Read Awing 1 Tesalonyanə 2 Bible Online

1 Tesalonyanə 2 - Awing bible

1 Tesalonyanə 2

¹Pəlim, pɨ nə́ nkɔ̌ʼmbɨ əwɨ́ jî ńgə́ nəghá zə́gə́ á mbô pɨ nə́ nə ńkě lə́ kətaŋ laŋ pô.

²Nə́ jî ndzaŋ pə́ nə ńtsaŋkə̂ nə́ áwə́g ńkə́ ńtûə ńdzɔmtə̂ áwə́gə́ á Filipi záʼ pəg pɔŋə̂ yǐəə á mbô pəənə́ Tesalonika. Lə́ Əsê əzəg ə́ pə́ ḿbɛ́d ńnéŋ ntɨ́ əwə́g ńgə́ pəg fiʼtə̂ áwɨ́ nə́ Nkɨ yi Əshîʼnə páʼ ə́ fɛ́d nə́ á mbô yə́, páʼ pɨ pə́ nə ḿbǎ nə́ tə ńkě ə́ tə́ ńkɔŋə̂ ńgə́ pəg náŋkə áwɨ́d pô lə́.

³Əghâ ándó pəg nə̈ ḿbóʼ nə́ mbô nə́ pɨ ńgə́ nə́ pí nkɨ yi əshîʼnə wə́ lə́, lə́ nə ńkě afankə pô, pəg kě akwaŋə təpɔŋ yə tsə́ kə́ ńtúg pô, kɨ ńkě áwɨ́ lə́ fɨg nə́ kə́ fɨgə̂ pô.

⁴Lə́ ḿbəənə̂ ńtséebə á pə́ ándó Əsê a lɔ nə́ ńgə́ pəg tséebə, ńté ńgə́ a nə ńtsɔ́ʼə áwə́g ńnéŋ nkɨ yi əshîʼnə yí wə́ á mbô pəgə́. Pəg kě loonə̂ á mə́ faʼ nə́ á pɔŋə̂ á pə́ ŋwu mbî pô, pəg loonə̂ á mə́ faʼ nə́ a pɔŋə̂ pə́ Əsê páʼ ä jwə́ʼ nə́ məntɨ́ mɛ́nə.

⁵Nə́ pyádnə ńjî ńgə́ pəg nə ńkě lə́ ətsáb pi əshîʼnə lɔg ńgyǐ á mə́ fɨg nə́ áwɨ́ ə́wɨ́ pô, ńkě kə́ ńgyǐ lə́ nə́ ətséebə á mə́ lɔg nə́ kə́bkə əliʼ ə́wɨ́ ə́ jîə ape yətsə́ pô, Əsê a jî məntɨ́ mə́gə́.

⁶Pəg nə ńkě tə́ ńdoonə̂ ńgə́ pɨ pə́ mbî pə́ ŋáŋkə áwə́g pô, ńkě tə́ ńdoonə̂ ńgə́ pɨ ŋáŋkə áwə́g pô, kɨ əwə kɨ əwə.

⁷Pəgə́ ándó məntú mə́ Yeso klisto pəg nə ḿběʼ ńchî tə mbɔʼ pəg pěʼ ńtə́ ńkwá əpúmə á mbô pəənə́. Lə́ pəg nə ḿbɛn ḿbwɔ́dnə pɛn əghâ pɛn nə ńchî nə́, ḿbwɔ́dnə ándó Mǎ a pyádnə nə́ pɔ́ píə.

⁸Pəg nə ńkɔŋə̂ áwɨ́ lɛ̌ tətə tə ńkě kɔŋə̂ á mə́ fɛ̂ nə́ tsɔʼə ndaʼ nkɨ yi əshîʼnə Əsê á mbô pɨ pô ḿbə́ ńkə́ ńkɔŋə̂ á mə́ fɛ̂ nə́ mbɨ əzəgə́ á mbô pəənə́, ńté ńgə́ pəg nə ńkɔŋə̂ áwɨ́ tə́shúnə́.

⁹Pəlim, nə tə́ ńkwúmtə ndzaŋ páʼ pəg nə̈ ə́faʼ nə́ ńkə́ ńtáŋnə, pəg nə́ faʼə̂ á nətúʼ ńkə́ ə́faʼə̂ á nənumnə á mə́ jɨ́ nə́ ńgə́ kɔ pəg jwaʼə̂ ŋwu əwɨ yitsə̌ əghâ pəg tə́ nə́ náŋkə nkɨ Əsê á mbô pəənə́.

¹⁰Pɨ pyádnə ńjî pɨ páʼ pəg pə́ nə́ pə́ələ́, Əsê a kə́ ńjî ndzaŋ pəg nə́ ŋwaʼ nə́ ńkə́ ntɨ́ ndə̌ŋdəŋ ńkě a fid yitsə̌ kə́ ńtúgə á mə́m pɨ páʼ pɨ nə ḿbí nə́ nə́ Yeso lə̂ pô.

¹¹Ńté ńgə́ nə jî ńgə́ pəg nə̈ faʼə̂ á mbô táʼ táʼ ŋwu əwɨ ntsəm lə́ tsɔʼə ndzaŋə ándó tǎ a faʼ nə́ á mbô ndə̌ pɔ́ píə.

¹²Pəg nə̈ néŋə məntɨ́ mə́ənə́, ḿbwɔ́dkə məntɨ́ mə́ənə́, ńkə́ ńgɛnə̂ nə́ mbiə á mə́ sóŋ nə́ nə́ pɨ ńgə́ nə́ chî ndzaŋ nchîmbî páʼ Əsê a kɔŋ nə́. Əsê páʼ a fóŋ nə́ áwə́ənə́ á mə́mə Anuə Nəfoonə ají pó nəgháʼ əyǐə.

¹³Pəg kə́ ńgɛnə̂ nə́ mbiə á mə́ láʼkə nə́ Əsê ńté ńgə́ ndzaŋ pəg nə ńgyǐ nə́ nə́ atséebə Əsê lə́, nə́ zóʼə ájɨ́d ńkə́ ḿbímə á zə́ələ́. Ńkě pímə zə́ələ́ á pə́ ándó atséebə ŋwu mbî pô ḿbə́ ḿbímə zə́ələ́ á pə́ ándó atséebə Əsê, a pěʼ ńkə́ ḿbə́ zə́ələ́. Ńté ńgə́ Əsê a tə́ faʼə̂ á mə́m pɨ páʼ pó pí nə́ nə́ Yeso.

¹⁴Pəlimə́ mə, mənu mə́ nə ńgɛd nə́ wɨ́, lə́ mɨ́d mə́ nə ńgɛd nə́ mənkyeetə mə́ pɔ́ pə́ Əsê páʼ pó pí nə́ ndzoŋ ndzəm Yeso a Judya. Ngaŋə́láʼ əjɨ́ ə́ nə ńtsaŋkə̂ áwɨ́ lə́ tsɔʼə ndzaŋ páʼ Pəjus pə́ nə ńkə́ nə́ ńtsaŋkə̂ ághóobə́,

¹⁵páʼ pó nə ńjwítə nə́ Mmaʼmbî Yeso Klisto pópə məntúmə́sê ntû ńtsaŋkə̂ áwə́gə́. Pó ghɛd ndě Əsê ə́ pə́gə, ńkə́ ḿbə́ ngaŋkə́pa ŋwu ntsəmə.

¹⁶Pó nə ńkə́ ńkɨ́ʼə áwə́g ńgə́ kɔ pəg sóŋ nkɨ yi əshîʼnə wə́ á mbô Pətəjǐsê, nkɨ páʼ ə́ yǐ nə́ chwádkə ághóobə́. Lɛ̌ ndzaŋ pó ghɛd nə́ təpɔŋ əghoobə́ á kɔ́ʼ tə ńjáʼə. Əghâ nə́ Əsê a záŋ ndě ńtíʼ ńnéŋ ngə́ʼə á mbɨ pó.

¹⁷Ńgɛn nə́ pəg nə́ pəlimə́ mə, pə́ kə fógə áwə́gə́ mə́m pɨ nə́ ndɛd yitsə̌, lə́ pə́ ḿbə́ tsɔʼə ńgə́ pɛn nə ńkě məshî tə́ ńdzə́ənə pô, Lə́ pəg pə́ ńtúgə áwə́ənə́ á məntɨ́ pəgə́, ńkə́ ńtə́ ńdɔ ndú ətsəmə á mə́ zɨ́ nə́ áwɨ́ ngǎ yitsə̌.

¹⁸Pəg nə ńdoonə̂ á mə́ pɨ nə́ zəənə́ áwə́ənə́; Tsɔʼə maŋ Pɔl, maŋ nə ńtə́ ńdoonə̂ a ngǎ maŋ á mə́ yǐ nə́ zəənə́ áwɨ́ ngǎ yi nɨ́ nə́, lə́ Satanə á pə́ ńkě əseenə á mbô pəg fɛ̂ pô.

¹⁹Lə́ ńté áwɨ́ páʼ pəg túg nə́ akwaŋ ńtə́ ḿbyáabə, ńtə́ ńkɔŋtə̂, ńkɔn ndzɔʼ ńté aŋkəndɔ́ʼə́ azɛ̂nə mbi Mmaʼmbî əwɛ̂n Yeso əghâ páʼ a yǒ nə́ yǐəə.

²⁰Lə́ ndə̌ŋdəŋə́, pɨ lə́ nəgháʼ əwəg ńkə́ ḿbə́ akɔŋtə azə́gə́.