Read Awing 2 Kɔlintyanə 6 Bible Online

2 Kɔlintyanə 6 - Awing bible

2 Kɔlintyanə 6

¹Ndzaŋə ándó pɛn faʼ nə́ pɛn pə́ Əsê lə́, pəg póʼ mbô nə́ pɨ ńgə́ kɔ apɔŋə́ntə́əmə Əsê páʼ a fɛ̂ nə́ nə́ pɛnə̂ á laŋ kətaŋə.

²Ńté ńgə́ Əsê a sóŋ ńgə́, “Ndzaŋ ndɛd kə koʼnə̂ nə́ á mbô maŋə á mə́ faʼ nə́ anu yə əshîʼnə á mbô pɨ lə́, maŋ nə ńdzóʼə atséebə azə́ənə́. Ndzaŋə alě á kə koʼnə̂ nə́ á mə́ chwádkə nə́ áwɨ́ lə́, maŋ kə́ ńkwáalə áwə́ənə́.” Jwə́ʼtə nə́! ndɛd ə́ koʼnə̂ nə́ á mbô Əsê á mə́ faʼ nə́ əshîʼnə á mbô pəənə́, ə́sɛ̂n lɛ̌ lə́ alě pə́ yǐ nə́ chwádkə pəənə.

³Pəg kě tə́ ńdoonə̂ ńgə́ ŋwu tsə̌ a fɛ̂ fid ńté afaʼə azə́g pô. Lə́ ghɛd ə́lɨ́d pəg kě loonə̂ mə́ tə́g nə́ kɨ́ʼə́ á alaŋə́ ndú ŋwu tsə̌ pô.

⁴Lə́ á mə́m anuə atsəm pəg faʼ nə́ zɨ́d, pəg nəələ̂ lə́ ńgə́ pəg lə́ ngaŋə́faʼ Əsê, á mə́ wam nə́ ntə́əmə á mə́m məngə́ʼə, á mə́m mənu mə̈ tsɛ nə́ áwə́gə́, pó pətsə́ ətyǎntə mənu chî nə́ á ndu mbîə.

⁵Pə́ nə shúmə áwə́gə́, ə́fwɔnə̂ áwə́gə́ á nkáʼə atsáŋə, apoŋə pəənə á chúʼ ntso nə́ pəgə́, pə̈g faʼə̂ tə́shúnə́, ə́sámkə pəlê ḿbəənə̂ ńchîə nə́ njiə.

⁶Lɛ̌ mənu mə́ nɨd nə́ ńgə́ pəg lə́ ngaŋə́faʼ Əsê: məntɨ́ mə́g mimə ŋwaʼ nə́, ajíənuə, awaamə́ntə́əmə, əshîʼnə əwəg, Ajwǐəsê, ndə̌ŋdəŋə́ akɔŋnə əwəgə́,

⁷ndə̌ŋdəŋ nkɨ əwəg ḿbɨ ḿbá mətɨ mə́ Əsê. Pɛn túg mə tɨ́ nə́ ndə̌ŋdəŋə́ ándó məkɔŋ mə́ ntso mɛ́nə, á mə́ lɔg nə́ póʼnə ntso ə́wə́ ə́ kə́ lɔg kɨ́ʼ mbɨ əzɛ̂n wə́.

⁸Pɨ pətsə́ pó ghóʼkə áwə́gə́, pətsə́ pə́ wágə áwə́gə́, pətsə́ pə́ pəənə̂ ńdzɔmtə̂ áwə́gə́, pətsə́ pə́ ŋáŋkə áwə́gə́, Pətsə́ pə́ tséebə mənu mə́ təpɔŋ ńté áwə́gə́, pətsə́ pə́ tséebə mənu mimə əshîʼnə. Pə́ lɔgə̂ áwə́gə́ ándó ngǎŋntsəələ lə́ pəg pə́ ńtséebə lə́ ndə̌ŋdəŋə́.

⁹Pəg chîə ándó pɨ pə́ kě nə́ áwə́g jí pô, lə́ ŋwu ntsəmə a pə́ ńjîə áwə́gə́, ándó pəg tə́ ńkwûə, tsɔʼə ndzaŋ nə́ zɨ́ nə́ lɛ̌, pəg chîə á mbîə. Pə́ pǎtə néŋə atsáŋə á mbɨ pəg lə́, pəg pə́ ńkě kwû pô.

¹⁰Pəg pǎtə ńchî nə́ afɨnə lə́, ḿbə́ ńkə́ ńkɔŋtə̂ tsɔʼə kɔŋtə̂ nə́, ńchîə ándó pəg póŋ lə́ ḿbə́ ńgɛd pɨ pipə nɨ́ nə́ pó foʼə̂, ḿbɨ ńchîə ándó pəg kě ajûtsə́ túg lə́, ḿbə́ ńdánə ńtúgə ajúmə atsəmə.

¹¹Pəshunə́ á mə́m kɔlin, pəg tsáb ntɨ́ əwə́gə́ á mbô pəənə́, ḿbɨ́ ńkə́ ŋ́ŋáʼkə məntɨ́ mə́g mətsəmə á mbô pəənə́.

¹²Pəg kě məntɨ́ mə́gə́ á mbô pɨ kə́bkə pô, lə́ kə́bkə pɨ ńkə́bkə məmə́ənə́.

¹³Mäŋ tsáb əghâ nə́ ándó pɨ pə́ pə́ póonə mə, nɨd nə́ akɔŋnə á mbô pəg tsɔʼə ndzaŋ pəg kə́ nə̈ ńnəələ̂ á mbô pɨ lə́. Chígə́ nə́ ŋáʼ məntɨ́ mə́ənə́.

¹⁴Kɔ nə́ láʼ ńtsɛntə̂ ə́faʼ pɨ̌pə Pətəpǐsê, ńté ńgə́ mbɔʼ á kě nyi pô. Təmbɔʼ anuə a koʼnə̂ nə́ pó təpɔŋ təbə̂ ako lə́ ə́lɛ́? Təmbɔʼ nkyaʼ pó ndzəmə tíʼ táʼ lə́ ə́lɛ́?

¹⁵Təmbɔʼ Klisto pó Dɛbəəl ə́ pímnə lə́ ə́lɛ́? lə́ akə̂ anu páʼ ŋwunə a néŋ nə́ ntɨ́ nə́ Yeso a túg nə́ á mə́ faʼ nə́ pó tə néŋ ntɨ́ nə́ yə́?

¹⁶Təmbɔʼ Ndɛ̂ ə́ pə́ nə́ yi Əsê ə́ pímnə pópə məsê mə́ mbî lə́ ə́lɛ́? Ńté ńgə́ pɛn lə́ ndɛ̂ ə́ pə́ nə́ yi Əsê páʼ ə́ chî nə́ mbîə. Tsɔʼə ndzaŋ Əsê nə́ nkɔ̌ʼmbɨ əyí a sóŋ nə́ ńgə́, “Maŋ yǐ chîə á mə́m pó ə́ kə́ nyinə̂ á ńdzɔʼ pó, ə́ pə́ Əsê əzoobə́ pó kə́ ńtíʼ ḿbə́ pəənə mə.”

¹⁷Ńdaŋ ə́lɨ́d Mmaʼmbîə a sóŋ ńgə́, “Nə́ yǐ shib mɛdtə̂ ághóobə́ ə́fóg mbɨ əzəənə́ á mə́m pó. Kɔ nə́ túgə anu yətsə́ pɨ̌pə mənu mə́ kě nə́ ŋwaʼ pô, ńjî ńgə́ maŋ pímə áwə́ənə́.

¹⁸Maŋ yǐ pə́ lə́ Tǎ əwəənə́, Nə́ pə́ póonə mə pi pə́ mbyâŋnə pópə pi pə́ pəngyě lə́ sóŋ Mmaʼmbîə páʼ a tsɛ nə́ ajúmə atsəmə.”