Read Awing Koloshanə 1 Bible Online

Koloshanə 1 - Awing bible

Koloshanə 1

¹Lə́ maŋ Pɔl páʼ maŋ pə́ nə́ ntú Yeso Klisto, ndzaŋ Əsê kə lɔ nə́. Aŋwaʼlə zɨ lə́ ŋwaʼlə̂ pəg ndim əwɛ̂n Timotiə.

²Aŋwaʼlə zəənə́ á ghɛnə̂ lə́ á mbô pəlim pɛnə̂, pɨ pə́ Əsê pó chî nə́ á Koloshan ə́faʼə̂ á mbô Əsê nə́ ntɨ́ əghɔ́b ətsəmə á mə́m Yeso Klisto. Əsê páʼ a pə́ nə́ Tǎ əwɛ̂n a fɛ̂ áwɨ́ nə́ apɔŋə́ntɨ́ pó mbwɔ́dnə.

³Pəg zá fɛ̂ ndǎ á mbô Əsê, Əsê páʼə a pə́ nə́ Tǎ pə Mmaʼmbî əwɛ̂n Yeso Klisto əghâ ándó pəg tə́ nə́ ńchaʼtə́sê nə́ pəənə́.

⁴Ńté ńgə́ pəg zóʼ ndzaŋ nə́ túg nə́ mbimə́ nə́ Yeso Klisto ńkə́ ḿbə́ nə́ akɔŋnə páʼ pɨ túg nə́ ńté pɔ́ pə́ Əsê pətsəmə.

⁵Á nə ḿbə́ əghâ ándó ndə̌ŋdəŋ Nkɨ yi Əshîʼnə á nə ḿbeg nə́ ńgyǐəə á mbô pɨ lə́, pɨ nə́ ńdzóʼə akwaŋ ńtə́ ḿbyáabə páʼ wɨ́d fɛ̂ nə́. Lə́ pə́ ńgə́ ndə̌ŋdəŋ mbimə́ əzɨ pópə akɔŋnə azɨ́ laŋ lə́ nə́ akwaŋ ńtə́ ḿbyáabə páʼ pə́ nə ńdɔʼkə̂ nə́ á mbô pəənə́ á Nəpóolə, a pə́ nə́ nkɨ yi əshîʼnə wə́

⁶páʼ wɨ́d yǐ nə́ á mbô pəənə́, ndzaŋ páʼ wɨ́d yǐ nə́ á mə́m mbî ntsəm lə́ ə́ tə́ ńdzə́mə mənta ńkə́ ńtə́ ńkwíŋə, tsɔʼə ndzaŋ páʼ wɨ́d kə́ nə́ ńtə́ ńkwíŋə á mə́m pɨ ə́fɛ́lə alě ándó pɨ nə́ ńdzóʼ nə́, atûə azə́ənə́ a kə́ ńdá nə́ apɔŋə́ntə́əmə á mə́m ndə̌ŋdəŋə́.

⁷Lə́ nə ḿbə́ Ɛpaflasə páʼ a nə ńkwá nə́ áwɨ́ pɨ zóʼə anu ńté apɔŋə́ntə́əmə Əsê. A nə ḿbə́ lə́ ndim əwəg pəg kɔŋ nə́, pəg pö faʼ nə́, ḿbə́ ngaŋəfaʼ Klisto páʼ a nə faʼ nə́ nə́ ntɨ́ əyí ətsəm ńkwáalə áwə́gə́.

⁸A ghɛd pəg jîə akɔŋnə páʼ pɨ túg nə́ á mə́m Ajwiə.

⁹Ńté anu zɨ́d zɨ, pə́g zá ńchaʼtə́sê atû pəənə́, ə́fɛ́lə ándó pəg nə ńdê nə́ ńdzóʼə anu ńté áwə́ənə́, pəg chaʼtə́sê ńgə́ pɨ yǐ ńjîə anu páʼ Əsê a lɔ nə́ əshîʼnə, ńkə́ ńtúgə ayáŋ páʼ Ajwiə ä fɛ̂ nə́, ńjî ńgə́ Ajwiə a kwáalə wə́ənə́ á mə́ jî nə́ anuə atsəmə.

¹⁰Lə́ á pə́ ńgə́ nə́ yǒ tíʼ chî nə́ ndú páʼ Mmaʼmbîə a lɔ nə́, ə́ kə́ túg nchîmbî ə́ koʼnə̂ nə́ yí ńkə́ ńgɛlə̂ a kɔŋtə̂. Nchîmbî əzɨ yǐ zə́m mənta ə́ kə́ ghɛlə̂ nə́ faʼ ntê məfaʼ yi əshîʼnə ntsəmə, nə́ tíʼə ńjî Əsê ńgɛnə̂ nə́ mbiə.

¹¹Maŋ chaʼtə́sê ńgə́ təmbɔʼ Əsê a ghɛd nə́ tɨ́ ńtyantə̂ á mə́m mətɨ mətsəmə mə́ lǒo nə́ á mə́m tə́kɔʼ nəgháʼ əyǐə, ńjî ńgə́ təmbɔʼ nə́ túgə asəgə́ndzɔʼ pó awaamə́ntə́əmə á mə́mə akɔŋtə.

¹²Ə́fɛ̈ ndǎ nə́ akɔŋtə á mbô Tǎ, páʼ a ghɛd nə́ pɛn koʼnə̂ á mə́ túg nə́ nənaanənə́ á mə́m ajú páʼ Əsê a kə lɔʼkə̂ nə́ á mbô pɨ píə á mə́m anuə nəfoonə nkyaʼ lə́.

¹³A fógə áwɛ̂nə á mə́m mətɨ mə́ ndzəmə́ ńtíʼ ńgyǐ nə́ pɛnə̂ á mə́mə anuə nəfoonə Mɔ́ əyǐ a kɔŋ nə́,

¹⁴Lə́ ńdaŋ nə́ Mɔ́ ghɛn pə́ tsóʼə atûə azɛ̂nə, lə́ á pə́ ńgə́ Əsê a ləgnə̂ pətəpɔŋ pɛnə̂.

¹⁵Klisto lə́ afîə Əsê, Əsê páʼ pə́ kě nə́ yí zə́ənə pô; Yeso lə́ ntsɛɛmbi Mɔ́ Mbyâŋnə á mə́mə ajúmə atsəm pə́ tsoŋkə̂ nə́.

¹⁶Pə́ nə ńdaŋ lə́ ndzəm yí ńtsoŋkə̂ ajúmə atsəmə á nəpó pó ndəsê, əpú pə́ zɨ́ nə́ pópə pi pə́ kě nə́ zə́ənə pô, kəənə á pə́ ələŋəmə́fɔ, kɨ pɨ pə́ sáʼ nə́ əláʼ, kɨ əjwi páʼ ə́ túg nə́ mətɨ, mətɨ mə́ ndzəmə́ kɨ pɨ pə́ chî nə́ á mətû? Əsê a nə tsoŋkə̂ əpú ətsəm ńdaŋ lə́ á ndzəm yə́, ńkə́ ḿbə́ á mbô yə́.

¹⁷Yeso a nə ńchîə mbiə ajúmə atsəmə, á mə́m yí ajúmə atsəmə á tsɛntə̂ táʼə aliʼə́.

¹⁸Lə́ yí ḿbə́ nətû nə́ mbɨ əjǐə, páʼ zɨ́d pə́ nə́ nkyeetə pɔ́ pə́ Əsê. Lə́ yí ḿbə́ nəchwaakənə́, ntsɛɛmbi ŋwunə á mə́ júmnə nə́ nəwûə, ńjî ńgə́ a yǐ ḿbə́ nətû nə́ ajúmə atsəmə.

¹⁹Ńté ńgə́ lə́ nə ńtsɔ́ʼ Əsê ńgə́ Mɔ́ yə́ a túgə ajúmə atsəm nə́ nkɔ̌ʼmbɨ əyí páʼ a pə́ nə́ mbɔ́ Əsê.

²⁰Ńdaŋ nə́ Mɔ́ əyǐ, Əsê a tíʼ ńtsɔ́ʼə á mə́ ghɛd nə́ mbî ntsəm pɨ ḿbɨ ńchîə á nətɛ́n yə́, Əsê a ghɛd mbwɔ́dnə chî ńdaŋ nə́ achǐə Mɔ́ əyǐ páʼ a nə ńkwû nə́ atǐə apagləpaglə, ńdaŋ ə́lɨ́d a tíʼ ḿbɨnkə̂ ajúmə atsəmə á mbô yí páʼ á chî nəpó pó ndəsê.

²¹Á nə ḿbə́ ntsɛɛmbi pɨ myaʼ Əsê ńchî ndi ə́ sagə̂, ńtíʼ ngaŋkə́pa əjí ńté mənu mə́ təpɔŋ páʼ pɨ nə́ faʼ nə́ ńkə́ ńkwaŋə̂.

²²Lə́ nə́ pə́ əghâ nə́, ńdaŋ nə́ nəwû Mɔ́ əyǐ páʼ a nə ńkwû nə́ á mə́m na mbɨ Əsê a tíʼ ńgɛd pɨ pə́ pəshu píə, á mə́ ghɛd nə́ pɨ tɨ́ ŋ́ŋwaʼə̂, təkɔntə ńkə́ ḿbə́ pɨ páʼ pó kě nə́ fid yitsə̌ á mbi yi túg pô.

²³Ndzaŋə á pə́ nə́ lɛ̌ lə́, nə́ chîə á mə́ ghɛn nə́ nə́ mbiə á mə́m mbimə́, ńtɨ́ tyantə̂, ńkě pɛ́nkə pô, ńkě akwaŋ ńtə́ ḿbyáabə zə́ nkɨ yi əshîʼnə kə fɛ̂ nə́ lə́ mɛdtə̂ pô, nkɨ yi əshîʼnə wə́ páʼ pɨ nə ńdzóʼ nə́ lə́, páʼ pə́ nə náŋkə nə́ áwə́ələ́ á mbô ŋwu ntsəmə á ndu ndəsê ghɛnə́. Maŋ Pɔl, maŋ faʼə̂ lə́ mə́ náŋkə nə́ nkɨ yi əshîʼnə ghɛnə́.

²⁴Nə́ əghâ nə́ maŋ tə́ ńkɔŋtə̂ ńté məngə́ʼ maŋ nə ńdzɨ́ nə́ ńté áwə́ənə́, á mə́m na mbəəmə mə maŋ tə́ ńdzɨ́ ngə́ʼ ńkwáalə lə́ á mə́ lwigtə̂ nə́ apuʼə ngə́ʼ Klisto páʼ a kə jɨ́ nə́ ńté mbɨ əji páʼ ə́ pə́ nə́ nkyeetə pɔ́ pə́ Əsê.

²⁵Maŋ kə́ ńtíʼ ḿbə́ lə́ ngaŋəfaʼ nkyeetə pɔ́ pə́ Əsê páʼ lə́ nə ńtsɔ́ʼ nə́ Əsê, páʼ a nə fɛ̂ nə́ afaʼ zəənə́ á mbô maŋ ńté atûə azə́ənə́. Lə́ afaʼə á mə́ náŋkə nə́ nkɨ yí tsɔʼə ətsəmə,

²⁶lə́ nə ḿbə́ anuə nəlyaŋnə́ páʼ a nə ńdyáŋ nə́ zɨ́d ə́fɛ́lə á məngoʼə́ məngoʼə́ á mbô ŋwu ntsəmə, lə́ nə́ pə́ əghâ a pɛn ńkyaʼə̂ zə́ələ́ á mbô pɨ píə.

²⁷Əsê a tsɔʼə á mə́ ghɛd nə́ pə́ jîə anuə nəlyaŋnə́ ajíə á mə́m Pətəjǐsê, anuə nəlyaŋnə́ páʼ á túg nə́ afoʼ pó nəgháʼ á mbô ŋwu ntsəmə. Anuə nəlyaŋnə́ yə wɨ́ lə́ ńgə́: Klisto a chîə á mə́m gho, páʼ á sóŋ nə́ lə́ ńgə́ nə́ yǒ kwúnə á mə́m nəgháʼ Əsê.

²⁸Ńdaŋ ə́lɨ́d pəg náŋkə nkɨ Klisto á mbô ŋwu ntsəmə; pəg kwaŋtə̂ ńkə́ ńdzéʼkə ŋwu ntsəmə, nə́ ntê ayáŋə atsəmə, á mə́ yǐ nə́ nə́ ŋwu ntsəmə á mbi Əsê páʼə a pɛ́d nə́ tə ńkwíŋ tə ńtə́əmə á mə́m Klisto.

²⁹Ńté ə́lɨ́d maŋ faʼə̂ ńtûə fǔəlóʼ nə́ tə́kɔʼ mətɨ páʼ Klisto a fɛ̂ nə́ páʼ mə́ chî nə́ á mə́m maŋ ə́ faʼə̂ ə́wə́.