Read Awing Koloshanə 3 Bible Online

Koloshanə 3 - Awing bible

Koloshanə 3

¹Ndzaŋə ándó pə́ kə júmkə nə́ áwə́ənə́ á nəwû pɨ̌pə Klisto lə́, tíʼ nə́ ńtə́gə atûə azə́ənə́ pə́ mənu mə́ chî nə́ á nəpóolə, aliʼə́ ándó Klisto a chî nə́ ə́wə́, á əlá apô Əsê yə təənə.

²Tə́g nə́ atûə azə́ənə́ á pə́ nə́ mənu mə́ chî nə́ aliʼ yəwə́, kɔ nə́ tə́gə atûə azə́ənə́ pə́ nə́ mənu mə́ chî nə́ á ndu mbî ghɛnə́.

³Ńté ńgə́ nə́ kwû pə́ lyáŋ nchîmbî əzəənə́ á mbô Klisto á mə́m Əsê.

⁴Chigə nchîmbî əzɨ lə́ Klisto, ndɛlə́ ándó a yǐ nə yǐ, nə́ yǒ kə́ yǐ pɨ po ə́nɔd ńchîə á mə́m nəgháʼ əyǐə!

⁵Nə́ yǐ shib jwítə mənu mə́ mbî páʼ na mbɨ lɔ nə́ á mə́ ghɛd nə́, mənuə ándó ndzɔʼə́ tə apímnə, ndɔtíə, mə lum nə́ á mə́ ghɛd nə́ təpɔŋə, pópə mə lɔ nə́ ajú páʼə á kě nə́ pə́ azô pô (zəənə́ chî lə́ ándó mbô Əsê məfɨgə yitsə̌).

⁶Əsê yǒ záŋ ndě nə́ pɨ páʼ pó kě nə́ yí zóʼnə pô, ńté ńgə́ po tə́ ńdzoŋ ndɛn mənu ghɛnə́.

⁷Ndɛd yitsə̌ kə chî ə́wɨ́ páʼ pɨ kə chî nə́ á mbî ńkə́ ńdzoŋ ndɛn mənu ghɛnə́, mɨ́d mə́ túgə áwə́ənə́.

⁸Nə́ əghâ nə́ pɨ yǐ shib myaʼ ndɛn mənu ghɛn ətsəmə, mənuə ándó azáŋə́ndé, mə záŋ nə́ ndě paŋ tə ə́sɛ́nə, ḿbɨ ḿbə́ nə́ ntɨ́ təpɔŋə, mə tsəŋ nə́ əlɛ́n ŋwunə. Kɔ ndzɔmnə yitsə̌, kəənə atsáb yə féŋ nə́ yitsə̌ á láʼ ə́fɛ́lə á ntso pəənə́.

⁹Kɔ nə́ tsɨd ntsəələ á tətɨ pɨ ńté ńgə́ nə́ pěʼ ḿbɛ́d tə ntsɔ́ʼə ndɛn mbɨ əwɨ pópə mənu mí ḿmyaʼə̂,

¹⁰ńtíʼ ńgwê mbɨ yi fîə. Lə́, mbɨ yi fî zɨ páʼ əsê páʼə tsoŋkə̂ nə́ zɨ́d lə́, á ghɛn nə́ mbiə á mə́ kwúblə nə́ zɨ́d ə́ chîə ándó yə́, ńjî ńgə́ mbɔʼ pɨ ghɛn nə́ mbiə mə́ pyádnə nə́ chígə́ jîə yə́.

¹¹Ándó páʼ a pə́ nə́ ə́lɨ́d lə́, kwúblə yitsə̌ á kě əwɨ́ chîə á tətɨ Pətəjǐsê pó Pəjus pô, pɨ pə́ póʼ nə́ ághɔ́b pópə pí pə́ kě nə́ ághɔ́b póʼ pô, Əfɛ́ləné, ətúmə́yéŋə́, əpoʼə kɨ pɨ páʼ pó kě nə́ apoʼ pô. Lə́, Klisto lə́ ajúmə atsəmə, Klisto a chîə á mə́mə ajúmə atsəmə.

¹²Pɨ lə́ pɨ pə́ Əsê, a kɔŋə̂ áwɨ́ ńkə́ ńtsɔ́ʼə áwɨ́ ńgə́ pɨ lə́ pəpíə. Lə́ á pə́ ńgə́ nə́ yǐ shib wê akóolə́mə́lə́ŋə, ə́wê ntɨ́ yi ŋwaʼ nə́, ə́wê atsóokə́mbəəmə, ə́faʼə̂ mənu ndǎ ndǎ ə́ pɨ wê asəgə́ndzɔʼə.

¹³Pɛn túgə awaamə́ntɨ́ nə́ pɨ pə́ ndaʼə, ḿbɨ́ ńkə̈ ńdəgnə̂ əfankə pɨ əghâ ándó pô wǔ nə́ anuə á mbô pɛnə̂, nə́ chîə á mə́ ləgnə̂ nə́ əfankə ŋwu ntsəm tsɔʼə ndzaŋə ándó Əsê a ləgnə̂ nə́ pəpɨ́ lə́.

¹⁴Á mə́m mənu mɨ mətsəm nə́ chîə á mə́ wê nə́ akɔŋnə páʼ á tsɛntə̂ nə́ ajúmə atsəmə a tíʼ ḿbə́ táʼə

¹⁵Mbwɔ́dnə páʼ Klisto ä fɛ̂ nə́, lə́ zɨ́d páʼ ə́ chî á mə́ ghɛd nə́ nə́ chî əshîʼnə, lə́ á mə́m mbwɔ́dnə əzɨ páʼ Əsê a fóŋ nə́ áwɛ̂n ńkyeetə̂ pɛn tíʼ táʼ na mbəəmə. Tə́ nə́ fɛ̂ ndǎ á mbô Əsê.

¹⁶Atséebə Klisto nə́ afoʼə yə́ atsəm yǐ shib lwɛ́nkə á mə́m məntɨ́ pəənə́. Zə́ʼkə nə́ ńkə́ ńtə́gtə a ŋwu ntsəm nə́ ayáŋə atsəmə. Zɔb nə́ pəsamsə, ḿbɨ́ ńkə́ ńdzɔb mənkǐ mə́ ńgóʼkə, ḿbɨ́ ńdzɔb mənkǐ mə́ ajwi ə́fɛ̂ ndǎ wə́ á mbô Əsê á mə́m məntɨ́ pəənə́.

¹⁷Anuə atsəm páʼ gho faʼ nə́ kɨ ə́sóŋə, faʼə̂ zə́ələ́ atsəm nə́ əlɛ́n Mmaʼmbî Yeso, ə́fɛ̂ á ndǎ á mbô Əsê páʼ pə́ nə́ Tǎ ńdaŋə̂ á mbô yí Mmaʼmbîə.

¹⁸Pəngyě pə́ ndɛ̂, tsóokə nə́ mbɨ zəənə́ á mbi pəlú pəənə́, ńté ńgə́ lə́ anuə á koʼnə̂ nə́ á mbô ŋwunə á chî nə́ á mə́m Mmaʼmbîə.

¹⁹Pəlú, kɔŋ nə́ pəngyě pə́ənə́, kɔ nə́ tə́ ńtsə́gə ághóobə́.

²⁰Pɔ́, zóʼnə nə́ pətǎ pɨ pópə pəmǎ pɨ nə́ anuə atsəmə, ńté ńgə́ lɛ̌ anuə ä ghɛd nə́ Mmaʼmbî a kɔŋtə̂.

²¹Pətǎ, kɔ nə́ tə́ ńjwaʼə̂ pɔ́ pə́ənə́, zə́ələ́ á yǐ ghɛd mbɨ əzɔb ə́ tə ḿbə́gə.

²²Əpoʼ, zóʼnə nə́ pətǎ pə́ faʼ pɨ́ pipə́ ndu mbî nə́ ndú ətsəmə, ńkě faʼə̂ á pə́ əghâ páʼ á chî nə́ aliʼ yi ə́wə́ ándó pɨ pətsə́ pə́ ghɛd nə́ lə́ pô, ə́faʼə̂ á pə́ nə́ ntɨ́ əwɨ́ ətsəm ḿbɔ́gə pə́ Mmaʼmbîə.

²³Kəənə afaʼə azô á pə́ mbô zə́ənə́, faʼ nə́ ntɨ́ əghô ətsəmə ándó gho faʼə̂ á pə́ á mbô Mmaʼmbîə, ńkě á pə́ á mbô ŋwu mbî faʼə̂ pô,

²⁴ńtə́ faʼə̂ ńtə́ ńjîə ńgə́ Mmaʼmbîə a yǒ tsɔʼə afaʼə azô nə́ apeʼ páʼ a lɔʼkə̂ nə́ á mbô pɨ píə. Ńté ńgə́ Yeso lə́ chigə Tǎ faʼ páʼ gho faʼ nə́ á mbô yə́.

²⁵Ngaŋə́ghɛlə təpɔŋ yǒ kwá ntsɔ́ʼəfaʼ əzɔb nə́ təpɔŋ pö ghɛd nə́, ńté ńgə́ Əsê a tsɔ́ʼtə əsáʼ ŋwu ntsəm lə́ ndə̌ŋdəŋə́.