Read Awing Efishanə 3 Bible Online

Efishanə 3 - Awing bible

Efishanə 3

¹Lɛ̌ anu páʼ á ghɛd nə́, maŋ Pɔlə ngaŋə atsáŋ Klisto Yeso tíʼə chaʼtə́sê ńté áwɨ́ Pətəjǐsê.

²Maŋ kwaŋ ńgə́, pɨ zóʼ, ńgə́ Əsê nə́ apɔŋə́ntə́əmə ají a fɛ̂ afaʼ zɨ ńgə́ maŋ faʼə̂ zə́ələ́ á mə́ kwá nə́ áwə́ənə́.

³Əsê a nə ńkyaʼə̂ anu páʼ a kə lɔ́btə nə́ zə́ələ́ á nəlyaŋnə́ ńgɛd maŋ jîə (Maŋ ŋwaʼlə̂ mɔ́ akəmə aŋwaʼlə yitsə̌ ńté anu zəənə́,

⁴Təmbɔʼ nə́ fóŋə anu maŋ nə ŋ́ŋwaʼlə̂ nə́, nə́ zéʼə ajíənu maŋ túg nə́ zɨ́d ńté anuə nəlyaŋnə́ Klisto).

⁵Á nə ḿbə́ nə́ mbî ntsɛɛmbi lə́ pə́ kě pɨ pə́ mbî nə́ anuə nəlyaŋnə́ fiʼtə̂ pô, lə́ Əsê a pɛn kyaʼə̂ zɨ́d əghâ nə́ ńdaŋə̂ á mə́mə Ajwiə á mbô məntú mə́ Klisto pó məntú mə́ Əsê mimə ŋwaʼ nə́.

⁶Anuə nəlyaŋnə́ zɨ lə́ ńgə́ Pətəjǐsê pó pəjus pó laŋə̂ á mə́m nkɨ yi əshîʼnə ńtíʼ ńchîə azóobə́ á mə́mə afoʼ páʼ á pə́ nə́ yə́ Əsê; pó tíʼ ḿbə́ lə́ əlam táʼ mbɨ, ḿbɨ ńchîə á mə́m ndaʼnə páʼ Əsê a kə ghɛd nə́ zɨ́d ńdaŋə̂ á mə́m Klisto Yeso.

⁷Pə kə ghɛlə̂ á mə lə́ ándó ngaŋəfaʼ nkɨ yi əshîʼnə lə́ pə́ ḿbə́ ajú yə səglə̂ nə́ páʼ Əsê a fɛ̂ nə́ á mbô maŋə. A kə fɛ̂ á mbô maŋ lə́ ńdaŋ lə́ nə́ mətɨ mə́ Əsê páʼ mə́ kə faʼ nə́ á mə́m maŋə.

⁸Maŋ kə́g ńtsɛɛlə̂ chigə mɔ́ kə́nyaŋ ŋwunə a chî nə́ á mə́m pɨ pə́ Əsê pətsəmə, lə́ Əsê a pə́ fɛ̂ ngóʼkə zəənə́ á mbô maŋ á mə́ ghɛd nə́ ńgə́ maŋ lɔg nkɨ yi əshîʼnə wə́ ńgɛn nə́ wə́ələ́ á mbô Pətəjǐsê ńté afoʼə Klisto zə́ yə tə afiʼə.

⁹Á mə́ kə́ nə́ ghɛd ŋwu ntsəmə a zɨ́ ndzaŋə anu Əsê a nə ńdɔ́btə nə́ á nəlyaŋnə́, á yǒ néŋə ázə́ələ́ á mə́mə afaʼə. Əsê páʼ a pə́ nə́ ńtsoŋkə̂ ajúmə atsəm, a kə lɔʼkə̂ anuə nəlyaŋnə́ zɨ ə́fɛ́lə á ngoʼ pəchə́,

¹⁰ńjî ńgə́ mbɔʼ ndɛd zɨ yǐ ńkoʼ ńdaŋə̂ á mə́m nkyeetə pɔ́ pə́ Əsê mətɨ mə́ nəpó pópə pɨ pó sáʼ nə́ nəpó pó yǒ jîə ayáŋə Əsê tsɔʼə nə́ məndú mí mətsəmə.

¹¹Əsê a nə ńgɛlə̂ azɨ́ lɛ ńdaŋ lə́ nə́ anuə ají a kə lɔ́btə nə́ a ntɨ́ yí tə ə́fɛ́lə nəfɛdnə́, a nə ńgɛlə̂ zɨ́d ńdaŋ lə́ nə́ Klisto Yeso páʼ a pə́ nə́ Mmaʼmbî əwɛ̂nə.

¹²Pɛn lə́ táʼə a mə́m yə́, ńkə́ ḿbɨ ḿbə́ nə́ mbimə́ pɛn túg nə́ nə́ yí lə́, pɛn túg ntɨ́ tə mbɔʼ pɛn yǐəə á mbi Əsê tə ńkě ajûtsə́ pɔ́g pô.

¹³Maŋ tíʼə ḿbóʼə lə́ mbô á mbô pɨ ńgə́ kɔ mbô mɨ́ mə́ pwɔ́d ńté ńgə́ maŋ jɨ́ ngə́ʼ ńté lə́ áwə́ənə́, ape anu yəwə́ atsəmə a kə́ ḿbə́ azə́ənə́.

¹⁴Ńté anu zɨ́d zɨ maŋ tíʼ ńkwə́ʼtə á məko Tǎ,

¹⁵Tǎ páʼ ngwud ntsəmə á nəpó pó ndəsê ə́ lɔg nə́ chigə əlɛ́n əghóobə́ á mbô yə́.

¹⁶Maŋ pítə Əsê á mə́mə afoʼə nəgháʼə ajíə, ńgə́ a fɛ̂ mətəənə á mbô pɨ ńdaŋə̂ á mə́m Ajwiə ají ńjî ńgə́ məntɨ́ mɨ́ mə́ tyantə̂ á mə́m mənu míə,

¹⁷maŋ pəənə̂ ńchaʼtə́sê ńgə́ təmbɔʼ Klisto a ghɛd ndɛ̂ əjǐ á mə́m məntɨ́ pɨ ńdaŋə̂ á mə́m mbimə́. Maŋ chaʼtə́sê ńgə́ pɨ pǐ məŋaŋ mɨ́ mə́ tyantə̂ á mə́mə akɔŋnə,

¹⁸ńjî ńgə́ mbɔʼ pɨ̌pə pɨ pə́ Əsê pətsəm túg mətɨ, atûə azə́ənə́ a tsɔ́ʼnə, nə́ jî ndzaŋə ándó akɔŋnə Klisto a shamnə̂ nə́, ə́sagə̂, ŋ́ŋáŋnə ḿbɨ ńkə́ ə́shǐəə.

¹⁹Kə́ nə́ ńjîə akɔŋnə Klisto páʼ á tsɛ nə́ ajíənuə ŋwu mbîə, ńjî ńgə́ mbɔʼ nə́ lwɛ́nkə nə́ ajúmə atsəm Əsê a pə́ nə́ zə́ələ́.

²⁰Á mbô yí wə́ a laŋ nə́ á mə́m mətɨ mí mə́ chî nə́ á mə́m pɛn ə́faʼə̂ ə́wɨ́, páʼə a chî nə́ təmbɔʼ a faʼ mənuə á mbô pɛn ńtsɛ ndzaŋ mbɔʼ pɛn pítə kɨ ńkwaŋə̂:

²¹Nkyeetə pɔ́ pə́ Əsê yǐ fɛ̂ nəgháʼə á mbô yí əlaŋə̂ mə́m Yeso, á mə́m ndɛd mbî ntsəmə, tə ḿmɛdnə̂! Amɛn.