Read Awing Galeshanə 6 Bible Online

Galeshanə 6 - Awing bible

Galeshanə 6

¹Pəlim, mbɔʼ nə́ waamə̂ ŋwunə a chî nə́ á mə́m təpɔŋ yitsə̌, pəənə́ ándó Ajwiə a chî nə́ á mə́m pɨ, nə tə́gə yə́ alaŋə́; ḿbə́ shib ə́faʼ ə́lɨ́d nə́ ndú páʼ wɨ́d pwɔ́dnə nə́. Pɨ tə́ ńgɛlə̂ nə lɔg ndɛd ńgə́ kɔ nə pɨ ńkə́ ńgwǔəə azə́ənə́ á mə́mə akwaʼlə.

²Tə́ nə́ ńkwáalə məmbɨ mə́ənə́ á mə́ twá nə́ əpeʼ əpə́ənə́, ńjî ńgə́ pɨ lwɛ́nkə noŋkə Klisto.

³Mbɔʼ ŋwu tsə̌ a kwaŋ ńgə́ yí lə́ ajûtsə́ páʼ a kě nə́ ajûtsə́ pô, a fɨgə̂ lə́ tsɔʼə mbɨ əjǐə.

⁴Ŋwu ntsəmə a náŋ əyí ngɛdmə́nuə, mbɔʼ zɨ́d koʼnə̂, gho kɔŋtə̂ nə́ anu páʼ gho faʼ nə́, ńkě fiʼkə̂ pə́ nə́ anu páʼ ŋwu ndaʼə a faʼ nə́ pô.

⁵Ńté ńgə́ ŋwu ntsəmə a chîə mə́ twám nə́ ajíə apeʼə.

⁶Pəənə́ ándó pə́ zéʼkə nə́ ághɔ́b nə́ atséebə Əsê lə́, pó shib ńgabtə̂ əpú pipə əshîʼnə pətsəm ə́fɛ̂ pipə́ ndzéʼkə əghoobə́.

⁷Kɔ nə fɨg məmbɨ mə́ənə́, mbɔʼ ŋwu tsə̌ a kě Əsê fɨg pô, ŋwu ntsəmə a foʼə̂ lə́ ajú páʼ a pǐ nə́.

⁸Mbɔʼ pó pǐ ńdzoŋə̂ pə́ mənu mbɨ əzɔb lɔ nə́ ńgə́ pó faʼ, pó yǐ foʼ lə́ nəwûə á mə́m ə́wə́; lə́ mbɔʼ pó pǐ ńdzoŋə̂ pə́ anu Ajwǐəsê lɔ nə́ ńgə́ pó faʼ, pó yǐ ə́foʼ lə́ nchîmbî páʼ zɨ́d mɛdnə̂ nə́ ngǎ mɔʼə́.

⁹Lə́ pə́ ńgə́ kɔ pɛn kéenə mə ghɛd nə́ əshîʼnə; ńté ńgə́ mbɔʼ pɛn chî ká pó, ndɛd yǒ ńkoʼ páʼ pɛn yǐ nə́ foʼə̂ ajúmə atsəm pɛn kə pǐ nə́.

¹⁰Lə́ á pə́ ńgə́ əghâ ətsəmə ándó pɛn túg nə́ əsa pɛn ghɛd əshîʼnə á mbô ŋwu ntsəmə, ḿbə́ ḿbyádnə ńgɛlə̂ á mbô pəlim pɛnə̂ á mə́m Yeso.

¹¹Zɨ́ nə́ pəmɛ́ pə́ əmə́g mə́ aŋwaʼlə maŋ lɔg nə́ ŋ́ŋwaʼlə̂ ə́wə́ á mbô pɨ nə́ apô mə!

¹²Pəənə ándó pó lɔ nə́ mə́ fyád nə́ wɨ́ ńgə́ pə póʼə wɨ́ lə́ pəənə ándó pó tə́ nə́ nɨd mbɨ əzoobə́, ḿbəənə̂ ńkɔ́ʼkə mbɨ əzɔb ńté mənu mə́ ndzəmə apeŋə́. Pó faʼ ndɛn mənu ghɛn lə́ ńté ńgə́ kɔ pə́ tsaŋkə̂ ághɔ́b ńté atǐəpagləpaglə Yeso.

¹³Pɨ pə́ póʼ nə ághɔ́b pó kě azóobə́ noŋkə kə́ ńdzoŋə̂ pô, pó loonə̂ lə́ ńgə́ pə póʼə wɨ́ ńjî ńgə́ pó tíʼə ńtəələ̂ ńté na mbɨ əzəənə́.

¹⁴Nə́ maŋ, maŋ yǐ təələ̂ azá ə́ té lə́ tsɔʼə atǐəpagləpaglə Mmaʼmbî əwɛ̂n Yeso Klisto, ńdaŋə̂ á mə́m atǐəpagləpaglə ají mbî ə́ kwûə á mbô maŋə, maŋ kə́ ńkwûə á mbô mbîə.

¹⁵Kɨ pə́ póʼə mə, kɨ ńchî póʼ, lə́ kě anu yitsə̌ pô, mɛ́ anuə á mbô maŋ lə́ ńgə́ maŋ tíʼ lə́ ajú yə fîə.

¹⁶Ńgɛn nə́ pɨ páʼ pö zoŋ nə́ anu zəənə́ á mə́m nchîmbî əzɔb, ńgə́ mbwɔ́dnə pó akóolə́mə́lə́ŋə Əsê ə́ chîə á mə́m pó ńkə́ ńchîə á mə́m pɨ pə́ Əsê pətsəmə.

¹⁷Á mə́ lwigtə̂ nə́, kɔ ŋwu tsə̌ a kə́ ḿbɨ́ ə́fɛ̂ mə nə́ ngə́ʼə, ńté ńgə́ əlagə́ məfəŋ ə́ chî nə́ á mbɨ maŋ ə́ nɨd ńgə́ maŋ lə́ apoʼə Yeso.

¹⁸Pəlim, ńgə́ apɔŋə́ntə́əmə Mmaʼmbî əwɛ̂n Yeso Klisto a chî nə́ pɨ tsɔʼə pɨ pətsəmə. Amɛn.