Read Awing 2 Kɔlintyanə 8 Bible Online

2 Kɔlintyanə 8 - Awing bible

2 Kɔlintyanə 8

¹Pəlimə́ mə, pəg loonə̂ ńgə́ nə́ jî ndzaŋ Əsê a kə nɨd nə́ apɔŋə́ntə́əmə ajíə á mə́m mənkyeetə mə́ pɔ́ pə́ Əsê á Masedonya.

²Akwaʼlə a lánə ńchîə á mə́m pó ńdaŋə̂ á mə́m məngə́ʼ pó nə ńchî nə́ á mə́m ə́wə́, lə́ akɔŋtə á nə ńchígə́ ńdwɛ́nkə məntɨ́ móobə́, mbô mɔ́b mə́ pyádnə ŋ́ŋáʼnə á mə́ fɛ̂ nə́ páʼ pó nə ḿbǎ nə́ tə ḿbə́ pə́ pəpóŋ lə́.

³Maŋ fiʼtə̂ áwɨ́ ńgə́, pó nə fɛ̂ tə ńkoʼ ndzaŋə ándó mbɔʼ pó nə́ fɛ̂, tə ḿbɨ́ ńtsɛ ndzaŋ pó nə ńtúg nə́, təghə́ ŋwu tsə̌ a fyáalə ághóobə́

⁴pó nə ḿbóʼmbô nə́ pəg tə ńněe ńgə́ pəg fɛ̂ əseenə á mbô pó, pó néŋə azóobə́ apô á mə́ kwá nə́ pɨ pə́ Əsê Judya.

⁵Pó nə faʼ ńtsɛ ndzaŋ pəg nə ńtə́ nə́ ńkwaŋə̂. Pó kə peg ə́fɛ̂ məmbɨ móobə́ á mbô Mmaʼmbîə, ḿbɨ ńkə́ fɛ̂ məmbɨ móobə́ á mbô pəg tsɔʼə ndzaŋ Əsê a kə lɔ nə́.

⁶Pəg tíʼə ḿbóʼmbô nə́ Taatus páʼ a nə chwáakə nə́ afaʼ zɨ́d zɨ ńgə́ a ghɛn nə́ mbi á mə́ kwá nə́ áwɨ́ nə́ məgtə̂ afaʼə apɔŋə́ntɨ́ zɨ́d zəənə́ á tətɨ pəənə́.

⁷Pɨ pyádnə foʼ nə́ ajúmə atsəm nə́ túg nə́, á mə́m mbimə́, á mə́m ndú nə́ fɛ̂ nə́ atséebə Əsê ə́wɨ́ ńdzoŋ ḿbéenə ajíənuə azɨ́ ə́wɨ́ ḿbɨ ńkə́ ḿbə́ ndzaŋ nə́ kɔŋ nə́ á mə́ kwáatə nə́ pəənə, ḿbɨ ḿbə́ nə́ akɔŋnə nə́ túg nə́ ńté áwə́gə́. Ńdaŋ ə́lɨ́d pəg lɔ ńgə́ mbô mɨ́ mə́ kə́ ŋáʼnə á mə́m afaʼə apɔŋə́ntɨ́ zɨ nə́ fɛ̂ nə́ məfɛ̂nə á mə́ kwáatə nə́ pɨ pə́ Əsê wɨ́ lə́.

⁸Maŋ kě ə́sóŋə ə́lɛ̌ ə́fyáalə áwɨ́ lə́ fyád nə́ pô; Ndzaŋ páʼ maŋ nɨd nə́ ndzaŋə ándó pɨ pətsə́ pó kɔŋtə̂ nə́ á mə́ kwá nə́ lə́, maŋ loonə̂ lə́ á mə́ jɨ́ nə́ ndzaŋ páʼ akɔŋnə azə́ənə́ á pə́ nə́ ndə̌ŋdəŋə́.

⁹Ńté ńgə́ nə́ jîə apɔŋə́ntə́əmə Mmaʼmbî əwɛ̂n Yeso Klisto, a nə ḿbǎtə ə́foʼ lə́ ḿbə́ ńgɛd mbɨ əjǐ a mə́ pə́ nə́ mbóŋ ńté áwə́ənə́, ńjî ńgə́ nə́ tíʼ ḿbə́ pəfoʼ ńté apóŋə ajíə.

¹⁰Akwaŋə anu mə lə́ ńgə́, á pɔŋ ńgə́ pɨ məgtə̂ anu páʼ pɨ nə ńchwáakə nə́ á ngoʼ páʼ ə́ nə ńdaŋ nə́, pɨ nə ńkě mbi kwá lə́ tsɔʼə á mə́ faʼ nə́ pô, pɨ nə ńkə́ ńkwá mbi lə́ nə́ ndzaŋ pɨ kɔŋ nə́ á mə́ faʼ nə́.

¹¹Ghɛn nə́ nə́ mbi ḿməgtə̂ afaʼə azə́ənə́! Tə́g nə́ atûə á mə́ məgtə̂ nə́ afaʼə azɨ́ ndzaŋ páʼ pɨ nə́ ńtyáŋtə nə́, ńkə́ ə́faʼə̂ ázɨ́d nə́ azə́ənə́ ajúmə atsəm nə́ túg nə́.

¹²Təmbɔʼ nə́ kɔŋə̂ á mə́ fɛ̂ nə́ tə ḿbə́ Əsê a yǐ peg məfɛ̂nə mɨ́ ńdaŋə̂ á ndzəmə ajú nə́ túg nə́ á mə́ fɛ̂ nə, ńkě laŋə̂ á pə́ á ndzəmə ajú nə́ kě nə́ túg pô.

¹³Maŋ kě sóŋ lə́ ńgə́ pɨ pətsə́ pó chîə ághɔ́b tə faʼ, afaʼə a tíʼə ńjíʼə áwɨ́ pô,

¹⁴á mə́ ghɛd nə́ ńgə́ mənu mə́ nyi ndə̌ŋdəŋ, ndzaŋ páʼ apeʼə azə́ənə́ á nɨ́ nə́ əghâ nə́ lə́, nə́ kə́ fɛ̂ nə́ ndú páʼ á yǐ nə́ koʼ nə́ mənu móobə́, ńjî ńgə́ əghâ nə́ kě nə́ túg pô apeʼə azɔ́b yə nɨ́ nə́ á tíʼ ńkoʼ nə́ məmɨ́ mənu ńdaŋ ə́lɨ́d mənu mətsəm mə́ tíʼ ḿbə́ ndə̌ŋdəŋə́.

¹⁵Tsɔʼə ndzaŋ páʼ aŋwaʼlə Əsê á sóŋ nə́ ńgə́, “Ŋwunə a nə́ ńkyeetə̂ nə́ á nɨ́ a nə ńkě túgə á nɨ́ tə́shú pô, ŋwunə a kə kə́ nə́ ńkyeetə̂ á kə́g, a nə kě túgə á kə́g tə́shú pô.”

¹⁶Pəg láʼkə Əsê ndzaŋə ándó a ghɛd nə́ Taatusə a túg ntɨ́ yi əshîʼnə ḿbyádnə ńdoonə̂ á mə́ kwá nə́ áwɨ́ tsɔʼə ndzaŋ pəg nə́ ńtúg nə́ lə́.

¹⁷A nə ńkě pí lə́ tsɔʼə anu pəg nə́ sóŋ nə́ ńgə́ a faʼ pô, ndzaŋə a nə ńdánə nə́ ńtə́gə atûə á mə́ kwá nə́ lə́, ńtíʼ ńgyǐəə á mbô pəənə́ á nkɔŋ yə́.

¹⁸Pəg túmə yí pó táʼ ndim yitsə̌ páʼ pə́ lánə nə́ ńgóʼkə yí á mə́m mənkyeetə mə́ pɔ́ pə́ Yeso mətsəm ńdaŋə̂ á mə́m afaʼə ají páʼ a náŋkə nə́ nkɨ yi əshîʼnə.

¹⁹Lə́ kě tsɔʼə ə́lɨ́d pô, mənkyeetə mə́ pɔ́ pə́ Əsê mə́ nə ńtsɔ́ʼə yí ńgə́ a nyinə̂ á ndzɔʼ pəg ndzaŋ pəg faʼ nə́ afaʼə akɔŋtə zɨ ńté nəgháʼ Mmaʼmbî ə́ ńkə́ ńtû ńnɨd ńgə́ pəg kɔŋə̂ á mə́ kwáatə nə́ pəənə.

²⁰Pəg lɔg ndɛd ńgə́ kɔ pɨ pə́ ŋwuntə̂ ńté ndzaŋə ándó pəg kwá nə́ əpú pɨ páʼ pɨ pó fɛ̂ nə́ nə́ ntɨ́ əghɔ́b ətsəm lɛ ə́faʼə̂ nə́ pə́ələ́.

²¹Ńté ńgə́ pəg tsɔ́ʼə á mə́ faʼ nə́ anu páʼ a koʼnə̂ nə́ á mbi Mmaʼmbî ńkə́ koʼnə̂ á mbi pɨ pə́ mbîə.

²²Ńdaŋ ə́lɨ́d pəg túmə a ndim əwəg pó po, páʼ pəg zéʼ nə́ yí ńkə́ ńdzɨ́ ńgə́ a tə́gə atûə ají nə́ mənu mimə nɨ́ nə́. Nə́ pə́ əghâ nə́ a pyádnə ńtə́gə atûə ají ńtsɛ ndzaŋə a nə ńchî nə́ á ntsɛɛmbi ńté ńgə́ a pyádnə néŋ ntɨ́ əyí nə́ pəənə́.

²³Ńgɛn nə́ Taatus lə́ ŋwu pəg yí faʼ nə́, ḿbəənə̂ noolə̂ faʼə̂ á mbô pəənə́. Ńgɛn nə́ pəlim pə́g, pó lə́ məntúmə á mbô mənkyeetə mə́ pɔ́ pə́ Yeso, á mə́ fɛ̂ nə́ nəgháʼə á mbô Klisto.

²⁴Lə́ pə́ ńgə́ pɨ nəələ̂ akɔŋnə azə́ənə́ á mbô pó ńjî ńgə́ mənkyeetə mə́ pɔ́ pə́ Yeso mətsəm mə́ pyádnə ńdzɨ́ ńkə́ ńjî ńgə́ pəg kə təələ̂ ńté áwɨ́ lə́ á pə́ ńkoʼnə̂.