Read Awing 2 Kɔlintyanə 7 Bible Online

2 Kɔlintyanə 7 - Awing bible

2 Kɔlintyanə 7

¹Pəshunə́ mə, Əsê a nə ńgɛd ndɛn məndaʼnə ghɛn ətsəm lə́ á mbô pɛnə̂. Ńdaŋ ə́lɨ́d pɛn chîə á mə́ sog nə́ məmbɨ mɛn ńjî ńgə́ ajúmə atsəm páʼ ä dɔtə̂ nə́ na mbɨ pó ajwi á fɛ́lə, ńjî ńgə́ pɛn ŋwaʼ ńgɛn fyag ńdaŋə̂ á mə́mə apɔ́gə Əsê.

²Ŋáʼ nə́ məntɨ́ mə́ənə́ á mbô pəg ńté ńgə́ pəg kě anu yətsə́ á mbô ŋwu tsə̌ fankə̂ pô, ńkë ŋwu tsə̌ fɨg pô, ḿbɨ ńkě ŋwu tsə̌ kə́ fɨg ńkwáalə ajúmə ají pô.

³Maŋ kě zɨ sóŋə lə́ á mə́ néŋ nə́ filə apa pɨ pô, ńté ńgə́ maŋ nə́ ḿbeg sóŋə á ntsɛɛmbi ńgə́ pəg túgə áwə́ənə́ a məntɨ́ pəg əshîʼnə. Á mə́ kwû nə́ lə́ pɛnə̂, á mə́ chî nə á mbî lə́ pɛnə̂.

⁴Maŋ zá ńtəələ̂ ńté áwə́ənə́, ńtúgə a tə́kɔʼ kətɨd ńté áwə́ənə́. Ntə́əmə mə lwɛ́nkə nə́ mbwɔ́dnə. Pɛn pǎtə ńchîə á mə́m məngə́ʼ lə́ ntə́əmə mə pɛ́d ńchî nə́ akɔŋtə.

⁵Á nə ḿbə́ pə́ ndɛd pəg nə́ ńgyǐ nə́ ńkwúnə á Masedonya lə́ akéenə á chîə á mbɨ pəgə́, lə́ məngə́ʼ mimə nɨ́ nə́ mə́ yǐəə á mbɨ pəgə́ á məndúmə məndúmə, pəg sáʼnə pəg pə́ pəənə apeŋə́ ḿbɨ ńtúgə apɔ́gə á mə́m məntɨ́ pəgə́.

⁶Lə́ Əsê páʼ a legtə̂ nə́ məntɨ́ mə́ pɨ pó fɨnə̂ nə́, a kə legtə̂ məntɨ́ mə́g ńdaŋ nə́ Taatus páʼ a kə tú nə́.

⁷Lə́ kə kě tsɔʼə mə yǐ nə́ mí páʼ mə́ nə ńgɛd nə́ mbɨ əzəg pɔŋ pô, lə́ kə kə́ ḿbə́ ándó a kə fiʼtə̂ nə́ áwə́g ndzaŋ pɨ nə néŋ nə́ ntɨ́ əyíə. A kə fiʼtə̂ áwə́g ndzaŋə ándó pɨ nə ḿbyádnə nə́ ńdoonə̂ á mə́ zɨ́ nə́ mə, ndzaŋə ándó pɨ fɨnə̂, ḿbɨ ḿbə́ ndzaŋə ándó pɨ tɨ́ nə́ ńkoʼnə̂ mə́ tɔ́mtə nə́ mə. Zɨ́d zəənə́ á ghɛd maŋ pɨ ḿbyádnə ńchígə́ ńkɔŋtə̂.

⁸Maŋ nə ḿbǎtə ńgɛd pɨ fɨnə̂ ńté aŋwaʼlə maŋ nə ŋwaʼlə̂ nə́ á mbô pɨ lə́, maŋ kě sɔbnə̂ ńgə́ maŋ nə́ ŋwaʼlə̂ pô. (Maŋ kə sɔbnə̂ ńté lə́ ńgə́ aŋwaʼlə yə wɨ́ á nə ńgɛd nə́ fɨnə̂, nə́ kə pǎ nə́ tə ə́fɨnə̂ tsɔʼə nə́ akəmə ndɛd lə́.)

⁹Nə́ pə́ əghâ nə́ maŋ kɔŋtə̂ ńkě té á pə́ ńgə́ maŋ nə ńgɛd pɨ fɨnə̂ pô, lə́ ntê á pə́ ńgə́ afɨnə azə́ənə́ a nə ńgɛd pɨ kwúblə ə́fɛ́lə á mə́m təpɔŋ əwəənə́. Əsê kə lɔg nə́ afɨnə azɨ́ ə́faʼ nə́ zə́ələ́, lə́ á pə́ ńgə́ pəg nə ńkě lə́ anuə təpɔŋə á mbɨ pɨ ghɛd pô.

¹⁰Ńté ńgə́ afɨnə Əsê ä faʼ nə́ nə́ zɨ́d, a ghɛlə̂ pɨ pö kwúblə məntɨ́ mɔ́b ə́fɛ́lə á mə́m təpɔŋ əghoobə́, akwúblə ntə́əmə ä tíʼə ńgɛlə̂ pɨ pó chwáalə, mbô akwúblə ntɨ́ zɨ kě nə́ afɨnə yǐəə pô, lə́ afɨnə páʼ á pə́ nə́ yə mbî, a yǐəə nə́ nəwûə.

¹¹Zɨ́ nə́ anu páʼ Əsê a ghɛd nə́ nə́ afɨnə zɨ́ zə̂. Zə́ələ́ a ghɛlə̂ nə́ tséebə məntɨ́ mə́ənə́, ḿbəənə̂ fǔəlóʼə á mə́ nɨd nə́ ńgə́ pɨ lə́ pəpóʼ pə́ ngaŋə, zɨ́ nə́ azáŋə́ndé pópə apɔ́g pɨ túg nə́, Zɨ́ nə́ ndzaŋ pɨ kə pyádnə nə́ ńdoonə̂ mə́ jɨ́ nə́ áwə́gə́, zɨ́ nə́ ndzaŋ pɨ nə ḿbóʼnə nə́ ńté áwə́gə́, zɨ́ nə́ ndzaŋ pɨ nə́ ńtúg nə́ ntə́əmə á mə́ fɛ̂ nə́ atsáŋə á mbô pɨ pó nə ńgɛd nə́ təpɔŋə. Pɨ nəələ̂ á mbô ŋwu ntsəm ńgə́ pɨ kě áwə́ənə́ anu yətsə́ fankə̂ á mə́mə anu yə wɨ́ pô.

¹²Lə́ á pə́ ńgə́ maŋ nə́ ḿbǎtə ŋwaʼlə̂ aŋwaʼlə yə́ ə́wɨ́ á mbô pɨ lə́, maŋ nə ńkě ŋwaʼlə̂ ńté lə́ a ŋwu páʼ a fankə̂ nə́ anu zɨ pô ńkě kə́ ŋwaʼlə̂ ńté lə́ ŋwu pə́ a fankə̂ nə́ anu zəənə́ á mbô yí pô, maŋ kə ŋ́ŋwaʼlə̂ lə́ ńgə́ á ŋwaʼə̂ atû pəənə á mbi Əsê ndzaŋ pɨ lánə nə́ ə́fɛ̂ məmbɨ mə́ənə́ á mbô pəgə́.

¹³Lə́ ghɛd ə́lɨ́d afɨnə azə́gə́ á měe. Lə́ nə ńkě tsɔʼə ńgə́ afɨnə azə́gə́ a měe pô, pəg nə ḿbɨ ḿbyádnə ńchîə á mə́mə akɔŋtə ndzaŋ pəg nə ńdzɨ́ nə́ Taatusə a chîə á mə́mə akɔŋtə ńdaŋ nə́ ndú páʼ pɨ pətsəm nə́ ńkwáatə nə́ á mə́ ghɛd nə́ ntɨ́ yí pwɔ́dnə.

¹⁴Maŋ nə ńtə́ ńtəələ̂ ńté áwə́ənə́ á mbô yə́, pɨ pɛn ńkě nətɛ́nə mə á ndəsê soŋ pô. Pəg kə́ zá ńtséebə ndə̌ŋdəŋə́ á mbô pəənə́, á pɛn ńkə́ ḿbə́ tsɔʼə ndzaŋə ándó pəg kə túg nə́ kətɨd ńté áwə́ənə́ á mbô Taatusə a fɛ́d ḿbə́ ndə̌ŋdəŋə́ lə́.

¹⁵Ńdaŋ ə́lɨ́d akɔŋnə ají ńté áwə́ənə́ ä kwíŋə ńtyantə̂ əghâ atsəmə ándó a kwumtə̂ ndzaŋə ándó pɨ pətsəm kə lɛ́ɛlə nə́ á mə́ zóʼnə nə́ məntəgə́ míə, akɔŋnə ají ńté áwə́ənə́ á kə ḿbɨ ńkwíŋ ndzaŋə ándó pɨ nə ńdɔg nə́ yí əshîʼnə á mə́m pɨ nə́ apɔ́g ńdzoŋə̂ ḿbɛ́nkə.

¹⁶Maŋ kwéʼnə ńkɔŋtə̂ lɛ titi, ńté ńgə́ mbɔʼ maŋ zə́ʼnə nə́ pɨ nə́ ntə́əmə mə ətsəmə.