Read Awing Efishanə 5 Bible Online

Efishanə 5 - Awing bible

Efishanə 5

¹Ndzaŋə ándó pɨ pə́ nə́ pɔ́ pə́ Əsê páʼ a kɔŋ nə́ lə́, tə́ nə́ fiʼnə̂ yə́.

²Túg nə́ akɔŋnə tsɔʼə ndzaŋə ándó Klisto a kə kɔŋ nə́ áwɛ̂n, əfɛ̂ nchîmbî əjǐə ándó mbéŋə afyaʼə́nu páʼ pə́ tɔ nə́ azagə́ yə əshîʼnə á kɔ́ʼə əwɨ̈ ńgɛlə̂ mbɨ Əsê pɔŋə̂.

³Ndzaŋ nə́ pə́ nə́ pɨ pə́ Əsê lə́, a kě pɔŋ ńgə́ anu yətsə́ ńté á mə́ zɔ́ʼ nə ndzɔʼə́ mbǒʼḿbóʼ, kɨ ńté mənu mə́ əsɨ́ ńdzoŋ ḿbə́ nə́ mənu ńté mə́ lɔ nə́ ajúmə a kě nə́ pə́ azɨ́ pô, mə́ pə́ mənu mbɔʼ pə́ láʼ ńkwéʼnə ńdzóʼ zóʼ nə́ á ndzɔʼ pɨ pô.

⁴Kɔ mənu mə́ əsɨ́ mətsə́ kəənə akəkógə́ atsáb yətsə́ pópə atséebə awágə á chîə tətɨ pəənə́, ńté ńgə́ lə́ kě mənu mə́ koʼnə̂ nə́ pô, pɛn chîə á mə́ tə́ nə́ fɛ̂ lə́ ndǎ á mbô Əsê.

⁵Lánə nə́ ńjîə atû pɨ ńgə́ ŋwu ntsəm páʼ a zɔ́ʼ nə́ ndzɔʼə́ mbǒʼḿbóʼ, ńgɛlə̂ mənu mə́ əsɨ́ kɨ ḿbɨ ńdoonə̂ ajú páʼə a kě nə́ pə́ ají pô (ńté ńgə́ mə lɔ nə́ ajúmə a kě nə́ azô pô a chî lə́ ándó əsê məfɨgə yitsə̌) a láʼ kě nənaanənə́ á mə́m nəfɔ nə́ Klisto pó Əsê túg pô.

⁶Kɔ nə́ pí ŋwu tsə̌ a fɨgə̂ áwɨ́ nə́ ətsáb kətaŋə, lə́ mənu mɨ páʼ mə́ yǒ nə́ ghɛd Əsê á záŋ ndě á mbô pɨ pó kě nə́ yí zóʼnə pô.

⁷Lə́ pə́ ńgə́ kɔ nə́ túgə anu yətsə̌ á mə́ faʼ nə́ pɨ̌pə ntê pɨ zəənə́.

⁸Pɨ nə ńchî lə́ ndzəmə́, nə́ pə əghâ nə́ pɨ tíʼ ńchî lə́ á mə́m nkyaʼ Mmaʼmbîə; ghɛd nə́ nchîmbî əzɨ chîə ándó yi pəənə ándó pó túg nə́ nkyaʼə,

⁹(ńté ńgə́ nənta nə́ atǐ nə́ nkyaʼ nə́ chî lə́ á mə́m ajúmə atsəm páʼ á pɔŋ nə́, ńkoʼnə̂ ńkə́ ḿbə́ ndə̌ŋdəŋə́)

¹⁰Fǔ nə́ alóʼ ńdzéʼ mənu páʼ mə́ yǐ nə́ ghɛd mbɨ Mmaʼmbî ə́ pɔŋə̂.

¹¹Kɔ nə́ néŋə apô azɨ́ nə́ mənu mə́ kətaŋ páʼ pɨ pə̈ faʼ nə́ páʼ mə́ pə́ nə́ mənu mə́ ndzəmə́, nə́ chî lə́ á pə́ mə́ kyaʼ nə́ mə́ələ́ á əshîsaŋə.

¹²Ńté ńgə́ lə́ chigə əsə́ənə á mə́ pěʼ nə́ sóŋ mənu pó faʼ nə́ nəlyaŋnə́ tsɔʼə sóŋ nə́.

¹³Lə́ á pə́ ńgə́ əghâ ándó anuə atsəmə á fɛ́d nə́ á mə́m nkyaʼ lə́, pə́ zə́ənə ázə́ələ́, ńté ńgə́ ajúmə atsəmə á fɛ́d nə́ pə́ zə́ənə zɨ́d lə́ nkyaʼə.

¹⁴Lə́ ghɛd ə́lɨ́d pə̈ sóŋ ńgə́, “Ngaŋpəlê, lǒo əsê, júmnə nəwûə, ńjî ńgə́ Klisto a yǒ fɛ̂ nkyaʼ nə́ gho.”

¹⁵Lɔg nə́ ndɛd nə́ nchîmbî zəənə́, ńkě chîə mbîə á pə́ ándó əkəkóg pɨ pô, ḿbə́ pə́ ándó pɨ pó yáŋ nə́.

¹⁶Kɔ pɛn ghɛd mɔ́ ndɛd əwɛ̂n yitsə̌ a laŋ kətaŋə, ńté ńgə́ təpɔŋə á nɨ́ nə́ ndɛd mbî zəənə́.

¹⁷Lə́ á pə́ ńgə́ kɔ nə́ chîə ándó əkəkógə́, lə́, atûə azə́ənə́ a tsɔ́ʼnə á pə́ nə anu páʼ Mmaʼmbîə a lɔ nə́.

¹⁸Kɔ nə́ nô məloʼ ḿbɛ́ɛlə, ńté ńgə́ apɛ̌lə yǐ ghɛd pɨ ghɛd mənu mə́ əsə́ənə, lwɛ́nkə nə́ pə́ nə́ Ajwiə á mə́m pəənə́.

¹⁹Tsáb nə́ á mə́m pɨ́ nə́ atsáb páʼ á fɛ́d nə́ á mə́m Salmsə, tsáb nə́ nə́ mənkǐ mə́ ngóʼkə pópə mənkǐ mə́ ajwiə, zɔb nə́ mənkǐ mə́ ngóʼkə pó pəsalms á mbô Mmaʼmbî ŋ́ŋáŋkə yə́ á mə́m məntɨ́ pəənə́.

²⁰Nə́ əlɛ́n Mmaʼmbî əwɛ̂n Yeso Klisto tə́ nə́ ńdzá ə́fɛ̂ ndǎ á mbô Əsê nə́ anuə atsəmə, Əsê páʼ a pə́ nə́ Tǎ.

²¹Ŋwu ntsəmə a ndzɔʼ pəənə́ a tə́ ńdzóʼnə mɔ́mɛ́ əyǐə, ńté ngóʼkə pɛn túg nə́ nə́ Klisto.

²²Pəngyě, nə́ tə́ ńdzóʼnə pəlú pə́ənə́ ándó nə́ kə́ nə́ ńdzóʼnə Mmaʼmbî lə́.

²³Ńté ńgə́ ŋwu mbyâŋnə lə́ nətûə á mbô ngwě əyǐ, tsɔʼə ndzaŋ páʼ Klisto a pə́ nə́ nətû nə́ nkyeetə pɔ́ pə́ Əsê lə; Klisto nə́ nkɔ̌ʼmbɨ əyí lə́ Nchwádkə nkyeetə pɔ́ pə́ Əsê, páʼ zɨ́d ə́ pə́ nə́ mbɨ əjǐ lə́.

²⁴Ńdaŋ ə́lɨ́d pəngyě pó yǐ shib zóʼnə pəlú pɔ́b nə́ mənu mətsəm tsɔʼə nə́ ndú páʼ nkyeetə pɔ́ pə́ Əsê ə́ zóʼnə nə́ Klisto lə́.

²⁵Pəlú, kɔŋ nə́ pəngyě pɨ́ tsɔʼə ndzaŋ Klisto a kə kɔŋ nə́ nkyeetə pɔ́ pə́ Əsê tə ə́fɛ̂ atûə ají ńté zɨ́d lə́,

²⁶A kə lɔg nkǐ pó atséebə ají ə́sog nkyeetə pɔ́ pə́ Əsê wɨ́ zɨ́d ŋwaʼə̂.

²⁷Ńjî ńgə́ təmbɔʼ a ghɛd nkyeetə pɔ́ pə́ Əsê yi wɨ́ ə́ yǐəə á mbi yí nə́ nəpɔŋ əyí ntsəm, ŋ́ŋwaʼə̂, ńkě kɔntə yitsə̌ túg pô, tə alɔʼə́, tə aliʼ yə twíŋkə nə́ kəənə anuə təkoʼ yətsə́.

²⁸Pəlú pə́ chîə á mə́ kɔŋ nə́ pəngyě pɔ́b tsɔʼə ndzaŋ pó kɔŋ nə́ mbɨ əzoobə́. Ŋwu páʼ a kɔŋ nə́ ngwě əyǐə a kɔŋ lə́ nkɔ̌ʼmbɨ əyə́.

²⁹Ŋwu əwɛ̂n yitsə̌ a kě ə́wɨ́ chî páʼ a pa nə́ na mbɨ əjǐ pô; Pɛn zə́gə zɨ́d lə́ zə́g nə́ ńkə́ ńdɔg ndɛd wɨ́ tsɔʼə ndzaŋə ándó Klisto a náŋ nə́ nkyeetə pɔ́ pə́ Əsê lə́,

³⁰ńté ńgə́ pɛn lə́ əlam mbɨ píə.

³¹Ndzaŋ páʼ aŋwaʼlə Əsê a sóŋ nə́ ńgə́, “Lɛ̌ anu á ghɛd nə́ ŋwu mbyâŋnə a chîə á mə́ fɛ́d nə́ ḿmɛdtə̂ Tǎ əyǐ pó Mǎ əyǐ, pó ngwě əyǐ ə́ kyeetə̂ táʼə aliʼə́, pɨ pɨ pə́ pɛ̌ pó yǐ tíʼ pə́ lə́ táʼ na mbəəmə.”

³²Anuə nəlyaŋnə́ yətsə̌ páʼ á shǐ nə́ ńkə́ ḿbə́ ndə̌ŋdəŋə́ á chîə á mə́mə aliʼə́ aŋwaʼlə Əsê zəənə́, páʼ maŋ zɨ́ nə́ ńgə́ zə́ələ́ á sóŋə lə́ anu ńté Klisto pópə nkyeetə pɔ́ pə́ Əsê.

³³Lə́ zəənə́ á kə́ sóŋə lə́ anu ńté áwə́ənə́: Ŋwu mbyâŋnə ntsəmə a chîə á mə́ shib nə́ kɔŋə̂ ngwě əyǐə ándó a kɔŋ nə́ mbɨ əjǐə, məngyě ntsəmə a kə́ shib ńdə́əkə ndú əyǐə.