Read Awing 2 Kɔlintyanə 11 Bible Online

2 Kɔlintyanə 11 - Awing bible

2 Kɔlintyanə 11

¹Maŋ póʼmbô ńgə́ təmbɔʼ nə́ nyáʼ ńgwam məntɨ́ mɨ́ nə́ maŋ ńté akəkógə́ mə. Maŋ jî ńgə́ nə́ pɛ́dtə ńtə́ ńgwaamə̂ məntɨ́ mɨ́ ńté mə!

²Akwaŋə mə lánə ńtɨ́ nə́ pɨ tsɔʼə ndzaŋ yə Əsê á kə́ nə́ ńtɨ́ nə́ pəənə́. Nə́ chî lə́ chigə ándó mɔ̂ məngyě páʼ a kě nə́ anuə ŋwu mbyâŋnə kə́ jîə pô, yə ándó páʼ maŋ laʼnə̂ á mə́ fɛ̂ á ndzɔʼə́ á mbô táʼ ŋwu mbyâŋnə páʼ á pə́ nə́ Yeso.

³Maŋ tə́ ḿbɔ́gə ńgə́ pɨ pə́ yǐ tsəŋ məntɨ́ mɨ́ tsɔʼə ndzaŋ nó nə́ ńdɔg nə́ ayáŋə ají yə təpɔŋ zə́ ə́fɨgə̂ Ifə ə́wə́ lə́, nə́ tíʼ mɛdtə̂ mə zoŋ nə́ Klisto ə́ kə́ faʼə̂ á mbô yí nə́ ntɨ́ əwɨ́ ətsəmə.

⁴Apɔ́gə mə á chî lə́ ńté ńgə́ pɨ zaŋkə̂ ḿbímə a ŋwu ntsəm páʼ a yǐ nə́ á mbô pɨ ə́sóŋə anu ńté Yeso yí ndaʼ ńkě pə́ yi páʼ pə̈g sóŋ nə́ lə́ pô. Pɨ kə́ ḿbímə ajwiə yə ndaʼ páʼ á kě nə́ lə́ Ajwi pɨ kə kwá nə́ lə́ pô, ńkə́ ḿbí nkɨ yi əshîʼnə páʼ ə́ kě nə́ pə́ yi pɨ kə kwá nə́ lə́ pô.

⁵Maŋ kě kwaŋ ńgə́, “Pətə́kɔʼ pə́ məntú mə́ Yeso” mimə wɨ́ mə́ gháʼ ńtsɛɛlə̂ mə nə́ anu yətsə́ pô.

⁶Təmbɔʼ maŋ chî jîə á pə́ mə tsáb nə́ pô tə ḿbə́ maŋ túgə ajíənuə, pəg pɛ́dtə ńgɛd zəənə́ á ŋwaʼə̂ á mbô pɨ nə́ ndɛd ntsəmə á mə́mə anuə atsəmə.

⁷Lə́ nə ḿbə́ anuə təpɔŋ maŋ nə ńgɛd nə́ á mə́ tsóokə nə́ mbəəmə mə ə́ kɔ́ʼkə áwɨ́, á mə́ náŋkə nə́ Nkɨ yi Əshîʼnə á mbô pɨ tə əpítə áwɨ́ nə́ ajûtsə́?

⁸Maŋ nə ńkwá əpúmə á mbô mənkyeetə mimə ndaʼ á mə́ tú nə́ afaʼə mə maŋ nə faʼ nə́ á mbô pəənə́.

⁹Əghâ ándó maŋ nə ńchî nə́ pɛn ńgyǐ ḿbóŋə ajú lə́, maŋ kě áwɨ́ jwaʼ pô ńté ńgə́ pəlim pó nə ńdǒ nə́ á Masedonya lə́, pó nə fɛ̂ ajúmə atsəmə á mbô maŋ páʼ maŋ nə̈ ńdɔ nə́. Ńdaŋ ə́lɨ́d maŋ wam mbəəmə mə, ə́ yǐ kə́ ghɛn nə́ mbi, maŋ yǐ kə́ wam mbəəmə mə ə́ kě əwɨ́ nə́ ndú yitsə̌ jwaʼ pô.

¹⁰Ndzaŋə ándó ndə̌ŋdəŋ Klisto a chî nə́ á mə́m maŋ lə́, ŋwu tsə̌ a kě chîə á mə́m mboʼ Akaya páʼ təmbɔʼ a zɔŋ ńgə́ kɔ maŋ tə́ təələ̂ pô.

¹¹Maŋ sóŋə zɨ lə́ ńté ńgə́ maŋ kě áwɨ́ kɔŋ? Əsê a jî ńgə́ maŋ kɔŋə̂ áwə́ənə́!

¹²Anu páʼ maŋ faʼ nə́, maŋ yǐ ghɛn nə́ mbiə á mə́ faʼ nə́ zə́ələ́ á mə́ ghɛd nə́ ńgə́ kɔ mətsə́ “məntú mə́ Yeso” mə́ mə́ túgə anu yətsɨ́ təmbɔʼ pó lɔg ńtɨd ə́wɨ́ ńtíʼə ə́sóŋə ńgə́ pó tə́ faʼə̂ tsɔʼə nə́ ndú pəg faʼ nə́ ə́wə́.

¹³Pɨ pə́ lə́ kě chigə məntú mə Yeso pô, pó lə́ məntú mə́ Yeso mimə məfɨgə; Pö tsɨd ntsɨd ńté afaʼə azóobə́, ḿbəənə̂ sɛd ngwub əzɔb á mə́ chî nə́ ándó chigə məntú mə́ Klisto.

¹⁴Kɔ á kɨʼnə̂ áwə́ənə́, ńté ńgə́ tsɔʼə Satanə təmbɔʼ á sɛd ngwub əjǐ ńtíʼ ńchîə ándó ntseŋndɛ̂sê páʼ a túg nə́ nkyaʼə!

¹⁵Lə́ á pə́ ńgə́ lə́ kě tə́kɔʼə anu yitsə́ páʼ təmbɔʼ ngaŋə́faʼ əjí ə́ sɛd ngwub əzɔb á mə́ chî nə́ ándó ngaŋə́faʼ ndə̌ŋdəŋ pô. Á yǐ pə́ a ndwigtə pó kə́ foʼ lə́ chigə ajú məfaʼ mɔ́b mə́ nɨd nə́.

¹⁶Maŋ loonə̂ á mə́ pɨ nə́ sóŋ ńgə́ kɔ ŋwu tsə̌ a kwaŋ ńgə́ maŋ lə́ akəkógə́. Lə́ təmbɔʼ nə́ kwaŋ ə́lɨ́d nə́ lɔgə̂ á mə́ ándó akəkóg ńjî ńgə́ mbɔʼ maŋ kə́ nyáʼ ńtəələ̂ azá mɔ́ əliʼə́.

¹⁷Anu páʼ maŋ sóŋ nə́ əghâ nə́ lə́, lə́ kě anu mbɔʼ Mmaʼmbîə a kɔŋ ńgə́ maŋ tə́ sóŋə pô; ńgɛn nə́ anu ńté kətɨd ghɛn, maŋ lánə ńtséebə lə́ ándó akəkógə́.

¹⁸Lə́ ndzaŋə ándó páʼ pɨ pipə nɨ́ nə́ pö tɨd nə́ lə́, lə́ ndaʼ mənu mə́ mbî mə́ ghɛd nə́ pó təələ̂. Maŋ yǐ kə́ təələ̂ azéemə.

¹⁹Pɨ nə́ nkɔ̌ʼmbɨ ə́wɨ́ pɨ pyádnə ńgyáŋə, ńté ńgə́ pɨ kɔŋtə̂ á mə́ mɛdtə̂ nə́ əkəkóg ə́ kə́ ńchîə azɔ́b ə́wə́!

²⁰Nə́ mɛdtə̂ ŋwu ntsəmə ándó a sáʼ nə́ áwə́ənə́ kɨ ńgwágə áwɨ́ nə́ ajúmə azə́ənə́ kɨ ńtéemə atəənə́ azə́ənə́ kɨ ńgwágə áwə́ənə́ kɨ ńdɔgə̂ áwə́ənə́ ándó ənukə́taŋə kɨ ńdəb əmə́g mə́ənə́.

²¹Maŋ túg əsə́ənə á mə́ pí nə́ ńgə́ pɛn kə tə́ ńgɔdlə̂ lə́ tə́shú ńtíʼ ə́faʼ ndɛn mənu wɨ́d wə́. Lə́ anuə atsəmə ándó mbɔʼ ŋwu ntsəmə a tɨd ńté zə́ələ́, maŋ kə́ ńtúg ntɨ́ təmbɔʼ maŋ tɨd ńté zə́ələ́ (maŋ tséebə lə́ ándó akəkógə́.)

²²Pó lə́ Pəyiblus? tə ḿbə́ maŋ lə́ kə́ ḿbə́ ŋwu Iblu. Pó lə́ pɔ́ pə́ Islɛl? Tə́ ḿbə́ maŋ kə́ ḿbə́ lə́ mɔ́ Islɛlə. Pó lə́ ngwud Ablaam? Tə́ ḿbə́ maŋ kə́ ḿbə́ lə́ ngwud Ablaamə.

²³Pó lə́ ngaŋə́faʼ Klisto? (Maŋ tséebə zɨ lə́ ándó apɛ̌lə) tə ḿbə́ maŋ lə́ chigə wɨ́d ńté ńgə́ azéemə afaʼə á tsɛɛlə̂ azóobə́. Maŋ faʼ mənu mimə nɨ́ nə́, ńtsɛɛlə̂ ághóobə̈, ńkwúnə atsáŋ ńtsɛɛlə̂ ághóobə́, pə́ ə́shúmə mə tə á chaanə̂, əghâ pipə nɨ́ nə́ chî ə́wɨ́ páʼ maŋ tɨ́ nə́ á ntso nəwûə.

²⁴Nə́ ngǎ tâ Pəjus pó shúmə mə nə́ ngwan məghə́m mɛ́n mə́ teelə́ nə́ ngwan nəpuʼə́.

²⁵Pəloman pó nə shúmə mə nə́ ngwanə atəənə́ ngǎ teelə́ ḿbɨ́ ńtə́mə mə nə́ məngɔʼ táʼ ngǎ. Maŋ kə́ ńkwúnə á mə́mə aŋkənúʼə́ ngǎ teelə́ á nyi ə́shaʼkə̂ á mə́m nkǐə, táʼ ngǎ a pɨ chî ə́wɨ́ páʼ maŋ nə ńchî nə́ á mə́m nkǐ táʼ nətúʼ pó táʼə alě mbîə, nkǐ twáamə mə ńkɔ́ʼə ḿbəənə̂ ńtsóolə.

²⁶Á mə́m pə nənyinə mə maŋ nə ńdzá nə́ ńnyinə̂ pɨ́d pipə nɨ́ nə́ lə́, maŋ nə́ ńchîə á ntso nəwûə á mbô mənkǐ mimə kɔ́ʼ nə́ ńdzoŋ ḿbá pəzə̌lə, ńchîə á ntso nəwûə á mbô pəlimə́ mə ḿbɨ ḿbá Pətəjǐsê; maŋ kə kə̈ ńchîə á ntso nəwûə á mə́m pəmɛ́ pə́ pətɔ̂ŋ pó pəkɔŋ pə́ məŋkwâʼlə̌, ńchîə á ntso nəwûə á mə́m nə́ənə pópə pəlim pə́ məfɨgə.

²⁷Ńchîə á mə́mə afaʼ pópə ngə́ʼə, tsɔʼə tə lê á mə́m mətúʼ mimə nɨ́ nə́, tsɔʼə təghə́ maŋ jîə ajú kɨ ńnô yətsə́, əghâ pipə nɨ́ nə́ maŋ chî tə məjî, əfə́g pəənə̂ ńkóolə mə maŋ kě atsəʼ kə́ ńdzɨ́ maŋ wê pô.

²⁸Maŋ kě chî təmbɔʼ maŋ sóŋə anu atsəm ńté ńgə́ əlě ətsəm maŋ sɔbnə̂ ńté mənkyeetə mə́ pɔ́ pə́ Yeso mətsəm páʼ maŋ túg nə́ mə́ələ́ a ntɨ́ maŋə.

²⁹Əghâ ándó ŋwu tsə̌ a pwɔ́d nə́, mbəəmə mə kə́ ḿbóolə; əghâ ándó ŋwu tsə̌ a wǔ nə́ á mə́m təpɔŋ, maŋ chîə á mə́m tə́kɔʼə afɨnə.

³⁰Təmbɔʼ maŋ tə́ ńtəələ̂ maŋ tɨd lə́ á mə́m mənu mə́ nɨd nə́ ńgə́ maŋ póolə.

³¹Əsê páʼ a pə́ nə́ Tǎ pə́ Mmaʼmbî Yeso Klisto (Afoʼə a chîə á mbô yí tə mbî láʼ ḿměe!) a jî ńgə́ maŋ kě ntsɨd tsəələ̂ pô.

³²Əghâ maŋ nə ńchî nə́ á Damaskɔsə lə́, nətû páʼ nə́ faʼ nə́ á mbô Əfo Aletas nə́ tə́g ngaŋə́pyáabə əliʼ á ntso tə́kɔʼ tɔ̂ŋ wə́ ńgə́ pó waamə̂ mə.

³³Lə́ pə́ pə́ ńnéŋə mə á mə́m nka ə́sóokə nə́ ngɔ́d páʼ ə́ chî nə́ a mbɨ nkáʼ yi pɔ́ nə́ ńtsóokə á əsê maŋ tíʼ ńdə́ʼə yə́.