Read Awing 2 Kɔlintyanə 10 Bible Online

2 Kɔlintyanə 10 - Awing bible

2 Kɔlintyanə 10

¹Maŋ Pɔlə, nə nkɔ̌ʼmbəəmə mə, maŋə ándó páʼ pə̈ sóŋ nə́ ńgə́ mäŋ pwɔ́dnə əghâ ándó maŋ chî nə́ pɛn ḿbɨ ńtsə́g əghâ ándó maŋ kě nə́ pɛn chî lə́, mäŋ póʼ mbô á mbô pɨ nə́ əlɛ́n Yeso páʼ á tsóokə nə́ mbɨ əjǐ ńkə́ mbwɔ́dnə.

²Mäŋ póʼmbô nə́ pɨ ńgə́ əghâ maŋ yǐ nə́ ńchî pɛn kɔ nə́ fyáalə mə maŋ tsə́g nə́ pɨ ndzaŋ mäŋ tsə́g nə́ á mbô pəənə ándó pö sóŋ nə́ ńgə́ pəg faʼə̂ lə́ ándó pɨ pə́ mbîə.

³Lə́ ndə̌ŋdəŋ ńgə́ pəg chî lə́ á mə́m mbîə ḿbə́ ńkě póʼnə ntso lə́ ándó pɨ pə́ mbî pô.

⁴Əpú ntso pɛn lɔg nə́ ḿbóʼ nə́ ntso əwɨ́, lə́ kě əpú ntso ndu mbî pô, lə́ ətyǎntə əpú ntso Əsê páʼ pɛn lɔg nə́ ə́shaʼtə̂ əliʼ pi tyantə̂ nə́ ə́wə́. Pɛn shaʼtə̂ əkwaŋ mənuə ándó pɨ́d kě nə́ koʼnə̂ pô.

⁵Pɛ̈n shaʼtə̂ mbô kətɨd ntsəm ńkwɛlə̂, páʼ wə́ələ́ á tɨ́ nə́ ándó kɨ́ʼ ńgə́ kɔ pɨ pə́ túgə ajíənuə Əsê, Pɛ́n lɔg əkwaŋ pɨ ətsəm ńnéŋə á nkáʼə atsáŋ ńjî ńgə́ mbɔʼ pɨ pəwɨ́ pó zóʼnə a Klisto.

⁶Əghâ ándó pɨ yi nə́ pyádnə ə́fɛ̂ mbɨ əzɨ nə́ Əsê tə ḿbə́ pəg yǐ chwíʼtə mbɨ əzəgə́ á mə́ néŋ nə́ áwə́ənə́ á atsáŋ páʼ mbɔʼ nə́ chî zóʼnə pô.

⁷Pɨ̈ náŋə azə́ənə́ á pə́ ndzaŋ əpú chî nə́ á ndzəmə apeŋə́. Təmbɔʼ ŋwu əwɨ yitsə̌ a chígə́ ńjî ńgə́ yí lə́ ŋwu Klisto a kwaŋə̂ atûə ají nga yitsə̌ ńté ńgə́ ndzaŋ a pə́ nə́ ŋwu Klisto lə́ pəg kə́ ḿbə́ pɨ pə́ Klisto.

⁸Nə́ əghâ nə́ təmbɔʼ maŋ pěʼ ḿbǎtə ńnyáʼ ńtəələ̂ á pə́ tə́shú ńté mətɨ mə́g páʼ Mmaʼmbîə á kə fɛ̂ nə́ pəg tə́ ńdɔgə̂ ńkwíŋkə áwɨ́ ə́wɨ́ kwíŋkə nə́, ə́ ńkě áwɨ́ nə́ mɨ́d shaʼtə̂ nə́ shaʼtə̂ pô, maŋ kě əshɨ́ yitsə̌ kó ńté ə́lɨ́d pô.

⁹Maŋ kě kɔŋə̂ á mə́ chî nə́ á pə́ ándó maŋ ghɔdkə̂ áwɨ́ ghɔdkə̂ nə́ aŋwaʼlə páʼ maŋ ŋwaʼlə̂ nə́ ə́fɛ̂ á mbô pɨ lə́ pô.

¹⁰Ŋwu tsə̌ a yǐ sóŋ ńgə́, “Əŋwaʼlə Pɔlə a ŋwaʼlə̂ nə́ á mbô pɛn, pɨ́d tyantə̂ a kə́ ńtsə́gə á mə́m wə́, lə́ təmbɔʼ á pə́ ńchî pɛ̌npo nə́ nkɔ̌ʼmbɨ əyí a kě tsə́g pô, atséebə ajíə a kě nə́ anu yitsə̌ kə́ ńchî pô!”

¹¹Ntê ŋwu zɨ́d zə́ ə́ chîə á mə́ jî nə́ ńgə́ mənu pəg ŋwaʼlə̂ nə́ á mbô pó əghâ ándó pəg chî nə́ aliʼə́ ndaʼ, lə́ yi pəg yǐ nə́ faʼ əghâ ándó pəg chî nə́ á mə́m pó.

¹²Pəg kě chîə á mə́ tə́ nə́ fiʼnə̂ nkaŋ kɨ fiʼ mbɨ əzəg pə̂gpə pɨ páʼ pó zɨ́ nə́ mbɨ əzɔb tə́shú pô. Pó chígə́ ńgəənə̂ lɛ ə́lɛ́! Pó ghɛd əghɔ́b fiʼ nəghɔd pó lɔg nə́ fiʼ mbɨ əzɔb ə́wə́.

¹³Ńgɛn nə́ pəg, pəg kě chîə á mə́ zɨ́ nə́ mbɨ əzəg laŋ ndzaŋə ándó pəg pěʼ nə́ ńchîə á mə́ zɨ́ nə́ pô, lə́ pəg yǐ tɨd koʼ lə́ tsɔʼə nə́ afaʼ Əsê a fɛ̂ nə́ ńgə́ pəg faʼə̂. Zəənə́ á yǐ pegə̂ afaʼ páʼ Əsê a fɛ̂ nə́ ńgə́ pəg faʼə̂ á mə́m pəənə́.

¹⁴Ndzaŋə ándó pəg kə yǐ nə́ nə́ Nkɨ yi əshîʼnə ńté Klisto á mbô pɨ lə́ ńkě ndɛdtə afaʼ əwə́g laŋ pô, pəg kə pɛlə á mə́mə aliʼ pəg chî nə́ mə́ faʼ nə́ ə́wə́.

¹⁵Ńdaŋ ə́lɨ́d pəg kě kətɨd yitsə̌ túg ńté afaʼə ándó pətsə́ pɨ pó faʼ nə́ ńdaŋ ndɛtə páʼ Əsê á kə fɛ̂ nə́ á mbô pəg pô. Pəg kwaŋə̂ azə́g lə́ kwaŋ nə́ ńtə́ ḿbyáabə ńgə́ ndzaŋ mbimə́ əzɨ̈ ə́ kwíŋ nə́ lə́ pəg kə́ ńchî təmbɔʼ pəg ghɛd pɨ pipə nɨ́ nə́ pó chî nə́ ḿbáatə áwɨ́ pó zóʼ nkɨ yi əshîʼnə yi wə́.

¹⁶Pəg tíʼ ńchî təmbɔʼ pəg náŋkə Nkɨ yi Əshîʼnə ghɛn nə́ ətú mbî ə́ laŋ nə́ áwɨ́ ńgɛnə̂ á mbiə, pəg kě kə́ ńchîə á mə́ tɨd nə́ ńté afaʼ páʼ pə́ pɛ́d nə́ tə ə́faʼə̂ zə́ələ́ afɔ ŋwu ndaʼ pô.

¹⁷Ndzaŋə ándó aŋwaʼlə Əsê a sóŋ nə́ ńgə́, “Ŋwu ntsəm páʼ a lɔ nə́ á mə́ tɨd nə́, a tɨd ńté á pə́ anu Mmaʼmbîə a faʼ nə́.”

¹⁸Lə́ kě ŋwunə a sóŋ nə́ ńgə́ a tɨ́ ńkoʼnə̂ páʼ pə́ pí nə́ yí pô, lə́ ŋwu páʼ Mmaʼmbiə a sóŋ nə́ ńgə́ a tɨ́ ńkoʼnə̂ páʼ pə́ pí nə́ yə́.