Read Awing Filipyanə 4 Bible Online

Filipyanə 4 - Awing bible

Filipyanə 4

¹Pəlimə́ mə, lə́ á pə́ ńgə́ maŋ pyádnə ńkɔŋə̂ áwə́ənə́, pɨ pɨ́ ḿbéŋə á əmə́g maŋə! Nə ghɛlə̂ mbəəmə mə ə́ pɔŋə̂, maŋ pɨ ńkə́ ńtəələ̂ ńté áwə́ənə́! Pəlim, lə́ ndzaŋ təmbɔʼ nə́ tɨ́ ńtyantə̂ á mə́m nchîmbî əzɨ pɨ pə́ Mmaʼmbîə.

²Judya, pɨ Sɛnchə, maŋ póʼ mbô á mbô pɨ ńgə́ nə́ náŋ ndúmə á mə́ pímnə nə́ ándó pəlimə́ ándó pó néŋ nə́ ntɨ́ nə́ Mmaʼmbîə.

³Ńgɛn nə́ gho páʼ pɔ̈ təb nə́ ako faʼə̂, ghö faʼə̂ nə́ ntɨ́ əgho ətsəm lə́, maŋ lɔ nə́ ńgə́ gho kwá pəngyě pəənə́; ńté ńgə́ pó kə pyádnə ə́faʼ pə̌gpo á mə́ náŋkə nə́ nkɨ yi əshîʼnə wə́, ńdzoŋ ḿbegə̂ Klɛmɛn ə́wɨ́ pópə pətsə́ pɨ pətsəm pə̌gpo nə̈ ńtəb nə́ ako ə́faʼə̂ páʼ məlɛ́n mɔ́b mə́ chî nə́ á mə́mə aŋwaʼlə Əsê yə́ pɨ páʼ pó chî nə́ á mbîə.

⁴Tə́ nə́ ńkɔŋtə̂ ńté ńgə́ nə́ chî pɨ pə́ Mmaʼmbîə, maŋ kə́ ḿbəənə̂ ḿbégnə sóŋə lə́ sóŋ nə́; kɔŋtə̂ nə́!

⁵Pwɔ́dnə á mbô ŋwu ntsəmə. Mmaʼmbîə a tə́ ńgyǐəə tsɔʼə ngǎ pɛ̌.

⁶Kɔ nə́ tə́ ńjwaʼ mbɨ əzɨ ńté anu yətsə́. Lə́ á mə́mə achaʼtə́sê azɨ́ pətsəm, pítə nə́ Əsê nə́ ajú nə́ kě nə́ túg pô, əghâ ətsəm nə́ tə́ nə́ ḿbítə yí nə́ kə́ ńtə́ fɛ̂ ndǎ əjǐ nə́ mənu páʼ ä faʼ nə́.

⁷Təmbɔʼ nə́ ghɛd ə́leenə́, mbwɔ́dnə Əsê páʼ təmbɔʼ ŋwu mbî yitsə̌ a kě jî ndzaŋ zɨ́d chî nə́ pô, ə́ yǐ ńgɛd məntɨ́ mɨ́ pópə akwaŋə́nuə azɨ́ mɛdnə̂ á mə́m Yeso Klisto.

⁸Pəlim, á mə́ lwigtə̂ nə́ maŋ loonə̂ ńgə́ nə́ lwɛ́nkə akwaŋə́nuə azɨ́ nə́ mənu páʼ mə́ pɔŋ nə́ páʼ təmbɔʼ ŋwunə a jɨ́ ńtséʼə: ḿbə́ ndə̌ŋdəŋə́ anu, mənu pɨ pə́ zóʼnə nə́, mənu mə́ koʼnə̂ nə́, mənu mimə ŋwaʼ nə́, mənu pɨ pə́ kɔŋ nə́, ḿbɨ́ ḿbə́ nə́ mənu mə́ pɔŋ nə́.

⁹Mənuə ándó páʼ pɨ zéʼ nə́, ńkwáalə, ńdzóʼə ńkə́ ńdzə́ənə á mbô maŋə, faʼ nə́ mə́ələ́, ńjî ńgə́ Əsê páʼ a túg nə́ mbwɔ́dnə a chî pɨ po.

¹⁰Lə́ chigə mɛ́ akɔŋtə á mə́m nchîmbîə mə pəg Mmaʼmbî ńgə́ a pǎtə ńchî lɛ ti lə́, nə́ pə́ ńkə́ ḿbɨ ḿbɛ́d ńkwúmtə á mə́ nɨd nə́ mə ńgə́ nə́ kě mə ləgnə̂ pô. Maŋ sóŋ ńgə́ ndi sag lə́ á kě pə́ lə́ ńgə́ nə́ myaʼə̂ mə pô. Nə kə kě lə́ əsa yi wɨ́ túgə á mə́ nɨd nə́ akɔŋnə yə wɨ́ pô.

¹¹Maŋ kě jɨ sóŋə ńté lə́ ńgə́ maŋ tə́ ńkwaŋə̂ ńgə́ pɨ kě ajú nə́ maŋ fɛ̂ pô, maŋ pɛ́dtə ńdzéʼə á mə́ kɔŋtə̂ nə́ mə́mə ajúmə atsəm maŋ túg nə́.

¹²Maŋ jî ndzaŋ á chî nə́ páʼ təmbɔʼ ŋwunə a tə ḿbóŋə ńkə́ ńjî ndzaŋə á chî nə́ páʼ təmbɔʼ ŋwunə a pyádnə ńtúgə. Maŋ zéʼə anuə nəlyaŋnə́ zɨ ńjî ńgə́ aliʼə́ atsəm, əghâ ətsəm maŋ chî təmbɔʼ maŋ kɔŋtə̂ nə́ ajúmə atsəm maŋ túg nə́, kɨ maŋ jî ńdzɛ́d kɨ ńchîə á pə́ nə́ nji, kɨ maŋ túgə á nɨ́ kɨ ńkə́gə.

¹³Mbɔʼ maŋ faʼ mbô anu ntsəm ńdaŋə̂ á mə́m mətɨ Klisto a fɛ̂ nə́ nə́ maŋə.

¹⁴Lə́ nə kə ghɛlə̂ á pyádnə ḿbɔŋ ndzaŋ nə kə kwá nə́ mə á mə́m məngə́ʼə mə lə́.

¹⁵Pɨ Pəfilipyan nə́ pyádnə ńjî ńgə́ nə́ ndɛlə́ ándó maŋ kə fɛ́d nə́ Masedonya, əghâ ándó maŋ kə chúʼ nə́ á mə́ náŋkə nə́ Nkɨ yi əshîʼnə lə́, pɨ nə ḿbə́ lə́ ndaʼ nkyeetə pɔ́ pə́ Əsê páʼ pɨ nə́ ḿbí nə́ á mə́ faʼ nə́ pɛnə̂. Lə́ nə ḿbə́ ndaʼ pɨ páʼ pɨ nə́ fɛ̂ nə́ əpúmə á mbô maŋ ńkə́ ńkwáalə á mbô maŋə.

¹⁶Lə́ kě tsɔʼə táʼ nga páʼ maŋ kə chî nə́ á Tɛsalonika ńtə́ ńdoonə̂ akwáalə á mbô pɨ nə́ fɛ̂ zɨ́d nə́ maŋ pô.

¹⁷Lə́ kě pə́ tsɔʼə ńgə́ maŋ tə́ ńdoonə̂ á mə́ kwá nə́ əpúmə á mbô pɨ pô, maŋ loonə̂ azá lə́ pə́ ńgə́ nə́ jîə ape, zə́ələ́ kə́ ńkwíŋə.

¹⁸Lɛ̌ aŋwaʼlə páʼ á nɨd nə́ ajúmə atsəm nə́ fɛ̂ nə́ nə maŋə - pɨd kə nɨ́ tə́ ńdaŋə̂! Nə́ əghâ nə́ maŋ túgə ajúmə atsəm maŋ lɔ nə́ ńté ńgə́ Ɛpafloditusə a yǐ nə́ əpú ətsəm nə́ fɛ̂ nə́ ńgə́ a fɛ̂ nə́ maŋə. Əpú pə́ ə́wɨ́ ə́ chî lə́ ándó akáŋə́sê yə lɨ nə́ á mbô Əsê, ándó afyaʼə́nu páʼ Əsê a pí nə́ zɨ́d ńkə́ ńkɔŋə̂ ázə́ələ́.

¹⁹Ndzaŋ Əsê mə ə́ túg nə́ afoʼ yə nɨ́ nə́ lə́, a yǐ fɛ̂ ajúmə atsəmə á mbô pɨ nə́ lɔ nə́ əlaŋə̂ á mə́m Klisto Yeso ə́ zoŋ ndzaŋ afoʼə ajíə a chî nə́.

²⁰Nəgháʼə á chîə á mbô Əsê páʼ ə́ pə́ nə́ Tǎ əwɛ̂n tə ḿmɛdnə̂! Amɛn.

²¹Achaʼtə á mbô pɨ pə́ Əsê pətsəm pó chî nə́ á mə́m Klisto Yeso, pəlim páʼ pə̌gpo chî nə́ aliʼə́ nə́ pó tə́ ńchaʼtə̂ áwə́ənə́.

²²Pɨ pə́ Əsê pətsəmə aliʼə́ nə́ pó túmə achaʼtə á mbô pəənə́, pɨ pó chî nə́ á ntɔ́ʼ əfo Lom pó pyádnə ńtə́ ńchaʼtə̂ áwə́ənə́.

²³Apɔŋə́ntə́əmə Mmaʼmbî Yeso Klisto a chî nə́ pɨ pətsəmə.