Read Awing 2 Kɔlintyanə 12 Bible Online

2 Kɔlintyanə 12 - Awing bible

2 Kɔlintyanə 12

¹Á pǎtə ńkě mə nə́ anu yətsə́ tə́ ńkwáalə á mə́ tɨd nə́ lə́, maŋ yǐ tɨd tsɔʼə tɨd nə́. Nə́ pə əghâ nə́ maŋ yǐ tséebə anu ńté mənu Mmaʼmbîə a nɨd nə́ mə wə́ á mə́m ndzəəmə atəəmə́tɨ́ pópə mənu mə́ nəlyaŋnə́ a kyaʼ nə́ á mbô maŋə.

²Maŋ jîə ŋwu tsə̌ páʼ a nə ḿbí nə́ Yeso, lɛ̌ ngoʼ ntsɔb nəkwa pə́ nə́ ńdɔg nə yí ńkɔ́ʼ ńgɛn nə́ yí chigə á mə́m nəpóolə (kəənə a kə lɛ ńgɛnə̂ á pə́ mə́m na mbɨ kəənə á mə́m ndzəəmə atəəmə́tɨ́, lə́ jî tsɔʼə Əsê).

³Maŋ jî ńgə́ ŋwu nə́ a kə ghɛnə̂ á nəpóolə, ḿbə́ ńkě jî ńgə́ a kə ghɛn lə́ nə́ na mbɨ əji kɨ tə na mbɨ əji pô, lə́ jî Əsê

⁴Maŋ jî ńgə́ a nə ńkwúnə paladayisə, ńtíʼ ńdzóʼ mənu páʼ pə́ kě nə́ chîə á mə́ fiʼtə̂ nə́ pô, mənu páʼ pə́ kě nə́ pí ńgə́ ŋwu mbî yitsə̌ a sóŋə a mɨ́d pô.

⁵Təmbɔʼ maŋ tɨd ńté ŋwunə ándó wɨ́d wə́, lə́ təmbɔʼ maŋ pə́ ńkě tɨd ńté əza mbɨ pô, təmbɔʼ maŋ tɨd ńté lə́ tsɔʼə mənu mə́ ghɛd nə́ maŋ póolə.

⁶Lə́ təmbɔʼ maŋ tsɔ́ʼ ńgə́ maŋ yǐ tɨd, tə ḿbə́ maŋ kě lə́ akəkóg pô, ńté ńgə́ maŋ tséebə lə́ ndə̌ŋdəŋə́. Lə́ ḿbə́ ńkǐə mə á mə́ ghɛd nə́ ə́lɨ́d ńjî ńgə́ kɔ ŋwu tsə̌ a ŋáŋkə mə ńtsɛ ndzaŋ pə́ chî nə́ mə́ ŋáŋkə nə́ mə nə́ mənu pə zɨ́ nə́ á mbɨ maŋ pó mi ándó pə́ zóʼ nə́ á mbô maŋə.

⁷Á mə́ ghɛd nə́ ńgə́ kɔ maŋ tə́ ńkɔ́ʼkə mbɨ tə́shú, ńté mənu mimə nɨ́ nə́ pə́ kə kyaʼ nə mə wə́, pə́ fɛ̂ aghɔ yə́ záŋ nə́ á mbɨ maŋə, páʼ zə́ələ́ á faʼ nə́ ándó ənyintú Satanə á mə́ shúm nə́ mə ə́ kə́ kɨ́ʼə á mə ńgə́ kɔ maŋ tə́ ńtəələ̂ tə́shúnə́.

⁸Maŋ kə chaʼtə́sê á mbô Mmaʼmbî ngǎ teelə́ ńté anu zəənə̈, ḿbítə yí ńgə́ a lɔgə̂ zɨ́d ńgɛnə̂.

⁹Akwe ajíə á pə́ ńgə́, “Apɔŋə́ntə́əmə mə lə́ ndaʼə anu a koʼnə̂ á mbô gho ńté ńgə́ mətəənə mə mə́ tyantə̂ lə́ əghâ ándó gho pwɔ́d nə́. Maŋ pyádnə ńkɔŋtə̂ lɛ tǐə á mə́ tɨd nə́ té mənuə ándó mə́ nɨd nə́ ńgə́ maŋ póolə, ńjî ńgə́ maŋ lánə ńjî ńgə́ lə́ mətɨ mə́ Klisto páʼ mə́ chî nə́ á mbɨ maŋə.”

¹⁰Maŋ koʼnə̂ mə á mə́m mənu mə́ nɨd nə́ ńgə́ maŋ póolə, á mə́m məndzɔmnə, á mə́m məngə́ʼ pópə atsaŋnə páʼ pə́ tsaŋkə̂ nə́ mə ə́wə́ ńdzoŋ ḿbegə̂ nətáŋ páʼ maŋ táŋnə áwɨ́d ńté Klisto. Ńté ńgə́ əghâ ándó páʼ maŋ pwɔ́d nə́ lə́ əghâ ándó páʼ maŋ tyantə̂ nə́.

¹¹Maŋ ghɛlə̂ lə́ ándó akəkógə́, lə́ pə́ ńgɛd pɨ ńgə́ maŋ faʼ ə́lə́ələ́. Lə́ pɨ páʼ pɨ chî nə́ á mə́ nɨd nə́ ńgə́ maŋ koʼnə̂. Təmbɔʼ maŋ pěʼ ḿbǎtə ḿbə́ pə́ əliʼkə́taŋ, maŋ kě kwéʼnə ńkə́g tə ńtsɛ “məntú mə́ Yeso” mimə weŋ mɨ́ mə́ pô.

¹²Pə́ kə ghɛd əkɨʼnəmə́nu pipə nɨ́ nə́ pópə mənu mimə yɛ́d nə́ yɛ́d nə́ á mə́m pɨ nə́ awaamə́ntə́əmə, páʼ mɨ́d mə nɨd nə́ ńgə́ maŋ lə́ ntú Yeso.

¹³Fiʼtə̂ nə́ ndzaŋ pə́ nə́ ńtúg nə́ áwɨ́ tə á pə́g ńtsɛ mətsə́ mənkyeetə mə́ pɔ́ pə́ Yeso, tə ńdéʼtə ńgə́ maŋ nə́ ńkě áwɨ́ tə́ ńjwaʼə̂ ńgə́ nə́ kwáalə mə pô? Ləgnə̂ nə́ afankə́nuə mə zəənə́.

¹⁴Lɛ̌ ngǎ teelə́ páʼ maŋ tyáŋtə nə́ mbəəmə mə á mə́ yǐ nə́ ghéenə áwə́ənə́, maŋ kě áwɨ́ nə́ ajûtsə́ yǐ pítə pô. Maŋ loonə̂ lə́ wə́ənə́, maŋ kě lə́ nkáb əzɨ loonə̂ pô. Á pěʼ ńkə́ ńchî lə́ ńgə́ pɔ̂nkə̂ pə́ kě chîə á mə́ lɔʼkə̂ nə́ nkéebə á mbô pətǎ pɔ́b pô, lə́ pətǎ pó chî nə́ á mə́ lɔʼkə̂ nə́ nkéebə á mbô pɔ́ póobə́.

¹⁵Maŋ yǐ kɔŋtə̂ á mə́ tsəŋ nə́ ajú páʼ maŋ túg nə́ zoŋ pá mbəəmə mə ə́wə́ á mə́ kwá nə́ áwə́ənə́; pɨ yǐ kɔŋə̂ mə tsɔ́ʼə mɔ́ aliʼ ńté ńgə́ maŋ pyádnə ńkɔŋə̂ áwɨ́?

¹⁶Pɨ yǐ pí ńgə́ maŋ kə́ kě lə́ atûə apeʼə á mbô pɨ pô, lə́ ŋwu tsə̌ a yǐ sóŋ ńgə́ maŋ kə́ ghɛd ngóobə, ńdɔg məntsɨd ńgwaamə̂ áwɨ́ ə́wə́.

¹⁷Á mə́m pɨ pətsəm maŋ kə tú nə́ á mbô pɨ maŋ kə pɛ́dtə ńtúmə yitsə̌ a yǐ ə́fɨgə̂ áwɨ́?

¹⁸Maŋ nə ḿbóʼmbô nə́ Taatusə ńgə́ a yǐ ńdzə́ənə áwə́ənə́, ḿbɨ ńkə́ ńtúmə táʼ ndim əwɛ̂n yitsə̌ á mə́m Klisto ńgə́ pó yí ghɛnə̂. Taatusə a nə ńkě áwɨ́ fɨg pô kəənə̂ a nə fɨgə̂ áwə́ənə́? Pəg nə ńkě mənu lə́ tsɔʼə ə́lɨ́d kə́ ńgɛd? Pəg nə́ ńkě lə́ ntag məko zɨ́d zə̂ zoŋ?

¹⁹Əghâ tsə̌ nə́ kwaŋə̂ azɨ́ ńgə́ ə́fɛ́lə á nəfɛdnə́ pəg loonə̂ lə́ tsɔʼə á mə́ kwá nə́ atûə azə́gə́ á mbi pəənə́. Ngá! pəg tséebə lə́ tsɔʼə ndzaŋə ándó Klisto a lɔ nə́ ńgə́ pəg tséebə á mbi Əsê, anuə atsəm pəg faʼ nə́ á ḿbə́ pəlim, pəg faʼə̂ lə́ á mə́ kwá nə́ áwɨ́ nə́ kwéŋə.

²⁰Maŋ tə́ ḿbɔ́gə ńgə́ a yǐ pə́ əghâ maŋ yǐ nə́, maŋ yǐ zə́ənə áwɨ́ nə́ chî ndzaŋ yi ndaʼə, ńkě chîə á pə́ nə́ ndú maŋ pěʼ nə́ ńdɔ ńgə́ nə́ chî pô, pɨ kə́ ńdzə́ənə mə maŋ chî ndzaŋ yi ndaʼə, ńkě kə́ ńchî nə́ ndú nə́ pěʼ nə́ ńdɔ ńgə́ maŋ chî pô. Maŋ tə́ ḿbɔ́gə ńgə́ maŋ yǐ téekə áwə́ənə́ á mə́mə afyaʼə́ pópə ŋwéetə́, azáŋə́ndé pópə əkeelə́, məndzɔmnə pópə asoŋə́, kətɨd pópə ajwaʼlə.

²¹Maŋ tə́ ḿbɔ́gə ńgə́ əghâ ándó maŋ yǐ nə́ pɨ yǐ lə́, Əsê mə néŋ əsə́ənə atû maŋə á mbi pəənə́, maŋ yǐ kə́ kyéŋ ə́ té pɨ pipə nɨ́ nə́ páʼ pó nə́ ńgɛd nə́ təpɔŋ á ntsɛɛmbiə, ńkě kə́ ńkwúblə məntɨ́ mɔ́b ə́fɛ́lə á mə́m ndɔtí mənu pó nə ńgɛd nə́ ándó ndzɔʼə́ mbǒʼḿbóʼə́ pô.