Read Awing Efishanə 6 Bible Online

Efishanə 6 - Awing bible

Efishanə 6

¹Pɔ̂nkə̂, lə́ aliʼə́nuə azə́ənə́ ándó pɔ́ pə́ Yeso á mə́ zóʼnə nə́ pətǎ pə́ənə́, ńté ńgə́ lə́ anu páʼ á koʼnə̂ nə́ á mə́ faʼ nə́.

²“Lə́əkə tǎ əgho pó mǎ əgho” ńté ńgə́ lə́ ntsɛɛmbi ntəgə́ páʼ ə́ túg nə́ ndaʼnə:

³“Ńjî ńgə́ mənu mətsəm mə́ yǒ ńnyi əshîʼnə á mbô gho, nchîmbî əzo ə́ yǒ ḿbə́ yi sag nə́ á ndu mbîə.”

⁴Pətǎ, kɔ nə́ tə́ ńgɛlə̂ mənu nə́ pɔ́ pɨ́ nə́ ndú páʼ mbɨ əzɔb yǐ nə́ tə́ pə́gə́. Á tíʼə ə́lɨ́d, nə́ kɔ́ʼkə ághóobə́ a pə́ nə́ ndú pó yǐ nə́ pɔ́gə Mmaʼmbî ə́ kə́ zoŋ pənoŋkə píə.

⁵Əpoʼ, zóʼnə nə́ pɨ pə́ mbî páʼ pó pə́ nə́ pəŋwúd pɨ nə́ apɔ́g ńdzoŋə̂ ḿbɛ́nkə, faʼ nə́ ə́lɨ́d nə́ ntɨ́ əwɨ́ ətsəmə ándó nə́ faʼə̂ pə́ á mbô Klisto.

⁶Faʼ nə́ ndɛn mənu ghɛn ńkě faʼ lə́ tsɔʼə a əghâ pə́ tə́ nə́ ńnáŋə áwɨ́ pô, ńjî ńgə́ pə́ kɔŋə̂ áwɨ́ pô. Lə́ nə́ ntɨ́ ə́wɨ́ ətsəm faʼ nə́ anuə ándó Əsê a lɔ nə́, ándó əpoʼ Klisto.

⁷Faʼ nə́ afaʼə azɨ́ nə́ ntɨ́ yi əshîʼnə, tsɔʼə ándó nə́ faʼə̂ á pə́ á mbô Mmaʼmbî lə́, ńkě á pə́ á mbô pə́pə̌ ŋwu mbî pô.

⁸Kwúmtə nə́ ńgə́ Mmaʼmbîə a yǐ tsɔ́ʼə afaʼə ŋwu ntsəm nə́ afaʼ yə əshîʼnə ándó pó faʼ nə́ kəənə a pə́ apoʼ kɨ ńkě apoʼ pô.

⁹Pəŋwúd pə́ əpoʼ, faʼ nə́ tsɔʼə ə́lə́ələ́ á mbô əpoʼ əpə́ənə́, kɔ nə́ tə́ ńgɛlə̂ pó tə́ ńchîə nə́ apɔ́gə. Kwúmtə nə́ ńgə́ pəənə́, ńdzoŋ ḿbə́ nə́ əpoʼ əpɨ́, pɨ túg lə́ táʼ ŋwúd páʼ a chî nə́ nəpóolə, páʼ a sáʼ nə́ əsáʼ ŋwu ntsəm ndə̌ŋdəŋə́.

¹⁰Á mə́ lwigtə̂ nə́, kwíŋ nə́ á mə́m Mmaʼmbî ńtyantə̂ ńdaŋə̂ á mə́m mətɨ mí páʼ mə́ chigə nə́ ńtyantə̂ lə́.

¹¹Wê nə́ əpú ntso ətsəm páʼ Əsê a fɛ̂ nə́ nə́ pəənə́, ńjî ńgə́ nə́ chî təmbɔʼ nə́ tɨ́ ńtyantə̂ á mə́m mənu mə́ təpɔŋ Dɛbəələ a lɔ́btə nə́.

¹²Ńté ńgə́ pɛn kě póʼnə məláʼ lə́ pɛ̌npə pɨ pə́ mbî pô, pɛn póʼnə lə́ pə́ mətɨ mə́ təpɔŋ páʼ mə́ chî nə́ nə́ nəpó təpɔŋ əghoobə́ á nɨ́ nə́, ngaŋə́sáʼə́láʼə, mətû mə́ aláʼə, pɨ pə́ túg nə́ mətəənə á mə́m mbî ndzəmə zəənə́.

¹³Lə́ á pə́ ńgə́ nə́ wê əpú ntso Əsê əghâ nə́! Ńjî ńgə́ təmbɔʼə alě təpɔŋ zə́ á yǐ, nə́ chî təmbɔʼ nə́ tɨ́ ńtyantə̂ á mə́m məlaʼ ngaŋkə́pa əzɨ́ ə́ yǐ nə́ nə́ mɨ́d lə̂, əghâ ándó nə́ yǒ nə́ ḿbóʼnə tə ńkoʼə̂ á ndwigtə, nə kə́ ḿbɛ́d ńtɨ́ ńtyantə̂.

¹⁴Lə́ á pə́ ńgə́ nə́ tɨ́ ńtə́ ḿbyáabə: Túg nə́ ndə̌ŋdəŋə́ ándó atwíŋ pə́ kwúd nə́ á ntə̂ pəənə́, mə́ tɨ́ nə́ ndə̌ŋdəŋ mɨ mə́ chîə ándó kɨ́ʼ ntso ghaŋə,

¹⁵lɔg nə́ anuə mə́ kád nə́ fiʼtə̂ nkɨ Əsê yi əshîʼnə ə́ yǐ nə́ nə́ mbwɔ́dnə á pə́ ngwub məko əzə́ənə́.

¹⁶Túg nə́ mbimə́ əghâ ntsəmə ándó kɨ́ʼ ntso əwəənə́, ńté ńgə́ təmbɔʼ nə́ lɔgə̂ áwɨ́d nə́ chî təmbɔʼ nə́ pə́gtə məkɔŋ mə́ ntso mətsəm mə́ kɛ́d nə́, páʼ ŋwu təpɔŋə a meg nə́ áwɨ́ ə́wə́.

¹⁷Lɔg nə́ ńgə́ mə chwádkə nə́ mɨ́ mə́ chî lə́ ándó akáŋə́tûə azə́ənə́, atséebə Əsê á pə́ ŋwíŋ ntso páʼ Ajwǐəsê a fɛ̂ á mbô pəənə́.

¹⁸Faʼ nə́ mənu mɨ́ mətsəmə á mə́m achaʼtə́sê, ḿbítə akwáalə á mbô Əsê. Tə́ nə́ ńchaʼtə́sê əghâ ətsəmə, á mə́mə anuə atsəm ndzaŋə Ajwiə á sóŋ nə́. Ńté anu zɨ́d zɨ nə́ tə́ ńdɔg ndɛd wɨ́ kɔ nə́ kéenə, ńchaʼtə́sê əghâ ətsəmə á mbô pɨ pə́ Əsê pətsəmə.

¹⁹Kə́ nə́ ńchaʼtə́sê á mbô maŋə, ńjî ńgə́ Əsê a yǐ ə́fɛ̂ nkəənə á mbô maŋ əghâ ándó maŋ koʼnə̂ nə́ á mə́ tsáb nə́, ńjî ńgə́ mbɔʼ maŋ tsáb tə apɔ́g, pə́ jî nkɨ yi əshîʼnə yi nəlyaŋnə́.

²⁰Ńtê nkɨ yi əshîʼnə wɨ́d ghɛn, maŋ lə́ ənyintúmə, əghâ nə́ maŋ pǎ nə́ tə ńchîə á pə́ á nkáʼə atsáŋ lə́. Chaʼtə́sê ńgə́ maŋ sóŋə áwɨ́d tsɔʼə tə apɔ́g tsɔʼə ndzaŋ maŋ chî nə́ mə́ sóŋ nə́.

²¹Taakikusə, ndim əwəg páʼ a faʼ nə́ mbô Mmaʼmbî nə́ ntɨ́ əyí ətsəm, a yǐ fiʼtə̂ áwɨ́ nə́ anuə atsəm ńté mə, ńjî ńgə́ pɨ tíʼ ńjî ndzaŋ maŋ chî nə́ ńkə́ ḿbə́ ndzaŋ maŋ tə́ nə́ faʼə̂.

²²Lə́, anu páʼ a ghɛd nə́ maŋ tíʼə ńtúmə yə́ á mbô pɨ lə́, á mə́ fiʼtə̂ nə́ áwɨ́ ndzaŋ pəg pətsəm pə́ nə́, ə́ kə́ zoŋ ńnéŋ məntɨ́ mə́ənə́.

²³Əsê páʼ a pə́ nə́ Tǎ pó Mmaʼmbî Yeso Klisto ə́fɛ̂ mbwɔ́dnə pó akɔŋnə ḿbá mbimə́ á mbô pəlim pətsəmə á mə́m Yeso Klisto.

²⁴Apɔŋə́ntə́əmə Əsê á chîə á mbô ŋwu ntsəm páʼ a kɔŋ nə́ Mmaʼmbî Yeso Klisto nə́ akɔŋnə tə měe.