Read Awing Koloshanə 4 Bible Online

Koloshanə 4 - Awing bible

Koloshanə 4

¹Pətǎ pə́ afaʼ páʼ pó túg nə́ əpoʼ, nə́ túg əpoʼ pɨ nə́ ndú páʼ wɨ́d pə́ nə́ yi ndə̌ŋdəŋ ńkə́ ńkoʼnə̂, ńté ńgə́ nə́ kə́ ńtúg əwɨ Tǎ nəpóolə.

²Tə́ nə́ ńchaʼtə́sê əghâ atsəmə, ndzaŋ nə́ tə́ nə́ chaʼtə́sê lə́ nə́ tə́ ńdɔg ndɛlə́, ə́fɛ̂ ndǎ á mbô Əsê.

³Nə́ tə́ ńchaʼtə́sê nə́ tə́ néŋə áwə́gə́ á mə́m wə́, ńjî ńgə́ Əsê a yǐ fɛ̂ ndúmə á mbô pəgə́ á mə́ náŋkə nə́ nkɨ nəlyaŋnə́ Klisto. Lə́ ghɛd nkɨ wɨ́d ghɛn maŋ chîə atsáŋ əghâ nə́.

⁴Tə́ nə́ ńchaʼtə́sê nə́ maŋ ńjî ńgə́ maŋ yǐ ńtsáb nə́ ndú páʼ maŋ chî nə́ á mə́ tsáb nə́ əwɨ́, nə́ ndú páʼ wɨ́d yǐ nə́ ŋwaʼ mbɔʼ ŋwu ntsəmə a zóʼə.

⁵Chî nə́ nə́ ayáŋ nə́ ndú pɨ faʼ nə́ mənu wɨ́ pɨ̌pə pɨ pó kě nə́ Əsê jî pô, zɨ́ nə́ ńgə́ nə́ faʼə̂ anu yə əshîʼnə nə́ mɔ́ akəmə ndɛd ntsəm pɨ túg nə́.

⁶Atséebə azə́ənə́ á túgə alɨ́ yə əshîʼnə ńkə́ ńchî nə́ ndú páʼ mbɔʼ ŋwu ntsəmə a kɔŋə̂ á mə́ jwə́ʼtə nə́, nə́ kə́ ńjî ndú páʼ təmbɔʼ nə́ fɛ̂ ndə̌ŋdəŋə́ akwe nə́ əpítə ətsáb ətsəmə á mbô ŋwu ntsəm a pítə nə́ áwɨ́ ə́wə́.

⁷Taakikusə a yǐ fiʼtə̂ áwɨ́ nə́ anuə atsəm ńté mə; lə́ ndim əwɛ̂n páʼ pɛn pyádnə nə́ ńkɔŋə̂ yə́, a kə́ ə́faʼə̂ á mbô Mmaʼmbî nə́ ntɨ́ yi ətsəmə;

⁸Maŋ túmə yə́ á mbô pɨ lə́ ńté lə́ tsɔʼə anu zɨ́d zəənə́, ńjî ńgə́ nə́ tíʼ ńjî ndzaŋ pəg chî nə́, ńjî ńgə́ a laŋ ə́lɨ́d ńnéŋ məntɨ́ mə́ənə́;

⁹Onisimusə a yǐ ghɛn pó yə́, lə́ ndim əwɛ̂n páʼ pɛn kɔŋ nə́ yə́ a chî nə́ á mə́m nkyeetə zɨ ńkə́ ə́faʼə̂ á mbô Yeso nə́ ntɨ́ yí ətsəm lə́. Pó yǐ tíʼ fiʼtə̂ áwɨ́ nə́ anuə atsəm páʼ á laŋ nə́ ə́fênə̌.

¹⁰Alistakusə páʼ a chî nə́ atsáŋ pəg yí, a tə́ ńchaʼtə̂ áwə́ənə́, ńdzoŋ ḿbéenə Magə, páʼ a pə́ nə́ ndim Banabasə. (Pə́ pɛ́dtə ńtə́gtə áwɨ́ ńté Magə, əghâ páʼə a yǐ nə́, pɨ kwáalə yí əshîʼnə)

¹¹Joshwa páʼ pə́ kə́ fóŋ nə́ yí nə́ Justusə lə́, a ghə́ pə́ chaʼtə̂ áwə́ənə́, pɨ pɨ pɛ́n teelə́ lə́ ndaʼ Pəjus páʼ pó néŋ nə́ ntɨ́ əghɔ́b nə́ Yeso, lə́ faʼə̂ pə̌gpo ńté Anuə Nəfoonə Əsê, pó pyádnə ńchígə́ ńkwáalə mə.

¹²Ɛpaflusə a tə́ ńchaʼtə̂ áwə́ənə́, yí páʼ a pə́ nə́ táʼ ŋwunə á mə́m nkyeetə əzəənə́ ńkə́ ḿbə́ ngaŋəfaʼ Yeso Klisto. A zá ḿbyádnə ńchaʼtə́sê əghâ ətsəm ńté áwə́ənə́, ḿbítə Əsê ńgə́ a ghɛd nə́ tɨ́ ńtyantə̂, ándó pɨ pə́ kwíŋ nə́ ńkə́ ńchígə́ ńdzoŋ ndzəm Klisto ńkə́ ńdánə ńdzóʼnə anu páʼ Əsê a lɔ nə́.

¹³Maŋ zɨ́ ńkə́ ḿbí ńgə́ lə́ ndə̌ŋdəŋ ńgə́ a faʼə̂ atyǎntə afaʼə á mbô pɨ, ḿbá pɨ pə́ Lawodesya pó pipə́ Ilypolisə.

¹⁴Lukasə páʼ a pə́ nə́ ntsóʼ əwəg pəg kɔŋ nə́ pó Dɛmasə, pó ghə́ pə́ chaʼtə̂ áwə́ənə́.

¹⁵Fɛ̂ nə́ achaʼtə mə á mbô pəlim pɛn pə́ chî nə́ Lawodesya ńkə́ ńtú ńchaʼtə̂ Nimfa pópə nkyeetə pɔ́ pə́ Əsê á ndɛ̂ yə́.

¹⁶Əghâ ándó pɨ fóŋ nə́ aŋwaʼlə zəənə́ á ndzɔʼ pɨ, nə́ kə́ fóŋə zə́ələ́ á mə́m nkyeetə pɔ́ pə́ Əsê á Lawodesya. Tsɔʼə əghâ yi wɨ́ nə́ yǐ pɨ kə́ fóŋə aŋwaʼlə páʼ nkyeetə Lawodesya ə́ yǐ nə́ ə́ túmə á mbô pəənə́.

¹⁷Sóŋ nə́ á mbô Akipusə ńgə́, “A jî ńgə́ a chîə á mə́ məg nə́ afaʼ pə́ nə fɛ̂ nə́ á mbô yí ńgə́ a tə́ faʼə̂ ńté Mmaʼmbî lə́.”

¹⁸Achaʼtə zɨ lə́ ŋwaʼlə̂ maŋ Pɔl nə́ apô mə, kɔ nə́ ləgnə̂ ńgə́ maŋ chîə á mə́m məŋkɛd mə́ atəənə́! Əsê a nəələ̂ áwɨ́ nə́ apɔŋə́ntə́əmə ajíə.