Read Awing Efishanə 4 Bible Online

Efishanə 4 - Awing bible

Efishanə 4

¹Maŋ tíʼə ḿbóʼmbô á mbô pəənə́, maŋ páʼ maŋ pə́ nə́ ngaŋətsáŋ ńté ńgə́ maŋ tə́ faʼə̂ á mbô Mmaʼmbîə: ghɛd nə́ nchîmbî əzɨ ə́ fîə afaʼ páʼ pə́ nə fóŋ nə́ áwɨ́ ńgə́ nə faʼə̂.

²Tə́ nə́ ńtsóokə mbɨ əzɨ əghâ ətsəm, mbwɔ́dnə, ḿbɨ ńtúgə awaamə́ntə́əmə, ńdɔgə̂ ŋwu ntsəmə á ndzɔʼ pɨ tsɔʼə ndzaŋə a chî nə́, á mə́mə akɔŋnə.

³Fǔəlóʼə á mə́ lɔʼkə̂ nə́ apímnə zə́ páʼ Ajwiə á fɛ̂ nə́ ńdaŋə̂ á mə́m mbwɔ́dnə páʼ zɨ́d kyeetə̂ nə́ áwɨ́ nə́ tíʼ ḿbə́ táʼ ŋwu lə́.

⁴Lə́ chî táʼ mbɨ ə́wə́ nə́ táʼə Ajwi tsɔʼə ndzaŋə ándó lə́ kə kə́ nə́ ńchî táʼə akwaŋ əwɨ́ ńtə́ ḿbyáabə, yə ándó páʼ Əsê a kə fóŋ nə́ áwə́ənə́ á mə́m ə́wɨ́ lə́.

⁵Lə́ chî táʼ Mmaʼmbî ə́wə́, táʼ mbimə́ nə́ táʼə akwáalə́nkǐə.

⁶Lə́ chî táʼ Əsê ə́wɨ́ páʼə a pə́ nə́ Tǎ əwɛ̂n pətsəmə, ńtsɛɛlə̂ ajúmə atsəm, ə́faʼə̂ ńdaŋə̂ á mə́m ŋwu ntsəm, ńkə́ chîə á mə́m ŋwu ntsəmə.

⁷Ŋwu ntsəmə á mə́m pɛnə̂ a kwá məfɛ̂nə ńdzoŋ ndzaŋə ándó Klisto a kə fiʼ nə́ ə́fɛ̂ nə́ apɔŋə́ntə́əmə.

⁸Tsɔʼə ndzaŋə ándó aŋwaʼlə Əsê a sóŋ nə́ ńgə́, “Ndɛd páʼ a kə kɔ́ʼ nə́ tə ńkoʼ chigə atǐ lə́, a kə wam pɨ pipə nɨ́ nə́ ándó əpǒʼntso ńdɔg ńgɛnə̂; ḿbɨ́ ə́fɛ̂ məfɛ̂nə á mbô pəənə.”[1]

⁹Nə́ pə́ əghâ nə́ aliʼə́ atsáb zɨ ńgə́, “a kə kɔ́ʼə atǐə” ä sóŋə lə́ ńgə́ akə̂? A sóŋə lə́ ńgə́ a kə peg ńtsó tə ńkoʼ chigə á nətɛ́n nə́ mbîə.

¹⁰Lə́ a pə́ ńgə́ ŋwu páʼ a kə tsó nə́ əsê lə́, lə́ tsɔʼə yí páʼ a kə kɔ́ʼ nə́ atǐə, ńkɔ́ʼ tə ńtóokə məpó mətsəm, ńjî ńgə́ mbɔʼə a lwɛ́nkə əliʼ ətsəmə.

¹¹Lə́ kə pə́ yí páʼ a kə “fɛ̂ nə́ məfɛ̂nə” á mbô pəənə. A kə tsɔ́ʼ pɨ pətsə́ ńgə́ pó pə́ məntú mə́ Yeso, ńtsɔ́ʼ pətsə́ ńgə́ pó pə́ ngaŋə́náŋkə́nkɨ Əsê pó zóʼ nə́, ḿbɨ́ ńtsɔ́ʼə pətsə́ ándó pɨ pó nyi nə́ ńnáŋkə nkɨ yi əshîʼnə pó zóʼ nə́, pətsə́ pó pə́ pətseŋnə pə́ pɔ́ pə́ Əsê nə́ ngaŋə́zéʼkə anǔəsê.

¹²A kə ghɛd ndɛn mənu ghɛn lə́ á mə́ tyáŋtə nə́ pɔ́ pə́ Əsê pó koʼnə̂ á mə́ faʼ nə́ afaʼə Əsê ńjî ńgə́ təmbɔʼ pó kwíŋkə mbɨ Klisto.

¹³Ńdaŋ ə́lɨ́d pɛn pətsəm yǐ tsɛntə̂ tíʼ pə́ táʼə á mə́m mbimə́ ə́ kə́ pə́ táʼə á mə́mə ajíənuə azɛ̂n ńté Mɔ́ Əsê, pɛn yǐ tíʼ pə́ pɨ pó kwíŋ nə́, ə́ kwíŋ tə́ chîə ándó Klisto.

¹⁴Ńjî ńgə́ kɔ pɛn pɨ ḿbɛ́d ḿbə́ tsɔʼə pɔ̂nkə̂, páʼ pə́ lɔg nə́ ndzeʼkə́ pɨ pə́ məfɨgə mbɨ ḿbə́ nə́ məŋɔ́dtə́ nə́ ngɔ́b páʼ pó tə́m nə́ ńchǐə áwɛ̂n ə́wɨ́ ńgɛnə̂ nə́ mbi ḿbəənə̂ nə́ ndzəmə.

¹⁵Pɛn chî lə́ pə́ mə́ tsáb nə́ ndə̌ŋdəŋə́ á mə́mə akɔŋnə, ə́ kwíŋ nə́ ndú ətsəmə á mə́m Klisto páʼ a pə́ nə́ nətûə.

¹⁶Ńdaŋ nə́ yí páʼ a chî nə́ nətû nə́ əlam mbɨ, əlam mbɨ ətsəm chwíʼtə táʼə aliʼə́, mbɨ ntsəm tíʼ ńgwamnə̂ á nəkaʼ ńdaŋə̂ nə́ mələŋə́ míə; lə́ á pə́ ńgə́ təmbɔʼ alamə́ atsəmə a tə́ faʼ ndzaŋə á pěʼ nə́ ńchîə á mə́ faʼ nə́, mbɨ ntsəm kwíŋə, ńkə́ ńkwíŋə á mə́mə akɔŋnə, ńkɔŋnə̂ məmbɨ móobə́.

¹⁷Lə́ á pə́ ńgə́, ńdaŋ nə́ əlɛ́n Mmaʼmbî mäŋ kwantə̂ áwɨ́ ńgə́ kɔ pɨ ghɛn nə́ mbiə á mə́ túg nə́ nchîmbî əzəənə́ ándó Pətəjǐsê, pɨ páʼ akwaŋə azóobə́ á kě nə́ atûə anu yətsə́ chî pô,

¹⁸ḿbɨ ńkə́ ḿbə́ pəənə ándó məntɨ́ mɔ́b mə́ pɛ́d nə́ á mə́m ndzəmə́, pó kě túgə anu yətsə̌ á mə́m nchîmbî páʼ Əsê ä fɛ̂ nə́ lə́ pô, ńté ńgə́ pó kě anu yətsə́ kwéʼnə ńjî pô, ətû pɔ́b ə́ pɨ ńtyantə̂,

¹⁹Əshɨ́ yitsə̌ ə́ kě ághɔ́b pɛ́lə ńkóolə pô, pó kwéʼnə fɛ̂ mbɨ əzoobə́ á mə́m mənu mə́ təpɔŋə, ńtíʼə ə́faʼ ńté mənu mə́ əshɨ́ mətsəm tə ńkě awaamə́mbɨ yətsə́ túg pô.

²⁰Lə́ kě mənu pɨ nə́ ńdzéʼ nə́ ńté Klisto lə́ pô!

²¹Á nəələ̂ ńgə́ pɨ nə́ ńdzéʼə anu ńté yə́, ḿbɨ ḿbə́ ngaŋə́zoŋə́ndzəm əjí lə́, pə́ zéʼkə áwɨ́ nə́ ndə̌ŋdəŋ páʼ á chî nə́ á mə́m Yeso.

²²Lə́ á pə́ ńgə́ nə́ myaʼ nkɔ̌ʼmbɨ wɨ́ yi lɛn wə́ páʼ wɨ́d kə ghɛd nə́ pɨ túg nchîmbî páʼ pɨ kə túg nə́ lə́. Nkɔ̌ʼmbɨ yi lɛn wə́ páʼ mənu mə́ ngóobə á ntɨ́ gho mə́ kə lɔ nə́ á mə́ tsəŋkə̂ nə́ áwɨ́d lə́.

²³Ghɛd nə́ Əsê kwúblə məntɨ́ mɨ́ pópə əkwaŋ pɨ́ pɨ́d tíʼ ə́sɛdnə̂ ḿbə́ pipə fîə,

²⁴nə́ yǐ shib wê nkɔ̌ʼmbɨ yi fî wə́, páʼ pə́ tsoŋkə̂ nə́ wɨ́d ə́ pə́ afiʼkə Əsê ńnɨd nkɔ̌ʼmbɨ yə́ á mə́m nchîmbî páʼ ə́ chígə́ nə́ ńtɨ́ ndə̌ŋdəŋ ńkə́ ńchígə́ ŋ́ŋwaʼə̂.

²⁵Lə́ á pə́ ńgə́ kɔ pɛn tə́ ńtsɨ́d ntsəələ, ŋwu ntsəmə a tséebə ndə̌ŋdəŋ pó ngaŋnəpad əyǐ ńté ńgə́ pɛn tsɛntə̂ ḿbə́ lə́ əlam mbɨ Klisto.

²⁶Túgə azáŋə́ndé, kɔ pə́ ńgɛlə̂ təpɔŋə, ńkɔ ńkə́ ḿbí mə́numə á mɛ́d páʼ gho pɛ́d nə́ á mə́mə azáŋə́ndé,

²⁷ńjî ńgə́ kɔ gho fɛ̂ əseenə á mbô Satanə.

²⁸Kɔ ndzə̌lə a pɨ ńtə́ ńdzəələ̂, a tə́ faʼ ə́faʼ nə́, ńdɔg mbô mí ə́faʼə̂ ə́wɨ́ nə́ ntɨ́ əyǐ ətsəmə, ńjî ńgə́ a chî təmbɔʼ a kwá pəənə ándó pó kě nə́ túg pô.

²⁹Kɔ atséebə təpɔŋ yətsə́ a fɛ́lə á ntso pəənə́, tsáb nə́ á pə́ atsáb páʼ təmbɔʼ á zéʼkə tsɔʼə anu páʼ zə́ələ́ yǐ nə́ kwá pɨ nə́ ndɛd yi wə́, ńjî ńgə́ təmbɔʼ zə́ələ́ á fɛ̂ apɔŋə́ntə́əmə á mbô pɨ páʼ pó zóʼ nə́.

³⁰Kɔ pɛn ghɛlə̂ Ajwǐəsê a pə́ nə́ yə ŋwaʼ nə́ a chî nə́ afɨnə, lə́ Ajwǐəsê zɨ pə́ nə́ ńdɔg nə́ ńdeŋkə̂ áwɨ́ ə́wə́. Alě yǒ yǐ páʼ Əsê yǒ nə́ tsóʼə atûə azə́ənə́

³¹Kɔ nə́ túg nəsɛnə́, kɔ nə́ tə́ ńdɔgə̂ mənu nə́ mətəənə, ńkɔ kə́ ńtúgə áwə́ənə́ azáŋə́ndé. Kɔ nə́ tə́ ə́sáʼnə kɨ ńdzɔmnə̂, kɔ nə́ kə́ ńtúgə áwɨ́ ntê kəpa yitsə̌.

³²Tə́ nə́ ńgɛd əshîʼnə á tətɨ pəənə́ ńkə́ ńtúg mbwɔ́dnə á mə́m ngɛdmə́nu əwə́ənə́. Ləgnə̂ nə́ təpɔŋ pɔ́pə́mɛ́ pɨ́ tsɔʼə ndzaŋ Əsê kə ləgnə̂ nə́ pəpɨ́ ńdaŋə̂ á mə́m Klisto lə́.