Read Awing Koloshanə 2 Bible Online

Koloshanə 2 - Awing bible

Koloshanə 2

¹Maŋ loonə̂ lə́ á mə́ fiʼtə̂ nə́ wɨ́ ndzaŋ maŋ kə fǔ nə́ alóʼə á mə́ faʼ nə́ á mbô pəənə́, ndzoŋ ḿbá pɨ pə́ Lawodesya, mbɨ ḿbə́ nə pəənə ándó pó kě nə́ mə nə́ nkɔ̌ʼmbəəmə mə jî pô.

²Maŋ faʼə̂ ə́lɨ́d lə́ ńgə́ pó túg ntə́əmə, ńkə́ ḿbə́ ńgə́ pó yǒ ńgyǐ ńkyeetə̂ nə́ akɔŋnə, ńtúgə afoʼ páʼ a pə́ nə́ mə́ chígə́ nə́ jîə anuənə́lyáŋnə́ Əsê, páʼ á pə́ nə́ Klisto nə́ nkɔ̌ʼmbɨ əyə́.

³Lə́ Klisto a pə́ nə́ Kî páʼ a ŋáʼ nə́ atɔ́g páʼ a túg nə́ ayáŋə Əsê pó ajíənuə ajíə.

⁴Maŋ fiʼtə̂ áwɨ́ ńgə́ kɔ nə pí ŋwu tsə̌ a fɨgə̂ áwɨ́ nə́ ətsáb məfɨgə, kəənə atsáb yəwə́ á pɔŋə̂ pə́ ə́lɛ́.

⁵Maŋ pǎtə ńkě pɛnə̂ á mə́m na mbɨ chî lə́, ḿbə́ ńchî pɛnə̂ á mə́mə ajwiə. Maŋ kɔŋtə̂ ndzaŋ páʼ maŋ jɨ́ nə́ pɨ tɨ́ ńtyantə̂ á nəkaʼ nə́ mbimə́ əzəənə́ á mə́m klisto.

⁶Ndzaŋ pɨ kə pí nə́ ńgə́ Yeso Klisto lə́ Mmaʼmbî lə́, ghɛd nchîmbî əjɨ̌po pə́ táʼə ajúmə.

⁷Pǐ nə́ məŋaŋ mɨ́ mə́ shǐəə á mə́m yə́, nə́ kɔ́ʼkə nchîmbî əzəənə́ á mə́m Klisto, mbɨ ńtɨ́ ńtyantə̂ á mə́m mbimə́ əzəənə́, tsɔʼə ndzaŋ pə́ kə zéʼkə nə́ áwə́ənə́. Fɛ̂ nə́ ndǎ ngǎ yi nɨ́ nə́.

⁸Nə́ lɔg ndɛd ńgə́ kɔ ŋwu tsə̌ a fɨgə̂ áwə́ənə́, ńdɔgə̂ áwɨ́ ńgɛd əpoʼ ə́wə́, nə́ ayáŋə ŋwu mbî páʼ pɨ pə́ zéʼkə nə́ mbî wɨ́ tsɔʼə akɔʼə akɔʼə. Ńtê ayáŋ zɨ ə́ fɛ́lə lə́ á mə́mə ajwi páʼ á chî nə́ nəpó pó ndəsê, zə́ələ́ a kě lə́ á mbô Klisto fɛ́lə pô.

⁹Klisto lə́ ŋwu páʼ Əsê a nə tsɛntə̂ nə́ mbɔ́ əyǐ ntsəm əfɛ̂ nə́ yə́, á mə́m na mbɨ əjǐə,

¹⁰pə́ kə fɛ̂ nchîmbî ntsəmə á mbô pɨ ńdaŋ nə́ Yeso Klisto, Klisto páʼə a pə́ nə́ nətû nə́ pəsáʼ pə́ aláʼ pópə pɨ pó túg nə́ mətəənə á mə́m mbîə.

¹¹Pə́ nə ḿbóʼə áwɨ́ ńdaŋ lə́ á ndzəm Klisto, ńkě póʼə áwɨ́ ńdaŋ lə́ ndzaŋ ŋwu mbîə a póʼ nə́ mɔ́ pô, ḿbóʼə pə́ nə mə póʼ nə́ mə́ Yeso, ńdaŋ ə́lɨ́d ńchwáalə á mə́m mətɨ mə́ aghɛlətə́pɔŋ páʼ na mbɨ túg nə́.

¹²Á nə ḿbə́ nə́ əghâ pɨ nə́ ńkwá nə́ nkǐ lə́ pə́ nə ńtwə́ŋə áwɨ́ pə Klisto, ńkə́ ḿbɨ ńdaŋə̂ á ndzəm akwáalə́nkǐ pə́ júmkə áwɨ́ pə klisto lə́ ńdaŋ lə́ ndzəm mbimə́ əzɨ nə́ mətɨ mə́ Əsê páʼ a nə ńjúmkə nə́ Yeso á nəwûə.

¹³Pɨ nə ḿbə́ nə́ əghâ tsə̌ lə́ ńkwûə áwə́ənə́ á mə́m ajwi ńté təpɔŋ əwə́ənə́, ḿbɨ ńkə́ ńté ńgə́ pɨ nə́ ḿbə́ lə́ Pətəjǐsê páʼ pó kě nə́ noŋkə túg pô. Lə́ Əsê a pɛn ńgɛd pɨ chîə mbî pɨ̌pə Yeso Klisto. Əsê a ləgnə̂ pətəpɔŋ pɛn pətsəmə.

¹⁴A nə shígtə mənu mə́ təpɔŋ mətsəm pə́ nə ŋwaʼlə̂ nə́ ńté áwɛ̂n, pópə noŋkə páʼ a nə ńgwam nə́ áwɛ̂nə, a nə ńkwéʼnə ḿmyaʼə̂ mɨ́d mətsəm táʼ ngǎ ndzaŋə pə́ nə ńkwumtə̂ nə́ yə́ atǐəpagləpaglə lə́.

¹⁵A ghɛd mətɨ mə́ ajwi páʼ mə́ sáʼ nə́ mbî zɨ mə́ sɛdnə̂ ńtíʼ ḿbə́ ənukə́taŋə, a tsɛɛlə̂ ághɔ́b ńtíʼ ə́soŋə̂ ághɔ́b ə́fɛ́d nə́ pó á əshîsaŋə ándó pɨ pə́ wam nə́ ntsoolə.

¹⁶Lə́ pə́ ńgə́ kɔ ŋwu tsə̌ a fɛ̂ pənoŋkə ńté ajú pɨ jî nə́ kɨ nô, kɨ ńté əlě mbî páʼ pɨ́d ŋwaʼ nə́, ńté Alě Akɔŋtə, ńté Sáŋ yi Fîə, kɨ ńté Alěláʼə́sê.

¹⁷Ndɛn mənu ghɛn ətsəm lə́ mə́lə́glə anu páʼ a tə́ nə́ ńgyǐəə, lə́ chigə mɛ́ anu páʼ a chî nə́ wə́ a pə́ ḿbə́ klisto.

¹⁸Kɔ nə́ pí ŋwu tsə̌ páʼ a lɔg nə́ mbɨ əjǐ ńgə́ a tsɛɛlə̂ áwə́ənə́ a fɨgə̂ áwə́ənə́. Mbô pɨ zə́ ə́ sóŋə ńgə́ pó tsɛɛlə̂ gho lə́ ńté mbô mənu po jɨ̈ nə́ á mə́m ndzəəmə atəəmə́tə́əmə, mbɨ ńtúgə atsóokə́mbɨ yə məfɨgə, ńkə́ ńgóʼkə pətseŋpə́ndɛ́pə́sê. Ntê pɨ zə̂ ə́ kə́ ŋáŋkə mbɨ əzɔb tsɔʼə ŋáŋkə nə́ tə jîə anu pó ŋáŋkə nə́ ńté. Pó ghɛlə̂ lɨ́d lə́ ńdzoŋ lə́ azóobə́ akwaŋə ándó pɨ pə́ mbîə,

¹⁹ńkě ághóobə́ Yeso, á pə́ nə́ nətû pɛ́lə ńdzoŋə̂ nə́ ntɨ́ əghɔ́b ətsəm pô. Lə́ Yeso páʼ a pə́ nə́ nətû nə́ mbɨ ntsəm, ńdzə́g əliʼ mbɨ ətsəm páʼ ə́ chwíʼnə nə́ mələŋə́ ńgə́ pɨ́d kwíŋ ńdzoŋ ndzaŋə ándó Əsê á lɔ nə́ ńgə́ pɨd tə̈ ńkwíŋə.

²⁰Pɨ kwû pɨ̌pə Klisto pə́ tíʼ fógə áwə́ənə́ á mə́mə atsáŋ páʼ əjwi páʼ pɨ́d sáʼ nə́ mbî zɨ néŋ nə́ wɨ́ wə́. Lə́ tíʼ ńgɛlə̂ akə̂ nchîmbî əji chîə á pə́ ándó yi pɨ pə́ mbî pəənə́? Lə́ ghɛlə̂ akə̂ pɨ zóʼnə pənoŋkə pɨ páʼ pə́ sóŋ nə́ ńgə́,

²¹“Kɔ waamə̂ ajú zəənə́. Kɔ jwə́ʼə ajú zəənə́. Kɔ kwumə̂ yətsə́ zə̂?”

²²Mənu mɨ mətsəm mə́ sóŋə lə́ anu ńté əpú páʼ pɨ́d sɛdnə̂ ńtíʼ ńkě atûə anu yitsə̌ chî pô, əghâ pə́ pěʼ nə́ ḿbɛ́d tə ə́faʼ ə́wə́. Mənu mɨ mətsəm mə́ zoŋə̂ lə́ noŋkə pópə ndzeʼkə́ pɨ pə́ mbîə.

²³Mbɔʼ pə́ tə́ náŋə mənu mɨ mə́ chîə pə́ ándó mə́ túgə ayáŋ yitsə̌, ńté ńgə́ mə́ ghɛlə̂ pɨ pə́ chîə ándó pó pyádnə ńgóʼkə Əsê, ńtsóokə mbɨ əzoobə́, ḿbəənə̂ ńgwam mbɨ əzoobə́. Lə́ ndɛn mənu ghɛn pə́ ńkě mətɨ túgə á mə́ ghɛd nə́ ńgə́ kɔ na mbɨ ghɛd mənu mə́ təpɔŋ ə́ lɔ nə́ á mə́ ghɛd nə́ pô.