Read Awing 2 Kɔlintyanə 2 Bible Online

2 Kɔlintyanə 2 - Awing bible

2 Kɔlintyanə 2

¹Ńdaŋ ə́lɨ́d maŋ ghɛd ntə́əmə mə ńgə́ maŋ kě á mbô pɨ yǐ pɨ yǐəə á mə́ ghɛd nə́ ntɨ́ ə́wɨ́ ə́ tə́ fɨnə̂ pô.

²Ńté ńgə́ təmbɔʼ maŋ ghɛd nə́ tə́ fɨnə̂, əwə a pɨ ńchî ə́wɨ́ páʼ a yǐ nə́ ghɛd maŋ tə́ ńkɔŋtə̂? Lə́ kě tsɔʼə pɨ páʼ maŋ ghɛd nə́ pɨ fɨnə̂ nə́ yǐ nə́ ghɛd maŋ kɔŋtə̂ pó?

³Lə́ anu páʼ a nə ńgɛd nə́ maŋ ŋwaʼlə̂ aŋwaʼlə zəənə́ á mbô pɨ lə́ ńté ńgə́; maŋ nə ńkě kɔŋə̂ á mə́ yǐ nə́ á mbô pɨ páʼ nə́ pěʼ nə́ ńchîə á mə́ ghɛd nə́ maŋ tə́ ńkɔŋtə̂ nə́ ghɛd maŋ chîə á pə́ á mə́mə afɨnə pô. Ńté ńgə́ maŋ chígə́ ńjî ńgə́ təmbɔʼ maŋ tə́ ńkɔŋtə̂ pɨ pətsəm kə́ ńtə́ ńkɔŋtə̂.

⁴Ńté ńgə́ maŋ nə ŋwaʼlə̂ á mbô pɨ lə́ á mə́m mɛ́ ngə́ʼə, ntə́əmə mə ə́ ńtə́ ńjwaʼə̂ mə ńdzoŋ ḿbegə̂ nəkyéŋ ə́wə́ a əmə́g maŋə. Maŋ nə ńkě ŋwaʼlə̂ lə́ mə́ ghɛd nə́ pɨ tə́ fɨnə̂ pô, maŋ nə́ ŋwaʼlə̂ lə́ mə́ nɨd nə́ akɔŋnə yə nɨ́ nə́ páʼ maŋ túg nə́ ńté áwə́ənə́.

⁵Lə́ mbɔʼ ŋwu tsə̌ a ghɛd ndim əyǐə a fɨnə̂, a kě lə́ a mbɨ maŋ ghɛd pô, lə́, a ghɛd lə́ á mbô pɨ pətsəm tə ńkoʼ nə́ ndú yitsə̌. (Maŋ sóŋə ə́lɨ́d lə́ ńté ńgə́ maŋ kě kɔŋə̂ á mə́ tsə́g nə yí tə́shú pô)

⁶Atsáŋ jɨ páʼ ŋwu yi nɨ́ nə́ a fɛ̂ nə́ lə́, á koʼnə̂ á mbô ńté ŋwu zə̂.

⁷Nə́ pə əghâ nə́ pɨ tíʼ ńchî lə́ á mə́ ləgnə̂ təpɔŋ əyǐ ə́ tû pwɔ́dkə ntɨ́ əyə́, ńjî ńgə́ kɔ a tə́ fɨnə̂ tə́shúnə́.

⁸Lə́ á pə́ ńgə́ maŋ póʼ mbô nə́ pɨ ńgə́ nə́ ghɛlə̂ a jî ńgə́ pɨ chígə́ ńkɔŋə̂ yə́.

⁹Maŋ ŋwaʼlə̂ aŋwaʼlə zɨ ńté lə́ ńgə́ maŋ kə̈ loonə̂ á mə́ jî nə́ ndzaŋ pɨ nə ńtɨ́ nə́ əshîʼnə á mə́mə akwaʼlə, ə́ pɨ kə́ jî ńgə́ kɨ pɨ ə́lɛ́ ńchî təmbɔʼ nə́ zóʼnə məntəgə́ mə əghâ ətsəmə?

¹⁰Ŋwu ntsəm páʼ pə́ ləgnə̂ nə́ pətəpɔŋ pí, maŋ yǐ kə́ ləgnə̂ azéemə. Anuə atsəm maŋ ləgnə̂, təmbɔʼ maŋ pěʼ ḿbeg ńdəgnə̂ anu yətsə́, mäŋ ləgnə̂ ńté lə́ áwə́ənə́ á mbi Klisto,

¹¹Pɛn faʼə̂ ə́lɛ̌ lə́ ńté ńgə́ kɔ Satanə a tsɛɛlə̂ áwɛ̂n, ńté ńgə́ pɛn jî məsê mə́ ndú míə.

¹²Əghâ ándó maŋ nə ńgyǐ nə́ ńkwúnə Təlowasə á mə́ náŋkə nə́ Nkɨ yi Əshîʼnə ńté Klisto lə́, ńjɨ́ ńgə́ Mmaʼmbîə a kə ŋáʼ ndúmə á mbô maŋ ə́wə́.

¹³Lə́ maŋ nə ḿbyádnə ńtúgə apɔ́g ńté ńgə́ maŋ nə ńkě mɔ́mɛ́ əwɛ̂n Taatusə zɨ́ pô. Ńdaŋ ə́lɨ́d maŋ tíʼ ə́fɛ̂ mbǒ á mbô pó, ńtíʼ ńgɛnə̂ Masedonya.

¹⁴Lə́ maŋ fɛ̂ ndǎ á mbô Əsê! Ńté ńgə́ a nəələ̂ áwɛ̂n nə́ ndú əghâ ətsəm ńgə́ pɛn tə́ ńyinə̂ pɛ̌npə Klisto páʼ a tsɛ nə́ ajúmə atsəmə á ntsoolə. Əsê a lɔgə̂ áwɛ̂n ńgɛlə̂ ńgə́ atsáb ńté Klisto a nyinə̂ aliʼə́ atsəm ándó azagə́ yə ləmkə̂ nə́.

¹⁵Ńté ńgə́ pɛn chî lə́ ándó azagə́ aleŋ yə ləmkə̂ nə́ páʼ Klisto ä fɛ̂ nə́ á mbô Əsê, páʼ a shamnə̂ nə́ á mə́m pɨ pə́ chwád nə́ ńkə́ shamnə̂ á mə́m pɨ pə̈ péŋ nə́.

¹⁶Á mbô pɨ pətsɨ́ lə́ azagə́ páʼ ä yǐ nə́ nə́ nəwûə, nə́ pətsɨ́ á pə́ azagə́ páʼ ä fɛ̂ nə́ nchîmbîə. Lə́ əwə a koʼnə̂ nə́ mbɔʼ a faʼ ndɛn mənu ghɛn ətsəmə?

¹⁷Pɛn kě chî lə́ ándó pətsə́ pɨ tə nə́ənə ándó pó lɔg nə́ atséebə Əsê ə́sɛd əpú məta pə́ fi nə́ pô, ńté ńgə́ Əsê a túmə áwɛ̂n, pɛn tséebə a ndə̌ŋdəŋ əwɛ̂nə á mbi yə́ ándó ngaŋə́faʼ Klisto.