Read Awing 1 Tesalonyanə 1 Bible Online

1 Tesalonyanə 1 - Awing bible

1 Tesalonyanə 1

¹Aŋwaʼlə zəənə́ á lǒo lə́ á mbô maŋ Pɔlə, lə́ pə̂gpə Silas nə́ Timotiə. Mäŋ ŋwaʼlə̂ lə́ á mbô nkyeetə pɔ́ pə́ Əsê páʼ ə́ chî nə́ á Tesalonika páʼ pó pə́ nə́ lə́ pɨ pə́ Əsê a pə́ nə́ Tǎ ńkə́ ḿbə́ pɨ pə́ Mmaʼmbî Yeso Klisto: Apɔŋə́ntə́əmə Əsê pópə mbwɔ́dnə ə́ chîə á mbô pəənə́.

²Pəg zá ńdáʼkə Əsê ńté áwɨ́ pətsəm ńkə́ ńdzá ńnéŋə áwə́ənə́ á mə́mə achaʼtə́sê azə́gə́.

³Ńté ńgə́ pə̈g wə́ʼtə á mbi Əsê a pə́ nə́ Tǎ əwɛ̂n ndzaŋ páʼ pɨ̈ néŋ nə́ mbimə́ əzəənə́ á mə́mə afaʼə, ndzaŋ páʼ akɔŋnə azə́ənə́ ä ghɛd nə́ nə́ néŋ ńtɨ́ nə́ afaʼə. Ńkə́ ḿbə́ ndzaŋ páʼ akwaŋə azɨ́ ńtə́ ḿbyáabə á mə́m Mmaʼmbî əwɛ̂n Yeso Klisto a tɨ́ nə́ ńtyantə̂.

⁴Pəlim, pəg jî ńgə́ Əsê a kɔŋə̂ áwɨ́ ńkə́ ńtsɔ́ʼə áwɨ́ ńgə́ nə́ pə́ pɨ píə.

⁵Ńté ńgə́ pəg nə ńkě nə́ nkɨ yi əshîʼnə á mbô pɨ yǐ tsɔʼə nə́ atséebə ntsoolə kətaŋ pô, pəg kə kə́ ńgyǐ nə́ zɨ́d lə́ nə́ mətɨ pó Ajwǐəsê, pəg kə́ ḿbyádnə ńjîə á ntɨ́ pəg ńgə́ nkɨ yi ə́wɨ́ lə́ ndə̌ŋdəŋə́. Pɨ jî ńté nchîmbî páʼ pəg nə ńchî nə́ zɨ́d pɛn, tsɔʼə ńgə́ mbɔʼ ape anuə á pə́ azə́ənə́.

⁶Pɨ nə̈ fiʼnə̂ áwə́g ńkə́ ə́fiʼnə̂ Mmaʼmbîə; pɨ nə ḿbǎtə ńjɨ́ ngə́ʼ titi lə́, ḿbə́ ńkwá nkɨ yi wɨ́ nə́ akɔŋtə páʼ á fɛ́d nə́ á mbô Ajwǐəsê.

⁷Lə́ələ́ á pə́ ńgə́ pɨ nə ńtíʼ ḿbə́ lə́ fiʼnəghɔlə á mbô pɨ pətsəm pə́ pí nə́ Yeso á Masedonya pópə Akaya.

⁸Ńté ńgə́ lə́ nə́ ńkě tsɔʼə nkɨ yi əshîʼnə ńté Mmaʼmbî páʼ wɨ́d ə́ nə ńdǒ nə́ á mbô pɨ ńgɛnə̂ á Masedonya pó Akaya pô, atsáb ńté mbimə́ əzəənə́ á mə́m Əsê á kə kə́ nyi tsɔʼ əliʼ ətsəmə. Ńdaŋ ə́lɨ́d anu yətsə́ páʼ mbɔʼ pəg pɨ ə́sóŋ á kě ə́wɨ́ chî pô.

⁹Pɨ pə̂ tsɔʼə pətsəm pə́ fiʼtə̂ ndzaŋ páʼ pɨ nə ńdɔg nə́ áwə́g əshîʼnə əghâ pəg nə ńgá nə́ áwə́ənə́. Ńkə́ ə́fiʼtə̂ ndzaŋ páʼ pɨ nə fɛ́d nə́ áwə́ənə́ á mə́m məsê mə́ məfɨg ndzoŋ Əsê; á mə́ faʼ nə́ á mbô ndə̌ŋdəŋ Əsê páʼ a chî nə́ a mbîə

¹⁰ńkə́ ńtə́ ḿbyáabə a mɔ́ əyǐ ńgə́ a lǒo á nəpó ńgyǐəə. Mɔ́ əyǐ Yeso páʼ a kə́ júmkə nə́ á nəwûə. Ḿbə́ Yeso páʼ a nə ńchwádkə nə́ áwɛ̂nə á mə́mə azáŋə́ndé Əsê páʼ á chî nə́ á mə́ yǐ nə́.