Read Awing 2 Kɔlintyanə 13 Bible Online

2 Kɔlintyanə 13 - Awing bible

2 Kɔlintyanə 13

¹Lɛ̌ lə́ ngǎ teelə́ páʼ maŋ yǐ nə́ á mə́ ghá nə́ áwə́ənə́. “Anuə atsəm pə́ tə́ nə́ ńgwaamə̂ a ŋwu ńgə́ a ghɛd, pɨ pə́ pɛ̌ kɨ pə́ teelə́ pó shib ńchî ə́wɨ́ ḿbí ńgə́ pó nə ńjɨ́ ńgə́ lə́ ndə̌ŋdəŋə́,” ndzaŋə ándó aŋwaʼlə Əsê á sóŋ nə.

²Maŋ kə kwantə̂ pəənə ándó pó kə ghɛd nə́ təpɔŋə a ntsɛɛmbi ńdzoŋ ḿbéenə ŋwu ntsəmə; Maŋ pɛ́lə ńkwantə̂ ághɔ́b əghâ nə́ páʼ maŋ kě nə́ pə̌gpo chî pô lə́. Maŋ kə sóŋ ə́lɨ́d nə ndɛd maŋ kə pɨ nə́ ńgyǐəə á ngǎ yǐ ndzəmə á mbô pəənə́. Lə́, maŋ yǐ pɨ kə́ sóŋə ázɨ́d əghâ nə́ páʼ maŋ kě nə́ pɛn chî pô. Ndzaŋ maŋ yǐ nə́ pɨ yǐ lə́, ŋwu tsə̌ a kě atsáŋ yǐ kə pô.

³Ndzaŋ nə́ lɔ nə́ á mə́ jɨ́ nə́ akyeʼə́nu páʼ a nɨd nə́ ńgə́ Yeso a nə ńtsáb ńdaŋə̂ á mə́m maŋ lə́, nə́ yǐ zə́ənə zə́ələ́. Yeso kě kɨʼə̂ á mə́ faʼ nə́ anu yitsə̌ á mbô pɨ pô, a pɨ ńtúgə á pə́ mətəənə á mə́ faʼ nə́ á mə́m pəənə́.

⁴A nə ńkɨʼə̂ əghâ ándó pə́ kə̈ kwumtə̂ nə́ yə́ á atǐə apagləpaglə, lə́ ḿbə́ ńchîə á mbî ńdaŋə̂ á mə́m mətɨ mə́ Əsê. Ndzaŋə ándó pə̌gpo pə́ nə́ táʼ lə́ pəg kə́ ńkɨʼə̂, ndzaŋə ándó pəg jînə nə́ pɛn lə́, pɛn yǒ chîə á mbî pɛ̌npə Klisto ə́laŋə̂ á mə́m mətɨ mə́ Əsê.

⁵Chaʼ nə́ məmbɨ mə́ənə́ á mə́ zɨ́ nə́ ńgə́ pɨ tɨ́ ńtyantə̂ nə́ mbimə́ əzəənə́? Nə́ kě jî ńgə́ Yeso Klisto a chîə á mə́m pɨ? Təmbɔʼ nə́ chî jí pô, lə́ á pə́ ńgə́ nə́ wǔəə akwaʼlə zə̂!

⁶Maŋ túgə akwaŋ ńtə́ ḿbyáabə ńgə́ pɨ jî ńgə́ pəg kě akwaʼlə wǔ pô.

⁷Pəg chaʼtə́sê ńgə́ kɔ nə́ yǒ ńgɛlə̂ anuə təpɔŋ yətsə́, ńkě loonə̂ á pə́ mə́ nɨd nə́ ńgə́ pəg koʼnə̂ tə́shú pô, ńté á pə́ ńgə́ pəg loonə̂ lə́ ńgə́ nə́ faʼə̂ pə́ anuə á koʼnə̂ nə́, páʼ pəg pǎ nə́ tə ńchî azə́gə́ á pə́ ándó pəg wǔəə akwaʼlə lə́.

⁸Ńté ńgə́ pəg kě mənü ghɛlə̂ páʼ mə́ kě nə́ ndə̌ŋdəŋ pô, pəg ghɛlə̂ lə́ mənu páʼ mə́ pə́ nə́ ndə̌ŋdəŋə́.

⁹Pəg kɔŋtə̂ əghâ ándó pəg kɨʼ nə́ pɨ pə́ ńtyantə̂. Lɛ̌ anu pəg chaʼtə̂ nə́ Əsê ə́wə́, ńgə́ nə koʼnə̂ ńgɛn ə́fyagə̂.

¹⁰Lə́ ghɛd ə́lɨ́d maŋ ŋwaʼlə̂ mənu məənə́ á mbô pɨ əghâ ándó maŋ kě nə́ aliʼ yə ə́wɨ́ chî pô, ńjî ńgə́ əghâ maŋ yǐ nə́ ńgyǐ kɔ maŋ lɔg mətəənə ándó Mmaʼmbîə a fɛ̂ nə́ nə́ maŋ ńtsə́gə áwɨ́ əwɨ́ tə́shúnə́. Ńté ńgə́ mətɨ mɨ mə́ chî lə́ á mə́ kwíŋkə nə́ áwə́ənə́, mə́ kě chî lə́ á mə́ shamkə̂ nə́ áwɨ́ pô.

¹¹Pəlimə́ mə, nə́ pə́ əghâ nə́ mbǒ nə́ əzəənə́! Náŋ nə́ ndú ətsəmə á mə́ koʼnə̂ ghɛn fyagə̂; Jwə́ʼtə nə́ məntəgə́ mə; pímnə nə́ á mə́m pəənə́, chî nə́ nə́ mbwɔ́dnə, ńjî ńgə́ Əsê páʼ ə́ túg nə́ akɔŋnə pópə mbwɔ́dnə ə́ yǐ ńchîə a tətɨ pəənə́.

¹²Chaʼtə̂ nə́ məmbɨ mɨ̈ ńchwegə̂ ŋwu ntsəm nə́ akɔŋnə pɔ́ pə́ Yeso. Pɨ pə́ Əsê pətsəm pó túmə achaʼtə á mbô pəənə́.

¹³Ńgə́ apɔŋə́ntə́əmə Mmaʼmbî Yeso Klisto, pó akɔŋnə Əsê nə́ Ajwǐəsê páʼ ä kyeetə̂ nə́ áwɛ̂n a chîə á mə́m pɨ pətsəmə.