Read Awing Efishanə 1 Bible Online

Efishanə 1 - Awing bible

Efishanə 1

¹Aŋwaʼlə zəənə́ á lǒo lə́ á mbô Pɔlə, páʼ Əsê a kə lɔ nə́ ńgə́ a pə́ ntú Klisto Yeso lə́. A ghɛnə̂ lə́ á mbô pɨ pə́ Əsê pó chî nə́ á Ɛfesusə, pɨ páʼ pó faʼ nə́ afaʼə azóobə́ á mə́m Yeso Klisto nə́ ntɨ́ əghɔ́b ətsəmə.

²Ńgə́ apɔŋə́ntɨ́ pó mbwɔ́dnə páʼ ə́ lǒo nə́ á mbô Tǎ əwɛ̂n Əsê pó Mmaʼmbî Yeso Klisto ə́ chîə á mə́m pəənə́.

³Pɛn fɛ̂ ndǎ á mbô Əsê páʼ a pə́ nə́ Tǎ pə Mmaʼmbî əwɛ̂n Yeso Klisto! Ńté ńgə́ a fɛ̂ afoʼə ajwiə atsəmə á mbô pɛn páʼ á chî nə́ nəpó ńdaŋə̂ á mə́m Yeso Klisto.

⁴Pə́ nə ḿbɛ́d tə ńtsoŋkə̂ mbî lə́, Əsê pɛ́dtə ńtsɔ́ʼə áwɛ̂n ńdaŋə̂ á mə́m Yeso Klisto ńgə́ pɛn pə́ pɨ píə, ńjî ńgə́ mbɔʼ pɛn ŋwaʼ, ḿbɨ ńkě kɔntə yitsə̌ á mbi yí túg pô.

⁵Əsê a nə ńtúgə akɔŋnə ńté áwɛ̂n, ńtíʼ ńkwaŋ tsɔʼə ngǎ yí ńgə́ a yǐ ghɛd pɛn pə́ pɔ́ pí ńdaŋə̂ á mə́m Yeso Klisto. Lɛ̌ anuə a nə ńkɔŋ nə́ ńkə́ ńdɔ ńgə́ á pə́ ə́lə́ələ́.

⁶Pɛn tə́ ŋ́ŋáŋkə Əsê ńté nəgháʼ əyǐ pó apɔŋə́ntə́əmə əjí páʼ a nə́ fɛ̂ nə́ nə́ pɛn yə tə ndɛn ńdaŋə̂ nə́ Mɔ́ əyǐ Yeso Klisto páʼ a kə kɔŋ nə́.

⁷Ńdaŋə̂ á mə́m nəwû Klisto á atǐəpagləpaglə, a tsóʼə atûə azɛ̂nə, ńtíʼ ńgɛd ńgə́ Əsê a ləgnə̂ pətəpɔŋ pɛnə̂, apɔŋə́ntə́əmə Əsê á pyádnə ńgáʼə,

⁸apɔŋə́ntɨ́ páʼ a fɛ̂ nə́ nə́ pɛn tə́ a nɨ́ lə́, á mə́mə ayáŋə ají pópə ajíənuə ajíə.

⁹Əsê a kə ghɛd nə́ ndú ətsəm ńdaŋə̂ á mə́mə ayáŋə ají ńgə́ pɛn jî mənu a kə tyáŋtə nə́ á nəlyaŋnə́ á mə́m Klisto

¹⁰Anu zɨ Əsê a kə tyáŋtə nə́ lə́ ńgə́, təmbɔʼ chigə ndɛd yi əwɨ ə́ koʼ a tsɛntə̂ ajúmə atsəm a kə tsoŋkə̂ nə́, ajúmə atsəmə á chî nə́ nəpó pó ndəsê, Klisto a tíʼ ḿbə́ nətûə.

¹¹Pə́ faʼə̂ anuə atsəm ńdzoŋə̂ lə́ ndzaŋ Əsê a kə tyáŋtə nə́ ńkə́ ńtsɔ́ʼə; Əsê a kə tsɔ́ʼə áwɛ̂n ńgə́ pɛn tíʼ táʼə á mə́m Yeso Klisto ndzaŋə a nə ńtyáŋtə nə́, ńdzoŋə̂ lə́ ndzaŋ a nə ńtyáŋtə nə́ ńgə́ a yǒ lɔgə̂ aliʼ tə ə́fɛ́lə á nəfɛdnə́.

¹²Lə́ á pə́ ńgə́ pɛn páʼ pɛn nə ḿbeg nə́ ńtúgə akwaŋ ńtə́ ḿbyáabə á mə́m Yeso, pɛn ŋáŋkə nəgháʼ Əsê.

¹³Pɨ nə ńkə́ ńtíʼ ńkə́ ḿbí pɨ pə́ Əsê əghâ ándó pɨ nə ńdzóʼ nə́ ndə̌ŋdəŋ nkəənə, Nkɨ yi Əshîʼnə páʼ ə́ nə ńgyǐ nə́ nə́ nchîntəənə á mə́m pəənə́; pɨ nə néŋ ntɨ́ nə́ Klisto, Əsê tíʼ néŋə aleŋkə nə́ pɨ ńgə́ pɨ lə́ pɨ pí. Aleŋkə jɨ lɛ lə́ Ajwǐəsê a fɛ̂ nə́ nə́ pɛnə̂, páʼ a kə laʼnə̂ nə́ ńgə́ a yǐ fɛ̂ lə́.

¹⁴Ajwi zəənə́ á nəələ̂ lə́ ńgə́ pɛn yǒ kwáalə ajú páʼ Əsê a kə laʼnə̂ nə́ pɨ pí ə́wɨ́ lə́, ḿbɨ ńkə́ nəələ̂ áwɛ̂n ńgə́ Əsê a yǒ kwéʼnə tsóʼə atûə pɨ pí ńjî ńgə́ pɛn ŋáŋkə nəgháʼ əyǐə.

¹⁵Ńté anu zɨ, ə́fɛ́lə ándó maŋ nə́ ńdzóʼ nə́ anu ńté mbimə́ əzɨ nə́ Mmaʼmbî Yeso Klisto ḿbéenə akɔŋnə nə́ túg nə́ ńté pɨ pə́ Əsê lə́,

¹⁶maŋ kě kə́ láʼə jwitə̂ á mə́ fɛ̂ nə́ ndǎ á mbô Əsê ńté áwɨ́ pô. Mäŋ kwúmtə áwə́ənə́ á mə́m achaʼtə́sê mə,

¹⁷ḿbítə Əsê páʼ ə́ pə́ nə́ yi Mmaʼmbî əwɛ̂n Yeso Klisto ḿbɨ ḿbə́ Tǎ páʼ a túg nə́ nəgháʼ ńgə́ a fɛ̂ Ajwiə á mbô pəənə́, ńjî ńgə́ Ajwi zɨ́d zə́ á ghɛd pɨ túgə ayáŋə, ḿbɨ fiʼtə̂ áwɨ́ nə́ ajú Əsê a pə́ nə́ zə́ələ́, ńjî ńgə́ pɨ jîə yə́.

¹⁸Maŋ loonə̂ lə́ ńgə́ təmbɔʼ atûə azə́ənə́ a ŋáʼnə nə́ zɨ́ nkyaʼ əjǐə, ńjî ńgə́ nə́ jîə ajú páʼ pɨ náanə nə́ ńkwaŋə̂ ḿbyáabə páʼ a kə́ fóŋ nə́ áwə́ənə́ á mə́m ə́wɨ́ lə́, ḿbɨ́ ńkə́ ńjî ndzaŋə afoʼ yə yɛ́d nə́ yɛ́d nə́ páʼ a kə laʼnə̂ nə́ pɨ pí ə́wə́,

¹⁹ḿbɨ ńkə́ ńjî ndzaŋə ándó mətɨ mí mə́ pyádnə nə́ ńtyantə̂ ńkə́ ńtə́ faʼə̂ á mə́m pɛn páʼ pɛn néŋ nə́ ntɨ́ əwɛ̂n nə́ yə́. Mətɨ mí mə̈ faʼ nə́ á mə́m pɛn lə́, lə́ tə́kɔʼ mətɨ wə́

²⁰páʼ a kə lɔg nə́ ńjúmkə Klisto ə́wə́ á nəwû ńtíʼ ńnáakə əlá apô yí yə təənə á nəpó lə́.

²¹Klisto a náanə ə́wə́ á nətûə, ə́sáʼə mətû mətsəm, pəmɛ́ pə́ pəənə, pɨ pə́ túg nə́ mətəənə ḿbá pətǎ pə́ faʼ pətsəmə, Klisto a túg əlɛ́n páʼ wɨ́d tsɛ nə́ məlɛ́n mətsəm páʼ mə́ chî nə́ á ndu mbî ḿbá mimə mbî páʼ ə́ chî nə́ á mə́ yǐ nə́.

²²Əsê a kə néŋə ajúmə atsəmə á mətɛ́n mə́ məko Klisto ńtíʼ fɛ̂ yə́ á mə́m nkyeetə pɔ́ pə́ Əsê ándó nətû nə́ ajúmə atsəmə.

²³Nkyeetə pɔ́ pə́ Əsê lə́ mbɨ Klisto, nkyeetə pɔ́ pə́ Əsê ə́ lwɛ́nkə nə́ Klisto páʼ a kwéʼnə nə́ ńkə́ ńdwɛ́nkə nə́ ajúmə atsəmə aliʼə́ atsəmə.