Read Awing Galeshanə 5 Bible Online

Galeshanə 5 - Awing bible

Galeshanə 5

¹Ńgɛn nə́ anu ńté á mə́ fɛ́d nə́ á mə́mə apoʼ, Yeso a fógə áwɛ̂nə á mə́mə apoʼə. Lə́ á pə́ ńgə́ nə́ tɨ́ ńtyantə̂ ńkě kə́ ḿbɨ ḿbí pə́ néŋə áwə́ənə́ á mə́mə apoʼ pô.

²Jwə́ʼtə nə́, maŋ Pɔl, mäŋ sóŋə á mbô pɨ lə́ ńgə́ təmbɔʼ pɨ mɛdtə̂ mbɨ əzɨ ńgə́ pə póʼə áwɨ́, lə́ á pə́ ńgə́ Klisto a kě áwɨ́ nə́ anu yitsə̌ kwá pô.

³Ngǎ yitsə̌ maŋ pɨ ńkə́ ńkwantə̂ a ŋwu ntsəm páʼ a mɛdtə̂ nə́ mbɨ əjǐ ńgə́ pə́ póʼə, lə́ á pə́ ńgə́ a chîə á mə́ shib nə́ zóʼnə á noŋkə ntsəmə.

⁴Pɨ páʼ pɨ lɔ nə́ á mə́ tɨ́ nə́ koʼnə̂ á mbi Əsê əlaŋə̂ á pə́ mə́m noŋkə, nə́ fóg mbɨ əzəənə́ á mə́m Klisto, lə́ á pə́ ńgə́ nə́ fɛ́lə áwə́ənə́ á mə́mə apɔŋə́ntə́əmə Əsê.

⁵Ńgɛn nə́ pəg, azə́gə́ akwaŋ pə̈g kwaŋ nə́ ḿbyáabə lə́ ńgə́ Əsê a yǐ ghɛd pəg tɨ́ ńkoʼnə̂ á mbi yə́. Lɛ̌ anu pə̈g pyáb nə́ ńdaŋə̂ á mə́m mətɨ mə́ Ajwi páʼ mə́ faʼ nə́ ńdaŋə̂ á mə́m mbimə́ əzəgə́.

⁶Əghâ ándó pɛn pə́ nə táʼ nə́ Yeso Klisto lə́, kɨ pə́ póʼə a gho kɨ ńchî tə póʼ, kwúblə yitsə̌ á kě ə́wɨ́ chî pô, ndaʼə anu chî nə́ ə́wɨ́ lə́ tsɔʼə mbimə́ páʼ ə́ faʼ nə́ ńdaŋə̂ á mə́mə akɔŋnə.

⁷Pɨ nə ńtə́ ə́faʼ əshîʼnə! Lə́ nə ńgɛd əwə ńgə́ pɨ mɛdtə̂ á mə́ tə́ nə́ zóʼnə ndə̌ŋdəŋə́?

⁸Anu zəənə́ a kə ghɛd nə́ pɨ kwúblə məntɨ́ mɨ́ lə́ a kə kě lə́ á mbô Əsê lǒo pô.

⁹“Pə́ lɔgə̂ lə́ tsɔʼə á mɔ́ mbê ńnéŋə á mə́mə akáŋə apéenə á kɔ́ʼə” tsɔʼə ndzaŋ pə̈ sóŋ nə́ lə́.

¹⁰Maŋ néŋ ntɨ́ nə́ gho ńdaŋə̂ á mə́m Mmaʼmbî ńgə́ gho kě anuə ndaʼ yi pí ńdaŋə̂ yi páʼ mäŋ sóŋ nə́ pô. Lə́ ŋwu ntsəm páʼ a jwaʼ nə́ áwə́ənə́, kəənə a pə́ əwə, Əsê a yǒ néŋə atsáŋə á mbɨ yə́.

¹¹Lə́ ńgɛn nə́ maŋ nə́ pəlimə́ mə, təmbɔʼ maŋ ghɛn nə́ mbiə á mə́ náŋkə nə́ nkɨ ńgə́ mə póʼ nə́ ŋwu lə́ anu yə əshîʼnə, lə́ pə́ ḿbɨ ńgɛlə̂ akə̂ pə́ pɛ́lə ńtsaŋkə̂ mə? Təmbɔʼ maŋ kə pěʼ ńtə́ ə́faʼ mbô anu zɨ, á pə́ ńgə́ nkɨ yi maŋ náŋkə nə́ ńgə́ Klisto a kə kwûə atǐə apagləpaglə lə́, ə́ yǐ ńkě nə́ ngə́ʼ yitsə̌ yǐ pô.

¹²Akwaŋə mə lə́ ńgə́ pəənə ándó pó jwaʼlə̂ nə́ áwə́ənə́, pó yǐ sə́ mbɨ əzoobə́.

¹³Lə́ ńgɛn nə́ pɨ nə́ pəlimə́ mə, pə́ nə fógə áwə́ənə́ á mə́mə apoʼə. Lə́ kɔ nə́ ghɛd mə́ fɛ́d nə́ á mə́mə apoʼ mə́ pə́ pə́ ndú yitsə̌ nə́ yǐ nə́ tíʼə zóʼə á pə́ á mbô na mbɨ əzəənə́, anu təmbɔʼ nə́ ghɛd lə́ ńgə́ akɔŋnə á chîə á tətɨ pɨ ńgɛd ŋwu ntsəmə a tíʼə faʼə̂ á mbô mɔ́mɛ́ əyǐə

¹⁴Ńté ńgə́ pə́ kyeetə̂ pənoŋkə pətsəm pə́ tíʼ fɛ́d nə́ táʼ noŋkə ghɛn mɔʼə́ ńgə́, “Gho kɔŋə̂ á ngaŋnəpad əgho ándó gho kɔŋ nə́ mbɨ əzo.”

¹⁵Lə́ təmbɔʼ nə́ tə́ ńgɛlə̂ mənu mə́ənə́ ándó məna mə́ nəyeŋ, ńdímkə pɔ́pə́mɛ́ pɨ ḿbəənə̂ néŋə məfəŋ nə́ pó, nə́ lɔg ndɛd ńté ńgə́ təmbɔʼ nə́ kwéʼnə ḿbóg məmbɨ mə́ənə́.

¹⁶Anu maŋ sóŋ nə́ lə́ ńgə́ nə́ mɛdtə̂ Ajwǐəsê á tə́gtə nchîmbî əzəənə́, ńjî ńgə́ kɔ nə́ ghɛd mənu páʼ na mbɨ lɔ nə́ ńgə́ pɨ ghɛlə̂.

¹⁷Ńté ńgə́ anuə ándó na mbɨ əzɛ̂n lɔ nə́ lə́ kě yə́ ándó Ajwǐəsê lɔ nə́ pô, anuə ándó páʼ Ajwǐəsê lɔ nə́ lə́ kě kə́ ḿbə́ yi páʼ na mbɨ lɔ nə́ pô, pó pɛ́n pɛ̌ lə́ ngaŋkə́peenə́; zəənə́ nəələ̂ ńgə́ təmbɔʼ gho kě faʼə̂ anu páʼ gho lɔ nə́ á mə́ faʼ nə́ pô.

¹⁸Təmbɔʼ Ajwǐəsê a chîə nətû gho, gho kě pɨ ḿbə́ apoʼə á mbô pənoŋkə pô.

¹⁹Lɛ̌ ndzaŋə ándó məfaʼ mə́ na mbɨ mə́ chî nə́; mə́ nɨd mbɨ əjǐ á mə́m mə̂ghabə, á mə́m mənu mə́ kě nə́ ŋwaʼ pô, pó mənu mə́ əsə́ənə.

²⁰Pó ghóʼkə məsê mə́ məfɨgə ńkə́ ə́fɛ́d ələəmə, pɨ pó sɛdnə̂ nə́ ńtúgə ŋwéetə́ á tətɨ pó ńkə́ ḿbóʼnə məlaʼə́, ńtúgə kəpeenə́ pópə azáŋə́ndé ḿbəənə̂ ńnáŋə tsɔʼə mənu mə́ mbɨ móobə́, ńchî nə́ azɔŋə, ńgabtə̂ məmbɨ móobə́ á mənchwa mənchwa ŋwunə chî nə́ əjǐ ndzəm ŋwunə chî nə́ əjǐə;

²¹pó túgə ŋwéetə́ á ndumə apeʼə pəənə, ḿbəənə̂ ńnô ḿbɛ́ɛlə, ńjîə ńtóokə ndɛtə, ńkə́ ḿbəənə̂ ə́faʼə̂ mətsə́ mənu mə́ təpɔŋə. Maŋ kwantə̂ áwɨ́ əghâ nə́ tsɔʼə ndzaŋ maŋ nə kwantə̂ nə́ áwə́ənə́ á ntsɛɛmbi lə́ ńgə́: pəənə ándó pö faʼ nə́ ndɛn mənu ghɛn pó yǒ kě anuə nəfoonə Əsê jî pô.

²²Lə́ mənta páʼ Ajwǐəsê á zə́m nə́ mə́ pə́ ḿbə́ akɔŋnə, akɔŋtə, mbwɔ́dnə, asəgə́ntə́əmə, apɔŋə́ntə́əmə á mə́ ghɛd nə́ mənu mimə əshîʼnə, mə faʼ nə́ nə́ ntɨ́ ntsəmə,

²³atsóokə́mbəəmə, ḿbɨ ḿbə́ nə́ awaamə́mbəəmə. Noŋkə yətsə́ á kě ə́wɨ́ chî páʼ á zɔŋ nə́ ndɛn mənu ghɛn pô.

²⁴Pəənə ándó pó pə́ nə́ pɨ pə́ Yeso Klisto pó jwítə na mbəəmə, ndzoŋ ḿbá mənu mətsəm páʼ na mbɨ lɔ nə́ ńgə́ pó faʼə̂.

²⁵Ajwǐəsê a fɛ̂ nchîmbîə á mbô pɛnə̂, lə́ tsɔʼə yí mbɔʼə a shib ńdɔg ndɛd nə́ nchîmbî əzɛnə̂.

²⁶Kɔ pɛn tə́ ńkɔ́ʼkə mbəəmə, kɔ pɛn kə́ ńgɛd ŋwunə a záŋ ndě, kɔ pɛn kə́ ńtúgə ŋwéetə́ á ndu pətsə́ pəənə.