Read Awing 2 Kɔlintyanə 5 Bible Online

2 Kɔlintyanə 5 - Awing bible

2 Kɔlintyanə 5

¹Ńté ńgə́ pɛn jî ńgə́ a yǒ pə́ əghâ pə́ shaʼtə̂ nə́ ntaŋ ghɛn pɛn chî nə́ á mə́m əwɨ́ páʼ wɨ́d pə́ nə́ mbɨ əzɛnə̂ á ndu mbî lə́, Əsê a yǒ túg ndɛ̂ á mbô pɛnə̂ á nəpó pɛn chîə á mə́m ə́wə́, ndɛ̂ páʼ Əsê nə́ nkɔ̌ʼmbɨ yə́ a pɔ́ nə́, lə́ ndɛ̂ ə́ yǒ nə́ chî mɛdnə̂.

²Pɛ̈n tsámnə ńtíʼə ńdoonə̂ ńgə́ mbɔʼ pɛn chî nə́ ngyaʼə́ əzɛ̂n páʼ ə́ chî nə́ nəpó lə́.

³Təmbɔʼ pɛn wê ntaŋ ə́wə́ a mbɨ pɛn, pɛn kě ntə̌blə tɨ́ pô.

⁴Ndzaŋ pɛn pɛ́d nə́ á mə́m ntaŋ ghɛnə́ á ndu mbî lə́, pɛ̈n tsámnə ńté nətáŋ əwɛ̂nə, pɛn kě tsámnə ńdoonə̂ lə́ ńgə́ pə́ tsɔ́ʼ na mbɨ ndu mbî zɨ pô, pɛn tsámnə ńdoonə̂ lə́ ńgə́ Əsê a wê yi nəpó zə́ á mbɨ pɛnə̂. Ńjî ńgə́ nchîntɨ ə́ mǐə ajú páʼ ä kwû nə́.

⁵Lə́ tyáŋtə Əsê ńtyáŋtə əwɛ̂n nə́ kwúblə wɨ́d ghɛnə̂, a fɛ̂ nə́ Ajwiə ajíə á mbô pɛnə̂ ándó aleŋkə ńgə́ kwúblə wɨ́d wə́ á yǐəə.

⁶Lə́ á pə́ ńgə́ pəg kě apɔ́g yətsə́ túg pô, pəg jî ńgə́ ndɛlə́ ándó pəg chî nə́ á mə́m na mbɨ lə́, pə̂gpə Mmaʼmbî chî lə́ məndiə məndiə.

⁷Ńté ńgə́ pəg chîə mbî ńdaŋ lə́ mə́m mbimə́, pəg kě á mbî chî ńdaŋ lə́ á mə́mə anu pəg zɨ́ nə́ pô.

⁸Pəg lwɛ́nkə nə́ atyǎntə ntə́əmə, ḿbyádnə ńkɔŋə̂ á mə́ mɛdtə̂ nə́ ngyaʼə́ əzəg zɨ páʼ ə́ pə́ nə́ na mbɨ lə́, ə́ ghɛn chî nə ngyaʼə́ páʼ ə́ pə́ nə́ əzəg pə Mmaʼmbîə.

⁹Kɨ pɛn chîə a pə́ nchîndɛ̂ kəənə aliʼə́ ndaʼ pɛn lɔg nə́ aliʼə́nuə azɛ̂n á mə́ ghɛd nə́ Mmaʼmbîə a tə́ ńkɔŋtə̂.

¹⁰Ńtə́ ńgə́ pɛn pətsəm ə́ yǒ tə́əmə á mbi Klisto alěsáʼə́məsáʼə. Ŋwu ntsəmə a yǒ kwá ntsɔ́ʼəfaʼ əjǐ kɨ ə́ pɔŋ kɨ ḿbə́g, ə́ zoŋ nə́ ndɛn mənu ətsəm páʼ pɛn kə̈ faʼ nə́ á mə́m na mbɨ əzɛnə̂.

¹¹Ńdzoŋ nə́ apɔ́g pɛn túg nə́ ńté a Mmaʼmbî, pɛn tíʼə ńdoonə̂ á mə́ tsáb nə́ té a yə́ á mbô pəənə. Əsê a lánə ńchígə́ ńjîə áwɛ̂nə, maŋ kwaŋ ńgə́ á mə́m məntɨ́ pɨ, pɨ kə́ ńdánə ńchígə́ ńjîə a mə.

¹²Pəg kě kə́ ńdɔ ngǎ yitsə̌ lə́ á mə́ fítə nə́ məmbɨ mə́gə́ á mbô pó pô, pəg loonə̂ lə́ ńgə́ nə́ tə́ ńtəələ̂ ńté áwə́gə́, ńjî ńgə́ nə́ yǐ ńchî mbɔʼ nə́ kwěe pɨ páʼ pó kɔn nə́ ndzɔʼ ńté pə́ ajú pó pə́ nə́ zə́ələ́ á ndzɔʼə́ aláʼ ńkě té pə́ ndzaŋ ntɨ́ əghɔ́b chî nə́ pô.

¹³Nə́ kwaŋ ńgə́ pəg tə́ ḿbɛ́ɛlə? Təmbɔʼ pəg tə́ ḿbɛ́ɛlə tə ḿbə́ pəg pɛ́ lə́ á mbô Əsê. Mbɔʼ ətú pəg tə́ faʼə̂, ə́ tə́ faʼə̂ ńté lə́ atûə azə́ənə́.

¹⁴Ńdaŋ ə́lɨ́d anu páʼ á tɛ́nkə nə́ áwə́g lə́ akɔŋnə Klisto, əghâ nə́ ándó pɛn lánə nə́ ńchígə́ ńjî ńgə́ táʼ ŋwunə a nə ńkwû ńté atûə azɛ̂n pətsəm lə́, a nɨd ńgə́ ŋwu ntsəmə a nə ńkwûə.

¹⁵A nə ńkwû ńté atûə ŋwu ntsəm ńjî ńgə́ pɨ pə́ chî nə́ á mbî pó kě lə́ a ngǎ pó pɨ ńchî pô, pó chî ńté lə́ a yí páʼ a nə ńkwû nə́ ḿbɨ ńjúmnə nəwû ńté atûə azóobə́.

¹⁶Nə́ əghâ nə́ pɛn kě yǐ tə́ sáʼ əsáʼ ŋwu lə́ ndzaŋə ándó pɨ pə́ mbî pə́ sáʼ nə́ məsáʼ pô. Mbɔʼ a nə ḿbə́ nə́ əghâ tsə́ pɛn tə́ sáʼ əsáʼ Klisto ándó pɨ pə́ mbî pó sáʼ nə́ məsáʼ, tə ḿbə́ pɛn kě əsáʼ əyí ə́lɨ́d yǐ pɨ sáʼ pô.

¹⁷Lə́ pə́ ńgə́ ŋwu ntsəm páʼ a chî nə́ á mə́m Klisto lə́ ŋwu yi fîə. Mənu mimə lɛn mə́ laŋə̂, mimə fî mə́ yǐəə.

¹⁸Mənu mɨ mətsəm mə́ fɛ́d lə́ á mbô Əsê, ńdaŋə̂ a ndzəm Klisto a sɛdkə̂ áwɛ̂n páʼ pɛn nə ḿbə́ nə́ ngaŋkə́pa əjí pɛn tíʼ pəshu píə, ńtíʼ əfɛ̂ afaʼə á mbô pɛn ńgə́ pɛn ghɛd pətsɨ́ pɨ pó kə́ ḿbə́ pəshu píə.

¹⁹Lə́ á pə́ ńgə́ Əsê a nə ńdɔgə̂ Yeso lə́ á mə́ kwá nə́ pɨ ə́wə́ á ndu mbî ə́sɛdkə̂ ághɔ́b pó yǐəə á mbô yə́, Əsê a nə ńkě təpɔŋ əghɔb lɔʼkə̂ pô, a nə fɛ̂ nkɨ yi wə́ á mbô pɛn ńgə́ pɛn tə́ ńdɔgə̂ nəələ̂ pɨ ə́wɨ́ ndzaŋ mbɔʼ pó pə́ pəshu píə.

²⁰Nə pə́ əghâ nə́ pəg náŋkə nkɨ Klisto ándó á tsáb Əsê nə nkɔ̌ʼmbɨ yí ńdaŋ nə́ pɛnə̂. Ńdaŋə̂ á ndzəm Yeso, pəg póʼmbô ńgə́ Əsê sɛdkə̂ áwɨ́ páʼ pɨ nə́ ḿbə́ nə́ ngaŋkə́pa əjí lə́ nə́ tíʼ ḿbə́ pəshu píə.

²¹Ńté atûə azɛ̂n, a ghɛd a pə́ ńgɛd təpɔŋ páʼ a nə ńkě nə́ təpɔŋ jî pô, ńjî ńgə́ pɛn laŋə̂ á ndzəm yí ńtíʼ ntɨ́ ndə̌ŋdəŋə́ á mə́m Əsê.