Read Awing Galeshanə 3 Bible Online

Galeshanə 3 - Awing bible

Galeshanə 3

¹Əkəkóg pɨ pə́ Galatya! lə́ fumkə̂ əwə fumkə̂ áwə́ənə́, Maŋ kwaŋ ńgə́ pə́ nə ḿbyádnə fiʼtə̂ áwɨ́ ndzaŋ páʼ Yeso Klisto a nə ńkwû nə́ atǐə apagləpaglə.

²Fiʼtə̂ nə́ mə tsɔʼə nə́ táʼə anu ghɛn mɔʼə́ ńgə́, pɨ nə ńkwáalə Ajwǐəsê lə́ ńdaŋ lə́ mə zóʼnə nə́ anu páʼ noŋkə ä sóŋ nə́ kɨ mə zóʼnə nə́ nkɨ yi əshîʼnə ə́ kə́ néŋ ntɨ́ əwə?

³Nə́ lánə ńchígə́ ńgəənə̂ lɛ ə́lɛ́? Pɨ nə́ ńchwáakə lə́ nə́ Ajwǐəsê, á pɛn ḿbə́ əghâ nə́ nə́ tíʼə ńdoonə̂ lə́ á mə́ lwigtə̂ nə́ lə́ nə́ məmɨ́ mətɨ?

⁴Lə́ ndə̌ŋdəŋ ńgə́ mənu mətsəm nə́ zɨ́ nə́ mə́ laŋ lə́ kətaŋə? Maŋ kwaŋ ńgə́ mə́ kə kwúnə anu yətsə́!

⁵Əsê a fɛ̂ Ajwiə á mbô pɨ ńkə́ ə́faʼ əkɨʼnəmə́nuə á mə́m pɨ ńté lə́ ńgə́ nə́ faʼə̂ anu páʼ pənoŋkə pə́ nɨd nə́ kɨ ńté lə́ ńgə́ nə́ zóʼ nkɨ yi əshîʼnə wə́ ńkə́ néŋ ntɨ́ ə́wə́?

⁶Ablaam a nə “Néŋ ntɨ́ əyí nə́ Əsê, ńdzoŋ nə́ mbimə́ əjǐ Əsê a pímə yə́ ándó ŋwunə a tɨ́ nə́ ndə̌ŋdəŋə́.”

⁷Ńdaŋ ə́lɨ́d nə́ chîə á mə́ pyádnə nə́ jî ńgə́ chigə pɔ́ pə́ Ablaam lə́ pɨ pə́ túg nə́ mbimə́.

⁸Aŋwaʼlə Əsê kə pɛ́d tə fiʼtə̂ á ngoʼ pəchə́ ńgə́ Əsê a yǒ ghɛd Pətəjǐsê pó tɨ́ ńkoʼnə̂ ńdaŋə̂ á mə́m mbimə́. Ńdaŋ ə́lɨ́d aŋwaʼlə Əsê á tíʼ ńnáŋkə nkɨ yi əshîʼnə á mbô Ablaam ndɛd pɔŋə̂ koʼə̂, ə́sóŋ ńgə́: “Ńdaŋ nə́ gho Əsê a yǒ fɛ̂ afoʼə á mbô ŋwu mbî ntsəmə.”

⁹Ndzaŋ Ablaamə a nə néŋ nə́ ntɨ́ yí nə́ Əsê lə́, Əsê a fɛ̂ afoʼə ají, ńdaŋ ə́lɨ́d ŋwu ntsəm páʼ a néŋ nə́ ntɨ́ yí nə́ Əsê, a yǐ kə́ túgə afoʼə ándó Ablaamə.

¹⁰Pɨ páʼ po faʼ nə́ ńdzoŋə̂ á pə́ noŋkə, ndɔ ə́ chîə atû pó. Ńté ńgə́ aŋwaʼlə Əsê á sóŋ ńgə́, “Ndɔ Əsê ə́ tə́əmə atû ŋwu ntsəm páʼ a kě nə́ tə́ ńdzóʼnə mənu mətsəm páʼ pə́ ŋwaʼlə̂ nə́ á mə́m noŋkə pô.”

¹¹Nə́ əghâ nə́ a pyádnə ŋwaʼ ńgə́ ŋwu tsə̌ a kě tɨ́ ńkoʼnə̂ á mbi Əsê ńdzoŋ lə́ noŋkə pô, ńté ńgə́ aŋwaʼlə Əsê á sóŋ ńgə́, “Ŋwu páʼ a tɨ́ nə́ ndə̌ŋdəŋə́ á mbi Əsê ńdaŋə̂ á mə́m mbimə́ a yǒ jî mbîə.”

¹²Lə́ noŋkə á kə̌ túgə anu yətsə́ á mə́ faʼ nə́ pó mbimə́ pô, á chî lə́ ńté ńgə́ aŋwaʼlə Əsê á sóŋ ńgə́, “Ŋwu ntsəm páʼ a faʼ nə́ anuə atsəm páʼ noŋkə á sóŋ nə́ a yǒ jî mbî ńté noŋkə.”

¹³Klisto a nə ńtsóʼə atûə azɛ̂nə á mə́m ndɔ noŋkə, ndzaŋ yí nə́ nkɔ̌ʼmbɨ yə́ a nə ḿbɨ nə́ sɛdnə̂ ńtíʼ ḿbə́ ndɔ ńté atûə azɛ̂n lə́, ńté ńgə́ aŋwaʼlə Əsê á sóŋ ńgə́ “Ndɔ ə́ chîə atû ŋwu ntsəm páʼ a lə́ŋ nə́ atûə atǐə.”

¹⁴Yeso Klisto a nə ńgɛlə̂ zɨ́d zɨ lə́ ńjî ńgə́ afoʼ zɨ páʼ Əsê a nə ńdaʼnə̂ nə́ á mbô Ablaam lə́ á fɛ̂ zə́ələ́ á mbô Pətəjǐsê ńdaŋə̂ á ndzəm Yeso Klisto, ńjî ńgə́ ńdaŋə̂ á mə́m mbimə́ pɛn kwáalə Ajwi páʼ Əsê a nə ńdaʼnə̂ nə́.

¹⁵Pəlimə́ mə, tíʼ maŋ lɔgə̂ fiʼ nəghɔd mənu mə́ ŋwu məsɔŋə́ əlě ntsəmə, təmbɔʼ pɨ pə́ pɛ̌ pó pímnə nə́ anu tə ńgwad əka əwɨ́, təmbɔʼ ŋwu tsə̌ a kě wɨ́d shaʼtə̂ kɨ ḿbegə̂ ajûtsə́ ə́wɨ́ pô.

¹⁶Əsê a nə ńgɛd ndaʼnə lə́ á mbô Ablaam pó mɔ́ əyǐə. Ńkě sóŋ lə́ ńgə́ “pɔ́ pô” ńkě kə́ sóŋ lə́ ńgə́ pɔ́ pipə nɨ́ nə́ pô, a nə sóŋ lə́ tsɔʼə ńgə́ “pɨ mɔ́ əgho” páʼ a pə́ nə́ lə́ Klisto.

¹⁷Anu páʼ mäŋ sóŋ nə́ lə́ ńgə́ Əsê a nə ńgwad əka pó Ablaam ńkə́ ńdaʼnə̂ á mə́ lɔʼkə̂ nə́ áwə́ələ́. Noŋkə páʼ pə́ nə fɛ̂ nə́ áwɨ́d lə́ ngoʼ nkɛd nəkwa nə́ ngoʼ məghə́m mɛ́n teelə́ təmbɔʼ wə́ələ́ á kě əka wə́ shaʼtə̂ kɨ shígtə ndaʼnə Əsê pô.

¹⁸Lə́ təmbɔʼ Əsê a fɛ̂ əpúmə á mbô pɛn ńté á pə́ ńgə́ pɛn tə́ ńdzoŋə̂ noŋkə, lə́ á pə́ ńgə́ a kě pɛ́lə ńdzoŋə̂ lə́ ndaʼnə əjǐ pô. Lə́ Əsê a nə fɛ̂ məfɛ̂nə á mbô Ablaam lə́ ńdzoŋ lə́ ndaʼnə páʼ a nə fɛ̂ nə́ á mbô yə́.

¹⁹Nətɛ́n nə́ anu páʼ noŋkə á nə nɨd nə́ lə́ ńgə́ akə̂? Əsê a nə ḿbegə̂ á noŋkə lə́ á mə́ ghɛd nə́ ŋwunə a jîə təpɔŋ əyǐə, tə ńkoʼ nə́ ndɛd páʼ Mɔ́ wə́ Əsê a nə ńgɛd nə́ ndaʼnə pó yí lə́ a yǐ nə́ yǐəə. Pə́ kə fɛ̂ noŋkə a laŋ lə́ á mbô pətseŋpə́ndɛ́pə́sê ńkwúnə á mbô Mosisə, a tíʼ faʼə̂ a tətɨ pɛ̌npə Əsê.

²⁰Əghâ nə́, pə́ kě ŋwunə a yǐ nə́ faʼə̂ tətɨ tə́ náŋə páʼ təmbɔʼ a pə́ tsɔ́ʼə táʼ ŋwu pô; ŋwu ghɛn lə́ Əsê.

²¹Zəənə́ á nəələ̂ lə́ ńgə́ noŋkə a kǐ məndaʼnə mə́ Əsê? Ngá! Lə́ kě ə́lɨ́d pô, ńté ńgə́ təmbɔʼ pə́ nə ə́fɛ̂ noŋkə wə́ələ́ chî mbɔʼ á fɛ̂ nchîmbî, tə ḿbə́ ŋwu ntsəmə a pěʼ ńtɨ́ ndə̌ŋdəŋ pó Əsê ńdaŋə̂ ndzəm wə́ələ́.

²²Lə́ aŋwaʼlə Əsê á pə́ sóŋ ńgə́ mbî ntsəm chîə atsáŋə á mə́m mbô mə́ təpɔŋə, ńjî ńgə́ məfɛ̂nə páʼ pə́ laʼnə̂ mɨ́d ńdzoŋə̂ nə́ mbimə́ á mə́m Yeso Klisto pə́ yǐ fɛ̂ á mbô pɨ pó néŋ nə́ ntə́əmə.

²³Záʼ ndɛd mbimə́ nə ńjǐ tə́ yǐəə lə́, noŋkə a fwɔnə̂ áwɛ̂n pətsəmə ándó ngaŋə́tsáŋə lə́ ńkoʼ nə́ ndɛd Əsê a yǐ nə kyaʼə̂ áwɛ̂n nə́ mbimə́ zəənə́.

²⁴Lə́ pə́ ńgə́ noŋkə a nə ńtúgə áwɛ̂n tə ńkoʼ lə́ nə́ ndɛd páʼ Yeso a nə ńgyǐ nə́, ńjî ńgə́ pɛn tíʼ ńtɨ́ ńkoʼnə̂ pɛ̌npə Əsê ńdaŋ nə́ mbimə́.

²⁵Nə́ əghâ nə́ páʼ mbimə́ yǐ nə́ lə́, noŋkə á kě áwɛ̂n pɛ́d ńtúg pô.

²⁶Ńté ńgə́ á mə́m Yeso Klisto pɨ pətsəm lə́ pɔ́ pə́ Əsê ńdaŋə̂ á mə́m mbimə́.

²⁷Ńté ńgə́ pɨ nə ńkwá nkǐ nə́ əlɛ́n Yeso Klisto lə́ á pə́ ńgə́ nə́ sɛdnə̂ ńtíʼ ńtúgə mbɔ́ Yeso Klisto.

²⁸Lə́ á pə́ ńgə́ kwúblə yitsə̌ á kě chîə á tətɨ Pəjusə pó Pətəjǐsê pô, kwúblə yitsə̌ á kě chîə á tətəənə apoʼ pó ŋwu páʼ a kě nə́ apoʼ pô, kwúblə a kě kə́ ńchîə á tətɨ ŋwu mbyâŋnə pó məngyě pô, ńté ńgə́ pɨ pətsəm tíʼ ḿbə́ lə́ táʼə á mə́m Yeso Klisto.

²⁹Təmbɔʼ gho chîə á mə́m Klisto, lə́ á pə́ ńgə́ pɨ lə́ pɔ́ pə́ Ablaam, ḿbə́ pəjî pə́ məláʼ ńdzoŋ ndzaŋ ndaʼnə Əsê ə́ sóŋ nə́.