Read Awing 2 Kɔlintyanə 4 Bible Online

2 Kɔlintyanə 4 - Awing bible

2 Kɔlintyanə 4

¹Á pə́ ńgə́ ndzaŋə ándó pɛn chî nə́ á mə́mə afaʼ zɨ ńdaŋə̂ á pə́ á mə́m akóolə́mə́lə́ŋə Əsê lə́, mbô mɛ́n mə́ kě yǐ pwɔ́dkə pô.

²Pɛn kǐə áwɛ̂n mənu mə́ əsə́ənə ándó páʼ pə́ faʼ nə́ nəlyaŋnə́ ńkə́ ńkǐə áwɛ̂nə á mə́ píʼkə nə́ mənu kɨ kə́ ńkwúblə atséebə Əsê. Ńdaŋ ndzaŋ pɛn tsáb nə́ ndə̌ŋdəŋə́ a əshîsaŋ pɛn ghɛd ńgə́ nchîmbî əzɛ̂nə á mbi Əsê ə́ chî nə́ ndú mbɔʼ pɨ pə́ jɨ́ ńgə́ ntɨ́ əwɛ̂n ə́ ŋwaʼə̂.

³Mbɔʼ nkɨ yi əshîʼnə wə́ pɛn náŋkə nə́ lə́ ə́ pə́ yi kə́bkə nə́, pə́ kə́bkə lə́ tsɔʼə á mbô pəənə́ ándó pó tə́ nə́ ḿbéŋə.

⁴Pó kě ntɨ́ nə́ Əsê néŋ lə́ ńté ńgə́ əsê ndu mbî zɨ ə́ fwɔn məntɨ́ móobə́ á mə́m ndzəmə, á mə́ ghɛd nə́ ńgə́ kɔ pó zɨ́ nkyaʼ nkɨ yi əshîʼnə páʼ wɨ̈d nɨd nə́ nəgháʼ Klisto, yí páʼ a pə́ nə́ ajubə Əsê.

⁵Ńté ńgə́ pəg kě náŋkə lə́ anu ńté mbɨ əzəg pô. Pəg náŋkə lə́ ńgə́ Yeso Klisto lə́ Mmaʼmbîə, Pəg pə́ ḿbə́ əpoʼ pɨ ńté atûə Yeso.

⁶Əsê páʼ a kə́ sóŋ nə́ ńgə́, “Á mə́m ndzəmə nkyaʼ yǒ kɛ́lə!” Lə́ tsɔʼə Əsê yi wɨ́ páʼ a kə ghɛd nə́ nkyaʼ əjí kɛ́lə á mə́m məntɨ́ pɛnə̂, á mə́ yǐ nə́ nə́ ajîə nəgháʼ Əsê á mbô pɛnə̂, páʼ zə́ələ́ ä kɛ́d nə a əshî Klisto.

⁷Lə́ pɛn páʼ pɛn túg nə́ afoʼə ajwi zɨ pɛn chî lə́ tsɔʼə ándó pə́pə̌ atsaʼə́ nəkəŋə́. Á mə́ nɨd nə́ ńgə́ mɛ́ tə́kɔʼ mətəənə á chî lə́ á mbô əsê, lə́ kě əwɛ̂n pô.

⁸Pɛn zá ńtúgə məngə́ʼə, lə́ mə́ pə́ ńkě áwɛ̂n kwéʼnə ńjíʼ pô, əghâ tsə́ məntɨ́ mɛ́n mə́ koʼlə̂, lə́ pəg pə́ ńkě tsɔ́ʼ mbô mə́g ḿmyaʼə̂ afaʼ pô.

⁹Ngaŋkə́pa yi nɨ́ nə́ ə́ chî ə́wə́, lə́ pə̂gpə ńkě láʼ ńchî tə əshu pô, əghâ tsə̌ pə́ ghɛd ndě əwə́g pyádnə ńdzáŋə, lə́ pó pə́ ńkě áwə́g tsəŋkə̂ pô.

¹⁰Nə́ əghâ ətsəm pɛn twáamə á nəwû Yeso á mə́m məmbɨ mɛ́n páʼ mə́ pə́ nə́ yí kwûə. Ńjî ńgə́ mbɔʼ pə́ kə́ ńjɨ́ nchîmbî əjǐ á mə́m mbɨ pɛnə̂.

¹¹Á mə́m nchîmbî əzɛ̂n pɛn tə́əmə lə́ á ntso nəwû əghâ ntsəm ńté atûə Yeso. Ńjî ńgə́ mbɔʼ pə́ zɨ́ nchîmbî əjíə á mə́m mbɨ əzɛn yi ə̈ kwû nə́ zəənə́.

¹²Zəənə́ á nəələ̂ lə́ ńgə́ pəg chîə ntso nəwûə, nchîmbî pə́ ńchîə á mə́m pəənə́.

¹³Aŋwaʼlə əsê a sóŋ ńgə́, “Maŋ kə tsáb lə́ ńté ńgə́ maŋ néŋ ntə́əmə mə nə́ Əsê.” Tsɔʼə nə́ táʼə Ajwiə á mə́m táʼ mbimə́ pəg kə́ ńtsáb ńté ńgə́ pəg néŋ ntɨ́ əwə́g nə́ yə́.

¹⁴Pɛn jî ńgə́ Əsê páʼ a kə júmkə nə́ a Mmaʼmbî Yeso ə́fɛ̂ nchîmbî nə́ yí, a yǐ kə́ júmkə áwə́g pə̂gpə Yeso ə́ lɔgə̂ áwə́g ə́ zoŋ pegə̂ áwɨ́ ə́wɨ́ pɛn ghɛn ńchîə á nəpɛnə́ yə́.

¹⁵Mənu mɨ mətsəm mə́ chî ńté lə́ atûə azə́ənə́, ńjî ńgə́ ndzaŋə ándó apɔŋə́ntə́əmə Əsê a ghɛn nə́ á mbô pɨ pipə nɨ́ nə́ lə́, pó yǐ ghɛn nə́ mbiə á mə́ ghɛd nə́ əchaʼtə́sê ndǎmbôsê, á mə́ ghɛd nə́ Əsê a túgə nəgháʼə.

¹⁶Lɛ̌ anu páʼ a ghɛd nə́ mbô mɛn mə́ kě póolə lə́, na mbɨ əzɛn pǎtə ńkwûə ńgɛnə̂ lə́, ajwiə azɛ̂nə á pə́ ńtə́ ə́sɛlə̂ yə fî əlě ətsəmə.

¹⁷Mɔ́ kə́nyaŋ ngə́ʼ ghɛn pɛn zɨ́ nə́ nə́ akəmə ndɛd zɨ lə́ a yǐ fɛ̂ mɛ́ tə́kɔʼ nəgháʼ yətsə́ á mbô pɛn páʼ a yǐ nə́ kě měe po, wə́ələ́ a yǐ pyádnə gháʼ tsɛ ngə́ʼ yi wə́.

¹⁸Ńté ńgə́ pɛn kě əmə́g mɛ́n tə́g lə́ nə́ mənu páʼ pə́ tə́ nə́ ńdzə́ənə mɨ́d pô, pɛn tə́g əmə́g mɛn lə́ nə́ mənu páʼ pə́ kě nə́ mɨ́d tə́ ńdzə́ənə pô. Anu páʼ pə́ zɨ́ nə́ ä chîə lə́ tsɔʼə nə́ mɔ́ akəmə ndɛlə́, lə́ anu páʼ pə́ kě nə́ zə́ənə pô a yǐ chî mɛdnə̂.