Read Awing 2 Kɔlintyanə 9 Bible Online

2 Kɔlintyanə 9 - Awing bible

2 Kɔlintyanə 9

¹Anu yətsə́ á kě ə́wɨ́ chî təmbɔʼ maŋ pɨ ŋ́ŋwaʼlə̂ á mbô pɨ ńté akwáalə ándó pə́ tə́ nə́ ńtúmə á mbô pɨ pə́ Əsê á Judya pô.

²Maŋ jî ńgə́ nə́ lánə ńkɔŋə̂ á mə́ kwá nə́ pəənə, maŋ pəənə̂ ńkə́ ńtəələ̂ ńté áwə́ənə́ á mbô pɨ pə́ Masedonya. “Maŋ kə sóŋ ńgə́ pəlimə́ á mə́m mboʼ Akaya pó nə ḿbɛ́dtə ńtyáŋtə mbɨ əzoobə́ á mə́ fɛ̂ nə́ akwá ə́fɛ́lə á ngoʼ ə́ kə laŋ nə́ lə́.” Ndzaŋ pɨ nə ńchígə́ nə́ ńtə́gə atû lə́, ńnéŋ ntɨ́ pɨ pipə nɨ́ nə́ á mə́m pó, pó tíʼə ńkɔŋə̂ á mə́ kwá nə́.

³Nə́ əghâ nə́ maŋ tú pəlim pəənə́ á mbô pɨ ńjî ńgə́ kətɨd əwəgə́ á mə́mə anu zɨ kɔ á chîə á pə́ ándó atséebə kətaŋ. Tsɔʼə ndzaŋə ándó maŋ kə sóŋ nə́ lə́, nə́ tə́ ńtyáŋtə mbɨ əzəənə́ á mə́ kwá nə́ ághóobə́.

⁴Lə́ təmbɔʼ pə̂gpə pɨ pə́ Masedonya tə́ ńgyǐəə ńdzɨ́ ńgə́ pɨ kě mbɨ əzɨ kə́ tyáŋtə pô, tə ḿbə́ əsɨ́ ə́ yǐ chîə atû pəg, ńté ńgə́ pəg kə tə́ ńkɔn ndzɔʼ ńté áwə́ənə́. Tə́kɔʼ əsə́ənə a kə́ ńchîə á atû pəənə́

⁵Lə́ á pə́ ńgə́ maŋ nə ńkwaŋ ńgə́ a pɔŋə̂ á mə́ póʼ nə́ mbô á mbô pəlim pɨ ńgə́ pó kwá mbi ńgyǐəə á mbô pəənə́, ḿbeg ńtyáŋtə əpú pɨ kə laʼnə̂ nə́ ńgə́ pɨ yǐ fɛ̂ lə́. Ńdaŋ ə́lɨ́d əpú pə̂ yǐ koʼnə̂ nə́ ndɛlə ándó maŋ yǐ nə́ yǐəə, zəənə́ á tíʼ nɨd ńgə́ pɨ fɛ̂ lə́ ńté ńgə́ pɨ kɔŋə̂ ńkě té á pə́ ńgə́ pə́ fyáalə áwɨ́ pô.

⁶Kwúmtə nə́ ńgə́ ŋwu páʼ a pǐ nə́ əpú ə́ kə́g a yǐ kə́ foʼ lə́ mɔ́ əliʼə́, ŋwu páʼ a pǐ nə́ əpú ə́ nə́ənə a kə́ foʼ lə́ pi nɨ́ nə́.

⁷Ŋwu ntsəmə a fɛ̂ ndzaŋ páʼ ntɨ́ əyí nɨd nə́, kɔ a fɛ̂ á pə́ ńgə́ pə́ fyáalə yí kɨ ńtə́ ə́fɛ̂ ńtə́ ŋ́ŋwuntə̂ ńté ńgə́, Əsê a kɔŋ lə́ ŋwu páʼ a fɛ̂ nə́ nə́ akɔŋtə.

⁸Əsê a chî təmbɔʼ a fɛ̂ afoʼə atsəmə á mbô pɨ tə nə́ənə, ńjî ńgə́ nə́ túgə ajúmə atsəm ndɛd ətsəm mbɔʼ pɨ lɔg ə́faʼ mbô mənu mimə əshîʼnə mətsəm ə́wə́.

⁹Ndzaŋ páʼ aŋwaʼlə Əsê sóŋ nə́ ńgə́, “Apô a yə́ á ŋáʼnə á mbô pəpóŋə, a tɨ́ ndə̌ŋdəŋ ḿmɛdnə̂.”[2]

¹⁰Əsê páʼ ä fɛ̂ nə́ mbǐpúmə á mbô ŋwu páʼ a pǐ nə́ əpú pó apéenə məkálə́ ńgə́ pə́ kɔ́d, lə́ yí páʼ a yǐ nə́ fɛ̂ mbǐpú ətsəmə á mbô pɨ páʼ pɨ lɔ nə́ ə́ kə́ ghɛd zɨ́d kwíŋ ńkə́ ńdzə́m məjî mə́ nɨ́ nə́ ndɛlə́ afoʼəmə́jíə, ńté ńgə́ mbô mí mə́ ŋáʼnə.

¹¹A yǐ zá əfɛ̂ afoʼə á mbô pɨ əghâ ətsəmə á nɨ́ nə́ ndúmə ándó mbɔʼ mbô mɨ́ mə́ kə̂ ŋ́ŋáʼnə əghâ ətsəmə. Ńdaŋ ə́lɨ́d pɨ pipə nɨ́ nə́ pó yǐ fɛ̂ ndǎ á mbô Əsê ńté əpúmə ándó pɨ fɛ̂ nə́ nə́ pó ńdaŋə̂ á mbô pəgə́.

¹²Ńté afaʼ zəənə́ ándó pɨ faʼ nə́ lɛ̌, á kě lə́ tsɔʼə pɨ pə́ Əsê kwáalə pô, á kə́ ńgɛlə̂ pɨ pipə nɨ́ nə́ pö láʼkə Əsê.

¹³Ḿbɨ ńkə́ ńté ńgə́ pɨ pə́ yǒ zɨ́ ńgə́ afaʼə azə́ənə́ á pɔŋ, ə́ tíʼ fɛ̂ nəgháʼə á mbô Əsê ə́ zoŋ ndzaŋ nə́ néŋ nə́ ntɨ́ əwɨ́ ńkə́ ńdzóʼnə nkɨ Klisto yi əshîʼnə páʼ pɨ̈ náŋkə nə́ lə́, pó yǒ kə́ pɨ fɛ̂ nəgháʼə á mbô Əsê ə́ té ndzaŋə ándó mbô mɨ́ mə́ ŋáʼnə nə́ á mə́ ghab nə́ apô pɨ po ńkə́ ńdzoŋ ḿbéenə ŋwu ntsəmə.

¹⁴Ńdaŋ ə́lɨ́d pó yǐ tə chaʼtə́sê nə́ pɨ nə́ akɔŋnə ńté tə́kɔʼ apɔŋə́ntə́əmə Əsê páʼ a nɨd nə́ á mbô pəənə́.

¹⁵Pɛn láʼkə Əsê ńté məfɛ̂nə mí mimə́ tə ndɛn páʼ a fɛ̂ nə́ á mbô pɛnə̂.