Read Awing Filipyanə 1 Bible Online

Filipyanə 1 - Awing bible

Filipyanə 1

¹Aŋwaʼlə zəənə́ a lǒo lə́ á mbô Pɔl pó Timoti, pó pə́ nə́ ngaŋə́faʼ Yeso Klisto. Ńgɛnə̂ á mbô pɨ pə́ Əsê pətsəm pó chî nə́ Filipi, ńnéŋ ntɨ́ əghɔ́b nə́ Yeso Klisto, ḿbɨ ńkə́ ńgɛnə̂ á mbô mətû pópə pɨ po kwáatə nə́ á mə́m nkyeetə Pɔ́ Pə́ Əsê:

²Ńgə́ Əsê páʼ a pə́ nə́ Tǎ əwɛ̂n pó Mmaʼmbî Yeso Klisto fɛ̂ áwɨ́ nə́ apɔŋə́ntɨ́ pó mbwɔ́dnə.

³Maŋ láʼkə Əsê mə əghâ atsəm páʼ maŋ kwúmtə nə́ áwə́ənə́,

⁴əghâ atsəmə ándó maŋ tə nə́ ńchaʼtə́sê atû pɨ maŋ chaʼtə̂ nə́ akɔŋtə,

⁵ńté ndúmə ándó pɨ kə kwáatə nə́ mə ə́wə́ á mə́mə afaʼə nkɨ yi əshîʼnə ə́fɛ́lə nəchwaakənə́ tə ńkoʼ əghâ nə́.

⁶Ńdaŋ ə́lɨ́d maŋ pyádnə ńjî ńgə́ Əsê páʼ a kə chwáakə nə́ afaʼ yə əshîʼnə zəənə́ á mə́m pɨ, á yǐ ghɛn nə́ mbi nə́ zɨ́d tə á yǒ měe nə́ alě páʼ Yeso Klisto a yǐ nə́ pɨ yǐəə.

⁷Pɨ chîə á ntɨ́ maŋ əghâ atsəmə, a pə́ ńgə́ a koʼnə̂ á mbô maŋ ndzaŋ maŋ kwaŋ nə́ nə́ ndú ghɛn ntê áwɨ́ pətsəm lə́, ńté ńgə́ nə́ kə́ ńchîə á mə́mə anu yə əshîʼnə zɨ Əsê a fɛ̂ nə́ nə́ maŋ leenə́, ḿbá nə́ əghâ nə́ maŋ chî nə́ atsáŋ ńdzoŋ ḿbə́ nə́ ndɛd maŋ kə́ póʼnə nə́ ńté nkɨ yi əshîʼnə ghɛn, ḿbɨ ńgɛlə̂ ńgə́ wɨ́d tɨ́ ńtyantə̂.

⁸Əsê lə́ əgha ŋwu páʼ a zɨ nə́ ńkə́ ḿbí ńgə́ maŋ tséebə lə́ ndə̌ŋdəŋ əghâ atsəmə ándó maŋ sóŋ nə́ á mbô pɨ ńgə́ akwaŋ yə əshîʼnə maŋ túg nə́ ńté áwɨ́ pətsəmə á fɛ́d lə́ á mə́m akɔŋnə Yeso Klisto nə́ nkɔ̌ʼmbɨ yə́.

⁹Mäŋ chaʼtə́sê ńgə́ akɔŋnə azə́ənə́ a kə́ ńgɛnə̂ tsɔʼə nə́ mbiə á mə́ kwéŋ nə́, ńdzoŋ ḿbegə̂ ajíənuə wɨ́ pó atûə yə tsɔ́ʼnə nə́ ńgɛn ə́fyagə̂,

¹⁰ńjî ńgə́ nə́ chî tə mbɔʼ nə́ zə́ənə ajú páʼ a chígə́ nə́ ńkoʼnə̂, ńchî mbɔʼ nə́ ŋwaʼə̂, ńkě kɔntə yitsə̌ kə́ ńtúgə alě ándó Klisto a yǐ nə́ ńtə́ ḿbəənə̂ pô.

¹¹Nchîmbî əzɨ ə́ yǐ lwɛ́nkə nə́ ndə̌ŋdəŋ mənu mimə əshîʼnə páʼ mbɔʼ mə́ fɛ́d lə́ tsɔʼə á mə́m Yeso Klisto, á mə́ fɛ̂ nə́ nəgháʼə á mbô Əsê ə́ kə́ pɨ lɔg ŋ́ŋáŋkə yí wə́.

¹²Pəlimə́ mə, maŋ loonə̂ ńgə́ nə́ jî ńgə́ mənu mə́ laŋ nə́ nə́ maŋ lə́, mə́ nə́ ḿbyádnə ńkwáatə á mə́ ghɛd nə́ ńgə́ nkɨ yi əshîʼnə ə́wə́ ə́ ghɛn nə́ mbiə.

¹³Ńdaŋ ə́lɨ́d ngaŋə́pyáabə ntɔ́ʼ pópə ŋwu ntsəm páʼ a chî nə́ aliʼə́ nə́ pó jî ńgə́ maŋ chîə atsáŋ lə́ ńté ńgə́ maŋ lə́ ngaŋəfaʼ Klisto.

¹⁴Pəlim pipə nɨ́ nə́ pó tɨ́ ńtyantə̂ nə́ Mmaʼmbî ńté atsáŋ páʼ maŋ nə kwú nə́ lə́, ḿbɨ ńkə́ ńtyantə̂ á mə́ sóŋ nə́ anǔəsê tə apɔ́gə.

¹⁵Lə́, pɨ pətsə́ á mə́m pó, pö náŋkə nkɨ Klisto lə́ ńté ńgə́ pó túgə ŋwéetə́ ńkə́ ńtúgə afyaʼə́, lə́ pətsə́ pə́ náŋkə lə́ nə́ ntɨ́ əghɔ́b ətsəmə.

¹⁶Pɨ pɨ pó faʼə̂ azɨ́ lə́ á mə́m akɔŋnə, ńté ńgə́ pó jî ńgə́ Əsê a tsɔ́ʼə a mə ńgə́ maŋ póʼnə ńté nkɨ yi əshîʼnə wə́.

¹⁷Pətsə́ pɨ pə̂ pó kě nkɨ Klisto lə́ nə́ ntɨ́ əghɔ́b ətsəm náŋkə pô. Pó náŋkə lə́ nə́ ntɨ́ təpɔŋə, ńdoonə̂ á pə́ ape, pó kwaŋ ńgə́ pó yǐ peg ngə́ʼə a mə á mə́mə atsáŋ páʼ maŋ chî nə́ ə́wə́.

¹⁸Azɔŋə á kě ə́wɨ́ chî pô! Maŋ kɔŋtə̂ ńté anu yə ə́wə́ - tsɔʼə ńgə́ pə́ náŋkə nkɨ Klisto nə́ məndú mətsəm təmbɔʼ pə́ náŋkə, kɨ nə́ akwaŋə təpɔŋ kɨ yə əshîʼnə: Maŋ yǐ ghɛn nə́ mbiə á mə́ kɔŋtə̂ nə́,

¹⁹Lə́ ndə̌ŋdəŋ maŋ yǐ kɔŋtə̂, ńté ńgə́ maŋ jî ńgə́ ńdaŋ nə́ achaʼtə́sê azɨ́ ḿbɨ́ ḿbə́ nə́ akwá páʼ á fɛ́d nə́ á mə́mə ajwiə Yeso Klisto, á yǐ ghɛd ńgə́ pə́ fógə a mə á mə́mə atsáŋ zəənə́.

²⁰Azéemə anu maŋ tə nə́ ńdoonə̂ chigə á mə́m ntɨ́ maŋ ḿbɨ ńkə́ ńkwaŋə̂ ḿbyáabə lə́ ńgə́ maŋ kě anu yitsə̌ yǐ faʼə̂ á yǐ nə́ néŋ əsə́ənə atû maŋ pô. Lə́ ńdaŋə̂ á mə́m atséebə mə páʼ maŋ yǐ nə́ tséebə tsɔʼə tə pɔ́g, maŋ yǐ pɨ ghɛlə̂ pə́ anuə atsəm əghâ nə́ tsɔʼə ndzaŋ maŋ kə pěʼ nə́ ńgɛlə̂ á mə́ jɨ́ nə́ ńgə́ maŋ kɔ́ʼkə Yeso á mə́m nchîmbîə mə, kɨ maŋ chîə á mbî kɨ ńkwûə.

²¹Ńté ńgə́ á mbô maŋ, mə chî nə́ á mbî lə́ Klisto, mə kwû nə́ á pə́ ape.

²²Mbɔʼ maŋ chîə á mbîə á mə́m na mbɨ, á pə́ ńgə́ lə́ afaʼ yə əshîʼnə maŋ yǐ nə́ ghɛn nə́ mbiə á mə́ faʼ nə́. Maŋ kě jîə yi páʼ mbɔʼ maŋ tsɔ́ʼ pô.

²³Pə́ tíʼə soŋnə̂ mə nə́ məlá mə́ mbɛ̌. Maŋ lánə ńtə́ ńdoonə̂ á mə́ mɛdtə̂ nə́ mbî jɨ ə́ chî pəg Klisto páʼ á pə́ nə́ chigə anu yə əshîʼnə tə ńdaŋə̂;

²⁴Lə́ nə́ əjɨ ngǎ, á pɔŋ ńgə́ maŋ ghɛn nə́ mbiə á mə́ chî nə́ mbîə

²⁵Atûə mə a kě tə́ ńkoʼlə̂ ńté anu zɨ pô, ńdaŋ ə́lɨ́d maŋ jî ńgə́ maŋ yǐ chîə mbîə. Maŋ yǐ ghɛn nə́ mbiə á mə́ chî nə́ pɛn pətsəmə, á mə́ ghɛd nə́ nə́ kwíŋ ḿbɨ ńkə́ ńtúgə akɔŋtə á mə́m mbimə́.

²⁶Ńjî ńgə́ təmbɔʼ pɨ kə́ ńchígə́ ńtúgə kətəələ á mə́m Yeso Klisto ńté mə á əghâ ándó maŋ pɨ nə́ ḿbəənə̂ á mbô pəənə́.

²⁷Túg nə́ nchîmbî əzɨ tsɔʼə nə́ ndúmə ándó páʼ nkɨ yi əshîʼnə ńté Klisto ə́ sóŋ nə́, ńjî ńgə́ kɨ maŋ yǐ ńdzə́ənə áwɨ́ kɨ ńchî yǐ, maŋ yǐ zóʼə anu ńté áwɨ́ ńgə́ pɨ tə̈ ńtə́əmə ńtyantə̂ á mə́m táʼə ajwi, ə́faʼə̂ nə́ mbô nə́ mbô á mə́m táʼə akwaŋ ńté mbimə́ pɛn túg nə́ á mə́m nkɨ yi əshîʼnə,

²⁸ńkě pí ńgə́ pɨ pɨ po kě nə́ pímnə pô, pó ghɛd nə́ chî nə́ apɔ́g pô; zəənə́ á nəələ̂ ághɔ́b lə́ ńgə́ pə́ yǒ chwádkə áwə́ənə́, ə́ pə́ tsəŋkə̂ ághóobə́, zɨ lə́ yǒ faʼ Əsê.

²⁹Ńté ńgə́ atûə azə́ənə́ nə́ ḿbɔŋ ńgə́ Əsê nə́ apɔŋə́ntə́əmə ají a ghɛd nə́ kě tsɔʼə ntɨ́ əwɨ́ nə́ Klisto néŋ pô, a nə ńkə́ ńgɛd ńgə́ pɨ kə́ ńjɨ́ ngə́ʼ ńté yə́.

³⁰Nə́ əghâ nə́, ghɛn nə́ nə́ mbiə á mə́ póʼnə nə́ məlaʼ pɛnə̂, pɨ póʼnə lə́ tsɔʼə məlaʼ páʼ pɨ kə jɨ́ nə́ maŋ póʼnə ntsɛɛmbi lə́. Maŋ kə́ ḿbɛ́d tsɔʼə á mə́m ə́wə́.