Read Awing 2 Kɔlintyanə 3 Bible Online

2 Kɔlintyanə 3 - Awing bible

2 Kɔlintyanə 3

¹Á chîə á pə́ ándó pəg pɨ ńtíʼə fítə pə́ məmbɨ mə́g ndzaŋ pəg koʼnə̂ nə́ lə́ ə́lɛ́? Pəg kě chîə á mə́ ŋwaʼlə̂ nə́ aŋwaʼlə ə́fɛ̂ á mbô pɨ kɨ kwáalə aŋwaʼlə á mbô pɨ á fítə nə́ áwə́g ńgə́ pəg koʼnə̂ pô. Kɨ pəg tə́ ńdɔ mbô ŋwaʼlə̂ yi wə́?

²Pɨ nə́ nkɔ̌ʼmbɨ wɨ lə́ aŋwaʼlə azə́g pəg ŋwaʼlə̂ nə́ á mə́m məntɨ́ pəənə́. Ŋwu ntsəmə a yǐ jîə zə́ələ́, ŋwu ntsəmə a kə́ fóŋə[1].

³Pɨ nɨd ńgə́ pɨ lə́ aŋwaʼlə páʼ Klisto a ŋwaʼlə̂ nə́, lə́ aŋwaʼlə yəwə́ á pə́ ńdaŋ lə́ á mbô pəgə́. Pə́ kě lə́ nə́ nkɔŋə́ aŋwaʼlə ŋwaʼlə̂ pô, pə nə ŋwaʼlə̂ lə́ nə́ Ajwi páʼ á pə́ nə́ yə Əsê páʼ ə́ chî nə́ á mbîə, pə nə ńkě lə́ á ndú məngɔʼ ŋwaʼlə̂ pô ḿbə́ ŋwaʼlə̂ lə́ á mə́m məntɨ́ mə́ pəənə.

⁴Pɛn tséebə ə́lɛ̌ lə́ ńté lə́ Klisto páʼ a ghɛd nə́ pɛn zə́ʼnə nə́ Əsê tsɔʼə tə apɔ́gə.

⁵Pəg tséebə ə́lɛ̌ ńkě té ńgə́ pəg túg mətəənə á mə́ faʼ nə́ anu yətsə́ pô, mətɨ mətsəm mə́ lǒo lə́ á mbô Əsê pəg faʼə̂ anuə atsəm pəg faʼ nə́,

⁶Əsê páʼ ə́ ghɛd nə́ pəg túg mətɨ á mə́ pə nə́ ngaŋə́faʼə á mə́m əka yi fîə, yi páʼ ə́ pə́ nə́ yə ajwiə, ńkě á pə́ yə aŋwaʼlə pô, ńté ńgə́ nələ́g nə́ aŋwaʼlə nə̈ jwítə, lə́ Ajwiə á pə́ fɛ̂ nchîmbîə.

⁷Pə́ kə ŋwaʼlə̂ pənoŋkə lə́ á ndu əpag məngɔʼə, nkyaʼ Əsê ə́fɛ́lə əghâ pə́ nə fɛ̂ nə́ pə́ələ́ á mbô Mosisə. Nkyaʼ Əsê yi wə́ ə́ nə́ ḿbǎtə ńtə́ ḿměe yə́ á əshî Mosisə lə́, ḿbə́ ńtyantə̂ nə́ ndú mbɔʼ pɔ́ pə́ Islɛl pó nə ńkě əmə́g mɔ́b nə́ yí tə́g pô. Təmbɔʼ noŋkə ándó wə́ələ́ á jwítə nə́ á kə́ yǐ nə́ ńté mbô nkyaʼ zɨ,

⁸á pə́ ńgə́ afaʼə ándó páʼ á pə́ nə́ yə Ajwiə a yǐ túgə a nəgháʼ páʼ á nɨ́ nə́ tə ńtíʼ ńchî ə́lɛ́?

⁹Təmbɔʼ afaʼə ándó zə́ələ́ ä ghɛd nə́ pɨ pə́ wǔ əsáʼ á túgə nəgháʼ, lə́ á pə́ ńgə́ yə ándó páʼ ä ghɛd nə́ pɨ pə́ tɨ́ ndə̌ŋdəŋ, əyǐ nəgháʼə á yǒ nə́ənə á pə́ ə́léenə́?

¹⁰Təmbɔʼ pɛn sóŋ ńgə́ ndzaŋə ándó páʼ ghɛn nəgháʼ əghâ nə́ á kə ŋwaʼ nə́ tə́shú lə́, nəgháʼ páʼ wə́ələ́ a nə ŋwaʼ nə́ á ntsɛɛmbi a tíʼ ənukə́taŋə, mbɔʼ pə́ tə́gə ághɔ́b yə́.

¹¹Ńté ńgə́ mbɔʼə ajú páʼ a shwəgtə̂ nə́ a túg mbô nəgháʼ zɨ, á pə́ ńgə́ ajú páʼ a kě nə́ shwəgtə̂ pô əyǐ nəgháʼə a yǐ tíʼ ŋwaʼ tə pə́ ə́léenə́?

¹²Ndzaŋ pɛn túg nə́ akwaŋ ńtə́ ḿbyáabə lə́, pɛn kě apɔ́g yətsə́ túg pô.

¹³Pɛn kě chî lə́ ándó Mosisə pô, páʼ a kə́ kə́bkə nə́ əshî yí ńjî ńgə́ kɔ pɨ pə́ Islɛlə zɨ́ nkyaʼ yi ŋwaŋkə̂ nə́ zə́ ndzaŋ zɨ́d shwəgtə̂ nə́ ńgɛnə̂.

¹⁴Pə́ kə fwɔn ətû póobə́, tə ńkoʼə̂ pə́ ə́sɛ̂n pə́ pɛ́d ńkə́bkə ajîə azɔ́b nə́ apagə atsəʼ əghâ ándó pö fóŋ nə́ á mə́m əka yi lɛn wə́ lə́. Təmbɔʼ pə́ ŋáʼə apagə atsəʼ zɨ́d zɨ ńdaŋ lə́ tsɔʼə ndzəm Klisto.

¹⁵Kɨ tsɔʼə ə́sɛ̂n, əghâ ətsəmə ándó pó fóŋ nə́ a noŋkə Mosisə apagə atsəʼ zə́ á kə́bkə əjî əghóobə́.

¹⁶Lə́ təmbɔʼ pə́ ŋáʼə zɨ́d tsɔʼə ndzaŋə ándó aŋwaʼlə Əsê á sóŋ nə́ ńté Mosisə ńgə́, “Pə́ nə ŋáʼə apagə atsəʼ ají lə́ əghâ ándó a nə sɛdnə̂ ḿbímə Mmaʼmbîə.”

¹⁷Əghâ nə́ lə́ Mmaʼmbî lə́ Ajwiə, aliʼə́ atsəm páʼ Ajwiə a Mmaʼmbîə á chî nə́ ə́wə́, afaʼə apoʼə á kě ə́wɨ́ chî pô.

¹⁸Pɛn pətsəm ándó pɛn kə tsɔ́ʼ nə́ apagə atsəʼ zə́ pɛn náŋə nəgháʼ Mmaʼmbî wə́ələ́ tíʼə ŋwaʼə̂ á mbɨ pɛnə̂. Wə́ələ̈ tíʼə ńkwúblə áwɛ̂n pɛn tíʼə ńkyaʼə̂ ńgɛnə̂ nə́ mbiə á mə́ chî nə́ tsɔʼə ándó yə́. Zəənə́ á lǒo lə́ á mbô Mmaʼmbî páʼ a pə́ nə́ Ajwiə.