Read Awing Galeshanə 2 Bible Online

Galeshanə 2 - Awing bible

Galeshanə 2

¹Ngoʼ ntsɔb nəkwa kə laŋ maŋ pəənə̂ á Jɛlusalɛm pəg Banabasə, ḿbéenə Taatusə.

²Maŋ nə ńgɛn lə́ ńté ńgə́ Əsê a nə sóŋə á mbô maŋ ńgə́ maŋ ghɛnə̂. (Maŋ nə ńdɔg mətû mɔ́b pə̌gpo ghɛnə̂ á ntsəmə́), maŋ tíʼ ḿbyáatə nkɨ yi əshîʼnə á mbô pó ndzaŋ maŋ nə́ sóŋ nə́ anǔəsê á mbô Pətəjǐsê. Maŋ nə ńkě lɔ ńgə́ afaʼ maŋ nə ḿbɛ́d nə́ tə ə́faʼ pó yi maŋ tə nə́ faʼə̂ a laŋ kətaŋ pô.

³Ngaŋəkoolə mə Taatusə páʼ a pǎ nə́ tə ḿbə́ pə́ ŋwu Glik lə́, pə́ nə ńkě yí fyáalə á mə́ póʼ nə́ pô, lə́ pɨ pətsə́ pə́ nə ḿbə́ ńdɔ ńgə́ pə póʼə yə́,

⁴ḿbóŋkə əmə́g ńgə́ pó lə́ pəlimə́ á mə́m Yeso lə́ ḿbə́ ḿbə́ lə́ ngaŋmə́naŋə́, ńtə́ ńdoonə̂ á mə́ zɨ́ nə́ ndzaŋ pɛn nə ńchwád nə́ ńdaŋ nə́ Yeso Klisto. Pó kə loonə̂ lə́ mə́ lɔg nə́ əwɛ̂n ghɛd əpoʼ wə́.

⁵Pəg nə ńkě ntso əghɔ́b tsɔʼə mɔ́ əliʼ jwə́ʼtə pô, á mə́ ghɛd nə́ nkɨ yi əshîʼnə mɛdnə̂ ndə̌ŋdəŋə́ á mbô pəənə́.

⁶Lə́, pɨ páʼ pó nə ńchî nə́ ándó mətûə, maŋ sóŋə zɨ lə́ ńté ńgə́ kɨ pó pə́ mətû kɨ ńchî mɨ́d pô, zəənə́ kě nə́ anu yitsə̌ chîə mə́ ghɛd nə́ nə́ maŋ pô. Maŋ sóŋə áwɨ́ ńgə́ Əsê a kě sáʼ əsáʼ ńnáŋə lə́ əshî ŋwu pô, maŋ fiʼtə̂ áwɨ́ ńgə́ pətə́kɔʼ pə́ mətû mɨ mə́ nə ńkě yǐ nə́ anu yə fî yətsə́ təmbɔʼ á kwáalə mə pô.

⁷Lə́ pó tíʼ ḿbɨ ńdzə́ənə á pə́ ńgə́ Əsê a fɛ̂ afaʼə afiʼtə́nkɨ yi əshîʼnə á mbô Pətəjǐsê, tsɔʼə ndzaŋ páʼ a nə ńkə́ nə́ ə́fɛ̂ afaʼ yəwə́ á mbô Pita ńgə́ a fiʼtə̂ nkɨ yi əshîʼnə á mbô Pəjusə.

⁸Ńdaŋ nə́ mətɨ mə́ Əsê pə́ nə ńgɛlə̂ mə maŋ pə́ ntú Yeso á mbô Pətəjǐsê, tsɔʼə ndzaŋ pə́ nə ńkə́ nə ńgɛlə̂ a Píta a pə́ ntú Yeso á mbô Pəjus lə́

⁹Əghâ ándó pó nə ńdzɨ́ nə́ apɔŋə́ntə́əmə Əsê pə́ nə fɛ̂ nə́ á mbô pəg lə́, Jɛmsə nə́ Sifasə ńdzoŋ ḿbéenə Jɔn páʼ pɨ pə́ kə jî nə́ ághóobə́ ándó məntɔ́ lə́, pó nə ńchaʼtə̂ apô azə́g Banabasə, ḿbímə áwə́g ńgə́ Əsê a tú nə́ áwə́g ńgə́ pə̌gpo tə́ faʼə̂ táʼə apô, ńtíʼ ə́sóŋ ńgə́ pə ghɛnə̂ á mbô Pətəjǐsê pó kə́ ńtíʼ ńgɛnə̂ á mbô Pəjusə.

¹⁰Anuə atsəm pó nə ḿbítə nə́ á mbô pəg lə́ ńgə́ pəg kwúmtə pəpóŋə á mə́m mənkyeetə móobə́, páʼ a nə ḿbə́ nə́ tsɔʼə anu maŋ nə tsɔ́ʼ nə́ á mə́ faʼ nə́.

¹¹Əghâ ándó Pita a nə ńgyǐ nə́ ńkwúnə Antiok lə́, maŋ sáʼə yə́ əshîsaŋ ńté anu páʼ a nə ńgɛd nə́ á kě koʼ pô.

¹²Záʼ pɨ pətsə́ páʼ Jɛmsə a nə ńtú nə́ pó pɔŋə̂ yǐ lə́, Pita a nə̈ ńjîə məjî pópə Pətəjǐsê. Lə́ əghâ ándó pɨ pɨ pó nə ńgyǐ nə́ a soŋ mbɨ əjǐ ə́fɛ́lə á mə́m pó ńkě məjî pó Pətəjǐsê pɨ ńjî pô, ńté ńgə́ a nə ńtə́ ḿbɔ́gə pɨ páʼ pó nə sóŋ nə́ ńgə́ pə́ shib ḿbóʼ Pətəjǐsê.

¹³Pətsə́ Pəjusə pó kə tíʼ ńchúʼə á mə́ fɨg nə́ əmə́gə ándó Pita, tsɔʼə Banabasə pó nə́ ńkə́ fɨgə̂ yə́ a chîə ndzəm pó ńkə́ ńtə́ fɨgə̂ ají əmə́gə.

¹⁴Əghâ ándó maŋ nə ńdzɨ́ nə́ ńgə́ pó kě zoŋə̂ á ndə̌ŋdəŋ ndzaŋ páʼ nkɨ yi əshîʼnə sóŋ nə́ lə́, maŋ sóŋə á mbô Pita á mbi pó pətsəm ńgə́, “Gho lə́ ŋwu Pəjusə, lə́ ḿbə́ ńgɛlə̂ á pə́ ándó Pətəjǐsê, ńkě á pə́ ándó ŋwu Pəjusə pô. Ńdaŋ ə́lɨ́d təmbɔʼ gho pə́ ńtíʼ ə́fyád Pətəjǐsê ńgə́ pó chîə ándó Pəjusə lə́ ə́lɛ́?”

¹⁵Lə́ ndə̌ŋdəŋə́, pɛn lə́ Pəjusə ndzaŋ pə́ nə ḿbî nə́ áwɛ̂nə “Pɛn kě lə́ Pətəjǐsê pô, pó pə́ nə́ ngaŋə́ghɛlə təpɔŋ pô.”

¹⁶Lə́ pɛn jî ńgə́ ŋwu ntsəmə ä laŋə̂ lə́ á mə́m mbimə́ nə́ Yeso Klisto ḿbɔŋə̂ tə́əmə koʼnə̂ pó Əsê, ńkě faʼə̂ á pə́ anu páʼ noŋkə á lɔ nə́ pô. Pɛn kə néŋ ntɨ́ nə́ Yeso Klisto ńjî ńgə́ pɛn tɨ́ ńkoʼnə̂ á mə́m Əsê ńdaŋə̂ á mə́m mbimə́ əzɛn nə́ Klisto, ńkě pə́ mə́ faʼ nə́ anu páʼ noŋkə á lɔ nə́ pô, ńté ńgə́ mbɔʼ ŋwu tsə̌ a kě tɨ́ ńkoʼnə̂ á mə́m Əsê ńdaŋə̂ á mə́m noŋkə pô.

¹⁷Lə́ mbɔʼ pɛn tə́ ńdoonə̂ á mə́ tɨ́ nə́ koʼnə̂ á mbi Əsê laŋ nə́ mə chwíʼnə nə́ pɛ̌npə Klisto, pɛn zɨ́ ńgə́ pɛn lə́ ngaŋə́ghɛlə “təpɔŋ” tsɔʼə ándó Pətəjǐsê, lə́ á pə́ ńgə́ Klisto a tíʼə faʼə̂ lə́ á mbô təpɔŋə? Təmbɔʼ á kě ə́lɨ́d chî pô.

¹⁸Təmbɔʼ maŋ pɨ ńchwáakə á mə́ pí nə́ noŋkə páʼ maŋ nə ńkǐ nə́ áwɨ́d, lə́ á pə́ ńgə́ maŋ nɨd mbəəmə mə ándó ŋwu páʼ a wǔ nə́ noŋkə.

¹⁹Ńgɛn nə́ anu ńté noŋkə, maŋ jî ńgə́ maŋ kwûə, ńjî ńgə́ təmbɔʼ maŋ chîə á mbîə á mbô Əsê. Pə́ nə ńjwítə mə atǐə apagləpaglə pəg Klisto,

²⁰ńdaŋ ə́lɨ́d lə́ kě maŋ páʼ maŋ chî nə́ á mbî pô, lə́ Klisto páʼ a chî nə́ á mə́m maŋə, nchîmbî páʼ mäŋ chî nə́ əghâ nə́, maŋ chî ńdaŋ lə́ á mə́m mbimə́ nə́ Mɔ́ Əsê, páʼ a nə kɔŋ nə́ mə ńkə́ fɛ̂ nchîmbî əjǐ ńté mə.

²¹Maŋ kě apɔŋə́ntə́əmə Əsê kǐ pô. Təmbɔʼ ŋwunə a tɨ́ ńkoʼnə̂ á mbi Əsê ńdaŋə̂ á pə́ á mə́m noŋkə, lə́ á pə́ ńgə́ Klisto a nə kwû lə́ kətaŋə.