ńkəələ̂ azɛ̂n lə́ á mə́ kwá nə́ ntsɔ́ʼəfaʼ páʼ jɨ́d yǐ nə́ mɛdnə̂.

²⁶Lə́ ghɛd ə́lɨ́d maŋ kě akəkógə́ ndə̌ kəələ̂ pô, maŋ kə́ ńchî lə́ ándó ḿbóʼnə məlaʼ páʼ a kě nə́ ngag əjǐ kətaŋ maʼə̂ pô.

²⁷Lə́ maŋ nuʼ mbəəmə mə á mə́ ghɛd nə́ jɨ́d ə́ tyantə̂, ńjî ńgə́ kɔ maŋ yǒ ńtə́ ə́sóŋə anǔəsê pə́ pɨ ə́fógə mə á mə́m əwɨ́ tə əgha lɛ nəfoonə.