Read Awing Filipyanə 2 Bible Online

Filipyanə 2 - Awing bible

Filipyanə 2

¹Nchîmbî əzəənə́ á mə́m Klisto ə́ ghɛd pɨ tyantə̂, akɔŋnə ajíə a kə̈ ńdegtə̂ ntɨ́ əwə́ənə́. Nə́ kə́ ńtûə ńkyeetə̂ pɨ̌pə Ajwi, ḿbɨ ńkə́ ńtúg ntɨ́ yi əshîʼnə pópə akóolə́mə́lə́ŋə á mə́m pəənə́.

²Maŋ tíʼə ḿbóʼmbô á mbô pɨ ńgə́ nə́ ghɛd mbəəmə mə ə́ pɔŋ ńgɛn fyag ńdaŋə̂ á mə́m táʼ akwaŋ əwəənə́, táʼə akɔŋnə, ḿbɨ ḿbə́ nə́ táʼ ntə́əmə, nə́ táʼə akwaŋə́nuə.

³Kɔ nə́ ghɛlə̂ anu yətsə́ páʼ á yǐ nə́ ghɛd nə́ kwíŋə á pə́ mə́m əkad kəənə akɔ́ʼkə mbəəmə, lə́ á mə́m atsóokə́mbɨ, zɨ́ nə́ pɨ pipə ndaʼə ándó pɨ pó tsɛ nə́ áwə́ənə́.

⁴Kɔ ŋwu tsə̌ á mə́m pəənə́ a tə́ ńnáŋə á pə́ mənu mə́ yǐ nə́ kwáalə yə́, a tə́ ńnáŋə á pə́ mənu mə́ yǐ nə́ kwá pɨ pə́ ndaʼə.

⁵Ghɛd nə́ akwaŋə́nu páʼ á chî nə́ á mə́m pɨ á kə́ ḿbə́ tsɔʼə yi páʼ á kə chî nə́ á mə́m Yeso Klisto.

⁶A kə chî lə́ ándó Əsê, lə́ a kə kě kwaŋ ńgə́ təmbɔʼ a shib tə ńtíʼ ńchî pó Əsê pələŋ pô.

⁷Ńtíʼə á pə́ ə́lɨ́d, a tsɔ́ʼə á ngǎ yə́ á mə́ myaʼ nə́ ajúmə atsəm páʼ á nə ḿbə́ nə́ ajíə, ńtíʼ ńgwê ngwub ngaŋəfaʼə. Pə́ pîə yə́ ándó ŋwu mbîə, á ə́fɛ́d ńchîə ándó ŋwunə.

⁸A kə tsóokə mbɨ əjǐə, ńkə́ ńdzóʼnə tə ńkoʼə̂ á ndɛd nəwûə, tə ńkwûə á pə́ atǐə apagləpaglə.

⁹Ńdaŋ ə́lɨ́d Əsê a ŋáŋkə yí ńtə́g nə́ aliʼ páʼ a ŋáŋnə nə́ ńtsɛ əliʼ ətsəmə atǐə, ńtíʼ ə́fɛ̂ əlɛ́n nə́ yí páʼ ə́ ŋáŋnə nə́ ńtsɛ məlɛ́n mətsəmə.

¹⁰Ńjî ńgə́ ŋwu ntsəmə a zóʼ nə́ əlɛ́n Yeso a yǐ kwə́ʼtə, kəənə a chîə á nəpó, á ndu ndəsê kəənə á ntɛ́n əsê.

¹¹Alə́əmə atsəmə á kə́ ḿbímə á əshîsaŋ ńgə́ Yeso Klisto lə́ Mmaʼmbîə á mə́ fɛ̂ nə́ nəgháʼ á mbô Əsê páʼ á pə́ nə́ Tǎ.

¹²Pəshunə́ mə, lə́ á pə́ ńgə́ tsɔʼə ndzaŋ nə́ zá nə́ ńdzóʼnə mə, ńkě pə́ tsɔʼə əghâ maŋ chî nə́ aliʼ yə wɨ́ pô, ńkə́ ḿbyádnə ńdzóʼnə əghâ páʼ maŋ kě nə́ ə́wɨ́ chî pô lə́. Faʼ nə́ á mə́ túg nə́ nchwadkə́ əzəənə́ á mə́mə apɔ́g ńdzoŋə̂ ḿbɛ́nkə,

¹³ńté ńgə́ Əsê lə́ ŋwu páʼ ä faʼ á mə́m pəənə́, á mə́ ghɛd nə́ pɨ kɔŋə̂ a mə́ faʼ nə́ anu páʼ a pɔŋ nə́ yí, ńkə́ ḿbɨ ə́fɛ̂ mətəənə á mbô pɨ mbɔʼ nə́ faʼ ə́wə́.

¹⁴Faʼə̂ anuə atsəm tsɔʼə tə ŋwuntə̂, tə pítə anu yitsə̌.

¹⁵Ńjî ńgə́ kɔ nə́ túgə filə, ńkə́ ńchî nə́ əpoʼ əwə́ənə́ ándó pɔ́ pə́ Əsê pə́ kě nə́ kɔntə túg pô, ńchîə á mə́m mbîə ajîəmbə̂glə́ ə́ túg nə́ pɨ pə́ təpɔŋə. Nə́ chîə á mə́ tɛ̂ nə́ a ndzɔʼ pó ándó pɔ́ pə́ sáŋ pə̈ kyaʼ nə́ atǐə.

¹⁶Lə́ ndzaŋə ándó páʼ pɨ yǐ nə́ waamə̂ atséebə nchîmbîə á tyantə̂ ńjî ńgə́ mbɔʼ maŋ yǒ ńtəələ̂ alě Klisto yǒ nə́ yǐ ńté ńgə́ maŋ nə ńkě lə́ afaʼə kətaŋ faʼ pô.

¹⁷Lə́ mbɔʼ pə́ pěʼ ńkwɛlə̂ pə́ achǐə mə ándó ajúmə afyaʼə́nu á mə́ lɔg nə́ peg mbimə́ əzɨ ə́wɨ́, mbəəmə mə pɔŋ maŋ kə́ ńkɔŋtə̂ pɛnə̂.

¹⁸Tsɔʼə nə́ ndú yi wɨ́, mbɨ əzɨ kə́ ńchîə mə́ pɔŋ nə́, pɨ kə́ ńkɔŋtə̂ pɛnə̂.

¹⁹Mbɔʼ a pə́ ndzaŋ Əsê a lɔ nə́, tə ḿbə́ maŋ tə́ ńkwaŋə̂ ḿbyáabə ńgə́ maŋ yǐ túmə Timotiə á mbô pɨ tsɔʼə nga pɛ̌, ńjî ńgə́ a néŋ ntə́əmə mə nə́ apəələ atsáb páʼə a lǒo nə́ á mbô pəənə́,

²⁰lə́ ndaʼ ŋwu páʼ a lánə nə́ ńtúgə anu ńté mə, ńkə́ ḿbɨ ńdánə ńtúg ndɛd əzəənə́.

²¹Apuʼə pəənə á túg ndɛd lə́ tsɔʼə nə́ mənu móobə́, ńkě ndɛd nə́ afaʼə Yeso Klisto túg pô.

²²Lə́, pɨ nə́ nkɔ̌ʼmbɨ əwɨ́ nə jî ndzaŋə ándó a kə nɨd nə wɨ́ nə́ afaʼ təmbɔʼ a faʼə̂, ndzaŋə ándó pəg yí kə faʼ nə́ ándó mɔ́ pó tǎ, ə́faʼə̂ nə́ apô mɔʼə́ ńté nkɨ yi əshîʼnə.

²³Maŋ tə́ ńkwaŋə̂ á mə́ tú nə́ yə́ á mbô pɨ nə́ ndɛd ntsəmə ándó maŋ yǐ nə́ ńdzɨ́ ndzaŋ mənu mə́ tə́ nə́ ńnyinə̂ á mbô maŋə.

²⁴Lə́ maŋ néŋ ntə́əmə mə nə́ Mmaʼmbî ńgə́ maŋ nə́ nkɔ̌ʼmbəəmə mə, tsɔʼə nga pɛ̌ maŋ chî tə mbɔʼ maŋ kə́ ńgyǐəə á mbô pəənə́.

²⁵Maŋ kwaŋ ńgə́ á koʼnə̂ ńgə́ maŋ túmə ndim əwɛ̂n Epafloditusə á mbô pəənə́, páʼ a faʼ nə́ ńkə́ ḿbóʼnə pəg yə́, ḿbə́ ə́faʼə̂ ándó ntú əwəənə́ a yǐ nə́ á mə́ kwá nə́ mə.

²⁶A tə́ ńdublə̂ á mə́ jɨ́ nə́ áwɨ́ pətsəmə, á pɨ ńkə́ ńtə́ ńjwaʼə̂ yí ńté ndzaŋ pɨ kə zóʼ nə́ ńgə́ a tə́ ńgoonə̂ lə́.

²⁷Lə́ ndə̌ŋdəŋə́, a kə pyádnə ńgɔ tə ńdɔ pə́ kwûə. Lə́ Əsê á pə́ ńkó mələ́ŋ míə, ńkě pə́ tsɔʼə məmɨ́ kó pó ńkə́ ńkó məméemə, ə́fógə mə á mə́mə afɨnə yə nɨ́ nə́.

²⁸Maŋ pyádnə ńchígə́ ńtə́gə atûə mə á mə́ tíʼ nə́ túmə yə́ á mbô pəənə́, ńjî ńgə́ pɨ yǐ mbɨ ńkɔŋtə̂ ngǎ yitsə̌ əghâ nə́ jɨ́ nə́ yí lə́, azéemə afɨnə á kə měe.

²⁹Tíʼ nə́ ńkwáalə yí əshîʼnə, nə́ akɔŋnə, ándó ndim páʼ pɨ po pətsəm néŋ nə́ ntɨ́ nə́ Mmaʼmbîə. Zóʼnə nə́ ntê pəənə ándó yí lə́,

³⁰a kə néŋ ntɨ́ yə́ á mə́mə afaʼ tə ńdɔ pə́ péŋkə nchîmbî əjǐ ńté afaʼə Klisto, a kə ghɛd ndɛn mənu ghɛn lə́ á mə́ tɔ́mtə nə́ mə nə́ ndú páʼ mbɔʼ pɨ nə́ nkɔ̌ʼmbɨ wɨ́ nə́ ńkě chî mbɔʼ pɨ tɔ́mtə pô.