Read Awing Galeshanə 1 Bible Online

Galeshanə 1 - Awing bible

Galeshanə 1

¹Aŋwaʼlə zəənə́ á lǒo lə́ á mbô maŋ Pɔlə, lə́ nə ńkě ŋwu mbî tsɔ́ʼ ńtsɔ́ʼə mə ńgə́ maŋ pə́ ntú Yeso Klisto pô, kɨ lə́ nə ńkě mətɨ mə́ ŋwu mbî ghɛd ńgə́ maŋ pə́ ntú Klisto pô, lə́ nə́ ḿbə́ Yeso Klisto pó Əsê a pə́ nə́ Tǎ a kə júmkə nə́ yə́ á nəwûə.

²Pəlim pətsəmə á mə́m Yeso pó chî nə́ aliʼə́ nə́ pó kyeetə̂ pə̌gpo á mə́ tú nə́ achaʼtə á mbô mənkyeetə mə́ pɔ́ pə́ Əsê á mə́m Galatya.

³Apɔŋə́ntə́əmə Əsê nə́ mbwɔ́dnə lǒo nə́ á mbô Tǎ əwɛ̂n Əsê pó Mmaʼmbî Yeso Klisto ə́ chîə a mə́m pəənə́.

⁴Ńjî ńgə́ tə mbɔʼ á chwádkə áwɛ̂nə á mə́m ndɛd mbî təpɔŋ zɨ, Klisto a fɛ̂ mbɨ əjǐ ńté a təpɔŋ əwɛ̂nə, pɛ́n zóʼnə anu Əsê páʼ a pə nə́ Tǎ əwɛ̂nə a lɔ nə́.

⁵Nəgháʼə á chîə á mbô Əsê ḿmɛdnə̂ ngǎ mɔʼə́! Amɛn.

⁶Á pyádnə ńkɨʼnə̂ a mə ńgə́ pɨ nə́ ńgə́glə ńkǐə áwə́ənə́ a ŋwu páʼ a fóŋ nə́ áwɨ́ ńdaŋə̂ á ndzəmə apɔŋə́ntə́əmə Klisto, ńtíʼə ńdzoŋə̂ á pə́ nkɨ yi əshîʼnə yi ndaʼə.

⁷Lə́ ndə̌ŋdəŋ ńgə́ “Nkɨ yi əshîʼnə yi ndaʼ,” ə́ kě ə́wɨ́ chî pô, lə́ mäŋ sóŋə anu zɨ lə́ ńté ńgə́ pɨ pətsə́ pó chî əwɨ́ páʼ pó jwaʼlə̂ nə́ məntɨ́ mɨ́ ḿbəənə̂ ńkə́ ńdoonə̂ á mə́ kwúblə nə́ nkɨ yi əshîʼnə Klisto wə́.

⁸Lə́ təmbɔʼ á pə́ pəg, kɨ ntseŋndɛ̂sê a lǒo nə́ nəpó ńtə́ sóŋə anǔəsê á mbô pɨ ńté nkɨ yi əshîʼnə páʼ ə́ pə nə́ yi ndaʼ ńdaŋə̂ yi páʼ pəg sóŋ nə́ á mbô pɨ lə́, tə ḿbə́ ndɔ Əsê ə́ chîə atû yə́.

⁹Pəg nə ḿbɛ́d tə ə́sóŋə zəənə́ a ntsɛɛmbiə, lə́ nə́ əghâ nə́ maŋ kə́ ḿbɨ ḿbégnə ə́sóŋə zɨ́d ngǎ yitsə̌, təmbɔʼ ŋwu tsə̌ a sóŋə anǔəsê á mbô pɨ ńté nkɨ yi əshîʼnə páʼ ə́ pə́ nə́ yi ndaʼ ńdaŋə̂ a yi páʼ pɨ nə́ ḿbí nə́ lə́, tə ḿbə́ ndɔ Əsê ə́ chîə atû yə́.

¹⁰Nə́ kwaŋ ńgə́ maŋ tséebə ńdoonə̂ lə́ ńgə́ pɨ pə́ zə́ənə á mə ándó ŋwu yi əshîʼnə? Lə́ kě ə́lɨ́d pô, anu páʼ maŋ lɔ nə́ lə́ ńgə́ Əsê a zə́ənə mə ándó ŋwu yi əshîʼnə. Nə́ kwaŋ ńgə́ maŋ loonə̂ lə́ á mə́ ghɛd nə́ mbɨ pɨ ə́ pɔŋ ńté mə? təmbɔʼ maŋ nə ńtə́ ńdoonə̂ lə́ ə́lɨ́d tə ḿbə́ maŋ kě lə́ ngaŋəfaʼ Klisto pô.

¹¹Tíʼ maŋ fiʼtə̂ áwə́ənə́ á ḿbə́ pəlimə́ mə, ńgə́, nkɨ yi əshîʼnə páʼ mäŋ náŋkə nə́ lə́ kě ŋwu mbî ghɛd pô.

¹²Maŋ nə ńkě kwáalə áwɨ́d lə́ á mbô ŋwu mbî yitsə̌ pô, ŋwu mbî yitsə̌ a kě mə ə́wɨ́ kə́ ńdzéʼkə pô. Lə́ nə ńgɛd Yeso Klisto nə́ nkɔ̌ʼmbɨ əyí maŋ jîə á wə́ələ́.

¹³Pə́ kə fiʼtə̂ áwɨ́ ndzaŋ maŋ nə́ ńchî nə́ lə́ ńchîə əghâ ándó maŋ nə fɛ̂ nə́ mbəəmə mə á mə́m anǔəsê Pəjusə lə́; ndzaŋ páʼ maŋ nə̈ ńtsaŋkə̂ nə́ nkyeetə pɔ́ pə́ Əsê tə akóolə́mə́lə́ŋ, ḿbɨ ə́fǔəlóʼə á mə atsəmə á mə́ tsəŋkə̂ nə́ wə́ələ́.

¹⁴Á mə́m nkaŋə mə tsɔʼə ətsəm pə́ nə ḿbî nə́ áwə́g pó maŋ nə́ ńtyantə̂ nə́ nə́ anǔəsê Pəjusə ńtsɛɛlə̂ ághɔ́b pətsəmə, ńkə́ néŋ ntə́əmə mə nə́ pənoŋkə pə́ pətǎ pə́ pətǎ pə́gə.

¹⁵Lə́ Əsê á mə́m apɔŋə́ntə́əmə ajíə a tsɔ́ʼə mə záʼ pə́ yǒ ḿbɔŋə̂ pîə mə, ńtíʼ ə́fóŋə mə ńgə́ maŋ faʼə̂ á mbô yə́. Lə́ əghâ páʼ a nə kɔŋ nə́

¹⁶a nəələ̂ a Mɔ́ əyə́ á mbô maŋə, ńjî ńgə́ təmbɔʼ maŋ fiʼtə̂ Nkɨ yi Əshîʼnə á mbô Pətəjǐsê, maŋ nə ńkě ntəgə́ á mbô ŋwu náŋ pô,

¹⁷maŋ nə ńkě kə ńgɛnə̂ á Jɛlusalɛm á mə́ náŋ nə́ məntú mə́ Yeso mə́ chî nə́ á mbi maŋ pô. Əghâ wɨ́d wə́ lə́ maŋ nə ḿbɨ ńtíʼ ńgɛnə̂ a pə́ Alabya ḿbɨ ńtíʼ ḿbəənə̂ á Damakɔsə.

¹⁸Lə́ ngoʼ teelə́ ə́ laŋ, maŋ kɔ́ʼ ńgɛnə̂ á Jɛlusalɛmə á mə́ ghá nə́ Pita, ńchî pəg yí nə́ əlě mbî ntsɔb tênə.

¹⁹Maŋ kə kě ntú Yeso yi ndaʼ zɨ́ tə ńdéʼtə Jɛmsə mɔ́mɛ́ Mmaʼmbîə.

²⁰Anu páʼ maŋ ŋwaʼlə̂ nə́ lə́ ndə̌ŋdəŋə́, Əsê a jî ńgə́ maŋ kě lə́ ntsɨd tsəələ̂ pô.

²¹Ndɛd yətsə́ yi ńdaŋ, maŋ ghɛn nə mboʼ Silya ńkə́ ńgɛnə̂ mboʼ Silisya.

²²Nə́ əghâ wɨ́d wə́ pɨ páʼ pó nə ńchî nə́ á mə́m mənkyeetə mə́ pɔ́ pə́ Əsê á Judya pó nə ńkě mə kə́ zə́ənə pô.

²³Pó nə ńjî lə́ tsɔʼə anu pɨ pə́ nə sóŋ nə́ ńgə́, “Ŋwu páʼ a nə ńchî nə́ ńtsaŋkə̂ áwɛ̂n a pɨ ńtíʼə ə́sóŋə anu ńté mbimə́ páʼ a nə ńdɔ nə́ á mə́ shamkə̂ nə́.”

²⁴Ńdaŋ ə́lɨ́d pó tíʼ ŋ́ŋáŋkə Əsê ńté mə.