Read Awing Efishanə 2 Bible Online

Efishanə 2 - Awing bible

Efishanə 2

¹Á nə ḿbə́ á ntsɛɛmbi lə́ pɨ nə ḿbə́ lə́ pəkwû ńté atyǎntətûə azɨ́ pó pətəpɔŋ pə́ənə́.

²Nə́ ndɛd zɨ́d zə́ pɨ nə ńdzoŋə̂ lə́ mənu mə́ təpɔŋ mə́ chî nə́ á mə́m mbîə; pɨ kə̈ zóʼnə lə́ ŋwunə a chî nə́ nətû nə́ mətɨ mə́ ajwi páʼ mə́ chî nə́ á mə́m əfə́gə atǐ lə́. Ajwi páʼ á sáʼ nə́ pɨ páʼ pə́ tyantə̂ nə́ atûə á mbô Əsê.

³Pɛn pətsəm nə ńkə́ ńchî lə́ tsɔʼə ándó pó, ńtíʼ ńchî ńdzoŋə̂ á pə́ mənu páʼ na mbɨ kɔŋ nə́, ńtíʼə faʼə̂ mənu mətsəmə ándó páʼ mbɨ əzɛ̂n pópə akwaŋə azɛ̂n lɔ nə́ ńgə́ pɛn faʼə̂. Ńdaŋ ə́lɨ́d azáŋə́ndé Əsê á zoŋə̂ áwɛ̂n, ándó á kə kə́ nə́ ńdzoŋ pətsə́ pɨ lə́.

⁴Lə́ akóolə́mə́lə́ŋə Əsê a pə́ ńnə́ənə, akɔŋnə a kɔŋ nə́ áwɛ̂n ə́wə́ á pyádnə ńgáʼə,

⁵ńté ńgə́ pɛn kə pǎtə ńkwûə á mə́mə ajwi ńté atyǎntətûə azɛ̂n lə́, a pɨ ə́fɛ̂ nchîmbî nə́ pɛn pə́ Klisto (Pɨ kə ńchwád ńté lə́ apɔŋə́ntə́əmə Əsê).

⁶Ndzaŋ pɛ̌npə Yeso Klisto pə́ nə́ táʼ lə́, a júmkə áwɛ̂n po á nəwû ńjî ńgə́ pɛn náanə pɛ̌npo á nəpóolə.

⁷A kə ghɛd lɛ̌ lə́ a mə́ nɨd nə́ pəənə á mə́m mbî yi fî ntsəm páʼ yǐ nə́ yǐ, ndzaŋə ándó apɔŋə́ntə́əmə Əsê á pyádnə nə́ ńgáʼ ńdaŋ nə́ akɔŋnə páʼ a kə nɨd nə́ áwɛ̂n ə́wə́ á mə́m Yeso Klisto.

⁸Ńté ńgə́ ńdaŋə̂ á mə́m apɔŋə́ntə́əmə Əsê pə́ kə chwádkə áwɨ́ ńdzoŋ nə́ mbimə́ əzəənə́! Zəənə́ á kě chî ńté lə́ afaʼ yətsə́ nə́ faʼ nə́ pô, lə́ məfɛ̂nə mə́ Əsê

⁹A kě ə́fɛ̂ ńté lə́ məfaʼ mɨ́ pô, ńjî ńgə́ kɔ ŋwu tsə̌ a tə́ ŋ́ŋáŋkə mbɨ əjǐə.

¹⁰Əsê a ghɛlə̂ áwɛ̂n pɛn pə́ ajú pɛn pə́ nə́ zə́ələ́. Ndzaŋ pɛ̌npə Yeso Klisto pə́ nə́ táʼ lə́ a ghɛd ńgə́ nchîmbî əzɛ̂n ə́ pə́ yi məfaʼ mimə əshîʼnə, məfaʼə ándó a nə ḿbɛ́d nə́ tə ńtyáŋtə ńgə́ pɛn yǐ faʼə̂ mə́ələ́.

¹¹Pɨ lə́ Pətəjǐsê tə fɛ́lə alě pə́ kə pî nə́ áwə́ənə́. Pəjusə pó fóŋə áwɨ́ nə́ “Pɨ pə́ kě nə́ ághɔ́b póʼ pô,” ńtíʼə fóŋ mbɨ əzɔb nə́ pɨ pə́ póʼ nə́ ághóobə́ (zəənə́ á sóŋə lə́ anu ńté mənu pɨ pö lɔg nə́ mbô ńgɛlə̂ ə́wɨ́ nə́ mbɨ əzoobə́) kwúmtə nə́ ńgə́ lɛ̌ ndzaŋ pɨ kə chî nə́ á ntsɛɛmbiə.

¹²Tə́ nə́ ńkwúmtə ńgə́ a kə pə́ əghâ yi wɨ́ lə́ nə́ kě chî ḿbáatə Klisto pô. Pɨ kə pə́ lə́ pəyǐyinə́, ḿbɨ ńkě chîə á mə́m pɨ pə́ Əsê a kə tsɔ́ʼ nə́ pô. Pɨ nə ńkě anu yitsə̌ túgə á mə́m əka pə́ kə wad nə́ lə́ pô, ńté ńgə́ wɨ́d kə zoŋə̂ lə́ məndaʼnə páʼ Əsê a kə fɛ̂ nə́ á mbô pɨ píə. Pɨ chîə á mbî ghɛn lə́ ńkě akwaŋ yitsə̌ túg ńtə́ ḿbyáabə pô, ńkě pɨ̌pə Əsê kə́ ńchî pô.

¹³Lə́ nə́ pə əghâ nə́, á mə́m Klisto Yeso pɨ páʼ pɨ kə chî nə́ ndi sag lə́, pə́ yǐ nə́ pɨ ḿbáatə ńdaŋə̂ á ndzəmə achǐə Klisto.

¹⁴Ńté ńgə́ Klisto nə́ nkɔ̌ʼmbɨ əyíə a yǐ nə́ mbwɔ́dnə á mbô pɛnə̂, á mə́ ghɛd nə́ ńgə́ Pəjus pópə Pətəjǐsê tíʼ ḿbə́ táʼ pəənə. A kə lɔg mbɨ əjǐ ńtsəŋkə̂ kəpa páʼə a kə tɨ́ nə́ ándó asagə́ ndɛ̂ á tətɨ pó ńgabtə̂ ághóobə́.

¹⁵Nə́ ndú ghɛn a tsəŋkə̂ Noŋkə Pəjus, pópə məntəgə́ páʼ mə́ kə fiʼtə̂ nə́ anu mbɔʼ pó faʼ ńkě kə́ faʼ pô. A kə ghɛd lɛ lə́ á mə́ lɔg nə́ Pəjus po pə Pətəjǐsê ghɛlə̂ táʼ ŋwu yi fî wɨ́ ńjî ńgə́ pó pə́ táʼə á mə́m yə́, ńjî ńgə́ mbɔʼ mbwɔ́dnə chîə á tətɨ pó.

¹⁶Ńdaŋə̂ á mə́m nəwû əyǐə atǐəpagləpaglə klisto á tsəŋkə̂ kəpeenə́ a kə chî nə́ á tətɨ pó, ḿbɨ ńkə́ ńtsɛntə̂ məlá məwɨ́ mɛ́n mbɛ̌ mə́ tíʼ táʼə á mə́m na mbəəmə, a tíʼ mbɨ nə́ pó á mbi Əsê.

¹⁷Klisto a tíʼ ńgyǐ ńnáŋkə nkɨ yi əshîʼnə yi mbwɔ́dnə wə́ á mbô ŋwu ntsəmə, á mbô pɨ Pətəjǐsê páʼ pó nə ńkě nə́ chî ḿbáatə Əsê pô, mbɨ ńkə́ ḿbə́ á mbô Pəjus pó nə́ ńchî nə́ ḿbáatə yə́.

¹⁸Ńdaŋə̂ á ndzəm Klisto, pɛn pətsəmə, Pəjus pópə Pətəjǐsê chî təmbɔʼ pɛn ghɛnə̂ á mbi Tǎ nə́ táʼ Ajwiə.

¹⁹Lə́ pə́ ńgə́, pɨ Pətəjǐsê, nə kě pɛ́d lə́ ətú mbî kɨ ngaŋnə́ghá pô. Pɨ tíʼ ḿbə́ lə́ pəŋwúd pə́ aláʼ pɨ̌pə pɨ pə́ Əsê, ńkə́ ḿbə́ pəlimə́ á mə́m ngwud Əsê.

²⁰Pɨ lə́ ndɛ̂ páʼ pə́ pɔ́ nə́ á ndumə achîə, achî zəənə́ á pə́ məntú mə́ Yeso pópə məntúmə́sê, Klisto á tíʼ ngɔʼ nəlwî páʼ ə́ twá nə́ ndɛ̂.

²¹Á mə́m yí ndɛ̂ yi wɨ́ tíʼ ńkyeetə̂ ntsəm ntɨ́ táʼə aliʼə́, ńtíʼ kwíŋə ándó Ndɛ̂ yi ŋwaʼ nə́ á mə́m Mmaʼmbîə.

²²Ndzaŋ nə́ pə́ nə́ táʼə á mə́m yí lə́, pə́ kə ńtsɛntə̂ áwɨ́ nə́ pə́ táʼ pɨ pɨ̌pə ŋwu ntsəmə, á mə́m ndɛ̂ páʼ Əsê chî nə́ ə́wɨ́ ńdaŋə̂ á mə́mə Ajwi ajíə.